Հրդեհ վագոն-տնակում եւ ինքնասպանության փորձի կանխում Կիևյան կամրջի վրա. ԱԻՆ

Հունիսի 17-ին, ժամը 19:45-ին «911» ծառայությանն ահազանգ է ստացվել, որ Երևան քաղաքում քաղաքացին փորձում է ինքնասպանություն գործել՝ ցած նետվելով Կիևյան կամրջից: Այս մասին հայտնում են ԱԻՆ-ի մամուլի ծառայությունից:

Դեպքի վայր են մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ, Ճգնաժամային կառավարման ազգային կենտրոնի օպերատիվ խումբը և հոգեբանական աջակցության բաժնի հրահանգիչը:

Փրկարարները ոստիկանության աշխատակիցների հետ համատեղ կանխել են քաղաքացի Վ.Ղ.-ի (ծնված 1971 թ.) ինքնասպանության փորձը: Վերջինս ոստիկանության աշխատակիցների կողմից տեղափոխվել է ոստիկանության Մաշտոցի բաժին:

Հոգեբանական աջակցության բաժնի հրահանգիչը Վ.Ղ.-ին ցուցաբերել է հոգեբանական աջակցություն:

Հրդեհ վագոն-տնակում

Հունիսի 17-ին, ժամը 18:01-ին «911» ծառայությանն ահազանգ է ստացվել, որ Երևան քաղաքի Րաֆֆու փողոցում՝ գորգերի շուկայի մոտակայքում գտնվող երկաթե վագոն-տնակում, հրդեհ է բռնկվել, ներսում առկա են պահեստավորած գորգեր:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից երկու մարտական հաշվարկ:

Հրդեհը մեկուսացվել է ժամը 18:29-ին, մարվել` 19:25-ին:

Մասամբ այրվել են վագոն-տնակի (սեփականատեր՝ Ա. Շ.) ներսի պատերի (մոտ 15 քմ) և տանիքի (մոտ 15 քմ) փայտյա կառուցատարրերը և ներսում պահեստավորած գորգերը (մոտ 10 խմ): 

Փրկարարներն արգելափակումից դուրս են բերել ավտոմեքենաները

Հունիսի 18-ին, ժամը 08:42-ին «911» ծառայությանն ահազանգ է ստացվել, որ Վայոց Ձորի մարզի Ջերմուկ քաղաքից դեպի Քարվաճառ տանող հատվածում քաղաքացիները մոլորվել են. անհրաժեշտ է փրկարարների օգնությունը:

Դեպքի վայր են մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ և մարզային փրկարարական վարչության օպերատիվ խումբը:

Փրկարարներն արգելափակումից դուրս են բերել «Lexus» (վարորդ՝ Ա.Խ. և 2 ուղևոր) և «Toyota» (վարորդ՝ Է.Ա. և 2 ուղևոր) մակնիշների ավտոմեքենաները:

Էլեկտրաքարշակը բախվել է ավտոմեքենային. կա տուժած

Հունիսի 18-ին, ժամը 02:28-ին «911» ծառայությանն ահազանգ է ստացվել, որ Արարատի մարզի Արարատ քաղաքում՝ երկաթգծի անցումի մոտ, գնացքը բախվել է ավտոմեքենային, առկա է գազի արտահոսք:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Պարզվել է, որ Արարատ-Արտաշատ երկաթգծի 560/4 կմ-ին բախվել են էլեկտրաքարշակը (մեքենավար՝ Մ.Ն., ծնված 1966 թ.) և «ՎԱԶ-21011» մակնիշի  ավտոմեքենան (վարորդ՝ Ա.Ա., ծնված 1979 թ.):

Մինչ փրկարարների՝ կանչի վայր հասնելը վարորդ Ա.Ա.-ն քաղաքացիների ուժերով դուրս է բերվել ավտոմեքենայից և հոսպիտալացվել Արարատի ԲԿ: Բժիշկները տուժածի առողջական վիճակը գնահատել են բավարար:

Փրկարարները հոսանքազրկել են ավտոմեքենան և փակել գազի բալոնի փականը:

ՃՏՊ Գյումրի-Երևան ավտոճանապարհին. տուժածը հոսպիտալացվել է

Հունիսի 18-ին, ժամը 03:59-ին «911» ծառայությանն ահազանգ է ստացվել, որ Գյումրի-Երևան ավտոճանապարհի 22-րդ կմ-ին տեղի է ունեցել ՃՏՊ. անհրաժեշտ է փրկարարների օգնությունը:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Պարզվել է, որ Գյումրի-Երևան ավտոճանապարհի 22-րդ կմ-ին «Opel Astra G » մակնիշի (վարորդ՝ Ա.Ո.,  ծնված 1980 թ.) ավտմեքենան դուրս է եկել ճանապարհի երթևեկելի հատվածից և շրջվել: Պատահարի հետևանքով վարորդը ստացել է տարբեր մարմնական վնասվածքներ և հոսպիտալացվել Գյումրու ԲԿ, որտեղ բժիշկները տուժածի առողջական վիճակը գնահատել են միջին ծանրության:

Փրկարարները հոսանքազրկել են ավտոմեքենան և փակել գազի բալոնի փականը:

ՃՏՊ Սպիտակ-Գյումրի ավտոճանապարհին. կա զոհ

Հունիսի 17-ին, ժամը 22:16-ին «911» ծառայությանն ահազանգ է ստացվել, որ Լոռու մարզի Արևաշող գյուղի մոտակայքում գտնվող գազալցակայանին հարակից տարածքում տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը:

Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:

Պարզվել է, որ Մ-7 ավտոճանապարհի Սպիտակ-Գյումրի հատվածի 2-րդ կմ-ին բախվել են «Volkswagen Golf» (վարորդ՝ Ս.Ա., ծնված 1981 թ.) և «Mercedes» (Գ.Թ., ծնված 1984 թ.) մակնիշների ավտոմեքենաները:

Մինչ փրկարարների՝ կանչի վայր հասնելը «Volkswagen Golf» մակնիշի ավտոմեքենայի ուղևորներ Դ. (ծնվ.2003թ.) և Կ. (ծնված 2005 թ.) Ա.-ները հոսպիտալացվել են Սպիտակի ԲԿ, որտեղ բժիշկները նրանց առողջական վիճակը գնահատել են միջին ծանրության:

Փրկարարները «Volkswagen Golf» մակնիշի ավտոմեքենայից դուրս են բերել վարորդի դին, այնուհետև «Mercedes» մակնիշի ավտոմեքենայից՝ վարորդին և մոտեցրել շտապօգնության ավտոմեքենային: Վերջինիս առողջական վիճակը բժիշկները գնահատել են ծանր: