Կառավարությունը փոխվեց, նոր զգացի, որ կրպակները հնարավոր է հանել. ով է նախաձեռնել Նար-Դոսի կրպակների ապամոնտաժումը

Երեւանի Նար-Դոսի փողոցի կրպակներն ու խանութները պակասեցին հինգով: N75 շենքի հարեւանությամբ գտնվող այդ կրպակներից չորսն ապամոնտաժվել էին ապրիլի 29-ին, մեկն այսօր՝ ապրիլի 30-ին: Վերջինիս տիրապետողները քաղաքային իշխանություններին առաջարկել էին շինությունը հեռացնել սեփական ուժերով՝ այն չվնասելու համար: Տեխնիկան այսօր գործի էր անցել՝ տեղափոխելու շուրջ 20 տարի գործած փայտամշակման կրպակը:

Տարածքում աշխատող կամ աշխատած տղամարդիկ դժգոհում էին քաղաքապետարանի որոշումից: Ասում էին՝ մարդկանց զրկել են աշխատանքից՝ առանց այլընտրանք առաջարկելու: Իսկ քաղաքապետարանի այն պնդումներին, թե նրանց գործունեությունը շարունակելու համար այլ տարածք է առաջարկվել, արձագանքում էին՝ այդ դեպքում ինչու այս ամիսների ընթացքում չեն տեղափոխվել: Պատմում էին նաեւ, որ կրպակների վրա ուշադրություն է հրավիրել տարածքի խանութների սեփականատերերից մեկը, որը նաեւ երկու կրպակ է ունեցել եւ խանութների դիմացի հատվածն ազատ լինելու նպատակով դիմել է քաղաքային իշխանություններին ու առաջարկել ապամոնտաժել կրպակները՝ այդպիսով ուշադրություն հրավիրելով նաեւ հարեւանությամբ գործող կրպակների վրա եւ հարվածի տակ դնելով դրանք:

«Երբ որ ես իմացա, որ Երեւանի ավագանին որոշում է կայացրել անօրինական կրպակները հանելու, առաջինը ես դիմեցի, ասացի՝ կարող եք սկսել իմ կրպակներից: Դրանք ես չեմ դրել, ուրիշն է դրել, բայց ես իրենցից վերցրել էի: Ասացի՝ կարող եք հանել: Երեկ էլ հանել են, եւ ես ուրախ եմ դրա համար: Քաղաքը եկել է տեսքի, մայթը եկել է տեսքի, քաղաքը մայրաքաղաքի է նմանվում: Ես ոչ մի բողոք չունեմ: Դեռ ընդհակառակը, նախաձեռնությունը հիանալի էր»,- ասաց «Նաիրի» ՍՊԸ տնօրեն Ռաֆիկ Ավետիսյանը:

Ըստ նրա, իր գնած կրպակներն այս ընթացքում չեն գործել: «Իմ կրպակները չէին աշխատում: Ես թույլ չէի տալիս: Ես երեք տարի առաջ եմ վերցրել՝ հանելու նպատակով: Բայց չէր ստացվում: Կառավարությունը փոխվեց, նոր զգացի, որ կրպակները հնարավոր է հանել: Ես հանում էի, մյուսները չէին հանում (այն ժամանակ-խմբ.): Իմաստ չուներ՝ ես հանեի, նրանք մնային: Հիմա որ ստացվեց այնպես, որ պիտի բոլորը հանվեն, առաջինը ես նախաձեռնեցի»,- շարունակեց խանութների սեփականատերը: Նշեց, որ դիմացի տարածքը ազատել ցանկանում է կանաչապատելու նպատակով: «Այս գազոնները 2008 թվականին քաղաքապետարանի որոշումով վարձակալության է տրվել ինձ, որպեսզի սարքեմ եւ մշակեմ: Ուրիշ ոչ մի բան: Ես սարքել էի, կիսատ էր մնացել, չէի կարողանում ավարտել, որովհետեւ կրպակները կեսը մայթի վրա էին, կեսը գազոնի մեջ: Բոլորն էլ անօրինական կրպակներ էին»,- ասաց Ռաֆիկ Ավետիսյանը:

Ամեն դեպքում, Նար-Դոսի փողոցը, որը Երեւանի թերեւս ամենաանշուք ու անկանոն շինություններով վայրերից մեկն է, այս մի քանի կրպակների ապամոնտաժումով ընդհանուր պատկերի փոփոխություն, ըստ էության, չի կրել: Քաղաքապետի մամուլի քարտուղար Հակոբ Կարապետյանը, պատասխանելով մեր հարցին, թե Նար-Դոսի փողոցի վերաբերյալ գոյություն ունի՞ լուծումների համալիր ծրագիր, ասաց.

«Այնտեղ բարդ խնդիրների համախումբ է, շատ զգալի մասը սեփականության իրավունք ունի, բայց էլի չեն համապատասխանում քաղաքաշինական ստանդարտներին: Ամենայն հավանականությամբ կան նաեւ ինքնակամ կառույցներ: Այնտեղ ինչ-որ համալիր լուծում պետք է տրվի, որը հեշտ չէ»: Դիտարկմանը, թե ստացվում է, որ այս վեց կրպակը քանդելով ոչ մի հարց չլուծեց, միայն այնտեղ աշխատող մարդիկ անգործ մնացին, քաղաքապետի մամուլի քարտուղարն արձագանքեց. «Այդ կրպակները քանդելը լուծեց այդ տարածքը բնակիչներին վերադարձնելու եւ հանրային տարածքը վերականգնելու հարցը: Այնտեղ ամենայն հավանականությամբ կանաչապատում կլինի եւ այլն»:

Հակոբ Կարապետյանի խոսքով, Նոր-Դոսի փողոցում հատկապես ոչ քարե շինություն-կրպակները, որոնք հանրային տարածքների վրա են տեղադրված, գույքագրվում են: «Եվ մաս առ մաս հանրային տարածքները վերադարձվում են: Հինգ կրպակը լուծեց այո, հինգ կրպակի տարածքի հարցը, բայց գործընթացը աստիճանաբար է տեղի ունենում: Հինգ կրպակը մի էտապն է: Այդ հինգ կրպակն ընթացքում գումարվում, գումարվում, դառնում է հարյուր հինգ, հազար հինգ»,- ասաց քաղաքապետի խոսնակը:  

Նար-Դոսի փողոցի համար 75 շենքի հարեւանությամբ գործած կրպակներից երկուսը շարունակում են կանգուն մնալ: Մեկը թերթի կրպակ է, մյուսում ավտոպահեստամասեր են վաճառվում: Դրանց դեպքում առկա են գործելու իրավական հիմքերը: