Կենսաթոշակների մասին օրենքի փոփոխությունների նախագծի քվեարկությունը հետաձգվել է

Հոկտեմբերի 17-ին ՀՀ ԱԺ առողջապահության եւ սոցիալական հարցերի մշտական հանձնաժողովը Հակոբ Հակոբյանի նախագահությամբ կայացած նիստում երկրորդ ընթերցման ընթացակարգով քննարկել եւ դրական եզրակացություն է տվել «Գործունեության իրականացման ծանուցման մասին» ՀՀ օրենքում լրացում կատարելու մասին», «Լիցենզավորման մասին» ՀՀ օրենքում փոփոխություններ եւ լրացում կատարելու մասին» եւ «Պետական տուրքի մասին» ՀՀ օրենքում փոփոխություններ եւ լրացում կատարելու մասին» օրենքների նախագծերի փաթեթին: Քննարկվել եւ դրական եզրակացության են արժանացել «Հայաստանի Հանրապետության քննչական կոմիտեի մասին» ՀՀ օրենքում փոփոխություն կատարելու մասին», «Մարդու իմունային անբավարարության վիրուսից առաջացած հիվանդության կանխարգելման մասին» ՀՀ օրենքում փոփոխություններ կատարելու մասին» եւ «Պետական պաշտոններ զբաղեցնող անձանց վարձատրության մասին» ՀՀ օրենքում լրացում կատարելու մասին» օրենքների նախագծերը: Վերոնշյալ օրենքների նախագծերը կընդգրկվեն ՀՀ ԱԺ առաջիկա հերթական նիստերի օրակարգի նախագծում:

ՀՀ ԱԺ պատգամավոր Հակոբ Հակոբյանի հեղինակած «Պետական կենսաթոշակների մասին» ՀՀ օրենքում փոփոխություններ կատարելու մասին» օրենքի նախագիծը հանձնաժողովը քննարկել է, սակայն դրա վերաբերյալ քվեարկությունը երկու ամսով հետաձգվել է: Հետաձգման նպատակը նախագծի լրամշակումն է:

Գագիկ Մինասյանի նախագահությամբ տեղի է ունեցել նաեւ ՀՀ ԱԺ ֆինանսավարկային եւ բյուջետային հարցերի մշտական հանձնաժողովի նիստը:

Երկրորդ ընթերցմամբ քննարկվել է ՀՀ կառավարության հեղինակած «Բնակարանային հիփոթեքային կրեդիտավորման մասին», «Սպառողական կրեդիտավորման մասին» ՀՀ օրենքում փոփոխություններ եւ լրացում կատարելու մասին», «Բանկերի, վարկային կազմակերպությունների, ներդրումային ընկերությունների, ներդրումային ֆոնդի կառավարիչների եւ ապահովագրական ընկերությունների սնանկության մասին» ՀՀ օրենքում լրացում եւ փոփոխություններ կատարելու մասին», «Հրապարակային սակարկությունների մասին» ՀՀ օրենքում լրացումներ կատարելու մասին» եւ «ՀՀ քաղաքացիական դատավարության օրենսգրքում լրացումներ կատարելու մասին» օրենսդրական փաթեթը:

Նշենք, որ փաթեթը կարգավորում է բնակարանային հիփոթեքային կրեդիտավորման պայմանագրեր կնքող կրեդիտառուների իրավունքների, կրեդիտավորողի կողմից տեղեկությունների բացահայտման, բնակարանային հիփոթեքային կրեդիտավորման պայմանագրերի կնքման եւ այդ պայմանագրերի հետ կապված այլ հարաբերություններ, կրեդիտավորողների նկատմամբ պատասխանատվության միջոցների կիրառումը:

Փաթեթի վերաբերյալ առաջարկներ է ներկայացրել ՀՀ ԱԺ ՀՀԿ խմբակցությունը: Հակոբ Հակոբյանը նշել է, որ առաջարկները հստակեցման նպատակ ունեն. վարկառուն ինքն է ընտրելու վարկի համար առաջարկվող պայմաններից եւ ցանկացած փոփոխության դեպքում հաշվի է առնվելու վարկառուի կարծիքը: Օրենքը հետադարձ ուժ կունենա այն դեպքում, եթե կլինի վարկառուի եւ վարկատուի համաձայնությունը:

Կառավարության հեղինակած «Բանկերի եւ բանկային գործունեության մասին» ՀՀ օրենքում փոփոխություններ եւ լրացումներ կատարելու մասին», «Ապահովագրության եւ ապահովագրական գործունեության մասին» ՀՀ օրենքում լրացումներ եւ փոփոխություններ կատարելու մասին» եւ «Բանկերի, վարկային կազմակերպությունների, ներդրումային ընկերությունների, ներդրումային ֆոնդի կառավարիչների եւ ապահովագրական ընկերությունների սնանկության մասին» ՀՀ օրենքում լրացումներ եւ փոփոխություններ կատարելու մասին» օրինագծերի փաթեթը եւս քննարկվել է երկրորդ ընթերցումով: ՀՀ օրենքների նախագծերի փաթեթի ներկայացման նպատակը բանկային եւ ապահովագրական համակարգի կարգավորման եւ վերահսկողության դաշտի համապատասխանեցումն է միջազգային պահանջներին:

Փաթեթի վերաբերյալ ՀՀ կառավարության առաջարկները ներկայացրել է ՀՀ Կենտրոնական բանկի նախագահի տեղակալ Ներսես Երիցյանը: Նշվել է, որ օրենքում մանրամասն ներկայացվել է պատվիրակման գործառույթը, առաջարկներ են արվել նաեւ ռիսկերի կառավարման, ներքին աուդիտի վերաբերյալ:

Վերոնշյալ օրենսդրական փաթեթների վերաբերյալ առաջարկներն ընդունվել են: Հանձնաժողովը դրական եզրակացություն է ներկայացրել ԱԺ վեցերորդ գումարման երկրորդ նստաշրջանի 2017 թ. հոկտեմբերի 24-ին գումարվող նիստերի օրակարգի նախագծում ընդգրկված նախագծերի վերաբերյալ:

Երկրորդ ընթերցումով քննարկվել եւ հանձնաժողովի դրական եզրակացությանն է արժանացել նաեւ «Աուդիտորական գործունեության մասին» ՀՀ օրենքում փոփոխություններ կատարելու մասին» օրենքի նախագիծը, որը ներկայացրել է ՀՀ ֆինանսների նախարարի տեղակալ Դավիթ Անանյանը:

Բյուջետային գրասենյակի 2017 թվականի երրորդ եռամսյակում կատարած աշխատանքների վերաբերյալ հաշվետվությունը ներկայացրել է Բյուջետային գրասենյակի համակարգող-փորձագետ Գագիկ Բարսեղյանը: Հաշվետվությունն արժանացել է հանձնաժողովի հավանությանը: