Ասաց՝ եթե գումարը չես բերել, իմ հետ էլ առնչություն չունենաս. ցուցմունք տվեց ԱԱԾ-ում դատավորի դեմ հաղորդում տված վկան

Երեւան քաղաքի ընդհանուր իրավասության դատարանի Կենտրոնի նստավայրում, դատավոր Տաթեւիկ Գրիգորյանի նախագահությամբ, շարունակվում է կաշառք վերցնելու մեջ մեղադրվող դատավոր Գագիկ Հեբոյանի եւ փաստաբան Վահագն Դանիելյանի գործով արտագնա դատական նիստը:

Այսօրվա նիստում հարցաքննվեց գործով առանցքային վկա Բենիկ Հարությունյանը:

Գագիկ Հեբոյանին մեղադրանք է առաջադրվել այն բանի համար, որ նա, զբաղեցնելով ՀՀ Կոտայքի մարզի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Բենիկ Հարությունյանի օգտին իր լիազորությունների շրջանակում գործողություն կատարելու համար 2019 թվականի մարտի 6-ին նրանից անձամբ պահանջել եւ 2019թ. մարտի 27-ին ՀՀ փաստաբանների պալատի փաստաբան Վահագն Դանիելյանի օժանդակությամբ ստացել է առանձնապես խոշոր չափերի կաշառք:

Բենիկ Հարությունյանը դատարանի հարցին ի պատասխան ասաց, որ ամբաստանյալներից որեւէ մեկի հետ թշնամական հարաբերություններ չունի, ինչի ժամանակ Հեբոյանը արձագանքեց. «ստում է»: Նախագահող դատավոր Տաթեւիկ Գրիգորյանը նախազգուշացրեց դատավորին, որ այլեւս չմիջամտի. «Դատարանը ձեր նկատմամբ նկատողություն է հայտարարում»,- ասաց դատավորը:

Բենիկ Հարությունյանը պատմեց, որ ինքը քաղգործով հայցվոր է եղել եւ մտավախություն է ունեցել, որ դատարանը՝ նախագահությամբ դատավոր Գագիկ Հեբոյանի, հայցը պետք է մերժի: «Բայց քանի որ հայցում կար նաեւ երկրորդ մասը, որ ես ներկայացրել էի 175 միլիոն դրամի բռնագանձման խնդրանքով, ես պետք է մուծեի 2,5 միլիոնի չափի պետական տուրք: Նիստի ընդմիջման ժամանակ մոտեցա պարոն Հեբոյանին, ասացի, որ հասկանալի է, որ իմ հայցը պետք է մերժվի, դուք գիտեք, որ ես 2011 թվականից չեմ աշխատում, ունեմ ֆինանսական եւ առողջական խնդիրներ, եթե հնարավորություն կա օրենքի շրջանակներում, խնդրում եմ՝ պետական տուրքից ինձ ազատեք: Պարոն Հեբոյանը ասաց՝ հեսա նայեմ «Պետական տուրքի մասին» օրենքը եւ տեսնենք՝ ինչ հնարավորություն կա, նայեց օրենքը, ասաց՝ միջնորդություն պատրաստի, որ հենց դատը սկսվի, ներկայացնես: Հետո ես այդ միջնորդությունը ներկայացրեցի դատարան, պարոն Հեբոյանը իրավունք չուներ դատաքննության փուլում նոր միջնորդություններ ընդուներ, բայց այդ միջնորդությունը ընդունեց: Ես մտածեցի, որ եթե պետական տուրքից ինձ ազատի, թող իմ ներկայացված հայցը չբավարարի: Ընդմիջման ժամանակ մոտեցավ պարոն Հեբոյանը, ասաց՝ գիտեմ, որ առողջական խնդիրներ ունես, հանարավորություն կա՞ ներկայացնես այդ փաստաթղթղերը, ասացի՝ իհարկե: Մարտի 6-ին գնացի դատարան, պարոն Հեբոյանին հանդիպեցի, ասացի՝ բերել եմ բոլոր փաստաթղթերը, ձեզ տա՞մ, թե ներկայացնեմ գրասենյակ: Ինքը ասաց, որ ներկայացնեմ գրասենյակ, իսկ մնացածի համար ասաց՝ հասկանալի ա, թե ինչ պիտի անես: Ասացի՝ չէ, հասկանալի չի, ասաց՝ դե պետական տուրքը դառնում է 3,5 միլիոն դրամ, գոնե դրա կեսը՝ 35000 ԱՄՆ դոլար, պետք է ինձ փող տաս: Պարոն Հեբոյանին ասացի՝ դուք գիտեք, որ ես 2012 թվականից չեմ աշխատում, գիտեք, որ իմ ամբողջ գույքի, դրամական միջոցների վրա կալանք է դրված, նման հնարավորություն չունեմ, սուտ կլինի, որ խոստանամ, հետո չկատարեմ: Դե լավ՝ ասաց, ուրեմն, պայմանավորվենք մինչեւ ամիսի 18-ը (վճռի հրապարակման օրը) աշխատի գոնե գումարի հարցը լուծես: Ես չխոստացա պարոն Հեբոյանին ոչինչ: Մարտի 18-ին եկել եմ դատարան, որպեսզի լսեմ դատավճիռը, սակայն Հեբոյանը իջավ ներքեւ, ասաց՝ չեմ հասցրել հրապարակել, ապա հարցրեց՝ բա էն հարցը ի՞նչ եղավ, ասացի՝ գումար չեմ կարող վճարել: Ասաց՝ եթե գումարը հիմա չես բերել, իմ հետ էլ առնչություն չունենաս, կբերես փաստաբանական գրասենյակ, կտաս Վահագին (խոսքը փաստաբան Վահագն Դանիելյանի մասին է,-հեղ.): Ես հասկացա, որ եթե գումարի հարցը չլուծեմ, ապա իմ մյուս գործերով եւս խնդիրներ կունենամ»,- մանրամասնեց գործով առանցքային վկան։ 

Նա ասաց, թե հասկանալով, որ այդ գումարը չի կարող վճարել, մարտի 20-ին այլընտրանք չունենալով՝ գնացել է ՀՀ ազգային անվտանգության ծառայություն եւ տեղյակ պահել, որ հայտնվել է անելանելի վիճակում: Դրանից հետո մարտի 26-ին ԱԱԾ աշխատակիցների ուղեկցությամբ գնացել է դատարան, որտեղ մի երիտասարդ իրեն ասել է՝ գնա փաստաբանական գրասենյակ, այնտեղ քեզ սպասում են. «Գնացի Վահագի գրասենյակ, մի կին կար, ասաց՝ ի՞նչ հարցով եք, ասացի՝ Հաբոյանն ինձ լավություն է արել՝ պետական տուրքից ազատել է, պետք է գումար փոխանցեմ, հարցրեց՝ ի՞նչ գումար, ասացի՝ կաշառք է»,- ասաց վկան. «Օ՜»,- տեղից արձագանքեց դատավոր Գագիկ Հեբոյանը:

Շարունակելով՝ վկան ասաց. «Կինը հարցրեց, թե ո՞ր քաղաքացիական գործն է, բացեց, նայեց, ասաց՝ պետական տուրքի հետ կապված խնդիր ունեք, ասացի՝ չգիտեմ կաշառք է, թե՞ պետական տուրք։ Կինն ասաց՝ Վահագը հաջորդ օրը կգա։ Հունիսի 27–ին հանդիպեցի Վահագին, ասաց՝ մեքենայի դուռը բաց է, տար, գումարը գցիր մեքենայի մեջ, ես էլ տարա, գցեցի մեջը»,- պատմեց վկան։

Գործով մեղադրյալ Վահագն Դանիելյանի պաշտպան Հենրիկ Մաղաքյանը վկայից հետաքրքվեց, թե երբ է հանվել վերջինիս գույքի վրա դրված արգելանքը։ Բենիկ Հարությունյանը նշեց, որ այս տարվա մայիսին։ Պաշտպանի ճշտող հարցին թե ի՞նչ հիմքով է հանվել արգելանքը, ինչ գործի շրջանակում, եւ արդյոք դա կապ ունի սույն քրեական գործի հետ, վկան ասաց, թե չի ցանկանում այս հարցին պատասխանել:

Նշենք, որ Բենիկ Հարությունյանը սույն քրեական գործով նախաքննության սկզբում ունեցել է մեղադրյալի կարգավիճակ՝ մեղադրվելով ՀՀ քրեական օրենսգրքի 312-րդ հոդվածով (կաշառք տալը): Հետագայում նրա նկատմամբ քրեական հետապնդումը հանցակազմի բացակայության հիմքով կարճվել է: Պաշտպան Մաղաքյանի հարցին՝ տեղյա՞կ է արդյոք՝ ինչ պատճառաբանությամբ է իրեն առաջադրված մեղադրանքը հանվել, վկան պատասխանեց․ «Քննիչին հարցրեք»։ Պաշտպանի մյուս հարցին՝ արդյո՞ք դրանից հետո ինքը հարցաքննվել է, վկան պատասխանեց, թե չի հիշում:

Բենիկ Հարությունյանի հարցաքննությունը կշարունակվի հաջորդ նիստին. այն տեղի կունենա հուլիսի 10-ին:

Տպել
3879 դիտում

Ղազախստանում ՀՀ դեսպանության ջանքերով 15 ՀՀ քաղաքացի, ինչպես նաև 1 ԼՂՀ քաղաքացի մեկնել է Հայաստան

Երկրաշարժ Մարմարաշեն գյուղից 3 կմ հարավ-արևելք. ուժգնությունը կազմել է 3 բալ

«Արարատ Ցեմենտ»-ում, ՀԷՑ-ում, «Նոր Զովքի» ցանցում ԱԱՏՄ-ն իրականացրել է կասեցումներ, իսկ Նոր Նորքում՝ ուժեղացված ստուգայց

Հայաստանում ՌԴ ավելի քան 1330 քաղաքացի մասնակցել է ՌԴ Սահմանադրության փոփոխությունների քվեարկությանը

Վայքից դեպի Զեդեյա ճանապարհին բախվել են շտապ օգնության «Ford»-ն ու «Toyota Camry»-ն. 9 տուժած կա

Քվեաթերթիկների 99,9%-ի հաշվարկով, ՌԴ ընտրողների 77,93%-ը կողմ են Սահմանադրության փոփոխություններին

Պատգամավորներն առաջարկում են դատավորներին բարձր թոշակ տալ. նախկին դատավորը մեկնաբանում է նախագիծը

ՌԴ-ում Սահմանադրական փոփոխությունների հանրաքվեի ձայների կեսի հաշվարկով կողմ է քվեարկել 76,24%-ը. նախնական

Ռոբերտ Քոչարյանը հրաժարվել է ՔԿԾ-ի դեմ հայցից. դատարանի որոշմամբ՝ վարույթը կարճվել է

Արմեն Թավադյանի գործով դատական ծախսերը մոտ 2.5 մլն դրամ են. պաշտպանը միջնորդեց վերացնել նրա գույքի կալանքը

Տեղի է ունեցել Իրանի, Ռուսաստանի ու Թուրքիայի նախագահների` Սիրիայի հարցով առցանց գագաթնաժողովը

Լուսակունք համայնքում կկառուցվի լուսավորության ցանց եւ ոռոգման ջրատարի ներքին ցանցի հիմնանորոգման աշխատանքներ

Գյումրու ինֆեկցիոնում կորոնավիրուսով 89 հիվանդ է բուժվում. հունիսի 30-ին հաստատվել է 57 նոր դեպք

Սուբվենցիոն ծրագրերով Նորատուսում կկառուցվի համայնքապետարանի շենք եւ կասֆալտապատվեն ճանապարհներ

Ծիրանատոնն էլ այս տարի հեռավար նշվեց. ծառ տնկելու, մշակույթի ու արվեստի դասեր՝ «Յոթ մուսաների» այգում

Արսեն Թորոսյանն այսօր այցելել է Վեդու և Արտաշատի բժշկական կենտրոններ

Արագածոտնի մարզում այս տարի իրականացվող սուբվենցիոն ծրագրերն ավելացել են 3 անգամ

Գյումրիում քննական 3 կենտրոն է ձևավորվել՝ թիվ 10, 11, 21 դպրոցներում

Հատակը, պատերը, կրպակները, կահույքը, երեխաների խաղասենյակները, զուգարանները ախտահանվում են օրական առնվազն 2 անգամ. ԱԱՏՄ

Ձայների 25 %-ի հաշվարկով ՌԴ-ում ընտրողների 73,24 տոկոսը կողմ է Սահմանադրության փոփոխություններին