Ծառուկյանի ընկերությունը 5 ամիս է՝ հրաժարվում է վճարել պարտքը. պնդում է բամբակի դաշտում աշխատած տրակտորի տերը

«Բարգավաճ Հայաստան» կուսակցության ղեկավար Գագիկ Ծառուկյանի ընտանիքին պատկանող «ԾԱՌՈՒԿՅԱՆ ՔՈԹԹՈՆ ՌՈԴ» ընկերությունը 5 ամիս է՝ հրաժարվում է վճարել «ՍԱԲՐԻ» ՍՊԸ-ին ունեցած շուրջ 3,5 միլիոն դրամի պարտքը:

Այդ մասին տեղեկացրեց «Հայկական ժամանակ»-ին դիմած «ՍԱԲՐԻ» ընկերության սեփականատեր Հունան Ավետիսյանը: Վերջինս հայտնեց, որ ինքն ունի տրակտոր, որը օրավարձով տրամադրում է հողաշերտերի կտրման, քանդման, հարթեցման եւ այլ աշխատանքների համար: Ամիսներ առաջ «ԾԱՌՈՒԿՅԱՆ ՔՈԹԹՈՆ ՌՈԴ» ընկերության ներկայացուցիչ Գագիկ Խաչիկյանը վարձակալել է Հունան Ավետիսյանին պատկանող տրակտորը՝ Արմավիրի մարզի Արաքս գյուղում գտնվող բամբակի դաշտերում աշխատանքներ կատարելու համար: Ըստ Ավետիսյանի՝ ընկերությունը պարտավորվել է օրական վճարել 120 հազար դրամ:

«Ծառուկյանի հիմնարկից եկան, ներկայացան, Գագիկ էր անունը, ասաց՝ տեխնիկա է պետք, որը կաշխատի: Պայմանավորվել ենք, պայմանագրով տվել ենք, որ աշխատի: Ընթացքում զգացի, որ փողերը չեն տալու, մեր տեխնիկան շուտ հանեցի»,- մեր զրույցում ասաց Ավետիսյանը:

Մեր հարցին, թե ինչպե՞ս է զգացել, որ գումարը չեն վճարելու, տրակտորի սեփականատերը պատասխանեց. «Ամեն օր էսօր-վաղն էին անում.... 7 միլիոնի գործ ենք արել, 4 ամսվա մեջ զոռով-զոռով, ամեն ամիս խնդրելով, աղաչելով՝ 3 միլիոն 560 հազարը տվեցին....5 ամիս ա անցել, հիմա գնում եմ՝ լրիվ արհամարհական, մեկը մեկի վրա է գցում, ասում են՝ Ծառուկյանը գումարները չի տալիս, որ մենք էլ ձեզ տանք»:

Ավետիսյանը նկատեց, սակայն, որ ինքը բոլոր փաստաթղթերը, հաշիվ ապրանքագրերն ունի, որոնք կհաստատեն՝ ծառայությունը մատուցվել է եւ ընկերության կողմից ընդունվել:

Հարցին, թե ինչպե՞ս են իրեն բացատրում գումարը ուշացնելը, Ավետիսյանը պատասխանեց. «Ասում ա՝ (Գագիկ Խաչիկյանը-խմբ.) Ծառուկյանը գումարները չի փոխանցում, դադարեցրել ա, ես էլ ասում եմ՝ իմ լսելով՝ Ծառուկյանը բանվորի փողը չի պահում: Գնում եմ օֆիս, չեն թողնում վերեւ բարձրանամ: Մի անգամ մոտեցել եմ Առուստամյանին (Մուլտի գրուպ կոնցեռնի տնօրեն Սեդրակ Առուստամյան-խմբ.), ասաց՝ գնացեք, կպատասխանենք: Համարս վերցրին: Նորից 10 օր է անցել, ո՛չ զանգի են պատասխանում, ո՛չ էլ ընդունում են, ո՛չ էլ փոխանցում են գումարը»:

Տրակտորի սեփականատերը նկատեց, որ չի հասկանում՝ ինչու են ձգձգում, որովհետեւ եթե գումար չունենալը լիներ խնդիրը, նույն մարդիկ շինարարություն չէին անի:

«Հայկական ժամանակ»-ը խնդրի վերաբերյալ մեկնաբանություն խնդրեց Սեդրակ Առուստամյանից: Մեր հարցմանն ի պատասխան՝ Առուստամյանը հայտնեց, թե ««Սաբրի» ընկերության տնօրեն Հունան Ավետիսյանը պրիմիտիվ ապատեղեկատվություն է տարածում, թե «Ծառուկյան Քոթթոն ՌՈԴ» ընկերությունը չի կատարում վճարումները»:

Առուստամյանը չի հերքել պարտքի առկայությունը, սակայն նկատել է, թե գումարները պետք է վճարվեին հանձնման-ընդունման ակտ կազմելուց հետո, ինչը փաստորեն տեղի չի ունեցել, քանի որ Ավետիսյանը մինչ աշխատանքներն ավարտելն է իր տեխնիկան հանել դաշտից:

«Ձեր գրության մեջ նշված է, որ «Սաբրի» ՍՊԸ-ն 5 ամիս է, ինչ գումար չի ստացել, սակայն դա իրականությանը չի համապատասխանում: Նշեմ, որ «Սաբրի» ՍՊԸ-ի հետ առկա չէ պայմանագրային պարտավորվածություն: Աշխատանքները կատարվել են օրացույցային գրաֆիկի եւ կանխավճարի հիմքերով, աշխատանքներն ընդունելուց հետո միայն պետք է կազմվեր վերջնական աշխատանքների ստուգման, հանձնման–ընդունման ակտ եւ ըստ այդմ էլ՝ կատարվեր վերջնահաշվարկ: Եվ թեպետ աշխատանքում առկա բազմաթիվ թերացումներին եւ հանձնման-ընդունման ակտերի բացակայությանը, «Ծառուկյան Քոթթոն ՌՈԴ» ՍՊԸ-ն, ընդառաջելով Հունան Ավետիսյանի վատ ֆինանսական վիճակում գտնվելու վերաբերյալ հավաստիացումներին ու աջակցության խնդրանքներին, կանխավճարներ է կատարել՝ դեռևս ս/թ մայիս ամսից սկսած: Արդյունքում առանց աշխատանքի կատարման վերաբերյալ վերջնական ակտի կազմման «Ծառուկյան Քոթթոն ՌՈԴ» ընկերության կողմից «Սաբրի» ՍՊԸ-ի կողմից կատարած աշխատանքի դիմաց, որի գումարը կազմում է 7 040 000 ՀՀ դրամ, արդեն իսկ կատարվել է վճարումներ 4 960 000 /չորս միլիոն ինը հարյուր վաթսուն հազար / ՀՀ դրամ»,- ասվում է մեր հարցմանը Առուստամյանի կողմից փոխանցված պատասխանում:

Նկատենք, որ այս պատասխանում անհամապատասխանություն կա նաեւ որպես պարտք մնացած գումարների մեջ. Հունան Ավետիսյանը նշել է, որ իրեն վճարել են 3 միլիոն 560 հազար դրամ, իսկ Առուստամյանի պատասխանում արդեն վճարված գումարը կազմում է 4 960 000 դրամ:

«Ծառուկյան քոթթոն ռոդ» ընկերության բաժնեմասերի 70 տոկոսը Գագիկ Ծառուկյանինն է, 20 տոկոսը՝ Գագիկ Խաչիկյանինը, 5 տոկոսը՝  սիրիացի գործարար Ամմար Սաբբաղինը եւ 5 տոկոսը՝ Ֆրանսիայի քաղաքացի Ֆաուզի Ակֆալիինը։ Ընկերությունն Արաքս գետի ափին հիմնել է բամբակի դաշտեր, մտադիր է նաեւ կազմակերպել արտահանում, ստեղծել տրիկոտաժի արտադրություն։

Նկարում՝ հաշիվ-ապրանքագրերից մեկը