ԵՊՀ ռեկտորի թեկնածուներից ղեկավար աշխատանքի փորձ չի պահանջվի. ընտրությունը կլինի մարտին

Այսուհետ Երեւանի պետական համալսարանի ռեկտորի թափուր պաշտոնի մրցույթի հիմնական պահանջն է դոկտորի գիտական աստիճանը եւ պրոֆեսորի կոչումը: Այդ ցանկից հանվել է 3 տարվա ղեկավար աշխատանքի փորձ ունենալու պահանջը, որը մինչ այդ եղել է: Այս մասին այսօր նշվեց ԵՊՀ հոգաբարձուների խորհրդի հերթական նիստի ժամանակ:

Լրագրողների հետ զրույցի ընթացքում հոգաբարձուների խորհրդի նախագահ Գեւորգ Մուրադյանը բացատրեց, որ 3 տարվա աշխատանքային փորձի պահանջը հանվել է, քանի որ իրավական խնդիր էր առաջանում: ԵՊՀ կանոնադրությունում չկա նման սահմանափակում, մինչդեռ այն առկա է կանոնակարգում: Ըստ այդմ առաջանում էր հակասություն եւ իրավական առումով կոնֆլիկտի էր բերում: Կանոնադրությունը հաստատում է կառավարությունը եւ իրավական առումով այն կանոնակարգից շատ ավելի բարձր աստիճան ունի:

Ինչպես ավելի վաղ տեղեկացրել էինք, սույն թվականի մարտի 23-ին տեղի կունենա մրցույթ, եւ հայտնի կլինի բուհի ռեկտորի անունը:

Մրցույթի հայտարարությունը կտարածվի այսօրվանից սկսած 5 օրվա ընթացքում: Այն կհրապարակվի համալսարանի կայքում, կուղարկվի նաեւ լրատվամիջոցներին եւ գիտակրթական հաստատություններին:

Իրենց թեկնածությունն առաջադրողները մասնակցության հայտերը պետք է ներկայացնեն համալսարան, որտեղ կլինի դրանց համար առանձին մատյան, իսկ մրցույթի կանոնակարգն առցանց հասանելի կլինի 2 օրից:

ԵՊՀ հոգաբարձուների խորհրդի նիստի ընթացքում որոշվեց նաեւ բուհի Իջեւանի մասնաճյուղի տնօրենի մրցույթի անցկացման օրը: Այն տեղի կունենա մարտի 16-ին:

Հոգաբարձուների խորհրդի նախագահը չնշեց, թե արդեն հայտնի է՝ ովքե՞ր են առաջադրվելու մրցույթին: Նրա խոսքով՝ գուցե արդեն կան մարդիկ, որոնք լրատվամիջոցներով հայտարարել են՝ թեկնածությունն առաջադրելու մասին, սակայն երբ հայտերը կբերեն, այդ ժամանակ հստակ կիմանան:

Նշենք, որ բուհի ռեկտորի պաշտոնակատար Գեղամ Գեւորգյանը մրցույթին չի առաջադրի իր թեկնածությունը: Այս մասին նա հայտնեց նիստի ավարտից հետո՝ լրագրողների հետ զրույցի ընթացքում: Պատճառներ չասաց՝ նկատելով, որ չառաջադրվելու իրավունք ունի:

Այն հարցին, թե ինչն իրեն չի գոհացրել պաշտոնավարման այս ընթացքում, որ որոշել է չմասնակցել, պատասխանեց, որ լրագրողները փնտրում են պատճառներ, որոնք գոյություն չունեն: Գեւորգյանը նաեւ հավելեց. «Որոշումը վաղուց էր վերջնական, այսպես էր ծրագրավորված»։

Այն դիտարկմանը, թե բոլորը սպասում էին իր թեկնածության առաջադրմանը, դարձյալ պատասխանեց կարճ. «Չափազանցնել պետք չէ, ոչ բոլորը»:

Վերջինս իր պաշտոնավարման ընթացքը գնահատեց նորմալ՝ միայն նշելով, որ մյուս թեկնածուն հավանաբար իրենից ավելի երիտասարդ կլինի. «Իմ տարիքն արդեն եզրային էր, դրանից այն կողմ չի կարելի պաշտոնավարել»: