Ինչո՞ւ է ձգձգվում «Իմ քայլը հանուն Արմավիրի մարզի» ներդրումային համաժողովը. պարզաբանում է մարզպետը

2019 թվականի ապրիլի 2-ին Արմավիրի մարզպետարանի պաշտոնական կայքը հայտնել էր, որ ապրիլի 12-ին տեղի է ունենալու «Իմ քայլը հանուն Արմավիրի մարզի» ներդրումային համաժողովը: Սակայն այն տեղի չունեցավ: Դրանից հետո Արմավիրի մարզպետ Համբարձում Մաթեւոսյանը հայտարարել էր, որ համաժողովը տեղի կունենա ապրիլի 28-ին, սակայն այդ օրն էլ տեղի չունեցավ:

«Հայկական ժամանակ»-ը Արմավիրի մարզպետ Համբարձում Մաթեւոսյանի հետ զրույցում պարզեց, թե որն է ձգձգման պատճառը:

- Պարոն Մաթեւոսյան, ինչո՞ւ դեռեւս տեղի չի ունեցել «Իմ քայլը հանուն Արմավիրի մարզի» ներդրումային համաժողովը:

- Ըստ հերթականության է: Ձգձգելու խնդիր չկա: Ուղղակի հիմա՝ այս ամառային շրջանում մի քիչ դժվար է մարդկանց մի տեղ համախմբել եւ բերել, որովհետեւ ցանկանում եմ, որ նախարարության ներկայացուցիչներն էլ լինեն, կառավարության ներկայացուցիչներն էլ լինեն, մեր արտասահմանյան գործընկերը լինեն: Հետո ընդհանուր որոշում կայացրեցինք, որ հավանաբար ճիշտ կլինի ֆորումի տարվա փակման դերը՝ ընդհանուր հաշվետվությունը հենց Արմավիրում անենք:

- Ապրիլին 2 անգամ սահմանված օր կար, որ պետք է տեղի ունենար ներդրումային համաժողովը:

- Ոչ թե 2 անգամ հետաձգվել է, այլ 2 անգամ նշել ենք ժամկետներ, որ մեզ ներկայացնեն փաթեթներ: Դա սովորական պրակտիկա է, մենք միշտ անում ենք: Ժամկետները նշում ենք, մեր մարզի բնակիչները բերում են այն փաթեթները, որոնք հիմնականում լավ գաղափարներ են, բայց չունեն ֆինանսական միջոցներ: Մենք հավաքագրում ենք փաթեթները, փորձում ենք աշխատել եւ բավականաչափ արդյունք ունենք: Արմավիրի մարզում 100 հեկտար պիստակի դաշտեր կհիմնվեն, արդեն պաշտոնապես հայտարարել ենք: Վերամշակման գործարան կբացվի այս տարի Արմավիր քաղաքում: Այս պրոցեսը միշտ ընթացքի մեջ է, մենք չենք սպասում, որ ֆորումը լինի, որ սկսենք ներդրողների հետ բանակցել:

- Արմավիրի մարզը հետաքրքի՞ր է ներդրողների համար:

- Այո, մեր մարզը՝ ատոմակայանի գործոնը հանած, հիմնականում գյուղատնտեսական մարզ է եւ մեր ներդրումների ծավալը հաշվում ենք գյուղատնտեսության ակտիվությամբ: Ես շատ մեծ ուրախությամբ ուզում եմ ասել, որ վերջին 1 տարվա մեր աշխատանքի արդյունքում մեր մարզի գյուղատնտեսական ցուցանիշները 100 տոկոսով աճել են: Դրա մասին նույնպես հրապարակել ենք պաշտոնական, բայց ցավոք սրտի մարդիկ այդպիսի բաներին ուշադրություն չեն դարձնում:

- Ներդրողները որեւէ խնդրի առաջ կանգնո՞ւմ են Արմավիրում, թե ազատ են ցանկացած գործունեության համար:

- Բոլոր ներդրողները ազատ են, առանց խոչընդոտների: Եթե նույնիսկ կլինեն խոչընդոտներ, ինչը ես չեմ բացառում, հաշվի առնելով պետական կառավարման համակարգի օրենքները, մարզպետարանի համապատասխան վարչությունները միշտ պատրաստ են անշահախնդիր ուսումնասիրել ներդրողների փաթեթները: Փորձում ենք խորհուրդ տալ, ինչը ներդրողների խոսքով՝ ավելի լավ է, քանի որ լրացուցիչ գումար չեն ծախսում այդպիսի ծառայությունների համար: Այսօր փաստացի մեր մարզի ներդրումների ծավալը 100 տոկոսով աճել է: Եթե նախկինում տարեսկզբին մարզպետարանում լինում էր 9 կամ 10 փաթեթ, մենք արդեն հասցրել ենք 30-ից ավելի փաթեթ վերանայել եւ ընթացք տալ: Սա փաստացի խոսում է ներդրումների ծավալի մասին:

- Ֆիքսված ժամկետ կա՞, թե երբ է Արմավիրում տեղի ունենալու ներդրումային համաժողովը:

- Այս տարի ենք անելու: Ես ցանկություն եմ հայտնել վարչապետին եւ տարածքային կառավարման նախարարին, որ լինի աշունը: Համ եղանակային պայմանները լավ կլինեն, համ էլ մնացած ֆորումների հետ խոչընդոտներ չեն առաջանա: Մենք տարեսկզբում տեսեք՝ ինչպես սկսեցինք. 1 ամսվա մեջ մի քանի հատ ֆորում ունեինք ու ներդրողները չէին հասցնում: Մարդիկ կան, ովքեր հետաքրքրված են մի քանի մարզով: Կառավարության աշխատակիցները, մարզպետները, մեր գործընկերները ֆիզիկապես չէին հասցնում բոլոր ներդրումներին պատրաստվեին կամ բոլոր ֆորումներին ներկա գտնվեին: Հիմա մենք որոշում ենք կայացրել, որ շատ ավելի ճիշտ կլինի անենք ամիսը մեկ: Ներդրումները միշտ շարունակվում են: Հիմա ոսկու վերամշակման գործարանի հետ են քննարկումներ գնում եւ կարծում եմ՝ այս տարի կկարողանանք բացումն անել: Հենց հիմա էլ աշխատանքներն ընթանում են:

- Ձեր պաշտոնավարման օրոք մարզի զարգացումն ինչպե՞ս եք գնահատում: Արմավիրն առա՞ջ է գնում, թե սովորական տեմպերով ընթանում է:

- Կարծում եմ՝ ճիշտ կլինի մարզի բնակիչները գնահատեն, բայց քանի որ հարցնում եք՝ փորձեմ ցուցանիշներով ասել: Գյուղատնտեսության վերաբերյալ ասացի, թե ինչ առաջընթաց ունենք, քաղաքաշինության, հողաշինության առումով՝ 9-10 փաթեթը դարձել է 30-ից ավելի: Արմավիրի մարզում արդեն 5 դպրոց կառուցելու կառավարության որոշում կա, սա բացարձակ ցուցանիշ է Արմավիրի համար: Խնայողությունների հաշվին արդեն 8 դպրոցի ջեռուցման հարց եմ լուծել, 2 դպրոցի ջեռուցման հարց էլ դեռ կլուծեմ: Այս բոլորը խնայողությունների հաշվին՝ կառավարությունից գումար չենք վերցրել: Իմ պաշտոնավարման ընթացքում 20-ից 30 տոկոս՝ կախված պաշտոնից, առողջապահության ոլորտի աշխատակիցների աշխատավարձը բարձրացել է: Մարզպետարանի աշխատողների աշխատավարձն է բարձրացել: Խնայողությունների հաշվին կարողացել ենք Էջմիածնի բուժկենտրոնի ծննդատունը ամբողջովին 1 հարկ վերանորոգել: Դրա համար խնայվել էր մոտ 60 միլիոն դրամ, բայց մենք կարողացանք դա անել 35 միլիոն դրամով, բացումն արել ենք: Շատ ծնողներ արդեն ցանկանում են ծննդաբերել հենց այդ ծննդատանը, էլ չեն գնում հասնում Երեւան: Առաջիկայում նախատեսված է հիվանդանոցների օպտիմալացման գործընթաց: Շենքեր են ազատվելու: Միգրացիոն ծառայության հետ աշխատում ենք՝ մարզում բնակֆոնդ կստեղծենք: Եթե չեմ սխալվում՝ մարզում մոտ 30 ընտանիք փախստական են, որոնց հանդեպ պետությունը պարտավորություն ունի՝ բնակֆոնդով ապահովելու: Չլսված բան է Արմավիրի համար, բայց մենք, կարծում եմ, առաջիկայում այդ հարցն էլ կլուծենք:

Արմավիրի մարզում մեր աշխատանքի արդյունքում անտուն մոտ 25 ընտանիք բնակարան կստանա: Սա բառացիորեն մարզպետարանի, համայնքի, կառավարության եւ իհարկե բարերարների համագործակցության արդյունքն է: Կառավարությունից ոչ մի լումա չվերցնելով՝ մարզում աննախադեպ շինարարական աշխատանքներ են տարվում ասֆալատաշինության գործում: Մոտ 16 համայնքում մենք կարողացել ենք ամենաանցանելի ճանապարհները անցանելի դարձնել: Հիմա կառուցում ենք Սարդարապատ-Նոր Արմավիր ճանապարհը, Տարոնիկի ճանապարհը, Երվանդաշատ-Բագարան ճանապարհը: 45 հատ սուբվենցիոն ծրագիր, 28 հրատապ ծրագիր: Հիվանդանոցներն ըստ օրենքի պետք է ունենան 2 հոսանքի գիծ, որը կսպասարկի արտակարգ դրությունների ժամանակ: Ես անակնկալ այց կատարեցի Արմավիրի ԲԿ եւ պարզեցի, որ այդ հոսանքի գծերը լինում են այն, երբ որ 2-ն էլ անջատվում են: Վիրահատական գործողություններ մարզում չեն կարողանում անել եւ ստիպված հիվանդներին տեղափոխում են մայրաքաղաք Երեւան: Ես հանձնարարել եմ 1 ամիս առաջ, հիվանդանոցներում լուծել ենք այլընտրանքային էներգիայի խնդիրը: Գեներատորներ ենք գնել, տեղադրել ենք: Եթե այս կարգի առաջընթացով մենք շարժվենք՝ մի քանի տարի հետո մարզում էլ հրատապ խնդիր չենք ունենա:

Տպել
1022 դիտում

Սերժ Թանկյանը հրապարակել է 2016 թվականին գրած «Արցախյան երգի» տեսանյութը

Բանկային համակարգն ունի բավարար կապիտալ եւ իրացվելիություն՝ սպասարկելու տնտեսությանը ֆինանսական անհրաժեշտ ռեսուրսներով

Ազգային ժողովի պատգամավորները մեկ րոպե լռությամբ հարգեցին հայրենիքի պաշտպանության համար ընկած զինվորների հիշատակը

Ո՞ր դեպքում հայկական կողմը կկիրառի «Իսկանդեր» եւ «ՍՈՒ-25» կործանիչները. պատասխանում է Արծրուն Հովհաննիսյանը

Հացի փռերում, ալրաղացներում եւ այլ ձեռնարկություններում առաջ է եկել լրացուցիչ աշխատուժի կարիք. Արցախը դիմում է օգնության

Ադրբեջանը պետք է անհապաղ դադարեցնի իր ագրեսիվ գործողությունները. Հունաստանի նախկին ԱԳՆ

Այս հակամարտությունը չունի կենսունակ ռազմական լուծում. Կանադա-Հայաստան բարեկամական խմբի ղեկավար

Զինծառայողների հետ կապի դուրս գալը կարող է վտանգել նրանց կյանքը. Արծրուն Հովհաննիսյան

Որևէ կենդանի զինվորական մեր կողմում գերության մեջ չկա․ Արծրուն Հովհաննիսյանը՝ ադրբեջանցի գեներալի գերի ընկնելու մասին

Արցախում զոհված միակ կին զինվորականը 35 տարեկան էր. նրա դին արդեն տեղափոխվել է հայրենի գյուղ

ՀՀ բջջային կապի օպերատորները չեն մեկնաբանում՝ Արցախի հետ ռոումինգը կվերացնե՞ն, թե՞ ոչ

Հեռախոսազրույց են ունեցել Մակրոնն ու Ալիեւը

Նոտարական պալատը հասանելի կլինի 24/7 ռեժիմով

Այս պահին թիրախավորված են նաև բնակավայրերը, ադրբեջանական հրետանին խփում է Մարտակերտ քաղաքին. Արծրուն Հովհաննիսյան

Այս պահին ունենք մոտ 200 վիրավոր, բոլորը պատշաճ բժշկական վերահսկողության ներքո են. Արծրուն Հովհաննիսյան

Դո՛ւրս շպրտեք Թուրքիային ՆԱՏՕ-ից. Նիդերլանդների խորհրդարանի պատգամավոր

Թրամփի վարչակազմը պետք է դադարեցնի անվտանգության ոլորտում Ադրբեջանին օգնության տրամադրումը. սենատոր Բոբ Մենենդես

Ադրբեջանի կողմից «ՏՕՍ» ծանր հրետանային համակարգերի կիրառումը եղել է անարդյունավետ․ ՊԲ

Անհրաժեշտ է ակտիվանալ «Թվիթերում». Հովհաննես Մովսիսյան

Տավուշի սահմանամերձ բնակավայրերի ուսումնական հաստատություններն անցնում են հեռավար ուսուցման