Վահրամ Բաղդասարյան. անցնող տարին համարում եմ կայունացման տարի

Անցնող 2016 թվականը Հայաստանի համար բացասական եւ ձախողումներով ուղեկցվող տարի է համարվում: Նախ տեղի ունեցավ ապրիլյան պատերազմը, որը 1996թ. հրադադարի հաստատումից հետո առաջինն էր հրադադարի խախտման իր ծավալներով, պատճառած զոհերով ու կորուստներով: Ապրիլյան պատերազմից դեռ ուշքի չեկած՝ «Սասնա ծռեր» խմբի կողմից տեղի ունեցավ ոստիկանության ՊՊԾ գնդի գրավումը: Այս երկու ողբերգական իրադարձություններին զուգահեռ տնտեսության մեջ դրական փոփոխություններ չարձանագրվեցին:

Եվ արդյունքում իշխանությունների նկատմամբ հասարակության մեջ եղած դժգոհությունն էլ ավելի մեծացավ: Հասարակության մեջ կուտակված լարվածությունը թուլացնելու համար իշխանությունները որոշեցին կադրային փոփոխություն իրականացնել՝ փոխելով վարչապետին ու կառավարությունը: Տեղի ունեցան նաեւ աղմկոտ պաշտոնանկություններ ու ձերբակալումներ: Այս փոփոխությունները թեեւ սկզբնական շրջանում դրական սպասումներ առաջացրին, բայց կարծես թե առայժմ լուրջ արդյունքներ չեն տալիս: Անցնող տարվա նկատմամբ իշխանությունների գնահատականն ու 2017թ. նկատմամբ ունեցած սպասումները փորձեցինք պարզել ԱԺ Հանրապետական խմբակցության ղեկավար Վահրամ Բաղդասարյանից:

- Պարոն Բաղդասարյան, չե՞ք կարծում, որ անցնող տարին բացասական էր մեր երկրի համար:

- Ապրիլյան պատերազմը, բնականաբար, իր անդառնալի հետքը թողել է, դա անժխտելի է: Բայց տնտեսական դաշտում տարածաշրջանային երկրների հետ ընդհանուր համեմատության մեջ ես բացասական չէի գնահատի: Իհարկե, մենք անելիքներ դեռ շատ ունենք: Քաղաքական դաշտում բավական բուռն բարեփոխումների տարի կարելի է համարել: Սահմանադրական բարեփոխումներն ու դրանից բխող օրենսդրական փոփոխությունները, հատկապես նոր Ընտրական օրենսգրքի ընդունումը, կառավարության նոր ծրագիրը միտված են ապագային, եւ համոզված եմ, որ բավական խոստումնալից են: Համենայնդեպս մի բան պետք է ֆիքսենք՝ մեր քաղաքական ուժը պահի խնդիր չի լուծում: Թեեւ տարին նախընտրական էր, բայց մենք խնդիր չենք դրել, որ ինչ-որ կերպ՝ խոստումներով կարողանանք ընտրություններն անցկացնել: Դրա վկայությունը 2017թ. բյուջեն է, որը կայունացման բյուջե էր: Մենք այդ բոլոր փոփոխությունները կատարում ենք ապագայի համար՝ 2017-2018 թվականների համար:

- Ապրիլյան պատերազմի դեպքում անդառնալի հետք ասելով ի՞նչ նկատի ունեք՝ նաեւ այն տարածքնե՞րը, որոնք ադրբեջանական կողմը գրավեց:

- Անդառնալի կորուստը մեր երիտասարդ զոհերն էին: Ամեն ինչ՝ տարածքներն էլ, կարող են դառնալի լինել, բայց զոհերը՝ ոչ:

- Այնուամենայնիվ, դրակա՞ն, թե՞ բացասական եք համարում 2016 թվականը:

- Այնուամենայնիվ, անցնող տարին համարում եմ կայունացման տարի: Ամբողջությամբ դրական չէի ցանկանա համարել, ընդհանուր առմամբ մենք գոհ չենք, քանի որ անելիքներ շատ կան: Ամբողջ միջազգային անցուդարձը իր դրական ու բացասական ազդեցությունն ունեցել է մեր զարգացումների վրա:

- Իսկ չե՞ք կարծում, որ «Սասնա ծռերի» դեպքը իշխանությունների նկատմամբ եղած դժգոհության հետեւանք էր:

- Ես չեմ ցանկանում խոսել արկածախնդիրների մասին, աշխարհի ցանկացած երկրում կարող են նման բախտախնդիրներ լինել: Հանրությունը պետք է դրա գնահատականը տա:

- Կառավարության ծրագիրը, բյուջեն դրական ու կայունացնող գնահատեցիք, բայց արդյոք ընդամենը երկուսուկես տարվա ընթացքում կառավարության ու վարչապետի փոփոխությունը իշխանությունների վարած քաղաքականության ձախողման արդյո՞ւնքը չեն:

- Մենք կառավարությանը գնահատականներ չենք տալիս, մենք նշում ենք, որ այն հիմքերը, որոնք դրված են ապագայի համար, առայժմ բավական խոստումնալից են: Նոր բարեփոխումները բավարար են, որ կառավարությունը հաջորդ տարիներին դրական արդյունքներ գրանցի:

- Բայց նոր կառավարության նկատմամբ էլ արդեն հանրության մեջ դժգոհություն է առաջանում այն առումով, որ հարկային ու մաքսային ծառայությունները շարունակում են ստվերային գումարներ գանձել գործարարներից, որ այդպես էլ լայն սպառման ապրանքների շուկայում գոյություն ունեցող մենաշնորհները չեն կոտրվում: Այդպիսով, նորից այն տպավորությունն է առաջանում, որ դա ընդամենը նախընտրական փոփոխություն էր:

- Ոչ, ձեր ասած այդ երեւույթները հնարավոր չէ միանգամից կարգավորել: Բավականին լուրջ փոփոխություններ են կատարվել հարկային եւ մաքսային քաղաքականության մեջ: Կառավարությունը հավասար դաշտ ստեղծելու համար հիմնավոր բարեփոխումներ է արել եւ շարունակում է անել: Ու այնպես չէ, որ միանգամից հնարավոր է մեծ փոփոխություններ անել եւ իդեալական պայմաններ ստեղծել:

- Դուք կարծում եք՝ այդ փոփոխությունները բավարա՞ր են, որ ընտրություններում շահեք հանրության վստահությունը: Չէ՞որ դուք այդ խնդիրն ունենալու եք:

- Ոչ, այդ ուղղությամբ մենք չենք մտածել, անկեղծ ասած, նման գնահատականներ չեն տրվել: Մենք ոչ թե պահի, այլ ապագայի գնահատական պետք է տանք, թե արդյոք մեկ տարի, երկու տարի հետո հույս կարո՞ղ ենք կապել այս փոփոխությունների, կառավարության եւ իշխանության հետ:

- Հանրապետական կուսակցությունը միայն Սերժ Սարգսյանի պաշտոնավարման ընթացքում մոտ ինը տարի է, իշխանության ղեկին է: Թե՛ տնտեսության, թե՛ արտաքին քաղաքականության մեջ էական առաջընթացներ չեն եղել:

- Արտաքին քաղաքականության մեջ կա բավական կայունացում, եւ մեր կատարած քայլերն այդ ուղղությամբ բավական գոհացնող են: Այլ խնդիր այս տարիների ընթացքում հնարավոր չէր լուծել: Ինչ վերաբերում է տնտեսությանը, ես ասացի, որ այն համեմատության մեջ պետք է դիտարկել:

- Չե՞ք կարծում, որ ԼՂՀ հարցի կարգավորման բանակցությունները փակուղում են: Հատկապես որ Ս. Սարգսյանը չի ցանկանում բանակցություններին մասնակցել:

- Մոտ ապագայում դրա հանգուցալուծումը ես չեմ տեսնում, եւ չեմ էլ կարծում, որ կլինի այնպիսի քաղաքական գործիչ, այնպիսի քաղաքական ուժ, որը կարող է մոտ ապագայում այդ հարցում կտրուկ փոփոխություն անել: Մեր թշնամին անկանխատեսելի է, դեռ չկան ընդհանուր հայտարարներ, եւ ինձ թվում է, որ մենք առայժմ կարողանում ենք մեր առաջ դրված խնդիրը կարգավորել: Այս հրադադարը, այս դողացող խաղաղությունը, որը մենք կարողանում ենք պահպանել, մեծ բան է: Այս հարցում մենք պետք է պատրաստ լինենք դիմագրավելու ամենավատթարագույնին: Իսկ ընդհանուր առմամբ, կարծում եմ, 2017-ին արդեն մեր երկրում շոշափելի առաջընթաց պետք է ունենանք: Իսկ 2018-2019թթ. արդեն՝ զգալի առաջընթաց: