Մենք ոչ մեկին չենք պատրաստվում ունեզրկել, բայց բոլորը պետք է աշխատեն օրինական դաշտում. Գեւորգյան

Մայիսի 22-ին ՀՀ վարչապետ Նիկոլ Փաշինյանի մոտ պետական կառավարման մարմինների ղեկավարների մասնակցությամբ տեղի էր ունեցել խորհրդակցություն, որի ընթացքում քննարկվել էին բյուջետային հավելյալ միջոցների բաշխմանը վերաբերող հարցեր: Վարչապետը նշել էր, որ 62 մլրդ դրամով կգերակատարեն այս տարվա բյուջեի եկամտային մասը: Գումարի մի մասը կուղղվի զինվորականների եւ ուսուցիչների աշխատավարձերի բարձրացմանը, մի մասը՝ ճանապարհաշինությանը: Մոտ 45 մլրդ-ի չափով էլ մնալու է, որը, ինչպես վարչապետն ասաց, պետք է ճիշտ ծախսվի: Երեկ էլ ՀՅԴ-ական Գեղամ Մանուկյանը հանրահավաքի ժամանակ հետաքրքրվում էր, թե ուր է իշխանությունների խոստացած 800-900 մլն դոլարը, որը պետք է ստվերը վերացնելու արդյունքում բյուջե մտներ:

«Ես կարծում եմ, որ 62 մլրդ-ը մի քիչ համեստ սպասում է»,- այս մասին «Հայկական ժամանակ»-ի հետ զրույցում ասաց ԱԺ «Իմ քայլը» խմբակցության պատգամավոր, տնտեսագետ Հայկ Գեւորգյանը:

- Պարոն Գեւորգյան, վարչապետը հայտարարեց, որ առնվազն 62 մլրդ-ով պետբյուջեի եկամտային մասը կգերակատարվի: Սա հարկային եւ մաքսայի՞ն մարմիններից ակնկալվող արդյունքն է:

- Դա 2 ասպեկտ ունի: Մեկը տնտեսական աշխուժությունն է, որն այսօր ակնհայտ է: Այսինքն, դրա շնորհիվ որոշակի լրացուցիչ եկամուտներ կգեներացվեն: Երկրորդը վարչարարությունն է: Այսինքն, ստվերի կրճատումը: Ես կարծում եմ, որ 62 մլրդ-ը մի քիչ համեստ սպասում է: Կարծում եմ՝ հետագայում ավելի կմեծանան այդ սպասումները:

- Գումարի մի մասի վերաբերյալ արդեն հստակ որոշում կա՞, թե ինչպես ծախսել: Ինչպե՞ս կօգտագործի դա կառավարությունը ըստ ձեզ, դարձյալ կգնա որեւէ ոլորտում աշխատավարձերի բարձրացմա՞նը:

- Ես կարծում եմ, որ այդքան էլ արդյունավետ որոշում չի լինի, եթե գնա աշխատավարձերի բարձրացմանը: Որովհետեւ գումարների մի զգալի մասը պետք է ծախսել հետագայում լրացուցիչ եկամուտներ գեներացնելու ակնկալիքով: Այսինքն՝ անել կապիտալ ծախսեր, որոնք մուլտիպլիկատիվ էֆեկտով կբերեն պետական բյուջեի եկամուտների է՛լ ավելի մեծացմանը: Կարծում եմ՝ այդ գումարից հատկացումներ կարվեն պաշտպանության ոլորտին, ինչը լրիվ արդարացված է:

- Երեկ ՀՅԴ-ականները հանրահավաքի ժամանակ հետաքրքրվում էին, թե ո՞ւր է իշխանությունների խոստացած ստվերային 800-900 մլն դոլարը: Վերոնշյալ 62 մլրդը արդյո՞ք չի մտնում այդ 800-900 մլն դոլարի մեջ:

- Ոչ ոք իրենց չի խոստացել, որ մի գիշերվա մեջ պետք է 800-900 մլն-ը վերադարձվի: Իսկ ընթացքում վերադարձվածը շատ ավելի մեծ կլինի, քան իրենց ասած 800 միլիոնը: Եկեք մի պարզ թվաբանություն անենք. առանց որեւէ հարկային փոփոխությունների, տնտեսության ոլորտում դեռեւս այլ օրենքների փոփոխության չգնալով՝ մենք անցած տարվա համեմատ ունեցել ենք արդեն 140 մլրդ ավելի նախատեսված բյուջե, որին գումարվում է եւս 60 մլրդ: Այսինքն, եթե դա վերածենք դոլարի՝ ավելի քան 400 մլն կդառնա: Դա՝ առանց որեւէ օրենսդրական փոփոխությունների, առանց հարկային ռեկետների: Սովորական աշխատանքով հիմա 400 մլն դոլար ավելի գումար ունենք, քան, օրինակ, մինչեւ հեղափոխությունը:

- Երեկ նաեւ կարծիքներ հնչեցին, որ օլիգարխները չեն վերացել, պարզապես օլիգարխ բառը փոխվել է սեփականատեր բառով: Նախ, ի՞նչ ենք հասկանում օլիգարխ ասելով եւ արդյո՞ք այդ համատեքստում կարող ենք դիտարկել սեփականատերերին:

- Որոշ կուսակցություններ բոլորին փորձում են տեղավորել իրենց ստանդարտների մեջ: Մենք ականատեսն ենք եղել, թե ինչպես են մարդկանց ունեզրկում ու ստեղծում մի ուրիշ խավ, որը տիրապետում է այդ սեփականությանը: Ու իրենց ստանդարտներով, իրենց մտածելակերպով, իրենց տեսլականների մեջ դա կայուն տեղ է զբաղեցնում: Մեր գաղափարախոսության մեջ, մեր աշխարհայացքի մեջ նման որեւէ բան չկա ու չի կարող լինել, որովհետեւ մենք բոլորովին այլ աշխարհայացք ունենք: Մենք հաստատում ենք հավասար պայմաններ բոլորի համար ու այդ ընթացքում տնտեսական դաշտ են մտնում այլ գործարարներ, որոնք մրցակցության մեջ են մտնում նախկին գործարարների հետ: Ես ձեզ կարող եմ ասել, որ նրանցից շատերը հարմարվում են օրենքներին: Այսինքն, էլ չգրված օրենքներով գործող տնտեսական դաշտն այլեւս չի լինելու: Մեր որդեգրած քաղաքականությունը դա է: Մենք ոչ մեկին չենք պատրաստվում ունեզրկել, բայց բոլորը պետք է աշխատեն օրինական դաշտում: