Ձեռնպահ քվեարկեք, մինչև հասկանանք դռնբաց կառավարության նիստ ասելով խոսքը ում է վերաբերվում

Ի՞նչ հիմքով պետք է ՄԻՊ-ը կառավարության նիստերին մասնակցի վարչապետի հրավերով. հանձնաժողովը դեմ էր:

ԱԺ պետական-իրավական եւ մարդու իրավունքների մշտական հանձնաժողովում քննարկվում է «Մարդու իրավունքների պաշտպանի մասին» ՀՀ սահմանադրական օրենքում փոփոխություններ եւ լրացումներ կատարելու մասին» հարցը: Մինչեւ քննարկմանն անցնելը հանձնաժողովի նախագահ Գեւորգ Կոստանյանը նշեց, որ հարցերը քննարկել է արդարադատության նորանշանակ նախարար Արտակ Զեյնալյանի հետ:

Քննարկման ժամանակ հիմնական առարկությունը վերաբերում էր օրենքի այն դրույթին, որ ՄԻՊ-ը կարող է կառավարության նիստերին մասնակցել միայն վարչապետի հրավերով: «Պաշտպանը կարող է մասնակցել Կառավարության նիստերին վարչապետի հրավերի հիման վրա»,- ասված է օրենքում:

ԱԺ Ծառուկյան խմբակցության պատգամավոր Գեւորգ Պետրոսյանը հետաքրքրվեց հիմնական զեկուցող արդարադատության փոխնախարար Արթուր Հովհաննիսյանից, թե ի՞նչ հիմքով, ի՞նչ տրամաբանությամբ պետք է ՄԻՊ-ը կառավարության նիստերին մասնակցի վարչապետի հրավերով: Հովհաննիսյանն ընդգծեց, որ կառավարության կառուցվածքի մասին օրենքով ասվում է, որ կառավարությունում նիստերը քննարկվում են միայն կառավարության անդամների կողմից, եւ որ ԱԺ-ն է հենց հաստատել այդ օրինագիծը: Նրա խոսքով՝ բացի այդ, ՄԻՊ-ին անհանգստացնող հարցերը քննարկվում են նախարարական կոմիտեներում:

«ՄԻՊ-ի ներկայությունը կառավարության նիստերին որեւիցե հարց չէր լուծելու: Ոչ միայն ՄԻՊ-ը, այլ մնացած անկախ մարմինները, ում նախկինում թույլատրված էր մասնակցելու նիստին, նոր օրենքով կարող են մասնակցել միայն վարչապետի հրավերով»,- բացատրեց Հովհաննիսյանը:

Հանձնաժողովի նախագահ Կոստանյանն էլ նշեց, որ ՄԻՊ-ը այն բացառիկ մարմիններից է, որ ցանկացած դեպքում կառավարության նիստում մասնակցելու իրավունք ունի: «Դժվար է այս երկրում պատկերացնել մի իրավական ակտ, որ մարդու իրավունքներին չի առնչվում, հետեւաբար՝ ցանկացած հարց, որ քննարկվում է կառավարությունում, առնչվում է մարդու իրավունքների հետ: Ուստի, նրա մասնակցությունը պարտադիր է եւ չպետք է լինի որեւէ մեկի հրավերով»,- ընդգծեց նա:

Արթուր Հովհաննիսյանը նշեց, որ երկու օրենքի մեջ եղած հակասությունն են շտկում: «Կառավարության կառուցվածքի եւ Մարդու իրավունքների մասին օրենքների միջեւ եղած հակասությունը: Կառավարության կառուցվածքի մասին օրենքով նախատեսված է թե ով կարող է մասնակցել նիստին վարչապետի հրավերով: Մենք հիմա հակասություն ենք շտկում կառավարության կառուցվածքի եւ Մարդու իրավունքների օրենքի միջեւ»,- շեշտեց նա:

ՄԻՊ Արման Թաթոյանն էլ նշեց, որ շնորհակալ է դիրքորոշումների համար՝ ՄԻՊ-ի դերը գնահատելու համար: «Ես՝ ինքս չէի ցանկանա մասնակցել այդ նիստերին, դրա համար համաձայնել էի փոփոխություններին: Մեր օրենքը սահմանադրական օրենք է, իմ գործողությունները հանրության համար նույնպես տեսանելի են, ես որեւէ խնդիր չեմ տեսնում, քանի որ մեր օրենքը սահմանադրական է»,- նկատեց նա:

Փոխնախարարն առաջարկեց հանել նախագծի այդ դրույթը, որ վարչապետի հրավերով պետք է ՄԻՊ-ը մասնակցի կառավարության նիստերին եւ նախագիծը դնել քվեարկության:

«Ձեռնպահ քվեարկեք այս հոդվածին, մինչեւ կհասկանանք դռնբաց կառավարության նիստ ասելով՝ խոսքը վերաբերում է ԶԼՄ-ի՞ն, թե՞ ցանկացած անձ կկարողանա մասնակցել նիստերին, այդ թվում՝ հանձնաժողովների անդամները»,- ասաց նա:

Կոստանյանն էլ նշեց, որ բոլոր օրենքները պետք է փոփոխության ենթարկվեն, որպեսզի ՄԻՊ-ն իր հայեցողությամբ, երբ ցանկանա, կարողանա մասնակցել կառավարության նիստերին: Փոխնախարարն էլ նշեց, որ կարիք չկա օրենքները փոփոխել, որ իր հայեցողությամբ ՄԻՊ-ը կարողանա մասնակցել նիստերին:

«ՄԻՊ-ի մասին օրենքը սահմանադրական օրենք է եւ դրանով նախատեսված է, որ ՄԻՊ-ն իր հայեցողությամբ կարող է մասնակցել կառավարության նիստերին: Սահմանադրական օրենքով դա այդպես է, ուստի՝ փոփոխության կարիք չկա»,- նկատեց նա:

Հանձնաժողովի անդամ Արփինե Հովհաննիսյանն էլ իր անհամաձայնությունը հայտնեց. «Օրենքը պետք է վերաբերի թե՛ ՄԻՊ-ին, թե՛ դատախազության մարմիններին: Այս պահին հարցը լուծեցինք, բա հետո՞: Պետք է առաջինից երկրորդ ընթերցումով շտկվի այս հակասությունը»,- նկատեց նա:

Կոստանյանն էլ նկատեց, որ կառավարությունը միասնական մոտեցմամբ կբերի կառավարության կառուցվածքի մասին օրենքը: Այս ամենը համակարգային լուծում է պահանջում:

«Այս պահին լուծումը տանք, կարողանան առանց հրավերի մասնակցել: Սահմանափակումը հանում ենք ու առանց դրա քվեարկության ենք դնում»,- ասաց Կոստանյանը: Փոխնախարարն էլ նշեց, որ պարտադիր լինելու է փոփոխություն՝ կառավարության կառուցվածքի մասին օրենքում: Ի վերջո, նախագիծը դրվեց քվեարկության, ընդունվեց միաձայն, հարցը կքննարկվի քառօրյա նիստում: