Գյումրին գործազուրկների թվով ՀՀ-ում լիդեր է. կայացավ Աշխատանքի տոնավաճառը

Զբաղվածության պետական գործակալության նախաձեռնությամբ Գյումրիում այսօր անցկացվեց Աշխատանքի 12-րդ տոնավաճառը: Սա ամենամյա միջոցառում է, որը գործատուի եւ աշխատանք փնտրողի համար տեղում միմյանց ծանոթանալու, առաջարկ-պահանջարկը քննարկելու, հնարավոր աշխատանք գտնելու առումով եզակի հնարավորություն է ստեղծում:Այսօր Գյումրիում 36 գործատու 380 աշխատատեղ էր ներկայացրել: Թափուր աշխատատեղերի առյուծի բաժինը սպասարկման ոլորտին է բաժին հասել: 100 եւ ավելի աշխատատեղի պահանջ կա՝ մատուցող-մատուցողուհի, վարսահարդար, վաճառող: Երկրորդ տեղում արտադրական ձեռնարկություններն են, որոնք ունեն կարողների, ենթավարպետների, տարբեր մեքենասարքավորումների վրա աշխատելու հմտություններ ունեցող աշխատակիցների պահանջ: Թափուր աշխատատեղեր կային նաեւ տեղեկատվական տեխնոլոգիաներիչ ոլորտում: Հիմնականում փնտրում են ծրագրավորողների:Այսօր շատերը պտտվեցին ներկայացվող տաղավարների շուրջբոլորը, գործատուների մոտ թողեցին իրենց ինքնակենսագրականներն ու նրանց տվյալները վերցրեցին: Մեծ մասը, սակայն, հույս չունի, որ տոնավաճառն օգնելու է, որ գտնեն իրենց ուզած աշխատանքը:Տիկին Հասմիկը վերջին տարիներին մշտապես մասնակցել է Աշխատանքի տոնավաճառներին: Ասում է դեռ աշխատանք չի գտել, սակայն հույսը չի կորցնում: Թոշակառու է, բայց ուժերին վստահ է: Ոսկեհասկի դպրոցի նախկին մանկավարժ է, հայոց-լեզու գրականություն է դասավանդել, դպրոցի երգչախմբի ղեկավարն է եղել, շատ փառատոնների են մասնակցել, հաղթել, գյուղի ճակատը բարձր պահել: «Առաջ նորմալ եմ ապրել, հիմա չգիտեմ, թե ինչ վիճակում եմ, տեսքս տեղն է, խելքս, ուժս տեղն է: Ինտերնետից էլ եմ շատ լավ, ռուսերենից էլ եմ շատ լավ, բայց թոշակառու եմ, ո՞վ գործի կընդունե: Անկախ ապրածս կյանքից հիմա ստիպված մաքրողի աշխատանք էլ որ լինի, պետք  է համաձայնեմ: Մանկավարժ եմ եղել, 2 դիպլոմ ունեմ, բայց այլ տարբերակ չկա: Տանը նստել չեմ ուզում, հետո էլ 51.000 դրամով ապրելն անհնար է: Անցյալ տարի էլ եկա, շրջեցի, հեչ բան էլ չգտա, ով էլ տվյալներս վերցրել էր, ոչ էլ զանգեց»,-ՀԺ-ի հետ զրույցում պատմեց տիկին Հասմիկը:

Գյումրին գործազրկության վիճակագրությամբ ՀՀ-ում շարունակում է լիդեր մնալ: 2019թ.-ի օգոստոսի 1-ի դրությամբ Գյումրիում աշխատանք փնտրողների թիվը 13678 է, գործազուրկներինը՝ 10600: Շիրակի մարզում 2019թ.-ի օգոստոսի 1-ի դրությամբ աշխատանք է փնտրում 15.7 հազար մարդ: Նրանցից 11.9 հազարն ունի գործազուրկի կարգավիճակ:

Շիրակի մարզում եւ Գյումրիում գործազուրկների բանակը շարունակում են գլխավորել կանայք՝ 8.4 հազար մարդ: Գործազուրկի կարգավիճակ ունեցողների 21.1 տոկոսը երիտասարդներ են, 3.4 տոկոսը՝ հաշմանդամություն ունեցող անձինք, 24.3 տոկոսը՝ գյուղաբնակները:

«Առաջարկվող աշխատատեղերը աշխատանք փնտրողների համեմատությամբ մեծ չեն, բայց հույս ունենք, որ առաջիկա ամիսների ընթացքում կկարողանանք այդ թափուր աշխատատեղերը համալրել: Չնայած գործազուրկների տարիքային սահմանը դեռ տատանվում է միջին եւ միջինից բարձր սահմանագծում, այնուամենայնիվ, արդեն կարելի է ասել, որ վերջին տարիներին աճել է երիտասարդների թիվը: Սա ուրախացնող է, քանի որ մենք նրանց կարողանում ենք առկա տարբեր ծրագրերում ընդգրկել որպես շուկայում անմրցունակ անձի՝ նպաստելով նրա կայացմանը»,-ասաց Գյումրու Զբաղվածության տարածքային կենտրոնի տնօրեն Ամալյա Ադամյանը:

Անկախ գործազուրկների մեծ թվից Շիրակի մարզում տարիներով հնարավոր չէ լրացնել բժիշկների, մարզի հեռավոր գյուղերում էլ մանկավարժների բացը: Բժիշկներ չկան, քանի որ ուսանողները Երեւանից ետ չեն վերադառնում, ուսուցիչները գյուղեր չեն գնում ցածր աշխատավարձի պատճառով:

Ընդհանուր առմամբ, Գյումրու զբաղվածության տարածքային կենտրոնի կողմից տարեսկզբից աշխատանքի է տեղավորվել 785 անձ: