Ֆիքսված մեկ փոխմարզպետը, կրճատվող հաստիքները, Լապշինն ու Անին. Սուրեն Պապիկյանը պատասխանել է հարցերին

Շիրակի մարզպետ Տիգրան Պետրոսյանին ներկայացնելուց հետո ՀՀ Տարածքային կառավարման և զարգացման նախարար Սուրեն Պապիկյանը պատասխանեց լրագրողների հարցերին: Առաջին գծում հաստիքների կրճատումն էր: Ինչպես է կազմակերպվելու այս գործընթացը, ո՞վ եւ ինչ կերպ է որոշելու, թե որ աշխատակիցն է շարունակելու աշխատանքը կամ հակառակը: Նախարարը հստակ պատասխան չուներ: Հստակ էր միայն հաստիքների կրճատման հրահանգը, բայց ով եւ ինչպեսը դեռ հատնի չէ:

«Տարբեր մարզերի համար կգործեն տարբեր մեխանիզմներ, մենք արդեն խորհրդատվական ընկերություններ ենք ներգրավել, ովքեր ուսումնասիրել են եւ արդեն առանձնացրել ենք օղակներ, թե որ մարզում որ օղակն է ուռճացված: Այսինքն, կարող է ստացվի այնպես, որ Գեղարքունիքի մարզում կրճատվի իրավաբանական վարչությունը, Շիրակի մարզում՝ ՏԻ վարչությունը, ես օրինակներ եմ բերում: Այսինքն, չեմ կարող ասել, թե էս պահին էստեղ որ վարչություններին ու բաժիններին կվերաբերվի սա: Բայց վերախմբավորումներ են լինելու, տարբեր բաժիններ իրենց մեջ ներառելու են այլ բաժիններ, անվանումների եւ գործառույթի փոփոխություններ են լինելու: Մարզպետի լիազորությունները կֆիքսվեն տարածքային կառավարման մասին օրենքով, որն արդեն կառավարությունում է, շուտով կշրջանառվի»,-ասաց  Սուրեն Պապիկյանը:

Ինչ է նախատեսվում փոխմարզպետների մասով, քանիսը կաշխատեն Շիրակի մարզպետարանում՝ ՀԺ-ի հարցին նախարարը պատասխանեց՝ թիվը կորոշվի կրճատումների արդյունքում:

«Այսինքն, կառավարության որոշում պիտի լինի, նախագծով այս պահին նախատեսված է 1 փոխմարզպետ, եւ հիմա մինչ նախագծի որոշում դառնալը մենք բոլոր տեղերում արդեն անցում ենք կատարել մեկական փոխմարզպետերի, միայն 2 մարզում կա երկու փոխմարզպետ: Պետք է հասկանանք՝ բարդություն առաջացնու՞մ է աշխատել մեկ փոխմարզպետով, թե՝ ոչ: Կարծում եմ, չի առաջացնում, եւ նախագիծը հենց այդպես էլ կընդունվի: Այնուամենայնիվ, քննարկելի է դեռեւս»:

Խոսվեց նաեւ բլոգեր Ալեքսանդր Լապշինի ֆեյսբուքյան գրառման մասին, որով բլոգերը մտահոգություն էր հայտնում Անին առանց Թուրքիա գնալու տեսնելու եւ առկա բարդությունների հետ կապված:

«Հայ ու ռուս սահմանապահների միմյանց հետ ունեցած անճշտությունների հետևանքով մենք չտեսանք հինավուրց հայկական մայրաքաղաքը: Թուրքիայի և Իրանի հետ Հայաստանի սահմանը հսկում են ՌԴ անվտանգության դաշնային ծառայության սահմանապահ զորքերը: Հայկական կողմը թույլտվություն ստանալու համար ուղղորդում էր ռուսների մոտ, ռուսները՝ հայերի: Մոտ 3 շաբաթ տեւեց սա: Որպես բոնուս մենք մոտիկից տեսանք, թե ինչով են ապրում սահմանամերձ գյուղերի բնակիչները»,-գրել է Լապշինը: Ըստ նրա, անիմաստ բյուրոկրատիայի պատճառով Հայաստանը կորցնում է շատ կարևոր զբոսաշրջային օբյեկտ՝ բաց թողնելով հայկական կողմից 300 մետր հեռավորության վրա գտնվող սեփական հինավուրց մայրաքաղաքը երկիր ժամանած զբոսաշրջիկներին ցույց տալու հնարավորությունը:Լուսանկարը Լապշինի ֆեյսբուքյան էջից

«Խնդիրն այն է, որ հին խորհրդային ցանկապատը ձգվում է իրական սահմանից 3-4 կմ այն կողմ, որտեղ զորամաս է տեղակայված: Դրանից այն կողմ անցնելու հնարավորություն չկա: Չնայած որ կարող էին զբոսաշրջիկներով շատ ավտոբուսներ տանել: Սա նաեւ հնարավորություն է, որ տեղի բնակիչները, որոնք ապրում են ծայրահեղ աղքատության մեջ, կարողանան գումար վաստակել», - գրել է բլոգերը:Լուսանկարը Լապշինի ֆեյսբուքյան էջից

Նախարարը լսեց, սակայն ասաց՝ խնդրին խորապես ծանոթ չէ, անպայման կուսումնասիրի եւ նկատի կունենան:

«Ես կարծում եմ, որ զբոսաշրջության մեջ դա կարող է լինի եւ կարեւոր ուղի դառնա, եւ այս հարցում մեր գործընկեր գերատեսչության հետ, մասնավորապես սա ազգային անվտանգության խնդիր է, նաեւ սահմանապահների հետ քննարկման ու բանակցության խնդիր է: Հարցը կբարձրացնեմ եւ շահագրգիռ եմ, որ այն լուծվի: Խնդրին մանրամասն չեմ տիրապետում, խոստանում եմ, հետամուտ կլինեմ»: