Պատգամավորն առաջարկում է ընդլայնել Ֆինանսական համակարգի հաշտարարին պահանջ ներկայացնելու իրավունք ունեցող անձանց շրջանակը

Ազգային ժողովի «Լուսավոր Հայաստան» խմբակցության պատգամավոր Արկադի Խաչատրյանը ներկայացրել է մի նախագիծ, որով առաջարկում է Ֆինանսական հաշտարարի ինստիտուտի հետագա զարգացումն ապահովելու նպատակով ընդլայնել կազմակերպությունների դեմ Ֆինանսական համակարգի հաշտարարին պահանջ ներկայացնելու իրավունք ունեցող անձանց շրջանակը։

«Ֆինանսական համակարգի հաշտարարի մասին» Հայաստանի Հանրապետության օրենքն ընդունվել է դեռեւս 2008 թվականին: Պատգամավորի պնդմամբ՝ Օրենքի գործողության տասից ավելի տարիների ընթացքում զգալի իրողություններ են փոփոխվել, եւ կարիք է առաջացել օրենքում կատարել փոփոխություններ, սահմանել նոր դրույթներ, որոնց նպատակն է վերացնել գործնականում ի հայտ եկած թերի կարգավորումները եւ ապահովել ֆինանսական հաշտարարի ինստիտուտի հետագա զարգացումը:

Խաչատրյանի համոզմամբ՝ այս տարիների ընթացքում ֆինանսական հաշտարարի ինստիտուտն ապացուցել է, որ այն այլեւս կայացած, պրոֆեսիոնալ կառույց է, որի կարեւորագույն գրավականներն են այս ինստիտուտի անկախությունը, անաչառությունը, պրոֆեսիոնալիզմը, հանրության եւ ֆինանսական կազմակերպությունների վստահությունը:

Ֆինանսական հաշտարարի ինստիտուտի հիմնական նպատակն է ֆինանսական ոլորտում սպառողների եւ հաճախորդների իրավունքների եւ շահերի պաշտպանությունը, նրանց պահանջների արագ, արդյունավետ եւ անվճար քննությունը, ֆինանսական համակարգի նկատմամբ հանրության վստահության բարձրացումը եւ ֆինանսական միջնորդության ավելացումը: Այն ապահովում է վեճերի լուծման արտադատական, այլընտրանքային լուծման հնարավորությունը:

Ֆինանսական հաշտարարի ինստիտուտի հետագա զարգացումն ապահովելու, ինչպես նաեւ գործնականում ի հայտ եկած խնդիրները կարգավորելու նպատակով «Ֆինանսական համակարգի հաշտարարի մասին» Հայաստանի Հանրապետության օրենքում փոփոխություններ եւ լրացումներ կատարելու մասին իր այս նախագծում Արկադի Խաչատրյանն առաջարկում է որպես հաճախորդ՝ Ֆինանսական համակարգի հաշտարարին Կազմակերպությունների դեմ նրանց կողմից մատուցվող ծառայությունների կամ ապահովման միջոցի հետ կապված պահանջներ ներկայացնելու իրավունք տալ նաեւ ֆիզիկական անձանց, անհատ ձեռնարկատերին կամ իրավաբանական անձանց:

Ընդ որում, անհատ ձեռնարկատերը կամ իրավաբանական անձը պետք է հանդիսանան Հաշտարարին դիմելու պահին Հայաստանի Հանրապետության տարածքում գրանցված կամ հաշվառված եւ Հայաստանի Հանրապետության հարկային օրենսգրքի համաձայն հարկման հատուկ համակարգերից որեւիցե մեկով հարկվող անհատ ձեռնարկատեր կամ իրավաբանական անձ կամ օտարերկրյա իրավաբանական անձի՝ Հայաստանի Հանրապետության տարածքում գրանցված մասնաճյուղ, բացառությամբ Օրենքով նախատեսված ֆինանսական կազմակերպությունների:

Խաչատրյանը նշեց, որ, նկատի ունենալով այն հանգամանքը, որ Ֆինանսական համակարգի հաշտարարը իրավասու է քննելու միայն 10 մլն ՀՀ դրամը չգերազանցող գույքային պահանջ, հաճախորդների շրջանակի վերոհիշյալ ընդլայնումը կարեւոր նշանակություն կունենա՝ փոքր բիզնեսի իրավունքների եւ շահերի պաշտպանության տեսանկյունից:

Նա առաջարկում է հնարավորություն տալ հաճախորդներին՝ «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» Հայաստանի Հանրապետության օրենքով նախատեսված Բյուրոյի դեմ, ինչպես նաեւ արժեթղթավորման ֆոնդերի դեմ եւս ներկայացնել պահանջներ Ֆինանսական համակարգի հաշտարարին։ Ընդ որում, Բյուրոյի դեմ կարող են ներկայացվել ոչ միայն ԱՊՊԱ պայմանագրով ապահովադրի, ապահովագրված անձի կամ տուժողի հետ կապված Բյուրոյի կողմից մատուցվող ծառայության, այլ նաեւ վնասների հատուցման եւ (կամ) դրա հետադարձ պահանջի (սուբրոգացիայի) հետ կապված պահանջներ:  

Բացի այս՝ գործող օրենքի համաձայն՝ մինչեւ պահանջը Ֆինանսական համակարգի հաշտարարին ներկայացնելը հաճախորդը պետք է Կազմակերպությանը ներկայացնի բողոք-պահանջ: Նախագծով սահմանվում է նաեւ, որ հաճախորդի համաձայնությամբ հաճախորդի բողոք-պահանջը Կազմակերպությանը կարող է ներկայացնել նաեւ Ֆինանսական համակարգի հաշտարարի գրասենյակը՝ գրասենյակի հոգաբարձուների խորհրդի սահմանած կարգով.

Առաջարկվում է հստակեցնել Ֆինանսական համակարգի հաշտարարի կողմից պահանջի քննության դադարեցման հիմքերը։ Մասնավորապես, լրացվել են հաճախորդի մահացած կամ անհայտ բացակայող ճանաչվելու, իսկ իրավաբանական անձ հաճախորդի դեպքում՝ լուծարվելու, կողմերի հաշտվելու, ինչպես նաեւ Կազմակերպության լիցենզիայի գործողությունը դադարեցվելու դեպքերը:

Նախագծի քննարկումը, սակայն, հետաձգվեց, քանի որ նախագծի վերաբերյալ կառավարության կարծիքը չկար։