Ընտրություններից մի քանի ամիս հետո ստորագրահավաքը, իմ կարծիքով, անլուրջ է. Գասպարյանը` իր դեմ բողոքի մասին

Այսօր սոցցանցերում տեղեկություն էր տարածվել, որ մի խումբ էջմիածինցիներ որոշել են ստորագրահավաք կազմակերպել՝ գործող քաղաքապետ Դիանա Գասպարյանի հրաժարականի պահանջով: Ըստ տարածված տեղեկության՝ նրանք դժգոհ են Գասպարյանի կառավարումից եւ կադրային քաղաքականությունից:

«Եթե մատնանշվի՝ ինչից են դժգոհ, կփորձենք լուծել»,- այս մասին «Հայկական ժամանակ»-ի հետ զրույցում ասաց Էջմիածնի քաղաքապետ Դիանա Գասպարյանը:

- Տիկին Գասպարյան, ճի՞շտ է, որ ձեր հրաժարականի պահանջով ստորագրահավաք է իրականացվում, եթե այո, ապա ովքե՞ր են այդ իրականացնողները:

- Վաղուց է անցկացվում կարծես թե, չեմ հասկանում՝ ինչու է մամուլում նոր հայտնվել: Մի անձ է նախաձեռնել այդ ստորագրահավաքը, ով իմ նշանակման առաջին օրվանից հակակրանք ունի իմ անձի հանդեպ: Այդ մարդը շրջում է տներով եւ տեղեկացնում է, որ ստորագրահավաք է կազմակերպված, բայց այդ մասսայական դժգոհությունների մասին, որ գրվում է, չեմ կարող ասել, որ իրականությանը համապատասխանում են: Որովհետեւ քաղաքապետարանը աշխատում է ծանրաբեռնված ռեժիմով, շատ ծրագրեր ենք իրականցնում` ցանկության դեպքում կարելի է դրանք տեսնել: Շատ բաներ արդեն տաք եղանակներին է նախատեսվում, որովհետեւ ձմռան եղանակներին պարզապես շատ աշխատանքներ հնարավոր չի եղել իրականացնել: Թե չէ, որեւէ հստակ բան չի մատնանշվում, թե օրինակ, ինչից են դժգոհ կամ ինչում է թերացել քաղաքապետարանը:

- Իսկ ո՞վ է այդ մի մարդը: Կազմակերպվա՞ծ ստորագրահավաք է, թե ուղղակի ձեր անձի դեմ է:

- Չէի ցանկանա նշել, մի կին է դա նախաձեռնել:

- Ինչ-որ անձերի կամ նախկին իշխանությունների հետ կապ ունեցո՞ղ մարդ է:

- Չեմ կարող ասել՝ ինչ կա սրա հետեւում կանգնած: Գիտեմ՝ ով է նախաձեռնողը, որովհետեւ պարբերաբար սրա մասին հայտարարում է, իսկ որեւէ մեկի կողմից ուղղորդվում է, թե՝ ոչ, չեմ կարող ասել: Բայց նաեւ կնշեմ, որ այս պահին մեր գործող օրենսդրությամբ ստորագրահավաքը որեւէ իրավական հետեւանք չունի եւ չի կարող ունենալ: Ընդամենը հոկտեմբերի վերջին են տեղի ունեցել ընտրությունները, դրանց արդյունքները չեն վիճարկվել, ըստ էության բոլորն ընդունել են, որ արդար, թափանցիկ ընտրություններ են տեղի ունեցել եւ դրա արդյունքում ընտրվել է քաղաքապետ: Մի քանի ամիս հետո ստորագրահավաքը, իմ կարծիքով, անլուրջ է:

- Իսկ փորձե՞լ եք կանչել, զրուցել, հասկանալ, թե կոնկրետ ինչի՞ց են դժգոհում:

- Եթե մատնանշվի՝ ինչից են դժգոհ, կփորձենք լուծել: Որեւէ կառուցողական բանի մասին այս պահին խոսք չի գնում: Պարզապես գիտեմ, որ տներով շրջում են եւ ստորագրահավաք են անում, բայց թե կոնկրետ ինչն է դժգոհության պատճառը` չգիտեմ:

- Քաղաքացիներն ինչպե՞ս են արձագանքել այդ ստորագրահավաքին:

- Բոլորն ունեն իրենց սուբյեկտիվ շրջապատները: Շատ մարդիկ, ում հետ ես շփվում եմ, վրդովված են այդ ամենի հետ կապված: Անգամ զարմանում են՝ ինչի է դա տեղի ունենում: Բայց միգուցե կա դժգոհ հատվածը, որը ոչ միշտ է, որ իրականում դժգոհ է հենց քաղաքապետարանից: Պարզապես սխալ է պատկերացնում այն պետական մարմինը կամ ինստիտուտը, որն առնչվում է իր խնդրին: Ենթադրենք դժգոհ է թոշակից, կարող է եւ համարել, որ դա քաղաքապետարանի թերացումն է եւ քաղաքապետարանից դժգոհ լինել, բայց այդ ամենը գնահատելու բան է եւ հարաբերական երեւույթ է: Ես չեմ կարծում, որ այնպիսի թերացում է եղել, որից պետք է զանգվածային դժգոհություն առաջանա: Հիմա քաղաքում շատ են խոսում ասֆալտի վիճակի մասին, բայց գիտակից մարդիկ հասկանում են, որ տարվա այս եղանակին ասֆալտապատման աշխատանքներ չեն իրականացվում: Դա իրականացվելու է արդեն մայիսին:

- Այս ամիսների ձեր աշխատանքը ինչպե՞ս կգնահատեք: Ինչ եք կարծում, հանրության մեծամասնությանը դա գոհացնո՞ւմ է:

- Ես կարծում եմ՝ այո, շատ բան է արվում: Օրինակ, մանկապարտեզները մեր մշտական հոգածության կենտրոնում են, փոքր բիզնեսին ենք աջակցում` տեղական տուրքերը ծխախոտի եւ ալկոհոլի համար իջեցնելով. ըստ քառակուսի մետրի` տնտեսվարողները ալկոհոլի եւ ծխախոտի վաճառքի համար լիցենզիա ստանալու համար քաղաքին գումար են վճարում: Գրեթե բոլոր մանկապարտեզներում հիմնանորոգման կամ վերանորոգման աշխատանքներ են իրականացվում: Կարծես թե կարդացի, որ կադրային քաղաքականությունից է դժգոհությունը, այնինչ, եթե հիմա մտնեք քաղաքապետարանի կայք, կտեսնեք բազմաթիվ համայնքային ծառայողների մրցույթներ, որոնք հայտարարվել են եւ բաց, թափանցիկ ընթացակարգերով անցկացվելու են:

- Ձեր համայնքում աշխատավարձերի բարձրացում եղե՞լ է:

- Ոչ, աշխատավարձերի բարձրացում չի եղել: Օպտիմալացվել է հաստիքացուցակը, որի արդյունքում տնտեսվել է բավական աշխատավարձային ֆոնդ եւ եթե տենդենցը այսպես շարունակվի, արդեն եկող տարում հնարավոր է դիտարկենք աշխատավարձի բարձրացում նաեւ: Առհասարակ բյուջեն ֆոնդային հատվածում այս տարվա լուրջ տնտեսումների հաշվին բավական շատ է, որի հաշվին հիմնանորոգում է իրականացվելու: Էլ չեմ ասում բազմաթիվ պայմանավորվածությունների մասին` բարեգործական, ներդրումային ծրագրերի: Էջմիածինում շինարարությունը լուրջ ծավալներով հիմա ընթանում է, այնինչ նախկինում շինթույլտվություն ստանալը որեւէ բան կառուցելու համար, շատ լուրջ` երկարատեւ, շատերի համար անհնար գործընթաց էր: Համայնքը բնականոն կյանքով ապրում է, քաղաքացիներին փորձում ենք հնարավորինս գոհացնել: