Վստահում եմ իմ ուժերին ու հստակ պատկերացնում, թե ինչ պատասխանատվություն եմ ստանձնում. Ռոման Մուրադյան

Ռոման Մուրադյանը 2018 թ. դեկտեմբերի 9-ին կայանալիք ԱԺ արտահերթ ընտրություններում Արարատի մարզում «Իմ Քայլը» դաշինքի կողմից առաջադրվել է որպես պատգամավորի թեկնածու. քվեաթերթիկում թիվ 9-ն է: Ռոման Մուրադյանը 2015 թվականից ակտիվորեն աջակցել եւ մասնակցել է «Քաղաքացիական պայմանագիր» կուսակցության նախաձեռնած միջոցառումներին՝ լինելով կուսակցության համախոհ։

Ռոման Մուրադյանի հետ զրուցում ենք քաղաքականություն մտնելու պատճառների, ծրագրերի ու պատկերացումների մասին։

- Պարոն Մուրադյան, Դուք բավականին երիտասարդ եք եւ չունեք քաղաքական անցյալ։ Ի՞նչն է Ձեզ դրդել քաղաքական պատասխանատվություն ստանձնել։

- Տղամարդու կյանքում գալիս է մի փուլ, երբ ուզում է օգտակար լինել ոչ միայն իր մտերիմներին՝ ընտանիքին, ընկերներին, այլեւ հասարակությանը։

Գիտեմ, որ ունեմ ներուժ, փորձ, գիտելիքներ, եւ հիմա ուզում եմ աշխատացնել հօգուտ իմ հայրենիքի։ Երկրի համար այս կարեւոր անցումային շրջանում պատասխանատվություն եմ զգում, որն ուզում եմ գործելով արտահայտեմ։

- Պատմեք Ձեր մասնագիտության եւ պրակտիկ գործունեության մասին։

- Առաջին մասնագիտությամբ տնտեսագետ-ֆինանսիստ եմ. ավարտել եմ Հայկական գյուղատնտեսական ակադեմիան: Ուսումս շարունակել եմ ՀՀ Գիտությունների ազգային ակադեմիայի գիտակրթական միջազգային կենտրոնի «Քաղաքագիտություն» բաժնի մագիստրատուրայում: Այնուհետեւ հիմնել ու ղեկավարել եմ իմ սեփական բիզնեսը: 2016թ.-ից աշխատանքի եմ անցել պետական ոլորտում. ՀՀ Գյուղատնտեսության նախարարության Սննդի անվտանգության պետական ծառայության Երեւանի կենտրոնի պետ եմ եղել, այնուհետեւ ՀՀ ԳՆ ՍԱՊԾ-ի պետի խորհրդական:

Պրոֆեսիոնալ մարզիկ եմ, երկար տարիներ զբաղվել եմ ըմբշամարտով: Սպորտն իմ բնավորությունն է կերտել, այն Ռոման Մուրադյանին, ով հիմա կա: Շնորհիվ իմ մարզական դաստիարակության` ես ցանկացած իրավիճակում պայքարում եմ մինչեւ հաղթանակ։ Դա է իմ բնույթը:

- Զբաղվել եք մասնավոր բիզնեսով, բիզնես մտածողություն ունեք։ Արարատ մարզի զարգացման համար բիզնես մոտեցումներ կիրառելո՞ւ եք։  

- Ես կարծում եմ, որ Արարատի հզոր ներուժը պետք է բիզնես մոդելի օրինակով զարգացնենք։ Այս մարզում շահութաբեր աշխատանքի հնարավորություններ շատ կան, ուղղակի պակասում է աշխատող շղթան:

Օրինակ` Արտաշատում գործում է պահածոների գործարան, կան նաեւ քարի վերամշակման արտադրություններ: Արարատ քաղաքին կից գյուղերում՝  Ավշար, Արարատ կան նաեւ գինու-կոնյակի եւ պահածոների արդյունաբերության ձեռնարկություններ, որոնք աշխատում են մեծ ծավալներով՝ արտադրելով գինի, կոնյակի սպիրտ, մրգերի եւ բանջարեղենի պահածոներ: Մասիսի տարածքում գործում են ծխախոտի հումքի մթերում եւ ծխախոտի արտադրություն իրականացնող գործարաններ: 

Այսօր մեր թիմի նպատակներից է հասցնել Արարատի բնակիչներին այն միտքը, որ գյուղատնտեսական բիզնեսը շահութաբեր է:

Հողի հետ աշխատանքը մեծ նվիրում է պահանջում, եւ այստեղ գյուղացուն կարեւոր է տեսնել իր տաժանակիր աշխատանքի ակնկալվող արդյունքներն ու երաշխիքները։ Հաճախ լինելով Արարատի գյուղերում, անընդհատ շփման մեջ եմ մարզի բնակիչների հետ։ Հիմնականում լսում եմ հուսահատ պատմություններ, թե ինչպես են երիտասարդները լքում գյուղը: Գյուղացու մեջ մահացել է իր հողի հանդեպ սիրո ու կապվածության զգացողությունը. մտածում են արտերկրում սվաղ անելն ավելի լավ է։ Հարկավոր է վերադարձնել արարելու ձգտումը:

Իրականում մենք մեծ սպառողական շուկա ունենք գյուղատնտեսության համար՝ ապրանքն իրացնելու մեծ ներուժ: Ուղղակի պետք է աշխատացնել այդ շղթայի բոլոր հատվածները՝ գյուղացի-հող-բերք-սպառում-շահույթ։

Ես միշտ հորդորում եմ նրանց մնալ գյուղերում եւ աշխատել հողի հետ։ Իսկ գյուղացիներն ինձ հակադարձում են, թե´ ոռոգման խնդիր կա, թե´ պարարտանյութն է թանկ, թե´ բերքը կարկուտի պատճառով փչանում է: Ի դեպ,  կարկտակայանների հարցը շատ կարեւոր ու հրատապ է։ ԱՄՆ այցերիս ընթացքում առիթ եմ ունեցել ուսումնասիրելու կարկտակայանների օգտագործման ամերիկյան փորձը եւ այն շատ հանգիստ ու արդյունավետ կարելի է տեղայնացնել:

Ամեն խնդիր ունի իր լուծման տարբերակը, ուստի խնդիրներին տիրապետելով էլ մենք ներկայացնում ենք  դրանց լուծումների մեր տարբերակները։ Իսկ կարկուտը եւ´ Բրազիլիայում է կարկուտ, եւ´ Կախետիյում, սակայն չգիտես ինչու այնտեղ չի խանգարում մարդկանց շահույթ ունենալ։ 

- Վերջերս շատ հանդիպումներ եք ունեցել Արարատի մարզում, մարզին բնորոշ էլ ի՞նչ խնդիրներ կառանձնացնեք

- Մեր թիմը բազում հետազոտություններ է անցկացրել  Արարատի մարզում, դուրս բերելով եւ դասակարգելով բոլոր խնդիրները: Արարատի մարզի առանցքային հիմնախնդիրներից է օրինակ ոռոգման համակարգը, որը լուրջ վերանորոգման կարիք ունի։ Մաքրման խնդիր ունի նաեւ դրենաժային ցանցը, որը բնապահպանական աղետի վտանգ է ողջ մարզի համար։ Արտաշատում ոռոգման համակարգի խնդիրների պատճառով մեծ քանակի ջրի կորուստներ են լինում, որն էլ իր հերթին բերում է ոռոգման ջրի ինքնարժեքի բարձրացմանը եւ, համապատասխանաբար, բնակչության դժգոհությանը։ Արարատում ինքնահոս ոռոգման ջրի համակարգի բացակայության պատճառով տնամերձ հողամասերի մի մասն անմշակ է մնում, ինչն իր հերթին կանաչ տարածքների պահպանմանն է խոչընդոտում: Մասիսում առկա է կոյուղու մաշվածության հիմնախնդիրը, ինչի հետեւանքով բազմաբնակարան շենքերի նկուղային հատվածները վատթար վիճակում են:

Խնդիրները շատ-շատ են, եւ այս պահին հարկավոր է արձանագրել դրանք եւ ներկայացնել նախագծերի տեսքով Ազգային Ժողովում՝ օրենքի սահմաններում փորձելով դրանց գործնական լուծումներ տալ։

- Այսինքն` ձեր նպատակներից է այս բոլոր խնդիրները բերել օրենսդրական դաշտ։

- Սկսենք նրանից, թե ի՞նչ պետք է անի պատգամավորը. նա պետք է ԱԺ-ի ամբիոնից բարձրաձայնի տարբեր ոլորտների խնդիրների մասին, ներկայացնի դրանց լուծումը նախատեսող նախագծեր։

Ես  չունեմ քաղաքական անցյալ, սակայն ունեմ կապեր, ունեմ համապատասխան ոլորտում փորձ ու գիտելիք, ունեմ ցանկություն, կամք, ներուժ եւ գիտակցություն, թե ինչ կարող եմ անել։ Հաճախակի մարդիկ պատգամավորից սպասում են այնպիսի գործառույթներ, որոնք պետք է իրականացնեն քաղաքապետերը, մարզպետները։ Պատգամավոր լինելով՝ ես կկարողանամ վերահսկել եւ պատասխան պահանջել քաղաքապետերից, մարզպետներից։ Որպես պատգամավորի թեկնածու խոստանում եմ բարձրացնել Արարատ մարզին վերաբերող բոլոր հարցերն ու խնդիրները, լուծումներ պահանջել, հետամուտ լինել խնդիրների լուծմանը։

- Ձեր գործունեության մեջ ի՞նչ սկզբունքներով եք առաջնորդվում։ Ինչպե՞ս կբնութագրեք ինքներդ ձեզ։ 

- Ես մինչեւ վերջ՝ մինչեւ հաղթանակ պայքարում եմ, գործս կիսատ չեմ թողնում: Ինձ ճանաչողները կարող են հենց դա ասել իմ մասին։ Ես գիտակցում եմ՝ ինչ պատասխանատվություն եմ ստանձնում: Վստահում եմ ինքս ինձ եւ պատասխանատու եմ անելիքներիս համար։ Իսկ ամենակարեւոր բնութագրիչս այն է, որ Գայանեիս ու Գագիկիս հայրն եմ։ 

Այս ընթացքում ինձ համար անչափ կարեւոր է, որպեսզի չդրվի տարբերություն արարատցու, վեդեցու, գյումրեցու կամ ղարաբաղցու միջեւ. ինձ համար բոլորը Հայաստանի բնակիչներ են, ովքեր հայրենիքի համար կարեւորագույն շրջանում պետք է սովորեն համագործակցել ու ստեղծել բոլորիս երազած ապագան։

- Ձեր ամենամեծ ձեռքբերումը ո՞րն է։

- Ընտանիքս (ժպտում է)։ 

- Ամենաբարդ գործը։

- Ընտանիքը միաժամանակ  ամենաբարդ ու ամենաքաղցր գործն է:

- Ի՞նչ երազանքներ ունեք, բացի քաղաքականությունից։

- Ուզում եմ Ազնավուրները շատ լինեն մեր երկրում։ Ամեն ոլորտ թող հարուստ լինի իր «Ազնավուրով»։ Գյուղերում շփվելով՝ տեսնում եմ, թե ինչքան խելացի, տաղանդավոր երիտասարդներ կան: Շատ եմ ուզում, որ այնտեղից աշխարհահռչակ գիտնականներ, արվեստագետներ ունենանք՝ վստահ լինելով, որ իրենց տաղանդը զարգացնելու ու գործի դնելու հնարավորությունները կլինեն հենց իրենց հայրենիքում …