Ներքին լարվածությունը արտաքին վտանգի նախադրյալ է ստեղծում, բայց արատավոր երեւույթների մասին պետք է բարձրաձայնել. Ղուլյան

«Ներքին կյանքում լարվածությունը, անշո՛ւշտ, արտաքին վտանգի լուրջ նախադրյալ է ստեղծում, սակայն սա չի նշանակում, որ արատավոր երեւույթների մասին չպետք է բարձրաձայնել եւ մատնանշել առկա խնդիրները». ՀԺ-ին տված հարցազրույցում այս մասին ասել է Արցախի Հանրապետության Ազգային ժողովի նախագահ եւ Հանրապետության նախագահի թեկնածու Աշոտ Ղուլյանը

Արցախի ԱԺ գործող նախագահը, հիշեցնենք, բացի նախագահի թեկնածու լինելուց, նաեւ գլխավորում է մարտի 31-ին կայանալիք խորհրդարանական ընտրություններին մասնակցելու հայտ ներկայացրած Արցախի ժողովրդավարական կուսակցության ցուցակը: Փետրվարի 26-ից մեկնարկել է ընտրությունների քարոզարշավը:

Ստորեւ՝ մեր հարցազրույցը.

- Պարո՛ն Ղուլյան, ընդամենը մեկ ամսից Արցախում ընտրություններ են, որոնց ակտիվ մասնակցություն եք ունենալու ե՛ւ որպես նախագահի թեկնածու, ե՛ւ Ձեր ղեկավարած Արցախի Ժողովրդավարական կուսակցության միջոցով: Ինչպե՞ս եք գնահատում նախընտրական իրավիճակն այս պահին Արցախում:

- Նախընտրական քարոզարշավի փուլն արդեն սկսվել է, եւ ես՝ որպես նախագահի թեկնածու եւ մեր թիմը՝ Արցախի ժողովրդավարական կուսակցության համամասնական ցուցակում ընդգրկված թեկնածուները, հանդիպումներ ենք ունենում հանրության հետ Արցախի տարբեր համայնքներում եւ մայրաքաղաքում: Ընտրությանը մասնակցող բոլոր քաղաքական ուժերն ու գործիչները քարոզչական տարբեր տեխնոլոգիաներով փորձում են իրենց խոսքը հասցնել ընտրողին, եւ ողջունելի են բոլոր այն մեթոդները, որոնք օրենքի սահմաններում են եւ միտված չեն մոլորեցնելու հանրությանը: Ամենակարեւորը, որ պահանջում է բոլորիս կենտրոնացումը, երկրում որեւէ կերպով լարվածություն թույլ չտալն է:

- Շատերն են համարում, որ Արցախում ներքին լարվածությունն անթույլատրելի է՝ հասկանալի պատճառով: Ըստ ձեզ՝ կհաջողվի՞ առանց այդ վտանգավոր լարվածության քարոզարշավ անել:

- Ներքին կյանքում լարվածությունը, անշո՛ւշտ, արտաքին վտանգի լուրջ նախադրյալ է ստեղծում, սակայն սա չի նշանակում, որ արատավոր երեւույթների մասին չպետք է բարձրաձայնել՝ մատնանշելով առկա խնդիրները: Միեւնույն ժամանակ, դա չպետք է արվի հանրությանը յուրայինների եւ ոչ յուրայինների բաժանելու միջոցով, այլ քաղաքական կառուցողական երկխոսությամբ ու իրար նկատմամբ հանդուրժողականության դրսեւորմամբ: Մեր քաղաքական թիմը հենց այս ճանապարհով է շարժվում՝ առաջարկելով մասնագիտական բարձր պատրաստվածությամբ մարդկանց ներուժը հանուն Արցախի զարգացման ներդնելու հայեցակարգը: Նախընտրական քարոզչության ողջ ընթացքում մենք պահպանելու ենք մեր զուսպ եւ հավասարակշռված կեցվածքը, սա է մեր ոճը, եւ կասկած չունեմ, որ այն արժանանալու է արցախցի ընտրողի հավանությանը եւ վստահություն է ներշնչելու ապագայի հանդեպ:

- Կան կարծիքներ, որ Արցախում նախագահական ընտրություններն առաջին փուլով չեն ավարտվի: Ո՞րն է ձեր կանխատեսումը:

- Կլինի մեկ, թե երկու փուլ, որոշելու է Արցախի ժողովուրդը: Նախընտրական քարոզարշավը նոր է սկսվել, եւ որեւէ կանխատեսում չի կարող վերջնական լինել: Այն, որ մրցակցությունը բավականին բարձր է լինելու, կասկած չկա: Կարծում եմ՝ յուրաքանչյուր թեկնածուի եւ թիմի կարեւորագույն առաջադրանքն այս պահին հանրությանը հավուր պատշաճի ներկայանալն է: Թե ընտրությունների արդյունքներն ինչպիսին կլինեն, կտեսնենք ընդամենը մեկ ամսից: Ամեն դեպքում, արցախցին արժանի է ունենալու փորձառու, ազնիվ, արդարամիտ եւ մաքուր կենսագրությամբ նախագահ եւ նույնպիսի հատկանիշներով օժտված պատգամավորներ:

- Որեւէ թեկնածուի մասին կարծիք կազմելու համար շատ վճռորոշ է համարվում Արցախի հարցում նրա որդեգրած քաղաքականությունը կամ կողմնորոշումը: Որո՞նք են Ձեր պատկերացումները:

- Արցախի ժողովրդավարական կուսակցությունն արցախյան քաղաքական դաշտում նոր չէ եւ միշտ էլ հստակ արտահայտել է ադրբեջանա-ղարաբաղյան հակամարտության կարգավորման հարցում իր դիրքորոշումը: Երեւի դա այն թեման է, որին անձամբ ես անդրադարձել եմ իմ բոլոր հարցազրույցներում եւ հայտարարություններում: Այդ մասին խոսել եմ նաեւ ՀՀ վարչապետ Նիկոլ Փաշինյանի՝ Արցախի նախագահի թեկնածուներին ուղղված կոչին ի պատասխան՝ առանձնացնելով հակամարտության կարգավորման համատեքստում մեզ համար կարեւորագույն դրույթները: 1991 թ. հանրաքվեով Արցախի ժողովուրդը որոշել է իր ճակատագիրը, եւ ձեռք բերված անկախությունն այն նվազագույն կարգավիճակն է, որ պետք է պահպանենք, իսկ միացումը մայր հայրենիքի հետ մեր վերջնանպատակն է: Այն սահմանները, որով այսօր գոյություն ունի Արցախի Հանրապետությունը, բնական սահմաններ են մեր ժողովրդի անվտանգության ապահովման համար, որը զիջման ենթակա չէ: Ինչ վերաբերում է բանակցային գործընթացին, ապա որեւէ լուրջ տեղաշարժի հասնելու համար նախեւառաջ պետք է վերականգնվի բանակցային ձեւաչափը՝ բոլոր փուլերում Արցախի մասնակցությամբ, եւ բանակցային գործընթացի անբաժանելի մաս դառնան Ադրբեջանի կողմից Արցախի օկուպացված տարածքների վերադարձի եւ հայ փախստականների հարցերը:

- Հաճախ է նշվում, որ Հայաստանի եւ Արցախի գործող իշխանությունների դիրքորոշումները նույնական են Արցախի հարցում: Այդ մասին խոսվել է նաեւ նախորդ շաբաթ օրն Արցախում տեղի ունեցած երկու հանրապետությունների անվտանգության խորհուրդների նիստում: Ինչո՞վ է կարեւոր դիրքորոշումների նույնական լինելը:

