Նախկինում մենք փորձել ենք ավելի շատ իրավական հարթության շրջանակներում պայքարել. «Վարորդի ընկեր» ՀԿ նախագահ

Մի քանի օր առաջ «Վարորդի ընկեր» հասարակական կազմակերպությունը վարորդներին կոչ էր արել «կարմիր գծերում» կայանելու դեպքում փակել մեքենաների համարանիշերը՝ հավելելով, որ եթե խնդիրներ կլինեն, կազմակերպությունն անվճար կօգնի եւ կպաշտպանի վարորդների շահերը:

«Քաղաքային իշխանությունը ոչ մի քայլ չի արել այդ ոլորտը բարելավելու համար»,- այս մասին մեր զրույցում ասաց «Վարորդի ընկեր» ՀԿ նախագահ Տիգրան Քեյանը:

- Ո՞րն է պատճառը, որ նման հայտարարություն եք արել:

- Կարմիր գծերի ներդրման գաղափարը հետեւյալն էր, որ չեն լինելու վճարովի պարկովշիկներ, կայանատեղիները արգելափակված չեն լինելու, մարդիկ հնարավորություն են ունենալու վճարի դիմաց կայանում իրականացնել, մեքենայի վնասվելու դեպքում քաղաքացին քաշքշուկների մեջ չի ընկնելու` տեսանկարահանվելու է տվյալ հատվածը եւ շատ արագ պարզվելու է վնաս պատճառող անձը, որպեսզի հետագայում քաղաքացին փոխհատուցում ստանալու հնարավորություն ունենա: Ըստ էության, նախորդ իշխանությունների ժամանակ դա մնաց զուտ ինչ-որ տեսանյութի տեսքով, որը շատ կիրթ, գրագետ ներկայացնում էր, թե ինչ լավ բան են կարմիր գծերը եւ այդպես շարունակ մնացել է տեսանյութի տեսքով:

- Քաղաքային նոր իշխանությունների հետ այս հարցի շուրջ քննարկումներ ունեցե՞լ եք:

- Բանակցել ենք ավագանիների հետ: Պայմանավորվածություն կար, որ հարցը պետք է քննարկվեր, ծայրամասերը ամբողջությամբ ազատվեին կարմիր գծերից, արգելափակոցները եւ նմանատիպ այլ արգելքները պետք է վերացվեին եւ դրանք հսկողության տակ առնվեր, տեսախցիկների արդիականցում պետք է իրականացվեր եւ նաեւ նոր վճարման համակարգի ներդրում իրականացվեր: Ինչպես նաեւ Կենտրոն վարչական շրջանում` որն ամբողջությամբ զետեղված է կարմիր գծերով, պետք է որոշակի այլընտրանքային հնարավորություն ունենային ոչ ծանրաբեռնված փողոցներում անվճար կայանելու, իսկ ծանրաբեռնված փողոցներում պետք է թանկացվեր, որ քաղաքացին իմանար՝ եթե 100 մետր չի ուզում քայլի, ապա պետք է վճարի, իսկ եթե պատրաստ է քայլել, ապա անվճարից օգտվի:

Կային մի շարք խնդիրներ, որ հանրության հոսքը շատ է դիահերձարանների մոտ, հիվանդանոցների մոտ, որտեղ ունեն հատուկ կայանատեղիներ`այդտեղ կարողանում են կայանել միայն աշխատակիցների մեքենաները, առաջարկել ենք, որ եթե ծանրաբեռնվածությունը շատ չէ, քաղաքացիներն էլ հնարավորություն ունենան այդտեղ ավտոմեքենաներ կայանելու: Հասկանում ենք, որ խնդիրը գլոբալ է, միանգամից այս բոլոր կետերը չեն կարող շատ արագ լուծվել, բայց ծայրամասերը, որոնք արդյունավետ չեն կարմիր գծերով սահմազատելու համար, կարող էին անել, դա շատ մեծ ջանք չէր պահանջում:

- Այդ հայտարարությունից հետո արձագանք եղե՞լ է քաղաքապետարանի կողմից:

- Արձագանք ունենք: Առաջարկվել է գրավոր դիմենք քաղաքապետին, որպեսզի կամ քաղաքապետը կամ տեղակալներից կամ էլ աշխատակիցների կազմով` ավագանիների ներգրավմամբ ստեղծվի խումբ, որի հետ մոտ օրերս պետք է հանդիպենք: Ամեն դեպքում այսօր նամակն ուղարկել ենք, սպասում ենք հրավերին, որպեսզի այդ հարցը քննարկենք:

- Ձեր արած կոչը՝ կարմիր գծերի վրա կայանելու դեպքում փակել մեքենաների համարանիշերը, արդյո՞ք անօրինական չէ:

- Կոչը լրիվ օրինական է: Մենք չենք հորդորել երկրորդ շարք կամ խաչմերուկի մեջտեղում կամ չթույլատրված հատվածներում կայանել: Ճանապարհային երթեւեկության կանոնների խախտման կոչ չի արվել: Կոչ է արվել միայն այն քաղաքացիներին, ովքեր չեն ուզում տուգանվել կարմիր գծերում կայանման համար: Մեր օրենսդրությունը մեքենայի շահագործումն է արգելում՝ առանց պետհամարանիշների կամ փակված: Բայց, եթե տրանսպորտային միջոցը կայանված է ձեր բակում կամ օրենքով սահմանված ցանկացած վայրում կարող է առհասարակ առանց համարանիշ լինել: Այսինքն, այստեղ քաղաքացին խախտում չի անում, եթե ինքը կանգնել է օրենքով նախատեսված վայրում:

- Այս նախագիծը նախկինում առաջարկե՞լ եք:

- Նախկինում շատ հարցեր ենք քննարկել, բայց նախկինում քանի որ ուժային որոշումներով էր գնում առաջ, այդքան էլ չէին ուզում լսել քաղաքացիներին եւ ընդառաջ գնալ: Նախկինում մենք փորձել ենք ավելի շատ իրավական հարթության շրջանակներում պայքարել: Մենք ասում էինք, որ մեզ բողոքեն, մենք կվիճարկենք: Նախկինում ընդվզում եղել է թանկացման դեմ: ՍՄՍ ծառայությունների դիմաց վճարն էին ուզում թանկացնել, այդ ժամանակ կոչ էինք արել, մեզ կանչեցին քաղաքապետարան, լսեցին եւ հաշվի նստեցին մեզ հետ եւ թանկացում գրեթե չեղավ: