2019-ին ՀՀ մարզերում տարերային աղետների հետեւանքով 50-ից 100 տոկոս տուժած հողօգտագործողներին փոխհատուցում կտրամադրվի

ՀՀ էկոնոմիկայի նախարարությունը քննարկման է ներկայացրել կառավարության որոշման նախագիծ, որով առաջարկվում է 2019 թվականին հանրապետության մարզերում տարերային աղետների (կարկուտ, ջրհեղեղ, ցրտահարություն) hետեւանքով տուժած հողօգտագործողների վնասի մի մասը փոխհատուցել:

Ըստ տվյալների՝ վնաս է պատճառվել շուրջ 15 հազար 698 հա հողատարածքի, ինչի հետեւանքով էլ տուժած հողօգտագործողների վնասի չափը կազմում է շուրջ 9 մլրդ 578 մլն 330 հազար դրամ։ Աջակցություն ցուցաբերելու նպատակով նախատեսվում է ՀՀ պետական բյուջեից փոխհատուցում տրամադրել 50-ից 100 տոկոսի չափով տուժած հողօգտագործողներին:

2019 թվականին տարերային աղետների հետեւանքով 50-100 % տուժած հողօգտագործողների (11569,5 հա) վնասի չափը կազմում է 7 մլրդ 469 մլն 858 հազար դրամ: Վնասի հաշվարկները կազմվել են հիմք ընդունելով ՀՀ մարզպետարաններից ստացված տեղեկատվությունը, ՀՀ Վիճակագրական կոմիտեի 2017 թվականի բուսաբուծական արտադրանքի գները եւ վերջին 3 տարիների միջին բերքատվության ցուցանիշները: Խաղողի, պտղի եւ հատապտղի համար նախատեսվում է փոխհատուցել վնասի 5 %-ի չափով, բանջար-բոստանային, կերային, տեխնիկական մշակաբույսերի եւ կարտոֆիլի համար 4 %-ի չափով, իսկ հացահատիկային եւ հատիկաընդեղեն մշակաբույսերի համար՝ 1 հա ցանքին անհրաժեշտ սերմացուի արժեքի 50 %-ի չափով՝ յուրաքանչյուր հա-ի հաշվով 30 հազ. դրամ: Միջինացված հաշվարկներով 1 հա խաղողի այգու համար աջակցության գումարը կազմում է 57 հազար 259 դրամ, պտղի եւ հատապտղինը՝ 71 հազար 436 դրամ, բանջար-բոստանային, կերային, տեխնիկական մշակաբույսերի, կարտոֆիլի համար՝ 59 հազա 91 դրամ:

2019 թվականին նախատեսված աջակցության գումարը կազմում է 437 մլն 540 հազար 280 դրամ, որը կազմում է պատճառված վնասի շուրջ 4,57%-ը:

2018 թվականին տարերային աղետների հետեւանքով վնասվել է 14 հազար 650 հա, վնասի չափը կազմել է 13 մլրդ 386 մլն 100 հազար դրամ, փոխհատուցվել է 492 մլն 961 հազար դրամ կամ պատճառված վնասի շուրջ 3.7 %-ը:

2017 թվականին տարերային աղետների հետեւանքով վնասվել է 15 հազար 604,88 հա, վնասի չափը կազմել է 12 մլրդ 206 մլն 891 հազ դրամ, փոխհատուցվել է 49 մլն 337 հազար դրամ կամ 0,4 %:

2016 թվականին տարերային աղետների հետեւանքով վնասվել է 23 հազար 117,7 հա, վնասի չափը կազմել է 33 մլրդ 568 մլն 809 հազար դրամ, փոխհատուցվել է 506 մլն 622 հազար դրամ կամ 1,5 %:

2015 թվականին տարերային աղետների հետեւանքով վնասվել է 8768,46 հա, վնասի չափը կազմել է 7 մլրդ 824 մլն 715,8 հազար դրամ, փոխհատուցվել է 211 մլն 824 հազար դրամ կամ 2,7 %:

Նախագծով առաջարկվում է ՀՀ կառավարության պահուստային ֆոնդից 437 մլն 540 հազար 280 դրամ նպատակաուղղել պետական աջակցության տրամադրման համար:

Ըստ նախարարության՝ ծրագիրը համահունչ է գյուղատնտեսության ոլորտում պետական քաղաքականության հետեւյալ նպատակներին՝

ՀՀ հողօգտագործողներին ցուցաբերել աջակցություն տարերային աղետների հետեւանքով պատճառված վնասների դիմաց,

տուժած հողօգտագործողների սոցիալական վիճակի բարելավում, ինչպես նաեւ հետագա տարիներին մշակվող տարածքների ավելացում: