Եթե բացակայեմ դպրոցից, ուրեմն կյանք չունեմ. Ազարյանը նույնիսկ ծննդյան օրը՝ 90-ամյակի օրը, չի բացակայել աշխատանքից

Օլիմպիական եռակի, աշխարհի քառակի, Եվրոպայի կրկնակի ու ԽՍՀՄ 11-ակի չեմպիոն լեգենդար մարմնամարզիկ Ալբերտ Ազարյանն իր 90-այակի օր, ինչպես ամեն օր, գնացել է իր անվան մարզադպրոց: Աշխատակիցները ու սաների ծնողները, սակայն, կարողացել են այնպես անել, որ այս օրը՝ փետրվարի 11-ը, նրա համար յուրահատուկ ու տարբերվող լինի մյուս օրերից: Մեծ շուքով դիմավորել են ու շնորհավորել: «Հայկական ժամանակ»-ի հետ զրույցում նա ընդգծեց, որ չէր կարող նույնիսկ այս օրով բացակայել դպրոցից եւ որ աշխատակիցների ու ծնողների վերաբերմունքից շատ շոյված է:

«Եթե ես բացակայեմ դպրոցից, ուրեմն կյանք չունեմ: Դպրոցն իմ կյանքն է: Եթե այստեղ չլինեմ, չեմ կարող ապրել: Շատ լավ անցկացրեցինք: Ներս մտա, բոլոր աշխատողները, ծնողները հավաքվեցին, շնորհավորեցին: Շատ ուրախ եմ: Անցած տարիներին աշխատողները նույն կերպ շնորհավորել են: Շատ ուրախ եմ նրանց վերաբերմունքի համար: Նրանց էլ քաջառողջություն եմ ցանկանում»,- ասաց նա:

Մարզական կարիերայի ընթացքում Ազարյանը բացառիկ արդյունքների է հասել: Նվաճել է 45 ոսկե, 42 արծաթե ու 10 բրոնզե մեդալ: Կարիերան ավարտել է ոտքը պատահաբար վնասելուց հետո: Նախ չի կարողացել մեկնել Մոսվկա՝ հավաքի, այնուհետեւ մի քանի մրցումներից հետո ավարտելու որոշում է կայացրել: Խոստովանում է, որ իր համար հատուկ նշանակություն ունեն օլիմպիական մեդալները:

«Ամենակարեւոր մեդալը օլիմպիականն է: Իսկ մեր օլիմպիական մեդալները գողացել ենք, չունենք: Երբ հարցնում են, ասում եմ, որ օլիմպիական մեդալը ամենակարեւորն է, որով կարող ես հպարտանալ: Ոչ թե չեմ նեղվում, այլ ուղղակի.... Հրանտ Շահինյանը (նրանն էլ են գողացել) ասում էր. «Մեր մեդալները գողացան, մենք առանց մեդալի օլիմպիական չեմպիոններ ենք»»,- ասաց նա:

Իր մարզական հաջողությունների մասին խոսելիս Ազարյանը հաճախ է պատմում, որ դրանց հասել է շնորհիվ նրա, որ դարբնի աշակերտ է եղել: Այդ աշխատանքի միջոցով ֆիզիկապես կոփվել ու ուժեղացել է, եւ այդ ուժն օգտագործել է սպորտում: Ընդգծում է, որ հաջողության հասնելու համար պետք է շատ աշխատել ու նպատակասլաց լինել:

«Տաղանդը տաղանդ է: Դրա հետ միասին աշխատասեր պետք է լինել, որ կարողանաս հասնել քո նպատակին: Եվ քո հաջողություններից հետո չպետք է ուրախանաս մտածելով, որ սա վերջինն է: Պետք է անընդհատ շարունակես»,- ասաց նա:

Ազարյանը ոչ միայն կարիերայում է հաջողակ, այլեւ անձնական կյանքում: Կնոջը՝ Ելիզավետային, հանդիպել է, երբ երկուսն էլ ուսանող են եղել, սովորելիս են եղել Երեւանի ֆիզկուլտուրայի տեխնիկումում: Ավելի քան 6 տասնամյակ է միասին են: 4 երեխա ունեն, թոռներ, ծոռներ: Դժվարանում է կոնկրետ նշել՝ որն է ե՛ւ կարիերայում, ե՛ւ անձնական կյանքում հաջողակ լինելու գաղտնիքը: Կարծում է, որ հավանաբար միմյանց նկատմամբ լավ վերաբերմունքն է:

«Դժվար հարց է: Իմ ընտանիքը շատ եմ սիրում, բոլորս միմյանց նկատմամբ շատ լավ վերաբերմունք ենք ունեցել, որովհետեւ մեր ընտանիքի մեծամասնությունը մարմնամարզությամբ է զբաղվում: Տիկինս՝ Լիզան, հանրապետության չեմպիոն է, Էդիկս օլիմպիական չեմպիոն է: Կարողացանք հավաքվել եւ սարքել շատ լավ ընտանիք, որով մինչեւ հիմա հպարտանում ենք»,- ասում է նա:

Հաճախ Ազարյանը նաեւ սիրով պատմում է իր ու կնոջ սիրո պատմությունը: Վերջինս Ախլցխայից է Հայաստան եկել: Վրաստանի առաջնությունում առաջին տեղն է զբաղեցրել, եւ ասել են, որ պետք է Երիկյան ազգանունը փոխի Երիկաշվիլիի: Հայրը զայրացել է, ու նրան Հայաստան է բերել, որպեսզի այստեղ մարզվի:

«Այդպես ծանոթացել ենք, եւ բոլորը շատ նախանձում էին, որ շփվում եմ Ախլցխայից եկած աղջկա հետ: Դարձել ենք լավ ընտանիք, եւ մինչեւ հիմա մեր ընտանիքով ուրախանում ենք»,- ասաց նա, իսկ դիտարկմանը, որ հավանաբար շատ աղջիկների սրտեր է կոտրել ժպիտով պատասխանում է՝ այո՛:

Երեկոն Ազարյանն անցկացնելու է ծննդյան օրն ավելի մեծ շուքով տոնելով:  Հայաստանի ազգային օլիմպիական կոմիտեի նախագահ գագիկ Ծառուկյանը ռեստորաններից մեկում խնջույք է կազմակերպել նրա պատվին: Մինչեւ այդ լեգենդար մարզիկը շնորհավորանք է ստացել ՀՀ վարչապետ Նիկոլ Փաշինյանից: