Լոռիում նախորդ տարի արտակարգ դեպքերի ու պատահարների աճ է գրանցվել. զոհվել է 42, վիրավորվել 866 մարդ

Նախորդ տարվա ընթացքում Լոռու մարզի տարածքում գրանցվել է 1425 արտակարգ դեպք, որոնց հետևանքով զոհվել է 42, մար­մնական վնասվածքներ ստացել 866 մարդ: Մարզում 2019 թ.-ին 2018-ի համե­մա­տու­թ­յամբ գրանցված արտա­կարգ դեպքերը աճել են 167-ով, զոհե­րի թիվը աճել է 7-ով, վիրավորներինը նվազել է 240-ով:

Այս մասին այսօր՝ հունվարի 23-ին, Լոռու մարզպետարանում հայտնեց ԱԻՆ Լոռու մարզային փրկարարական վարչության պետ, գնդապետ Սերոբ Գաբրիելյանը՝ ներկայացնելով նախորդ տարի մարզում գրանցված արտակարգ դեպքերի ու պատահարների վիճակագրությունը: Հաշվետվությանը ներկա էր ԱԻ փոխնախարար Արա Նազարյանը, Լոռու մարզպետ Անդրեյ Ղուկասյանը, ենթակա ստորաբաժանումների ու համայնքների ղեկավարներ:

2019-ին գրանցված դեպքերի 878-ը (2018 թ.-ին՝ 448) եղել են տեխնածին, որոնց հետևանքով զոհվել է 20 մարդ, վիրավորվել՝ 337-ը: Տեխնածին բնույթի արտա­կարգ դեպքե­րը աճել են 430-ով կամ 96%-ով, զոհերի թիվը աճել է 3-ով կամ 15%-ով, վիրա­վոր­նե­րի­նը՝ 22-ով կամ 6,5%-ով: Գրանցված տեխնածին արտակարգ դեպ­քե­րից 626-ը հրդեհներն են, որոնց թիվը 2018 թ.-ի համեմատ մարզում աճել է 392-ով (167,5%): Հրդեհների հետևան­քով գրանց­վել է 1 զոհ (2018թ.՝ 6 զոհ) վիրա­վոր­վել՝ 4 մարդ: Հրդեհների հե­տևան­քով զոհերի թիվը նվազել է 5-ով, վիրավորներինը՝ 6-ով:

Հաշվետու տարում տարերային բնույթի 29 դեպք է արձանագրվել, որոնց հետևանքով զոհեր և վիրավորներ չեն եղել:

Նվազել են սոցիալ-կենցաղային բնույթի դեպքերը՝ 2018 թ.-ի 778 դեպքի դիմաց անցնող տարում արձանագրվել է 518 դեպք, որոնց հետևան­քով զոհվել է 22, վիրա­վոր­վել՝ 529 մարդ: Զո­հե­րի թիվն աճել է 4-ով, իսկ վիրա­­վոր­նե­րի­նը նվազել 256-ով:

Լոռու մարզպետ Անդրեյ Ղուկասյանը, գնահատելով մարզային փրկարարական վարչության կողմից նախորդ տարի իրականացված աշխատանքները, իր խոսքում նշեց. «Բոլորս գիտենք, որ տարին աննախադեպ էր տարբեր դեպքերի ու պատահարների առումով: Ես շնորհակալ եմ վարչության պետին եւ ողջ անձնակազմին՝ դրանց բարձր մակարդակով արձագանքելու եւ հնարավոր վատ հետեւանքները ժամանակին կանխելու համար: Ցավոք սրտի, ունեցանք նաեւ ողբերգական դեպք, երբ երիտասարդ փրկարար զոհվեց: ԱԻՆ Լոռու մարզային վարչությունը մեր մարզի կայացած ծառայություններից մեկն է»,- ասաց մարզպետը՝ հիշեցնելով կառավարության կողմից հրշեջ-փրկարարների աշխատավարձերի բարձրացումը՝ հույս հայտնելով, որ դա լինելու է շարունակական:

ԱԻՆ փոխնախարար Արա Նազարյանը եւս բարձր գնահատեց մարզային փրկարարական վարչության աշխատանքը: Վերհանվեցին նաեւ արտակարգ դեպքերին ու պատահարներին արագ արձագանքմանն ուղղված մի շարք հարցեր, եղան քննարկումներ: Իսկ վերջում փրկարար ծառայության մի շարք աշխատակիցներ պարգեւատրվեցին պատվոգրերով ու շնորհակալագրերով: