Կարող են թողարկվել մունիցիպալ պարտատոմսեր. փոխքաղաքապետը՝ վերելակների խնդրի լուծման մասին

Երեւանի գլխավոր ճարտարապետ Արթուր Մեսչյանը պաշտոնավարման առաջին օրերին խոսել էր Երեւանում վերելակների նորացման իր պատկերացումների մասին՝ խնդրի լուծումը փոխկապակցելով ձեղնահարկերի հետ: Նա նկատել էր, որ պետք է մշակել այնպիսի բիզնես պլան, որ այն դեպքերում, երբ շենքերի վերեւի հարկերի բնակիչները ցանկություն չունենան ձեղնահարկ կառուցել, որպեսզի այժմ բուսնած «մանսարդները» միասնականացվեն, իսկ քաղաքն ազատվի թունավոր ազբոշիֆերից, ապա կարելի է այդ տարածքներում բնակարան կառուցելու հնարավորություն ընձեռել ուրիշներին՝ պայմանով, որ փոխարենը պետք է լուծեն շենքի վերելակի խնդիրը:

Վերելակների խնդրին վերջերս անդրադարձել էր նաեւ քաղաքապետի տեղակալ Հայկ Սարգսյանը եւ նշել, որ աշխատանքներ են տարվում վերելակների փոխարինման ծրագրի ուղղությամբ, որի արդյունքում հին վերելակ քաղաքում չի մնալու: «Ծրագիրն իրականացվելու է մունիցիպալ պարտատոմսերի թողարկմամբ: Սա աննախադեպ պրոյեկտ է լինելու ոչ միայն մեր երկրի համար, այլեւ տարածաշրջանում որեւէ քաղաքապետարան նման ծրագիր չի իրականացրել»,- վստահեցրել էր նա:

Հայկ Սարգսյանից հետաքրքրվեցինք, թե իր եւ Արթուր Մեսչյանի բարձրաձայնած ծրագրերը միմյանց հետ կապ ունե՞ն:

«Դրանք որեւէ կերպ չեն կապվում, բայց նաեւ իրար չեն խանգարում եւ հակասում: Մենք ունենք ամբողջ քաղաքում վերելակների տոտալ եւ զարկային փոխարինման պրոյեկտ, այսինքն՝ Երեւանում միանգամից պետք է փոխվեն բոլոր վերելակները, որովհետեւ այնպիսի մեծ ծավալ է այսօր ոչ բավարար վիճակում, որ մասնակի, տեղային լուծումները ոչինչ չեն տալու: Ուղղակի մեր գումարները փոշիացնելու են: Հիմա էստեղ կփոխենք, յոթ տարի հետո կփոխենք էնտեղ, քսան տարի անց՝ էնտեղ, սա նորից կհնանա: Մեզ պետք է համակարգված միասնական մոտեցում: Դրա համար պլանավորում ենք, որ այդ վերելակների ֆոնդը նորացնենք միաժամանակ՝ նոր միջոցներով: Եվ այդ միջոցների այլընտրանքները բազմազան են՝ միջազգային վարկ, կառավարության հետ համատեղ որեւէ ռեսուրսի ձեւավորում, քանի որ վերելակները Երեւանի ֆոնդին չեն պատկանում, այլ բնակչության սեփականությունն են, եւ մեր ներդրումը այդտեղ կարող է նաեւ համակցվել կառավարության հետ որեւէ միջոցառմամբ՝ ֆինանսական կամ ոչ ֆինանսական: Այդ ռեսուրսներից մեկը պարտատոմսերի թողարկումն է, մյուսը վարկային ռեսուրսներն են, երրորդը դրամաշնորհն է: Մենք այդ բոլոր ռեսուրսները այսօր քննարկում ենք, որ հասկանանք՝ դրանիցից որն է ավելի էֆեկտիվ»,- պատասխանեց Երեւանի քաղաքապետի տեղակալը:  

Մանրամասնելով, թե ինչ ասել է հնամաշ վերելակների խնդիրը լուծել  մունիցիպալ պարտատոմսերի միջոցով, նա նշեց. «Եթե մենք որոշենք խնդիրը լուծել մունիցիպալ պարտատոմսերի միջոցով, դա ենթադրում է քաղաքապետարանի կողմից պարտատոմսերի թողարկում եւ տեղաբաշխում պարտատոմսերի շուկայում, որոնք ձեռք բերողը կունենա երաշխավորված եկամտային խոստում տվյալ ժամանակահատվածի վերջում կամ ընթացքում: Դրան կարող են մասնակցել քաղաքացիները, գործարար հատվածը, ներդրումային ֆոնդերը, բանկերը եւ այլն: Մենք կհավաքագրենք այդ միջոցները եւ կուղղենք վերելակների վերափոխման նախագծին, որը այս պահին մշակման փուլում է: Կամ եթե որոշենք, որ գնում ենք ոչ թե պարտատոմսերի, այլ միջազգային վարկի ուղղությամբ, կաշխանեք վարկի ներգրամմաբ, որը իր հետ հավանաբար կբերի նաեւ դրամաշնորհ»,- ասաց Հայկ Սարգսյանը:

Թե հատկապես որ ուղղությունն է ընտրվելու՝ վերելակների լրջագույն խնդիրը լուծելու համար, քաղաքապատերանում փաստորեն դեռ չեն որոշել: Առայժմ, ինչպես նշեց, մեր զրուցակիցը, աշխատում են վերելակների հիմնափոխման պրոյեկտի վրա: «Փորձում ենք վերջնական արդյունքում դա տեղավորվի վերելակների այսօրվա դրությամբ հավաքագրվող վճարումների սահմանաչափերում կամ մի քիչ փոփոխությամբ: Հաշվարկը ցույց կտա՝ հնարավոր կլինի՞ որպեսզի մարդիկ այդ նույն վճարի դիմաց կամ մի փոքր տարբերությամբ օգտվեն ավելի նոր, ավելի հուսալի եւ անվտանգ վերելակներից»,- եզրափակեց Երեւանի քաղաքապետի տեղակալ Հայկ Սարգսյանը: