Էդմոն Մարուքյանը մինասյանացավ է կպել. Ալեն Սիմոնյան

Էդմոն Մարուքյանի հայտարարությունը, թե նրանք չեն մասնակցելու քարոզարշավին, որովհետեւ «Ոչ» քարոզելով՝ ծառայություն են մատուցում իշխանությանը, աբսուրդ է: Այս մասին այսօր լրագրողների հետ ճեպազրույցում ասաց ԱԺ փոխխոսնակ Ալեն Սիմոնյանը: Նրան պնդմամբ՝ ԼՀԿ-ն պատասխանատվություն է կրում իր ընտրողների առջեւ եւ պետք է նրանց ուղղորդի:

«Եթե ասում են, որ հանրաքվեն հակասահմանադրական է, դեմ են «Այո»-ին, եւ ոչ մի գործողություն չես անում, ստացվում է, որ չգիտեն՝ ինչով են զբաղված, չեն կողմնորոշվել»,- ասաց Սիմոնյանը:

Դիտարկմանը, թե սա նույն սցենարն է, որով 2015 թ.-ին շարժվեց Նիկոլ Փաշինյանը, երբ ասաց, որ ընտրությունների անցկացումը կեղծ օրակարգ է, Սիմոնյանը պատասխանեց, որ դրա տակ եղել է բացատրություն:

«Այս պարագայում բացատրություն չկա: Մարուքյանը հասկանում է, որ ՀՀ ժողովուրդը, ամենայն հավանականությամբ, գալու է եւ «Այո» է քվեարկելու, միեւնույն ժամանակ էլ չի կարողանում խուսափել անցյալից, երբ կտրուկ հայտարարություններ էր անում, որ հնարավոր է՝ գլխավորի «Ոչ»-ի շտաբը, կամ նախագահը չի ստորագրի հանրաքվեն անցկացնելու որոշումը»,- ասաց ԱԺ փոխխոսնակը՝ հավելելով, որ այս հայտարարությունը ընդամենը արդարացող եւ ցայտնոտի մեջ գտնվող քաղաքական ուժի ղեկավարի խոսք էր, որը չի կողմնորոշվում:

«Մենք ասում էինք՝ դա կեղծ օրակարգ է, չենք մտնում դրա մեջ, նա ասում է՝ եկեք ուժ չտանք դրանով. սրանք լրիվ տարբեր բաներ են»,- նկատեց Սիմոնյանը:

«Քաղաքական գնահատականները եւ ատելությունը եթե մենք սկսենք նույնացնել, ապա կարող եմ Էդմոն Մարուքյանի ցանկացած հարցազրույցի մեջ՝ սկսած այս վերջին հարցազրույցից, ատելության խոսք գտնել. նրա խոսելու ձեւը, սարկազմը, ծաղրանքը»,- նշեց ԱԺ փոխխոսնակը՝ անդրադառնալով Մարուքյանի այն դիտարկմանը, որ ՀՀ վարչապետ Նիկոլ Փաշինյանը վերջերս ամբիոնից հայտարարել էր՝ վեճ քարոզողները կհամարվեն հակապետական ուժեր, իսկ հակառակները՝ նվիրյալներ, եւ սա ատելության խոսքի դրսեւորում է:

Վերջերս Սիմոնյանը ԱԺ նիստի ժամանակ հայտարարել էր, որ Մարուքյանը համագործակցում է Սերժ Սարգսյանի փեսա Միքայել Մինասյանի հետ, ինչին Մարուքյանն այսօր իր ասուլիսի ժամանակ անդրադարձել էր՝ ժխտելով այդ տեղեկությունը: Նա նաեւ նշել էր, որ գուցե հակառակն է, եւ «Իմ քայլն» է նրան տարել օդանավակայան, ճանապարհել, որ հետո փնտրի: «Ինձ թվում է՝ Մարուքյանը «մինասյանացավ» է կպել, եւ դա արդեն քրոնիկ բնույթ է կրում: ՀՀ-ում որեւէ մեկը անձերով չի զբաղվում, էլ չեմ ասում, որ այդ անձերը շատ չնչին եւ անկարեւոր են մեր պետականաշինության մեջ»,- դիտարկեց Ալեն Սիմոնյանը:

«Եթե 650 հազար մարդ գնա եւ քվեարկի «Այո», այդտեղ Մարուքյանի իրավական հնարքները դառնում են առ ոչինչ: Եթե ասելիք ունի իր ընտրողներին, պետք է դուրս գա փողոց, ձեւավորի «Ոչ»-ի շտաբն ու մարդկանց ապացուցի, որ որոշումը հակասահմանադրական է»,- հայտարարեց Սիմոնյանը՝ հավելելով, որ դրանից հետո էլ կարող է դիմել ՍԴ՝ վիճարկելու քվեարկության արդյունքները:

«Ավելի քան վստահ եմ, որեւիցե կասկած չունեմ, որ լինելու են շատ բարձր տվյալներ, եւ վերջ է դրվելու ՍԴ-ի խնդրին»,- ասաց Սիմոնյանը՝ հավելելով՝ չի բացառում, որ ինչ-որ դատավորներ մինչեւ կենսաթոշակայինի ժամկետը լրանալը հրաժարական կտան: Նրա պնդմամբ՝ դա կլինի ողջունելի քայլ. «Ես նրանց կհամարեմ ՀՀ քաղաքացիների ձայնը լսող, նվիրյալ պետական մարդիկ, որոնք գիտակցում են այն ամենը, ինչը շատ հաճախ, ի հեճուկս իրենց ցանկության, արել են ու դրան լուծում են տալիս»,- ասաց Սիմոնյանը:

Հարցին, թե կլինի՞ հանրաքվե, եթե բոլոր 7 դատավորները հրաժարական տան, Սիմոնյանը պատասխանեց, որ հանրաքվեն, ամեն դեպքում, կկայանա, բայց նա խիստ կասկածում է, թե Հրայր Թովմասյանը նման բան կանի: Նա նաեւ հավելեց, որ անկասկած լինելու են մարդիկ, ովքեր կգլխավորեն «Ոչ»-ի շտաբը: