Ծեծկռտուք Զարթոնք գյուղում՝ ավելի քան 20 հոգու մասնակցությամբ. գյուղացիները խոսել են քաղաքական ենթատեքստի մասին

Երեկ՝ հունվարի 3-ին, վիճաբանություն-ծեծկռտուք է տեղի ունեցել Արմավիրի մարզում: Ժամը 00:30-ի սահմաններում ոստիկանության Արմավիրի մարզի վարչությունում օպերատիվ տեղեկություններ են ստացվել, որ Զարթոնք գյուղում մի խումբ անձանց միջև տեղի է ունենում վիճաբանություն-ծեծկռտուք. տեղեկանում ենք shamshyan.com կայքից:

Գյուղ են մեկնել Ոստիկանության Արմավիրի մարզային վարչության օպերատիվ խումբը՝ վարչության պետ Արամ Հովհաննիսյանի, վարչության պետի տեղակալներ Արմեն Գասպարյանի, Անդրանիկ Սողոմոնյանի գլխավորությամբ, Ոստիկանության Վաղարշապատի բաժնի օպերատիվ խումբը՝ բաժնի պետ Հովհաննես Մարտիրոսյանի, բաժնի պետի օպերգծով տեղակալ Դավիթ Պետրոսյանի գլխավորությամբ: Օպերատիվ մեկ այլ խումբ էլ ժամանել է ոստիկանության Մեծամորի բաժնի պետ Մանուկ Միքայելյանի գլխավորությամբ:

Ոստիկանները պարզել են, որ նույն օրը՝ ժամը 00:10-ի սահմաններում Արտաշար գյուղի բնակիչներ, 32-ամյա Առաքել Գրիգորյանը, 26-ամյա Պարսամ Մխիթարյանը, 24-ամյա Սերոբ Գրիգորյանը, ով լինելով սև գույնի «Lada Priora» ավտոմեքենայի ղեկին, արագ է վարել Զարթոնք գյուղում, ինչի համար Զարթոնք գյուղի բնակիչներ, 27-ամյա Արշակ Մկրտումյանը և 25-ամյա Գերասիմ Մարգարյանը դիտողություն են արել Ս. Գրիգորյանին, որից հետո վերջիններիս և նրանց կողմնակիցների միջև տեղի է ունեցել ծեծկռտուք և «մի կաթիլ մեղրի» պատմությունը վերածվել է տուրուդմփոցի՝ փոխադարձ հարվածներ հասցնելով միմյանց:

Որոշ ժամանակ անց «մեջքի աջ շրջանի կտրած-ծակած մակերեսային վերք» ախտորոշմամբ «Մեծամոր» բժշկական կենտրոն է տեղափոխվել Զարթոնք գյուղի բնակիչ 35-ամյա Սերյոժա Եփրեմյանը և «կրծքավանդակի փափուկ հյուսվածքների սալջարդ, աջ ազդրի կոտրվածք» ախտորոշմամբ՝ Զարթոնք գյուղի բնակիչ, 79-ամյա Անուշ Պետրոսյանը:

Այնուհետև Արմավիրի բժշկական կենտրոնից ահազանգ է ստացվել ոստիկանության Մեծամորի բաժին, որ բուժօգնություն ստանալու նպատակով իրենց մոտ են տեղափոխվել Պ. Մխիթարյանը՝ «կրծքավանդակի սալջարդ ձախից, ալկոհոլ օգտագործած վիճակ» ախտորոշմամբ, և Ս. Գրիգորյանը՝ «կրծքավանդակի սալջարդ աջից» ախտորոշմամբ:

Քիչ հետո էլ «Վաղարշապատ» բժշկական կենտրոնից ոստիկանության Վաղարշապատի բաժին ահազանգ է ստացվել, որ «գլխի գագաթային շրջանի պատռված վերք» ախտորոշմամբ իրենց մոտ է տեղափոխվել Զարթոնք գյուղի բնակիչ, 28-ամյա Սամվել Մնացականյանը:

Ոստիկանները պարզել են, որ վիճաբանության ժամանակ վնասվել է նաև Զարթոնք գյուղի բնակիչ, 48-ամյա Անդրանիկ Պետրոսյանին պատկանող Mercedes Sptinter մակնիշի 45 AV 777 համարանիշի ավտոմեքենան: Մինչ բժիշկները վիրավորներին օգնություն են ցուցաբերել, Արմավիրի մարզի ոստիկանները՝ մարզի ոստիկանապետ Ա. Հովհաննիսյանի գլխավորությամբ, պարզել են նշված ծեծկռտուքին և խուլիգանությանը մասնակից մի քանի կասկածյալների ինքնությունը, ովքեր բերման են ենթարկվել ոստիկանության Մեծամորի բաժին:

Գ. Շամշյանի տեղեկություններով՝ նրանք են Արտաշար գյուղի բնակիչ, 44-ամյա Ալիկ Մխիթարյանը, Զարթոնք Գյուղի բնակիչներ, 30-ամյա Արգիշտ Մելքոնյանը, 36-ամյա Նշան Սարգսյանը, 32-ամյա Սահակ Գրիգորյանը, 67-ամյա Պարույր Սարգսյանը, 31-ամյա Մխիթար Սարգսյանը, 63-ամյա Խաչիկ Սարգսյանը, 44-ամյա Գագիկ Մելքոնյանը, 45-ամյա Գևորգ Կարապետյանը, 53-ամյա Արտյոմ Մկրտումյանը, 45-ամյա Սուսաննա Մարգարանը և 25-ամյա Սերժ Մովսիսյանը:

Ոստիկանների կողմից ձեռնարկված օպերատիվ-հետախուզական միջոցառումների շնորհիվ պարզվել է նաև, որ նույն վիճաբանության ժամանակ Ս. Եփրեմյանին դանակով հարվածել է 31-ամյա Մխիթար Սարգսյանը, իսկ Ա. Պետրոսյանի Mercedes մակնիշի ավտոմեքենային քարերով հարվածել ու վնասել են 27-ամյա Արշակ Մկրտումյանը, 25-ամյա Բաղդասար Մկրտումյանը:

Ոստիկանությունը ձեռնարկում է անհրաժեշտ օպերատիվ-հետախուզական միջոցառումներ՝ հանցագործության գործիք դանակը հայտնաբերելու, ինչպես նաև կասկածյալներ Ա. և Բ. Մկրտումյաններին հայտնաբերելու ուղղությամբ: Փաստի առթիվ ոստիկանության Մեծամորի բաժնի հետաքննչական բաժանմունքում նյութեր են նախապատրաստվում:

Զարթոնք գյուղի մի քանի բնակիչներ SHAMSHYAN.com-ի թղթակցի հետ զրույցում ասել են. «Վիճաբանություն-ծեծկռտուքի մասնակիցների մեջ կան նախկին գյուղապետի համակիրներ, ու եթե Արմավիրի մարզի ոստիկանները օպերատիվ չարձագանքեին ստացված օպերատիվ տվյալներին ու ժամանակին չժամանեին գյուղ, մի կաթիլ մեղրի պատմությունը վերածվելու էր Սոդոմ-Գոմորի և ճիշտ կլինի, որպեսզի ոստիկանությունը ձեռքը պուլսի վրա պահի, որ գյուղում նորից իրար չուտեն»:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: