Ընտրությունների ելքը վճռելու է բացառապես մեկ գործոն` դա աբովյանցու քվեն է. Ռոմանոս Պետրոսյան

Հունիսի 9-ին Կոտայքի մարզի Աբովյան քաղաքում տեղի են ունենալու քաղաքապետի ընտրություններ: Գործող համայնքապետ Վահագն Գեւորգյանը հայտարարել էր, որ կրկին մասնակցելու է ընտրություններին: Օրերս Կոտայքի մարզպետ Ռոմանոս Պետրոսյանն էլ լրագրողների հետ զրույցում հայտարարեց, որ «Քաղաքացիական պայմանագիր» կուսակցությունն առաջադրելու է իր թեկնածուին:

«Հայկական ժամանակ»-ի հետ զրույցում Ռոմանոս Պետրոսյանը հրապարակեց ՔՊ-ի թեկնածուի անունը:

- Պարոն Պետրոսյան, ո՞վ է «Քաղաքացիական պայմանագիր» կուսակցության թեկնածուն՝ Աբովյանի քաղաքապետի ընտրություններում:

- ՔՊ վարչությունը որոշում է կայացրել Աբովյանի քաղաքապետի հերթական ընտրություններին առաջադրելու իր թեկնածուին: Այդ թեկնածուն Աբովյանի «Քաղաքացիական պայմանագիր» կուսակցության տարածքային կառույցի անդամ է, նախկինում տեղական ինքնակառավարման ոլորտում բավականին փորձ ունեցող Գրիգոր Գուլյանը: Գուլյանը մեր քաղաքական թիմի, մեր կուսակցության լիարժեք անդամ է եւ կիսում է մեր քաղաքական տեսլականը՝ հայաստանյան քաղաքական ներկապնակում ու մասնավորապես՝ Աբովյան քաղաքի տեղական ինքնակառավարման գործում մեր պատկերացումներն ու առաջիկայում իրականացվելիք ծրագրերը:

- Գրիգոր Գուլյանը կարծես թե այդքան էլ հայտնի անուն չէ հանրության շրջանում: Այս առումով ՔՊ-ն խնդիր չի՞ ունենա:

- «Քաղաքացիական պայմանագիր» կուսակցությունն ընդամենը 4 տարեկան է: Եթե հայտնիության առումով նայենք, ապա եզակի քաղաքական գործիչներ ունենք այսօր Հայաստանում: Նրանց գերակշիռ մասն արդեն իսկ ՔՊ-ում են ու իրենց քաղաքական մաքուր անցյալով, սկզբունքային եւ գաղափարական գործունեությամբ այսօր կարողանում են մաս կազմել այն բարեփոխումների ընթացքին եւ առհասարակ այն քաղաքական գծին, որն իրականացնում ենք հետհեղափոխական Հայաստանում:

Այսինքն, հայտնի լինելու կամ հայտնի չլինելու հանգամանքը գրեթե չի խոչընդոտում մեր ծրագրերի իրականացմանը: Մեր գործիչներից էլ շատ-շատերը հայտնի չէին, բայց այսօր լավագույնս իրականացնում են իրենց վրա դրված պարտականություններն ու լիազորությունները: Գրիգոր Գուլյանի մասին պետք է ասեմ, որ տեղական ինքնակառավարման մարմնում հայտ ներկայացնող քաղաքացին եւ գործիչը պարտադիր չէ, որ համապետական ճանաչում ունենա, եթե ինքն այդ նույն քաղաքում ծնվել է, գործում ու ապրում է եւ նաեւ այդ քաղաքում ունի մեծ շրջապատ եւ հարգանք: Իր մասնագիտական գործունեության ընթացքում նա աչքի է ընկել բազմաթիվ դրական հատկանիշներով եւ պիտի շեշտեմ, որ նաեւ լայն շրջապատ ունեցող անհատ է: Լայն կոնսոլիդացիայի արդյունքում է Գուլյանը ներկայացվել վարչությանը եւ վարչությունը, հաշվի առնելով կուսակցական ակտիվի քննարկումները, ամրագրել է, որ Աբովյանի քաղաքապետի ընտրություններում ՔՊ թեկնածուն Գրիգոր Գուլյանն է:

- Որպես ՔՊ վարչության անդամ, ինչպե՞ս եք գնահատում ձեր կուսակցի շանսերն Աբովյանի քաղաքապետի ընտրություններում:

