Գյումրու ծննդատան ճակատագիրն անորոշ է

Եթե գյումրեցին վատառողջ է եւ կարիք ունի պոլիկլինիկայում ընդհանուր հետազոտվելու, ապա պետք է պատրաստ լինի, որ մարմինը մաս-մաս քննեն բժիշկները: Մի օր սիրտը, հաջորդ օրը թոքերը կամ աչքերը, շաբաթվա երրորդ, չորրորդ օրերը պետք է տրամադրի այլ օրգանների հետազոտությանը: Բայց ոչ թե իր ցանկությունն է, այլ իրավիճակն է այդպես թելադրում: Գյումրու պոլիկլինիկաներում մասնագետներն ամեն օր չէ, որ աշխատում են: Ով էլ գալիս է, մի քանի ժամով է տարածքում: Անկախ գոյացած հերթերից՝ մինչ իր աշխատանքի ավարտը սպասարկում, գնում է:

Խնդիրը միայն Գյումրիում չէ, որ առկա է: ՀՀ Առողջապահության նախարար Արսեն Թորոսյանը ՀԺ-ի հետ զրույցում ասաց՝ հանրապետության այլ մարզերում եւս, նաեւ Երեւանում կա նման խնդիր:

«Հարցեր կան, որոնք նախարարությունը չպետք է լուծի: Նույնիսկ, եթե շատ ուզենա: Եթե մենք խնդիրը դիտարկենք գյուղերում, ուրեմն պետք է ամբուլատորիաների բժիշկների աշխատաժամերով էլ  զբաղվեինք: Բայց դա սխալ մոտեցում է, քանի որ մենք լավ չգիտենք էդ հարցերը, մենք չենք կարող Երեւանում նստած իմանանք, թե ենթադրենք Գյումրու Բեռլին պոլիկլինկայի բժիշկների աշխատաժամերը ինչպես պետք է կազմակերպել՝ հաշվի առնելով քաղաքի եւ բնակիչների կարիքները: Դրա համար կան լիազոր մարմիններ, որն այս դեպքում Շիրակի մարզպետարանն է, պետք է կազմակեպի այդ աշխատանքը: Պետք է մարզպետարանը ջանքեր գործադրի, որ հարցը կարգավորի: Դա պարզ կազմակերպչական խնդիր է, որը պետք է լուծի պոլիկլինիկայի տնօրենը: Հաստիքները որոշվում են սպասարկվող բնակչության թվով, եւ, եթե բնակիչները քիչ են լինում, ապա բժիշկը կամ կես դրույքով է աշխատում, կամ 0.25 դրույքի վրա է լինում: Այդ հարցը պետք է կարգավորվի կոնսոլիդացիայով, երբ շատ բնակիչներ հավաքագրվեն մի բժշկի մոտ, բժիշկն ավելի երկար կաշխատի»,-ասաց Արսեն Թորոսյանը:

Այս բացը նախարարությունը փորձում է կարգավորել նաեւ ընտանեկան բժշկի ինստիտուտի զարգացմամբ: Չի բացառվում, որ առաջիկայում, օրինակ, նյարդաբանական ռեֆլեքսի ստուգման համար ընտանեկան բժիշկն այցելուին ոչ թե նյարդաբանի մոտ ուղարկի, այլ հենց ինքն էլ ստուգի:

Ի՞նչ ճակատագիր է սպասում Գյումրու ծննդատանը: Ներկա պահին որեւէ հստակ որոշում չկա: Նախարարի ձեւակերպումներից հասկանալի էր, որ ծննդատունը փակելու մտադրություն այս պահին չկա, սակայն բուժհաստատությունը խնդիրներից ազատելու ծրագիր եւս չկա: Թերծանրաբեռնվածությամբ աշխատելու պատճառը ծննդատան պատասխանատուները պայմանավորում են Գյումրիում բացված երկրորդ ծննդատան առկայությամբ: Նախարարն ասաց՝ սխալ կարծիք է: «Մեկ հաստատության կողմից մեծ թվով ծառայությունների մատուցումը չի նպաստում ծառայությունների որակի բարձրացմանը: Կոնկրետ Գյումրու ծննդատան վերաբերյալ այս պահին որեւէ որոշում չկա, թե ինչ պետք է լինի: Գիտեմ, որ վիճակը լավ չէ, այսինքն, կարիք ունի որեւէ լուծման, ներդրումների կամ այլ ծննդատների հետ վերամիավորման: Կարող եմ ասել, որ լուծումները չեն լինի բոլորին գոհացնող, դա միանշանակ է: Որեւէ ձեւով պետք է կոմպրոմիսի գնալ այդ հարցը լուծելու համար: Մենք չենք կարող բոլոր կողմերին գոհացնել: Այլապես կունենանք այն, ինչն ունենք այսօր: Նախնական բանավոր քննարկումներ կան մարզպետարանի հետ: Բայց դրանք վերջնական չեն: Մենք փորձում ենք հարցերին մոտենալ համապարփակ եւ ոչ թե կետային»:

Առողջապահական համակարգի ամենամեծ խնդիրն, ըստ նախարար Թորոսյանի, կադրերի բացակայությունն է: «Սարքավորումներ առնելը հնարավոր է, շենքերը վերանորոգել կամ նորը կառուցել նույնպես հնարավոր է, բայց կադրերին բերել եւ լավ պայմաններ ստեղծել, որ նրանք մնան ու աշխատեն մարզում, շատ բարդ է: Այդ ուղղությամբ քայլեր արվում են նպատակային կլինիկական օրդինատուրաների շնորհիվ, երբ որ պետության հաշվին ուսանողները սովորում եւ ուղեգրվում են մարզային բուժհաստատություններ»:

Նույն նպատակով նախարարությունը նաեւ իրականացնում է կարճատեւ գործուղման ծրագիրը: Երբ որեւէ մարզում կամ քաղաքում ինչ-որ նեղ մասնագետի անհապաղ կարիք է զգացվում, ապա տվյալ մասնագետին նախարարությունը ժամանակավորապես Երեւանից գործուղում է պահանջված վայր:

«Մենք ենք վճարում, եւ բավական լավ վարձատրություն է, որպեսզի բժիշկները շահագրգռված լինեն եւ գնան: Նոյեմբերյանում վիրաբույժի կարիք կար, եւ Երեւանի մեծ կլինիկաներից մեկից մենք մեկ վիրաբույժի գործուղել ենք 3 ամիս աշխատելու»:

Գյումրիում եւ Շիրակի մարզում նաեւ մասնագետների ու բուժսարքավորումների պակաս կա: Սրանով պայմանավորված, օրինակ Մարալիկի առողջության կենտրոնի շենքը վերանորոգվեց, շահագործվեց ու փակվեց:

«Լավ պատերի ներսում որեւէ սարք չկա, որ մատուցվի լավ ծառայություն, մենք դրա մասին տեղյակ ենք: Պետք է հաշվի առնենք բուժհաստատության տեղակայումը, եւ տարածքում որոշակի հեռավորության վրա եւս մեկ բուժհաստատության առկայությունը, որովհետեւ 10 կմ-ի վրա չի կարող 2 մեծ բուժհաստատություն գոյատեւել թե՛ ֆինանսական կայունության տեսանկյունից, թե՛ բուժօգնության որակի: Առողջապահությունը սովորական տնտեսության ոլորտ չէ եւ ունի յուրահատկություններ հենց ծառայությունների կենտրոնացման առումով: Այս ոլորտում ինչքան ծառայությունները կենտրոնացված են, այնքան որակը բարձր է եւ գինը՝ մատչելի»:

Ըստ նախարարի, ՀՀ-ում մատների վրա կարելի է հաշվել մարզերի այն բժշկական կենտրոնները, որոնք անմխիթար վիճակում են: «Մնացած բոլոր մարզերում ունենք լավ առողջապահություն, լավին ձգտող առողջապահություն»,-զրույցը եզրափակեց նախարարը:

Տպել
639 դիտում

Փրկարար ծառայություն ընդունվողներն անպայման եռամսյա փորձաշրջան պետք է անցնեն. խորհրդակցություն ԱԻՆ-ում

Հայաստանի համախառն միջազգային պահուստներն ավելացել են 19%-ով. ՀՀ կառավարություն

Թիվ 156 դպրոցում պայթուցիկ սարք չի հայտնաբերվել. ԱԻՆ

ՊՆ 2-րդ զորամիավորումում մարտական հրաձգությամբ զորավարժություն է անցկացվել

Ահազանգ է ստացվել, որ 156 դպրոցում պայթուցիկ սարք կա, տեղում են փրկարար ծառայության աշխատակիցները  

Իտալական շուկայի մոտ 30 ձեռնարկություններ առաջիկայում կգան Հայաստան․ Իտալիայում ՀՀ դեսպան

Արա Մինասյանն ընդդեմ Արսեն Թորոսյանի գործով վերաքննիչ բողոքները մերժվել են

ՀՀ վարչապետն ու Աննա Հակոբյանն այցելել են Հռոմի Սուրբ Նիկողայոս Հայ Կաթողիկե եկեղեցի (տեսանյութ, լուսանկարներ)

Երթևեկության կազմակերպման փոփոխություն Երևան քաղաքի Արցախի պողոտայի և Այվազովսկու փողոցի խաչմերուկում

Սարհատ Պետրոսյանը ներկայացել է ոստիկանություն՝ իր հայտարարությունների վերաբերյալ պարզաբանումներ տալու

Կոնստանտին Օրբելյանը ներկայացվել է «Գրեմմի». նախորդ տարի հաջողություն չէր ունեցել

Դերասան Արտյոմ Կարապետյանին դանակով սպառնացած երթուղայինի վարորդը հայտնաբերվել է (տեսանյութ)

«Ջերմոց կմշակեմ». Լեւոն Երանոսյանը՝ իր հետագա անելիքների մասին

ՀՀ և ՌԴ դատախազությունների դատախազները Մոսկվայում քննարկել են անչափահասներին վերաբերող քրգործերով խնդիրները

Բրեգովիչի նոյեմբերի 24-ի համերգը չեղարկվել է քաղաքապետարանի պատճառով. մարդիկ զանգվածաբար վերադարձրել են տոմսերը

ՀՀ վարչապետը՝ ամենաակտիվ ֆեյսբուքյան էջ վարող քաղաքական լիդերների տասնյակում. Twiplomacy

ԱԱԾ-ում ապօրինի որդեգրման դեպքերով հարուցված քրեական գործը փոխանցվել է ՀՀ քննչական կոմիտե

Վերաքննիչ քրեական դատարանը վարույթ է ընդունել Ռ. Քոչարյանի պաշտպանների բողոքը

2004-ի այս օրը պայթեցվեց կամ հրկիզվեց «Հայկական ժամանակ» օրաթերթի գլխավոր խմբագրի` Ն. Փաշինյանի մեքենան (լուսանկարներ)

Քթի վիրահատությունից հետո երիտասարդը կորցրել է ձայնը. մեղադրանքներ ու պարզաբանումներ