Ռոբերտ Քոչարյանը Հայաստանում գործոն չէ, մաքսիմում գործիք է իր օտարերկրյա տերերի ձեռքում

«Սասնա ծռեր» համահայկական կուսակցության նախաձեռնող խումբը սեպտեմբերի 29-ին կայանալիք առաջին համագումարին ընդառաջ հանդիպումներ է անցկացրել Շիրակի մարզում, մասնավորապես՝ Գյումրիում եւ Ախուրյանում: Կուսակցության նախաձեռնող խմբի անդամները մեկ անգամ եւս ընդգծել են, որ ցանկացած պահի կաջակցեն եւ կսատարեն  վարչապետ Նիկոլ Փաշինյանին: Ըստ Գևորգ Սաֆարյանի՝ իրենք ամեն պահի պատրաստ են ժողովրդի հետ Նիկոլ Փաշինյանի առաջնորդությամբ դուրս գալ փողոց եւ հեղափոխությունը հասցնել իր տրամաբանական ավարտին:

«Այս պահին կոչ ենք անում լուծարել օրենսդիր իշխանությունը, որը գտնվում է նախկին ռեժիմի ազդեցության տակ, ինչպես նաեւ դատական համակարգում կատարել լրջագույն փոփոխություններ՝ անցումային արդարադատության փիլիսոփայության մեջ: Հակառակ դեպքում, իշխանության այս երկու թեւերն ամեն կերպ խոչընդոտելու են հեղափոխությունը տրամաբանական ավարտին հասցնելը»,- ՀԺ-ի հետ զրույցում ասաց «Սասնա ծռեր» համահայկական կուսակցության նախաձեռնող խմբի անդամ Գեւորգ Սաֆարյանը:

Արեգ Կյուրեղյանը մեկ անգամ եւս ընդգծեց, որ ՀՀ-ում սահմանադրական կարգը տապալված է եղել, երբեք չի գործել եւ այն հիմա աշխատեցնելու փորձերն անօգուտ են:

«Մեծամասամբ դատավորները կամ մյուսները նախկին ՀՀԿ-ի աշխատողներն են, եւ շատ դժվար է մնալ սահմանադրության ներկայիս օրենքների ներսում ու իրականացնել ժողովրդի կամքը: Անձամբ ես գտնում եմ, որ պետք է ստեղծվի ժամանակավոր արդարադատություն իրականացնող համակարգ, ապա պառլամենտը ցրվի, լինի ժամանակավոր կառավարություն, որը կիրականացնի ժողովրդի կամքը: Այդ լիազորությունը Փաշինյանը ստացել է հայ ժողովրդից, դա հայ ժողովրդի պահանջն է, ու շատ արագ պետք է կատարվի: Արագ էն իմաստով, որ ժամանակը կարող է չհերիքի, զուտ ժամանակի հարցն ա, որը որ մեզ պետք է: Ժամանակի խնդիր ունենք, երկրի ներսում մեր հարցերը կարգավորենք, որ դիմակայենք արտաքին վտանգներին»,- ասաց Արեգ Կյուրեղյանը:  

Ըստ նրանց՝ անհրաժեշտ է ստեղծել արտակարգ լիազորություններով օժտված ժամանակավոր կառավարություն, որը նաեւ իր վրա կվերցնի օրենսդիր իշխանության գործառույթները, եւ պետք է ցրել ԱԺ-ն, ինչպես նաեւ անհրաժեշտ է ունենալ ժամանակավոր կամ անցումային արդարադատության մարմին: Սասնա ծռերն այդ մարմինը տեսնում են  երդվյալ ատենակալների կողմից վարվող դատարանի ստեղծմամբ, որը պետք է վարի առանձնապես կարեւոր հարցեր, ինչպիսին, օրինակ, Մարտի 1-ի գործն է, Ռոբերտ Քոչարյանի կալանավորման հարցը եւ այլն:

Անդրադառնալով Ռոբերտ Քոչարյանի՝ քաղաքականություն վերադարձին Գեւորգ Սաֆարյանն ասաց, թե Քոչարյանը երբեք չի եղել Հայաստանում գործոն եւ չի կարող լինել: «Նա մաքսիմում կարող է լինել գործիք իր օտարերկրյա տերերի ձեռում եւ այո, Քոչարյանն այսօր հայտնվելով թակարդում, փորձում է քաղաքականությամբ զբաղվելու քողի տակ պաշտպանվել: Դա իրեն չի փրկելու, Քոչարյանը Հայաստանում տապալել է ժողովրդի իշխանությունը, զավթել է այն, եւ զավթել է զենքով, ինչի հետեւանքը եղել են զոհեր: Այս ամենի համար Քոչարյանը պետք է պատասխան տա իր ազատությամբ, իսկ եթե փորձի այլ գործողություների գնալ, չի բացառվում, որ կարող է պատասխան տալ իր կյանքով նաեւ»,- վստահ է Գեւորգ Սաֆարյանը:

Արեգ Կյուրեղյանը գտնում է, որ Քոչարյանը չի կարող դառնալ հայ ժողովրդին համախմբող գործոն: Բայց նա կարող է մեծապես վնասել ՀՀ-ին: «Հայ ժողովուրդն իր փառահեղ հաղթանակը ավարտին կհասցնի, միայն մնում է թույլ չտալ Քոչարյանին եւ ընդհանրապես հակահեղափոխականներին՝ այդ  ճանապարհին վնաս հասցնել Հայաստանին ու հայ ժողովրդին»,- ասաց նա:

«Հակահեղափոխություն ասելով մենք չպետք է հասկանանք դասական տարբերակը, երբ ժողովրդի լայն զանգվածները պահանջներ կներկայացնեն իշխանություններին: Հակահեղափոխություն ասելով մեր պարագայում պետք է հասկանանք, որ Քոչարյանը, Հանրապետականը, իր թիմը օտարերկրյա տերերի միջոցով կարող են որոշակի խժդժություններ ստեղծել Հայաստանում, այդ թվում նաեւ որոշակի ռազմական գործողություններ կարող են կազմակերպել: Քոչարյանը հայ ժողովրդի թշնամին ա, հայ ժողովուրդը լավ է ճանաչում իր թշնամիներին: Վերջին անգամ հայ ցուցարարների վրա սուլթան Համիդն էր կրակել, հետո՝ Քոչարյանը: Նրանք պատրաստ են կրակել ոչ թե 10 հոգու, այլ 100 կամ հազար տասը հոգու վրա, սակայն նրանք եւ իրենց տերերը պետք է հասկանան, որ իրենց նմանատիպ գործողություններն անգամ տապալված են, քանի որ հայ ժողովուրդը թույլ չի տա նման «իզգոյներին» ժողովրդի կողմից ընտրված կառավարությունը տապալել: Եվ էդ ռեւանշիստները պիտի հասկանան, որ եթե որեւէ  ռեպրեսիվ գործողություն կատարեն ներկայիս կառավարության նկատմամբ, ապա կստանան նույնկերպ ռեպրեսիվ գործողություններ իրենց նկատմամբ»:

Գեւորգ Սաֆարյանի դիտարկմամբ, այսօր Հայաստանի ներքին եւ արտաքին թշնամիները համատեղ են գործում: Ներքին ասելով՝ նկատի ունի Ռոբերտ Քոչարյանին եւ հակահեղափոխականներին, իսկ արտաքին թշնամին, ըստ նրա՝ ՌԴ-ն է:    

«Այսօր Քոչարյանն ունի Ռուսաստանի մեծ հովանին: ՌԴ նախագահը դեմոնստրատիվ շնորհավորեց Քոչարյանի ծնունդը: Լավրովի հայտարարությունները նաեւ հիշենք, այսինքն՝ այդ ներքին եւ արտաքին հակառակորդներն այսօր համատեղ են գործում: Դրանից բացի, այսօր մենք ՀՀ-ում ռուսական հատուկ ծառայություններին թույլ ենք տվել իրականացնել գաղտնալսում եւ նրանք լսում են թե՛ վարչապետի հեռախոսը, թե՛ ՊՆ-ի հեռախոսը, բայց կա շատ ավելի զավեշտալի իրավիճակ: Ռուսական այդ ծառայությունները լսում են Հայաստանի եւ օտարերկրյա ղեկավարների խոսակցությունները պաշտոնապես: Հայաստանը դա թույլ է տվել: Սա զավեշտ է: Սա մեր ինքնիշխանության դեմ կատարվող գործողություն է, եւ եթե ավելի պարզ բառապաշարով խոսենք, ստացվում է, որ Հայաստանը Ռուսաստանին ասում է տեր, մենք քո դեմ որեւիցե գործողություն չենք կատարում, եւ որպեսզի դու համոզված լինես, արի եւ ներկա գտնվի մեր եւ օտարերկրյա պետությունների բարձրաստիճան պաշտոնյաների խոսակցությանը: Սա անթույլատրելի է»:

Արդյո՞ք Հայաստանի ներքաղակական իրավիճակներով է պայմանավորված հայ-ադրբեջանական շփման գծի լարվածությունը: Գեւորգ Սաֆարյանի կարծիքով, Ադրբեջանին թվում է, որ Հայաստանում կա ներքին թուլացում, Ադրբեջանին նաեւ թվում է, որ Հայաստանը թուլանում է արտաքին քաղաքականության մեջ՝ հաշվի առնելով, որ ՌԴ-ի կողմից աջակցություն եղավ Հայաստանի ներսում հակահեղափոխության քայլերի փորձ անող ուժերին: «Դրա համար Ադրբեջանին թվում է, որ Հայաստանը չի կարող արձագանքել իր սադրանքներին, բայց դա այդպես չէ: Բոլորը պետք է հասկանան, որ Հայաստանը ինչ-որ անձանց պետություն չէ: Ոչ Քոչարյանինն է, ոչ Փաշինյանինն է, կամ ինչ-որ մեկինը, այլ ժողովրդինն է, եւ որեւէ սադրանք ՀՀ սահմաններին, Արցախը ներառյալ, ուղղակի վտանգ է Ադրբեջանի գոյությանը, որովհետեւ հայ ժողովուրդը կարող է զինվել, հայտնվել սահմանում: Ադրբեջանում պետք է հասկանան, որ Հայաստանը շատ ուժեղ է, շատ համախմբված է եւ նման սադրանքների դեպքում կարող է հասնել մինչեւ Բաքու: Կարծում եմ, որ բոլոր այն դիրքերը, որոնք վտանգ են ներկայացնում առնվազն մեր խաղաղ բնակչության համար, պետք է ոչնչացվեն: Հայաստանը պետք է տիրանա դրանց՝ ապահովելով սեփական բնակչության անվտանգությունը»,- զրույցն այս վստահությամբ եզրափակեց «Սասնա ծռեր» համահայկական կուսակցության նախաձեռնող խմբի անդամ Գեւորգ Սաֆարյանը: