Գյումրու մսավաճառներին տրված վերջնաժամկետն ավարտված է. մեկ տաղավարի աշխատանք է կասեցված

Գյումրու շուկայի տարբեր տաղավարներում, հիմնականում Լաչինի միջանցք կոչվող հատվածի միս-մսամթերք վաճառողները մինչեւ հուլիսի 25-ը պետք է կարգի բերեին իրենց տաղավարները, հոսող տաք եւ սառը ջուր, սառնարաններ, մաքուր եւ առանց մանրէների կոճղեր ունենային: Եվ ամենակարեւորը՝ միս-մսամթերքի ստուգում անցած լինելը հավաստող կտրոններ ու սանիտարական գրքույկներ: Վերջին երկու ամսում նշված տարածքում անընդհատ այցեր իրականացնող Սննդամթերքի անվտանգության տեսչական մարմինն այսօր կրկին Գյումրիում էր:  Ուսումնասիրությունները սկսվեցին այն նույն տաղավարներից, որոնք անցնող օրերին եւս ստուգվել էին: Գրեթե բոլոր մսավաճառներն էին հասկացել, որ այս անգամ պետք է խոստացածը կատարեին, հակառակ պարագայում ստիպված էին լինելու համակերպվել վաճառքի կետի կասեցման որոշման հետ: Տեսչական մարմինը մսավաճառներին խորհրդանշական կարմիր սկուտեղներ նվիրեց, որ վաճառվող միսը նոր սառնարանների մեջ դրանցով դնեն:«Առաջին անգամ պատկերը սարսափելի էր, խնդիրներ էլ շատ կային, բայց աշխատանք ենք տարել, արդյունքները բավականին լավն են, ու տնտեսվարողներն էլ եկել են այն եզրակացության, որ այսպես ավելի ճիշտ է: Էս ամեն ինչը 20 օրվա պատմություն ունի: Հրավիրեցինք բոլորին, զրուցեցինք և առաջարկեցինք տուգանելու փոխարեն էդ գումարը ներդնեն, իրենց աշխատանքային պայմանները բարելավեն: Մեծ մասը սիրով համաձայնեց: Այս պահին ամենափնթի վիճակում գտնվող մարզը Շիրակն էր, բայց դեռ Լոռիում չենք եղել, հստակ ասել չեմ կարող, միայն գիտենք, որ կա նման խնդիր: Ամենալավ վիճակում Սյունիքն էր, ամենակոկիկը: Մեղրիում ու Ագարակում կար 6 խանութ, բոլորն էլ կարելի էր համեմատել Երևանի ամենալավ խանութների հետ, իսկ Կապան կարող էինք ընդհանրապես չմտնել, ամեն ինչը ապահովված էր»,-լրագրողների հետ զրույցում ասաց ՍԱՏՄ ղեկավար Գեորգի Ավետիսյանը:Բայց սա չի նշանակում, թե խնդիրներն ամբողջությամբ են կարգավորված: Անելիք շատ կա: Այս պահին, եթե բավարար է համարվում վաճառվող ապրանքի համար տրված փորձաքննության կտրոնի առկայությունն, ապա հունվարի 15-ից պարտադիր կդառնա միայն սպանդանոցային մորթի ենթարկված կենդանու մսի վաճառքը:ՍԱՏՄ-ն ուսումնասիրել է նաեւ մսի փորձաքննությամբ զբաղվող ընկերությունների աշխատանքային պայմանները: ՍԱՏՄ Շիրակի մարզային կառույցի ղեկավարի պարտականությունները կատարող Ալեքսան Մկրտչյանն ասաց, նրանք էլ խնդիրներ ունեն: «Այն թերությունները, որ կային, դրանց մասով հանձնարարականներ են տրվել, 2 օր հետո թերությունները պետք է շտկվեին: Այսինքն, մենք երկու օրից արդեն հստակ պատկեր կունենանք՝ այդ պայմանները մեզ բավարարում են, թե՝ ոչ»:

Ինչպե՞ս է միսը հասնում Գյումրու շուկա, ի՞նչ փոխադրամիջոցով եւ ի՞նչ պայմաններում: Այս հարցերի պատասխանները Սննդամթերքի անվտանգության տեսչական մարմինը չունի: Բայց սա շուկա հասած միսը սառնարանում պահելու ու հոսող ջրի առկայության պարտադրանքից պակաս կարեւոր հանգամանք չէ:

«Միսը տեղափոխող մեքենաներին մենք չենք կարողանում գտնել, բայց առաջարկ ենք արել իրավունք ունենալու տուգանել այն տնտեսվարողներին, որոնք միսը, հացը կամ մնացած սննդամթերքը վերցնում են վատ պայմաններից: Հավատացեք, երբ սպանդանոցային մորթի անցնենք՝ յուրաքանչյուր սպանդանոց իր կազմում ունենալու է և սառնարանային մեքենաներ, և կենդանիներին տեղափոխող մեքենաներ, որը թույլ կտա ճիշտ պայմաններում և սանիտարահիգիենիկ նորմերը պահպանելով կատարել առաքումները խանութներ, հանրային սննդի կետեր, կամ պետական կառույցներ»,-շրջայցի ժամանակ լրագրողներին ասաց ՍԱՏՄ ղեկավարը:

Մսի շուկայից հետո հերթը կաթնամթերքին կհասնի: Պատասխանատուներն ասում են, կաթ ու պանիր հիմնականում գյուղացիներն են վաճառում, նրանց տուգանել չեն կարող, քանի որ ոչ թե իրավաբանական, այլ ֆիզիկական անձինք են: Մնում է մարդիկ նրանցից ապրանք չգնեն: «Տեսնում ենք շուկայում վաճառում են պլաստիկ շշերում լցված անհասկանալի ծագման կաթ: Պիտի գտնենք նաև դրա լուծումը, որովհետև վաճառողները գյուղացիներ են, որևէ իրավաբանական անձ կամ կառույց չեն, և վարչական վարույթ չեն կարող իրենց նկատմամբ իրացնել: Երևի ժամանակի ընթացքում մենք քաղաքային իշխանության և ոստիկանների հետ կփորձենք այդ հարցին լուծում տալ»,-ասաց Գեորգի Ավետիսյանը:

Փողոցում վաճառվող հացի խնդիրը եւս կարգավորել չեն կարող: Հիմնավորումը նույնն է՝ իրավաբանական անձի կամ կազմակերպության  մասին չէ խոսքը: Բայց այնպես էլ չէ, որ իրավաբանական անձից՝ տնտեսվարողներից, խանութներում վաճառվող ժամկետանց կամ «ապագայի» թվագրմամբ մթերքի առկայության դեպքում այս մարմինն ունի հստակ գործողությունների ծրագիր: «Խանութներում վաճառվող ժամկետանց կամ ապագայի սննդի ամբողջական հայտնաբերում չենք կարող իրականացնել, որովհետև ինչքան էլ մենք տեսուչներ շատ ունենանք, միևնույն է, տնտեսվարողներն ավելի շատ են: Դրա համար մեզ մոտ գործում է թեժ գիծ, որը թույլ կտա իրականացնել ավելի լավ պետական վերահսկողություն»,-ասաց ԿԱ Սննդամթերքի անվտանգության տեսչական մարմնի ղեկավար Գեորգի Ավետիսյանը: