Նոր էքսպերիմենտ. եւ կրկին Սերժի մատը 

Տպագրվել է «Հայկական Ժամանակ» օրաթերթի՝ 2006 թվականի հուլիսի 14-ի համարում

Սերժ Սարգսյանի մատը կրկին դարձել է քաղաքական սկանդալի անմիջական  մասնակից։ Հայկոմկուսի ղեկավարությունը Կոմկուսից ժամանակին հեռացված Յուրի Մանուկյանին, Վազգեն Սաֆարյանին, Նորիկ Պետրոսյանին, Սանատրուկ Սահակյանին եւ  Խորեն Սարգսյանին մեղադրում է իշխանությունների պատվերով միավորվելու եւ ապագա ընտրություններում նախագահի թեկնածու Սերժ Սարգսյանի համար ձախաթեւյան գաղափարական հենք ապահովելու մեջ։ Ի դեպ, ըստ որոշ տեղեկությունների, Սերժ Սարգսյանի մեկ այլ մատը մասնակից է այլ՝ աջ-լիբերալ գաղափարական դաշինքի ձեւավորման գործում, որը կազմվելու է Գուրգեն Արսենյանի ՄԱԿ-ով, Խոսրով Հարությունյանի ՔԴՄ-ով եւ Արմեն Դարբինյանի «Արժանապատիվ ապագայով»։

Եւ եթե այս երկու բեւեռներին գումարվում է պահպանողական-նժդեհյան Հանրապետականը, ապա իրականանում է Սերժ Սարգսյանի ծրագիրը՝ դառնալ ողջ գաղափարական-քաղաքական դաշտը ծածկող կուսակցությունների միասնական թեկնածուն։ Եւ ահա, ՊՆախարարի համար ձախ ուժերի աջակցությունը ապահովելու մեջ են ՀԿԿ-ում մեղադրում Կոմկուսից հեռացվածներին, որոնք մինչեւ աշուն պատրաստվում են համախմբվել մեկ կուսակցության մեջ եւ անցկացնել ՀԿԿ 36-րդ համագումարը, որը ՀԿԿ-ից վտարվածները համարում են 2004-ի նոյեմբերից կիսատ մնացած եւ ոչ լեգիտիմ։

Թե ինչպե՞ս են մեկ ընդհանուր կուսակցության մեջ գոյատեւելու, ասենք, Սանատրուկ Սահակյանը, Նորիկ Պետրոսյանը, Թռչունիչն ու Յուրի Մանուկյանը, ոչ մի կերպ չկարողացանք պատկերացնել, որովհետեւ անմիջապես հիշեցինք Յուրի Մանուկյանին, որը Ռոբերտ Քոչարյանին ու Սերժ Սարգսյանին ավելի է սիրում, քան Լենինին եւ Մարքսին, եւ անգամ իր սիրելի անեծքն ունի. «Այսօրվա ընդդիմադիրները հայախոս թուրքեր են, եւ ովքեր պահանջում են Ռոբերտ Քոչարյանի հրաժարականը, դրանք թուրք են»,- տարբեր եթերներից պարբերաբար անիծում էր Յուրի Մանուկյանը։ Ավելին, ինչպես երդվում է ՀԿԿ Երեւանի քաղաքային կոմիտեի առաջին քարտուղար Տաճատ Գեղամիչը, Յուրի Մանուկյանն անգամ ասել է, որ ինքը թքած ունի մարքսիզմ-լենինիզմի վրա։ Մինչդեռ, երիտասարդ կոմունիստ Սանատրուկ Սահակյանը, որի գլխավերեւում մշտապես Ստալինի եւ Չե Գեվարայի նկարներն են, մեկ այլ կարգախոսի հեղինակ է, որը բազմաթիվ անգամներ հնչեցրել է միացյալ ընդդիմության հանրահավաքներում.

«Ավելի լավ է մեր նախագահը լիներ թուրք, քան Ռոբերտ Քոչարյանը»,- այսպես էր ասում ընկեր Սահակյանը։ Եւ ահա թուրքերի, Ռոբերտ Քոչարյանի ու մարքսիզմ-լենինիզմի հարցում նման սկզբունքային գաղափարական տարաձայնություններ ունեցող կոմունիստները պատրաստվում են միավորվել։ Ուրեմն ճի՞շտ է Ռուբեն Թովմասյանը, որ այդ միավորումը հանուն իշխանությունների է:

«Ինչքան ուզում է` թող Թովմասյանը զառանցի. ես նրա զառանցանքներին ու վայրահաչություններին չեմ արձագանքելու։ Նա մի մարդ է, որը իշխանությունների պատվերով պառակտեց Կոմկուսը, եւ հիմա այդ կուսակցությունում մնացել է ընդամենը 4,5 մարդ, որովհետեւ այնտեղ կան անձինք, որոնք մի ամբողջական մարդու կշիռ էլ չունեն։ Մենք միավորվում ենք, որպեսզի վերականգնենք այսօր դե ֆակտո գոյություն չունեցող Կոմկուսը, որովհետեւ 2004-ի նոյեմբերին տեղի ունեցած կուսակցության 36-րդ համագումարը, որը անց է կացվել կարմիր բերետավորների եւ դուբինկաների ներքո, լեգիտիմ չէր,  եւ 2004-ից այս կողմ Հայաստանի կոմունիստական կուսակցություն գոյություն չունի։ Իսկ ՀԿԿ առաջին եւ մնացած քարտուղարները լեգիտիմ չեն։ Մենք մինչեւ աշուն կհրավիրենք ՀՀԿ իրական 36-րդ համագումարը եւ Հայաստանի կոմկուսը նորից կվերածնվի։

Իսկ Թովմասյանը եւ Խառատյանը, իբր մարքսիզմ-լենինիզմի գաղափարակիրներ լինելով, նրանցից մեկը մասնավոր համալսարան է պահում, աղջիկն էլ վճռաբեկ դատարանի դատավոր է, Թովմասյանի մասին էլ տեղեկություններ կան, որ «ՍՍՌ» անունով կազինո ունի։ Իմպերիալիզմի եւ մասնավոր սեփականության դեմ պայքարող կուսակցության ղեկավարները նույն այդ իմպերիալիզմի կարկառուն դեմքեր են դարձել։ Բայց մենք վերականգնելու ենք Մարքս-լենինյան գաղափարների վրա խարսխված իրական Կոմկուսը, ինչքան էլ թովմասյաններն ու մյուսները վայրահաչեն»,- ասում է երիտասարդ կոմունիստ Սանատրուկ Սահակյանը։ Ինչ վերաբերում է այս իշխանություններին անսահման սիրող Յուրի Մանուկյանին, ապա թե՛ Սանատրուկը եւ թե՛ Խորեն Թռչունիչը երեկ մեզ կոնֆիդենցիալ կարգով վստահեցրին, որ իրենք բանակցել են Յուրի Մանուկյանի հետ, եւ նա կարծես թե հակված է այլեւս չսիրել Քոչարյանին եւ Սերժին։

Համենայնդեպս, եթե անգամ սիրի էլ, ապա ոչ այնպես, որ մթագնվի նրա լենինյան կողմնորոշումը։ Ու մինչ ժամանակը ցույց կտա, թե Սերժ Սարգսյանի մատը ո՞ր կոմունիստների հետ է, երեկ ՀԿԿ բյուրոն եւ ՀԿԿ Երեւանի քաղաքային կոմիտեն ընդունել են հայտարարություն, որտեղ Կոմկուսից հեռացվածներին մեղադրում են դավաճանության, անսկզբունքայնության, կարիերիզմի, իրենց ջուր տված ջրհորի մեջ թքելու եւ հակակոմունիստական հիստերիա հրահրելու մեջ։ «Նրանց մենք թույլ չենք տալու վերակենդանանալ»,- ՀԿԿ-ի անունից միավորվող հեռացվածներին սպառնաց Կոմկուսի Երեւանի քաղկոմի առաջին քարտուղար Տաճատ Գեղամիչը։

Չեղած Կոմկուսի անունից ընդունված երկու հայտարարությունների մեջ հեռացվածներին, ու հատկապես Սանատրուկ Սահակյանին, մանավանդ հետաքրքրել էր վերակենդանանալու պահը։ «Այն հիստերիան, որը Թովմասյանի 4,5 անդամանոց խմբակը բարձրացրել է, անզոր փորձեր են՝ իշխանություններից կախվելով վերակենդանանալու համար։ Եւ չնայած պատմության մեջ վերակենդանացման միայն մեկ անհաջող փորձ է եղել՝ Ֆրանկենշտեյնի փորձը, սակայն  ամենասարսափելին այն կլինի, որ սրանց իսկապես հաջողվի վերակենդանանալ»,¬ ասում է Սանատրուկ Սահակյանը։ Իսկ թե կդառնա՞ Սերժ Սարգսյանը մեր օրերի Ֆրանկենշտեյն ու մեծ վերակենդանացնող, ցույց կտա ժամանակը։

Նաիրա Զոհրաբյան