- Համատեղ նիստերը շատ արդյունավետ ձեւաչափ են անվտանգության բոլոր բաղադրիչների վերաբերյալ մտքերի փոխանակման համար, դրանք նաեւ շատ օգտակար հարթակ են՝ անդրադառնալու հակամարտության կարգավորման գործընթացի տարբեր մանրամասներին եւ հստակեցնելու մեր ընդհանուր դիրքորոշումը: Կարգավորումը համահայկական օրակարգի կարեւորագույն հարցերից է, իսկ դա նշանակում է, որ այն առնչվում է հայկական երկու հանրապետությունների պետական շահին եւ համայն հայության ազգային շահին: Ուստի այդ հարցում ՀՀ եւ Արցախի իշխանությունների դիրքորոշումները չեն կարող նույնական չլինել: Այնուամենայնիվ, նույնականությունը չի ենթադրում, որ բոլոր հարցերում հնչում են միատեսակ կարծիքներ: Կարծում եմ՝ երկու հայկական պետությունների դիրքորոշումները հակամարտության կարգավորման հարցում փոխլրացնում են միմյանց: 

Հիշեցնենք, որ Աշոտ Ղուլյանն Արցախի ԱԺ նախագահ էր ընտրվել 2015 թ.: Մինչ այդ նա եղել էր նաեւ Արցախի ԱԺ 4-րդ եւ 5-րդ գումարման ԱԺ նախագահը:

Տպել
1616 դիտում

Արցախում հաստատված կորոնավիրուսով քաղաքացին մասնակցել է համապետական ընտրություններին

Գողություն, սպանության փորձ, ծեծ. ոստիկանությունը 1 օրում հանցագործության 42 դեպք է բացահայտել

Օն-լայն առևտրաշրջանառությունը գրեթե եռապատկվել է. օն-լայն նախագծերի մրցույթի արդյունքներն ամփոփվում են

Թոքերի արհեստական օդափոխման սարքերի նախագծումը 1-2 ամսվա գործընթաց չէ. միանալու պատրաստակամություն են հայտնել շատերը

Պաշտպանները Ռոբերտ Քոչարյանի խափանման միջոցը վերացնելու նոր միջնորդություն են ներկայացրել. դատավորը դեռ անաշխատունակ է

Մանկական հոգեբուժական դիսպանսեր ծառայությունը կենտրոնացվել է «Սուրբ Գրիգոր Լուսավորիչ» ԲԿ-ի պոլիկլինիկայում

Երեւանում հայտնաբերվել է դասալքության համար նախորդ տարվանից հետախուզվող երիտասարդը

Արմեն Թավադյանի եւ Վարուժան Մկրտչյանի վերաբերյալ քրեական գործով առաջին նիստի օրը հայտնի է

Հակոբ Ճաղարյանն ազատվել է վարչապետի խորհրդականի պաշտոնից

Թալինում «Mercedes C» ավտոմեքենան բախվել է գազատար խողովակին․ կա տուժած

COVID-19-ի հետազոտման շարժական լաբորատորիան կգործարկվի այսօրվանից՝ հետազոտելով 99 տոկոս ճշտությամբ

Մահվան դեպքն արձանագրվել է Արտաշատի բժշկական կենտրոնում. պացիենտը եղել է 93 տարեկան

Աշխարհահռչակ Ռոնալդինյոն 1.6 մլն դոլար գրավ է վճարել, որ բանտում մնալու փոխարեն տնային կալանքի ենթարկվի

Այսօր ունենք կորոնավիրուսի 28 նոր դեպք. գրանցվել է 1 նոր մահ. վարչապետ

Կորոնավիրուսով վարակված արցախցու հետ շփված 20 անձ է մեկուսացվել, ինքնամեկուսացած է ամբողջ գյուղը

ՌԴ-ն արտահանձնում է Ալրաղացի Լյովիկ մականունով հայտնի Լեւոն Սարգսյանին

Հայկական դուդուկը ՅՈՒՆԵՍԿՕ-ի ցանկում գրանցվել է 2008 թվականին․ ԿԳՄՍՆ

Պայթյուն թուրքական ռազմարդյունաբերական ընկերության գործարանի տարածքում. 3 վիրավոր կա

Հրդեհ Ագարակ գյուղում. տուժածներ չկան

6 ժամով լույս չի լինելու Վայոց ձորի մարզի մի մասում