- Իմ կուսակցի շանսերը ընտրություններում բավականին բարձր եմ գնահատում: Նաեւ այն կոնտեքստում, որ Աբովյանում դեռեւս տեղական ինքնակառավարումն իրականացվում է նախկին իշխանության ներկայացուցիչ քաղաքական ուժի աջակցությունը վայելող քաղաքապետի կողմից: Աբովյանում դեռեւս ունենք որոշակի երեւույթներ ու առերեւույթ նաեւ խնդիրներ, որոնք ազդում են կյանքի որակի վրա եւ ճիշտ քաղաքականություն վարելու արդյունքում դրանք կարող են մեկընդմիշտ լուծվել՝ շատ ավելի կարճ ժամկետներում, քան այս վերջին տարիներին է փորձ արվել: Ասեմ ավելին՝ «Քաղաքացիական պայմանագիր»-ը հեղափոխական այն կուսակցությունն է, որը կենտրոնական իշխանության, տարածքային կառավարման մարմիններում արդեն լիարժեք կառավարում է պետական համակարգում, սակայն տեղական ինքնակառավարման ոլորտում դեռեւս հին են՝ հին քաղաքական մշակույթ կրող, նախկին իշխանությունների մաս կազմող կուսակցություններից մնացած գործիչները: Ու, եթե Աբովյանի քաղաքապետի ընտրություններին նաեւ գլոբալ քաղաքականության կոնտեքստից նայենք, ապա սա հեղափոխության տրամաբանական շարունակությունն է, հեղափոխության նոր առաքելությունն է, հեղափոխության նոր պահանջները հասցնելու ամենահեռավոր համայնքներ, ամենահեռավոր գյուղեր:

Իհարկե, Աբովյանը հեռավոր համայնք ու գյուղ չէ: Պարզապես Աբովյանում ունենք հերթական ՏԻՄ ընտրություններ եւ հասունացել է պահը, որ այստեղ եւս պետք է ՏԻՄ փոփոխություններ լինեն: ՔՊ-ն, որպես նաեւ իշխող ուժ, անհրաժեշտ է համարում Աբովյանում ունենալ իր թեկնածուն եւ քաղաքացու վճռորոշ քվեով իր թեկնածուի ընտրվելու պարագայում Աբովյանում իրականացվելու են այն բարեփոխումները, որոնք իրականացնում ենք այն քաղաքներում եւ բնակավայրերում, որտեղ մեր կուսակցական եւ քաղաքական արժեհամակարգը կիսող գործիչներ են ընտրվել:  

- Գիտենք, որ Աբովյանը տարիներ շարունակ եղել է ԲՀԿ-ի եւ նրա առաջնորդ Գագիկ Ծառուկյանի իշխանության ներքո: Անգամ ժամանակին խոսակցություններ են եղել, որ Աբովյանում արգելվել է մի քանի տեսակ գարեջուր վաճառել խանութներում: Արդյո՞ք այժմ աբովյանցին այնքան ազատ է, որ կարող է գնալ եւ ազատ ընտրել նրան, ում ցանկանում է:

- Այո, անշուշտ աբովյանցին այնքան ազատ է, որ կարող է իր քվեն տալ իր նախընտրած քաղաքական ուժը ներկայացնող թեկնածուին եւ այդ քվեն լիարժեքորեն իրացնել, քանի որ դրա երաշխավորը այլեւս Հայաստանի Հանրապետությունն է: Եթե նախկինում, օրինակ՝ 2017 թվականին, ես, որպես ԵԼՔ դաշինքի պատգամավորության թեկնածու, միայն մեր քաղաքական դաշինքի երաշխիքը ունեի եւ պետության կողմից այդ երաշխիքը չունեի, որ իմ ընտրողի քվեն իրացվելու է եւ բոլոր 24-26 տեղամասերում մենք վստահված անձինք էին նշանակում, որպեսզի մեր քվեն պաշտպանեն, ապա այսօր աբովյանցու քվեն պաշտպանողը նախ եւ առաջ ՀՀ-ն է, նախ եւ առաջ կառավարությունն է, որին ժողովուրդն է պատվիրակել յուրաքանչյուր ընտրություն լեգիտիմության 100 տոկոսանոց բաղադրիչով անցկացնել: Աբովյանցուն դա ես երաշխավորում եմ, որպես պետական կառավարման ներկայացուցիչ:

Իսկ ձեր բնութագրերի հետ կապված որոշակի անհամաձայնություն ունեմ, քանի որ այդքան էլ այդպես ծայրահեղացված չէր Աբովյանում տվյալ քաղաքական ուժի գերիշխանությունը: Բայց քաղաքական առումով՝ այո, պիտի ասեմ, որ Աբովյանում տասնամյակներ շարունակ 1 ուժի կենտրոնից են թելադրվել խաղի կանոնները, 1 կուսակցություն է ամբողջությամբ տիրապետել ՏԻՄ բոլոր մարմինների գործողություններին՝ քաղաքապետ, ավագանու անդամներ հիմնականում այդ ուժի ներկայացուցիչներն են եղել: Ինչպես նաեւ համայնքային կազմակերպություններում ղեկավար անձինք, աշխատողները, բոլորն, առանց բացառության, որպես կանոն, այդ քաղաքական ուժի կոորդինացմամբ են գործել: Բայց այսօր ունենք տրամագծորեն այլ պատկեր, այսօր ունենք իրավագիտակից քաղաքացի, ունենք քաղաքացիական բարձր գիտակցություն Աբովյան քաղաքում եւ քաղաքացին ինքը տեսնում է, թե ինչպիսի բարեփոխումներ ենք իրականացնում մարզի այլ բնակավայրերում, ինչպիսի բարեփոխումներ է իրականացնում կառավարությունը այս տարածաշրջաններում: Ու այսօր տեղական ինքնակառավարման մարմիններում երկար սպասված փոփոխությունների ժամանակն է, որպեսզի կենտրոնական իշխանությունների, տարածքային կառավարման մարմինների եւ ՏԻՄ-երի միջեւ լինի քաղաքական-մշակութային, արժեհամակարգային ամբողջական ըմբռնում, որպեսզի սուբվենցիոն ծրագրերի տեսքով, հրատապ ծրագրերի տեսքով կառավարության ծրագրերը արդյունավետորեն ներդրվեն նաեւ այդ համայնքում: Աբովյանի գործող քաղաքապետի դեպքում այդպես չէ, ինչը ես  որակել էի քաղաքական սաբոտաժ:

- Եթե նայենք ռեսուրսներին՝ արդյո՞ք ԲՀԿ-ն քաղաքում չունի այդ ռեսուրսները՝ աշխատուժ, ուսանողներին անվճար երթեւեկության հնարավորություն՝ իր ձայներն ապահովելու համար:

- Դուք իրավացի եք, ավանդաբար ուժի կենտրոն հանդիսացած կուսակցությունն ունի իր բավականին ազդեցիկ լծակները՝ Աբովյանի ՏԻՄ ողջ համակարգում: Բավականին լուրջ ադմինստրատիվ ու բիզնես ռեսուրսներ ունեն: Բայց պետությունն իր դիրքերում է եւ օրենքով սահմանված կարգով՝ պետական մարմինները, համապատասխան գերատեսչությունները հետեւելու են նախընտրական եւ ընտրական ողջ գործընթացներին ու օրենքով սահմանված կարգով էլ կասեցնելու եւ հակազդելու են այնպիսի գործողություններին, որոնք կարող են ուղղակի կամ անուղղակի ներգործության փորձ ունենալ ընտրությունների վրա: Ընտրությունների ելքը վճռելու է բացառապես մեկ գործոն` դա աբովյանցու քվեն է: Աբովյանի քաղաքացին գնալու է ընտրատեղամաս եւ իր ընտրությունն է կատարելու հօգուտ այն քաղաքական ուժի, այն գործչի, այն թեկնածուի, որը, ինչպես ասում են՝ իր ծոցից է ելած, իր ցավը կիսում է եւ պատկերացնում է, թե քաղաքում ինչ առաջնահերթ խնդիրներ կան ու հավատարիմ է դրանք իրականացնելու տեսլականին: Իհարկե, տարածքային եւ կենտրոնական իշխանությունների գործուն աջակցությամբ:

- Ըստ ձեզ ուսանողը չի՞ մտածելու, որ եթե օրինակ չքվեարկեց այս կամ այն անձի օգտին՝ ինքն վաղն այլեւս անվճար չի գա Երեւան:

- Աբովյանի ուսանողը, իմ խորին համոզմամբ, ոչ թե մտածելու է, որ քվեարկի այդ քաղաքական ուժի օգտին եւ շարունակի երթեւեկել անվճար ավտոբուսներով, այլ այդ ուսանողը, վստահաբար կարող եմ ասել, քվեարկելու է այն թեկնածուի օգտին, որն այդ քաղաքում իրավահավասարության, տեղական ինքնակառավարման բյուջեի ճիշտ կառավարման, քաղաքի ռեսուրսների, ինչպես նաեւ տրանսպորտային ցանցերի, աղբահանության, կանաչ գոտիների, հողային ֆոնդի տնօրինման գործում գործելու է միայն այդ ուսանողի շահերից: Այսօր մեր Աբովյանի ուսանողին շատ ավելի հետաքրքիր է կանաչ գոտիները վերականգնելու, կանաչ ծառահատումները բացառելու, քաղաքին քաղաքի տեսք հաղորդելու, փողոցային առեւտուրը վերացնելու, քաղաքային շուկայի մշակույթը վերականգնելու հրամայականը, քան ընդամենը անվճար երթեւեկելու: Անվճար երթեւեկելու կարիք չունի աբովյանցին: Աբովյանցին աշխատանք կունենա, արժանապատիվ աշխատավարձ կստանա եւ արժանապատիվ վարձատրությամբ էլ իր հոգսերը կհոգա:

- Այսինքն, նաեւ աշխատավոր մա՞սը ազատ կքվեարկի, քանի որ աշխատուժի զգալի մասը դարձյալ նույն ուժի հետ կապվող ընկերություններում է աշխատում:

- Այո, մենք այսօր ունենք տարիներով կառավարվող մի համակարգ, որտեղ աշխատանքի ընդունվելը պրակտիկորեն անհնար է եւ Աբովյանի հենց համայնքային ենթակայության օղակներում, եթե փոքրիկ հարցում անցկացնեք, ապա աշխատակազմի ճնշող մեծամասնությունը, եթե ոչ ամբողջ աշխատակազմը բացառապես մեկ ուժի կենտրոնից ուղղորդված կամ մեկ ուժի թրի տակով անցած աշխատողներ են: Իսկ ահա այդ մատնանշած ուսանողն արդեն գիտի, որ տեղական ինքնակառավարումը, երբ իրականացվի ժողովրդի թեկնածուի եւ նաեւ իշխող քաղաքական ուժի կողմից, ապա նաեւ ինքը հնարավորություն կունենա կրթություն ստանալուց հետո ներգրավել քաղաքի ինքնակառավարման մարմիններում, համայնքային ենթակայության օղակներում եւ իր աշխատանքային կարիերան իր սիրելի քաղաքում կառուցել: Ոչ թե ստիպված լինի մայրաքաղաք Երեւանում իր աշխատանքային ապագան կազմակերպել: Աբովյանը բավական մեծ հնարավորություն ունի նաեւ ներդրումային միջավայրի առումով: Աբովյանը էկո քաղաք է, նաեւ ցանկանում ենք սմարթ քաղաք դարձնել: Ունենք արդեն քաղաքի զարգացման որոշակի հայեցակարգ, ինչը ժամանակին կհրապարակենք: Օրենքով սահմանված կարգով ՔՊ-ի թեկնածուն քարոզարշավի ժամանակ կխոսի այդ մասին քաղաքացիների հետ:

Տպել
7038 դիտում

ՀՀ վարչապետն ու ՆԱՏՕ-ի գլխավոր քարտուղարը քննարկել են Հայաստան-Ադրբեջան խաղաղության պայմանագիրը

Տրոլեյբուսը հայտնվել է խրամուղում. շինարարը կտուգանվի (տեսանյութ)

Նիկոլ Փաշինյանը շնորհավորել է Վլադիմիր Պուտինին

Վարչապետի որոշմամբ` նշանակվել է ՊԵԿ նախագահի առաջին տեղակալ

Մենք դավաճան, հող ծախող չենք, ձեր թիկունքում ոչ մի բան չենք անելու, թողեք այս ճանապարհով գնանք. Փաշինյանը՝ տավուշցիներին

«Երևան Սիթին» տուգանվել է 10 միլիոն, «Հայփոստ»-ը՝ 2,6 միլիոն դրամով

Առանձնապես խոշոր չափի «Մեթամֆետամինի» ապօրինի շրջանառություն երիտասարդ կնոջ և տղամարդու կողմից. նրանք կալանավորվել են

Նիկոլ Փաշինյանը «TikTok»-ում նոր շարք է սկսել (տեսանյութ)

Ընդդիմությունն ասում է՝ Տավուշի գյուղերն ուզում է տա, Խրեմլուի ղեկավարը ո՞վ է. Փաշինյան

Պակիստանում երկրաշարժ է գրանցվել

Փետրվարին 150 հարկ վճարողի մոտ արձանագրվել է ՀԴՄ կիրառման կանոնների խախտում. հայտնի է տուգանքի չափը

Կոտայքում միմյանց բախվելուց հետո մեքենաներից մեկը գլխիվայր շրջվել է. կա տուժած

Մի քանի ժամ լույս չի լինի Երևանի և 7 մարզի մի շարք հասցեներում

Որ բանկերի քարտապանները կարող են օգտվել հետվճարի ծրագրից

ԵՄ արտգործնախարարները վերահաստատել են իրենց աջակցությունը Հայաստանին

Դիլիջանի ոլորանները փակ են բեռնատարների համար, մի շարք շրջաններում ձյուն է տեղում

ԱԺ-ն նոր պատգամավոր ունի. Դավիթ Կարապետյանը երդմամբ ստանձնել է պատգամավորի մանդատը

Բախվելուց հետո մեքենաներից մեկը բռնկվել է. ներսում հայտնաբերվել է 4 ուղևորի դին, վարորդի վիճակը ծանր է (լուսանկարներ)

«Միր» քարտերը կդադարեն աշխատել Հայաստանի գրեթե բոլոր բանկերի բանկոմատներում

Միքայել Վարդանյանը Մասիսին նվիրել է 117 մլն դրամ արժողությամբ աղբահավաք մեքենաներ և 230 աղբաման

Սահմանը կանցնի իմ տան միջով, զինվորների ներկայության դեպքում ինչպե՞ս ենք ապրելու էդ տանը. վարչապետը պատասխանել է բնակչին

Սա մեր ապագան կառուցելու միակ տարբերակն է, հեշտ հարց չէ. վարչապետը՝ Կիրանցի բնակիչներին (տեսանյութ)

Վարչապետը տիկնոջ հետ ներկա է գտնվել «...և նորից Գարուն» ներկայացմանը (լուսանկարներ)

Ինչ պայմանավորվածություն է ձեռք բերվել Փաշինյանի՝ Տավուշ այցի ժամանակ. մանրամասներ (լուսանկարներ)

Ես չեմ վիրավորում, ասում՝ «գյադեն հերդ ա», քոքից բռնվեք, կհանդիպենք․ Հովհաննես Դավթյանը՝ Արզաքանցյանին

Մենք պետք է թույլ չտանք պատերազմի սկսում․ ինչ է ասել վարչապետը տավուշցիների հետ հանդիպմանը

Պուտինն իրեն լեգիտիմություն տվեց՝ այլանդակությունները շարունակելու համար, ՌԴ-ին բարի ճանապարհ դեպի գերեզման. Սուքիասյան

Երևանն այս տարի կունենա 20 հա տարածք զբաղեցնող տնկարան, կտնկվի 2000 ծառ

ԱՄՆ-ն մտադիր չէ շնորհավորել Ռուսաստանի նախագահին ընտրություններում հաղթելու համար․ Պատել

Ամեն խաղի պետք է պատրաստվենք, ինչպես վերջինի․ Հարոյանը՝ Կոսովոյի հավաքականի հետ խաղի մասին

Հայաստանի և Մալթայի ԱԳՆ պաշտոնյաների խորհրդակցությունների ընթացքում անդրադարձ է եղել ՀՀ-ԵՄ գործընկերության խորացմանը

ՌԴ ԿԸՀ-ն ավարտել է ձայների հաշվարկը․ ընտրողների 87,28% քվեները Վլադիմիր Պուտինինն է

Նռնակ, պայթուցիչ ու փամփուշտներ․ Կապանի բնակիչը փրկարարական ջոկատում հանձնել է ԼՂ-ից բերված զինամթերքը

Վրաստանի ԱԺ կրթության հանձնաժողովի նախագահը գալիս է Հայաստան․ մանրամասներ

Մկրտչյանը ԱՄՆ ՄԶԳ փոխկառավարչի հետ քննարկել է ԼՂ-ից բռնի տեղահանվածներին աջակցության հարցում համագործակցությունը

Ինչ իրավիճակ է ՀՀ ճանապարհներին ժամը 20։00-ի դրությամբ

Վրաստանը պետք է ավելին անի Ռուսաստանին զսպելու համար․ ՆԱՏՕ-ի գլխավոր քարտուղար

Երկու երիտասարդ վիճել են տաքսու վարորդի հետ, ապա դանակահարել ուղևորին

Պուտինը հանդիպել է ՌԴ նախագահի թեկնածուների հետ, առաջարկել շարունակել ակտիվ համատեղ աշխատանքը

Հայաստանը հստակ դիրքորոշում ունի հասնել խաղաղության․ նախագահը հանդիպել է ֆրանսիացի մտավորականների հետ