«Գյումրին առանց տնակների» հիմնադրամի նախկին եւ ներկա տնօրենները չեն հանդարտվում

«Գյումրին առանց տնակների» հիմնադրամում նոր զարգացումներ են սկսվել: Նախկին եւ ներկա տնօրենների միջեւ չարաշահումների մասով ծագած վեճը ոչ միայն չի հանդարտվում, այլ նոր երանգ է ստանում: Հիշեցնենք, որ ընթացիկ տարվա հունվարի 29-ին Գյումրու «Երկխոսությունների մեդիա կենտրոնում» մամուլի ասուլիս էր հրավիրել Գյումրին առանց տնակների հիմնադրամի գործադիր տնօրեն Մհեր Խաչատրյանն ու խոսել 2018-ի հունվարից սկսած բացահայտումների, բնակբաշխումների եւ տնակների քանդման գործընթացներում թույլ տրված ապօրինությունների մասին: Մհեր Խաչատրյանը նաեւ հայտարարել էր, որ հիմնադրամի նախկին տնօրեն, ներկա պահին հոգաբարձուների խորհրդի անդամ Ղարիբ Հարությունյանը եւս անմասն չի եղել ֆինանսական չարաշահումներից: Հայտարարությունից րոպեներ հետո նույն տաղավար հասած Ղարիբ Հարությունյանը ասվածը որակել էր զրպարտանք եւ Մհեր Խաչատրյանի կազմակերպած ասուլիսն անվանել քաղաքական ենթատեքստ ունեցող: Այդ օրերին, երբ դեռ Շիրակը մարզպետ չուներ, (հունվարի 29-ին եւ հետագա օրերին Հ.Գ.),  Գյումրիում պտտվող խոսակցություններ կային այն մասին, որ Շիրակի մարզպետի պաշտոնի համար քննարկվում էր  Տիգրան Պետրոսյանի թեկնածությունը, որը ցանկություն էր հայտնել իր հետ մարզպետարան բերել նաեւ Ղարիբ Հարությունյանին: Հավանաբար քաղաքական ենթատեքստ ասելով՝ Ղարիբ Հարությունյանը հենց դա էր նկատի ունեցել: Հունվարի 29-ի ասուլիսում նախկին եւ ներկա տնօրենները միմյանցից ապացույցներ պահանջեցին: Ղարիբ Հարությունյանն ասաց, որ ինքը չարաշահումների հետ կապ չունի, Մհեր Խաչատրյանը պնդեց հակառակը:

Այսօր արդեն ֆեյսբուք սոցիալական ցանցում «Գյումրին առանց տնակների» հիմնադրամի հոգաբարձուների խորհուրդը հետեւյալ հաղորդագրությամբ է հանդես եկել, որում մասնավորապես ասվում է. «Տեղեկացնում ենք, որ «Գյումրին առանց տնակների» հիմնադրամի ֆինանսական գործունեության ներքին մասնագիտական ուսումնասիրության արդյունքում պարզվել է, որ նախկին գործադիր տնօրեն Ղարիբ Հարությունյանի պաշտոնավարման ընթացքում նրա կողմից որևէ չարաշահում չի եղել: Հիմնադրամի տարեկան արտաքին աուդիտի արդյունքները կհրապարակվի ավելի ուշ՝ օրենքով սահմանված ժամկետում:

Հարգանքներով «Գյումրին առանց տնակների» հիմնադրամի հոգաբարձուների խորհուրդ»:Նույն հարթակում «Գյումրին առանց տնակների» հիմնադրամի տնօրեն Մհեր Խչատրյանը եւս արել է գրառում, որին ֆինանսական փաստաթղթեր է կցել: Մհեր Խաչատրյանը գրել է. ««Գյումրին առանց տնակների» հիմնադրամի վերջին աղմկահարույց իմ հայտարարությունից հետո, ինչպես գիտեք, հոգաբարձուների խորհուրդը որոշում էր ընդունել սահմանափակել թեմայի շուրջ հրապարակային հայտարարությունները՝ մինչև արտաքին աուդիտի եզրակացությունը: Ես, հավատարիմ մնալով հիմնադրամի կանոնադրությանը, միառժամանակ հետաձգեցի փաստերի հրապարակումը, ինչն անգամ ավելորդ խոսակցությունների տեղիք տվեց ու որոշակիորեն վտանգեց իմ հեղինակությունն ու բարի համբավը: Սակայն հոգաբարձուների խորհրդի վերջին նիստի ժամանակ կայացվեց տրամաբանորեն հակառակ որոշում և խորհուրդը հայտարարություն տարածեց այն մասին, իբր ներքին մասնագիտական ուսումնասիրության արդյունքում պարզվել է, որ նախկին տնօրենը չարաշահումներ թույլ չի տվել:

Հաշվի առնելով այլևս, որ այսքանից հետո իմ լռությունը կարող էր իմ խոսքերի և հեղինակության հանդեպ կասկածի տեղիք տալ, ստիպված եմ հրապարակել ձեռքիս տակ ունեցած չարաշահումների փաստերից մեկը: Այս փաստաթղթերով ապացուցվում է որ 2017 թվականի օգոստոս ամսին «Գյումրին առանց տնակների» հիմնադրամի նախկին տնօրեն Ղարիբ Հարությունյանը, չունենալով օգնական, ֆինանսական հաշվետվության մեջ ծախս է ներկայացրել որպես օգնականի աշխատավարձ 100000 դրամի չափով:

Գիտակցում եմ նաև, որ այսքանից հետո, ըստ կանոնադրության, հնարավոր է քննարկվի հիմնադրամի տնօրենի պաշտոնից իմ հեռացման հարցը: Սակայն, ի սկզբանե իմ գործունեությունն ուղղված է եղել արդարության կայացմանն ու անօրինականությունների բացահայտմանը ու եթե դրա արժեքը իմ պաշտոնանկությունն է, ես այն կընդունեմ առանց երկմտանքի՝ միաժամանակ արդեն հրապարակելով իմ ձեռքի տակ ունեցած չարաշահումների ողջ փաթեթը՝ չսպասելով արտաքին աուդիտի եզրակացությանը»:Հատկանշական է, որ Մհեր Խաչատրյանն այս գործում իր ունեցած փաստերի հետ մնացել է մենակ: Հիմնադրամի հոգաբարձուների խորհուրդն առավել վստահում է Ղարիբ Հարությունյանին: Փաստաբանը եւս, ով ի սկզբանե աջակցում էր Մհեր Խաչատրյանին, որպեսզի հիմնադրամում հայտնաբերված չարաշահումները բացահայտվեն, այս հարցում Խաչատրյանի կողքին չէ: Այս պարագայում, ներկա տնօրենին մնում է կամ ապացուցել իր կողմից հնչեցված մեղադրանքի իսկությունը, կամ, հակառակ պարագայում, պատասխանատվություն կրել իր գործողությունների համար: