Լուրեր

Կարեւոր է, որ դրամի արժեզրկումը տեղի է ունենում ի հեճուկս Հայաստանի կենտրոնական բանկի իրականացրած դոլարային ինտերվենցիաների: Այլ կերպ ասած, դրամի պահվածքը ինչ-որ տեղ դուրս է եկել ՀՀ ԿԲ-ի վերահսկողությունից:

Խնդիրն այն է, որ այս տարվա պետբյուջեով եկամուտները, անցած տարվա համեմատ, պետք է աճեն գոնե 11%-ով, որպեսզի բյուջեն կատարվի, բայց 4 ամսվա տվյալներով` աճը կազմել է 3.1%, այսինքն` ավելի քան 3 անգամ ցածր է եղել, քան պետք է լիներ: Ուշագրավ է, որ կարեւորագույն հարկատեսակի` Ավելացված արժեքի հարկի գծով այս 4 ամիսներին մուտքերը ավելի ցածր են եղել, քան անցած տարվա նույն ժամանակահատվածում: Իսկ եթե եկամուտները վերածենք դոլարի, կստացվի, որ այս տարվա առաջին 4 ամիսներին բյուջեի մուտքերը նվազել են անցած տարվա համեմատ: Հայաստանի տնտեսական վիճակը, ինչպես երեւում է, ավելի վատ է, քան հնարավոր էր պատկերացնել:

տես էջ 2

Այս փաստը առավել հետաքրքիր է ահա թե ինչու. ԱԺ ընտրությունների քարոզարշավի վերջին օրերին Սուրեն Սուրենյանցը «Ա1+» հեռուստաընկերությունում նկարահանված վճարովի հոլովակում հայտարարեց, թե Երեւանի թիվ 7 ընտրատարածքում պաշտպանում է Սամվել Ալեքսանյանի (Լֆիկ Սամո) թեկնածությունը: Նույն ԸՏ-ում, ինչպես գիտեք, մեծամասնական ընտրակարգով առաջադրվել էր նաեւ Հայ ազգային կոնգրեսի անդամ Նիկոլ Փաշինյանը: Ստացվում է, որ «Հանրապետություն» կուսակցության քաղաքական խորհրդի անդամը պաշտպանում էր ՀՀԿ-ի թեկնածուին եւ այն էլ` Լֆիկ Սամոյին: Առավել հետաքրքիր է, որ «Հանրապետություն» կուսակցությունը իր քաղխորհրդի անդամի այսօրինակ հայտարարության վերաբերյալ որեւէ դիրքորոշում չի արտահայտել: Մնում է հուսալ, որ այս պարագայում լռությունը ամենեւին էլ համաձայնության նշան չէր, այլ սովորական թյուրիմացություն:

տես էջ 3

«Հանրապետություն» կուսակցության առաջնորդ Արամ Սարգսյանը, որը մայիսի 6-ի ԱԺ ընտրություններում Հայ ազգային կոնգրեսի համամասնական ցուցակի 3-րդ համարն էր զբաղեցնում, երեկ ինքնաբացարկի դիմում է ներկայացրել ԿԸՀ: Այս տվյալը մեր թղթակցին հայտնել են ԿԸՀ-ից: Ենթադրվում է, որ առաջիկա երկուշաբթի ինքնաբացարկի դիմումներ կներկայացնեն իշխանական կոալիցիայի մաս կազմող կուսակցությունների` պետական պաշտոններ զբաղեցնող թեկնածուները:

Հայտնի օլիգարխ Սամվել Ալեքսանյանը երեկ որեւէ կերպ չի արձագանքել ուղիղ եթերում բանավիճելու Նիկոլ Փաշինյանի առաջարկին: Ալեքսանյանը որեւէ կերպ չի արձագանքել նաեւ Նիկոլի երեկվա պատասխանին: Սա, ըստ որոշ փորձագետների, ախորժակի կորստի առաջին նշաններն են: Հիշեցնենք, որ Նիկոլի առաջարկի համաձայն` Ալեքսանյանի հետ ուղիղ եթերում բանավեճը պետք է տեղի ունենա կիրակի երեկոյան, եթե, իհարկե, Ալեքսանյանը համարձակվի ընդունել առաջարկը:

«Բարգավաճ Հայաստան» կուսակցության համամասնական ցուցակի 9-րդ հորիզոնականը զբաղեցնող ՀՀ քաղաքագետների միության նախագահ Հմայակ Հովհաննիսյանը երեկ մեր թղթակցի հետ զրույցում չի բացառել, որ հնարավոր է` ինքնաբացարկի դիմում ներկայացնի եւ հրաժարվի իր պատգամավորական մանդատից: Հովհաննիսյանը դեմ է ՀՀԿ-ի հետ ԲՀԿ-ի կոալիցիա կազմելուն: «Այսօր միտումները տանում են նրան, որ կոալիցիան ձեւավորվելու է»,- մեր թղթակցին ասել է Հմայակ Հովհաննիսյանը: Քաղաքագետը հավելել է, որ իր սկզբունքներին դեմ չի գնա: Այժմ ամեն ինչ կախված է նրանից, թե ինչպիսի պայմանավորվածություն ձեռք կբերվի Սերժ Սարգսյանի եւ Գագիկ Ծառուկյանի միջեւ:

Արդյո՞ք Սերժ Սարգսյանը ներկա է գտնվելու նոր ձեւավորված խորհրդարանի առաջին նիստին` մեր թղթակցի այս հարցին ի պատասխան, երեկ ՀՀԿ խոսնակ Էդուարդ Շարմազանովը ասել է, որ ըստ ԱԺ կանոնակարգ-օրենքի, հանրապետության նախագահը այդ նիստին ներկա է գտնվում: ՀՀԿ խոսնակը հայտնել է նաեւ, որ ԱԺ առաջին նիստը տեղի կունենա մայիսի 31-ին, ժամը 10-ին: Նա երեկ հաստատել է, որ ՀՀԿ համամասնական ցուցակում ինքնաբացարկի դիմումները շարունակվում են, սակայն այդպես էլ որեւէ մեկի անունը չի նշել: Շարմազանովը մասնավորեցրել է միայն, որ ինքնաբացարկի դիմումները գրում են ներկայիս գործադիրի անդամները, իսկ գործող պատգամավորներից ոչ մեկը դեռ նման դիմում չի գրել:

Լավատեղյակ աղբյուրներից հայտնի դարձավ, որ ռուսաստանյան որոշակի շրջանակներ փորձում են Սերժ Սարգսյանին համոզել` ՀՀ վարչապետ նշանակել «երկու Կարեններից մեկին»: Խոսքը Երեւանի նախկին քաղաքապետ, «Գազպրոմբանկի» տնօրենի տեղակալ Կարեն Կարապետյանի եւ Սերժ Սարգսյանի նախագահի աշխատակազմի նախկին ղեկավար, թիվ 32 ընտրատարածքի ԱԺ պատգամավոր Կարեն Կարապետյանի մասին է: Մեր աղբյուրները վկայում են, որ այս տարբերակին դեմ չէ նաեւ «Բարգավաճ Հայաստան» կուսակցությունը: Սերժ Սարգսյանն էլ, մեր տեղեկություններով, վերջնական որոշում դեռեւս չի կայացրել: Գործող վարչապետի թեկնածությունը նրա համար ընդունելի է միջազգային «ֆեյսի» համար: Սակայն, նրան նաեւ մտահոգում է Տիգրան Սարգսյանի ցածր հեղինակությունը հանրապետության ներսում:

Պղնձի միջազգային գինը շարունակում է նվազել, եւ երեկ մեկ տոննայի գինը կազմել է 7 հազար 610 դոլար, մինչդեռ մայիսի 1-ին գինը 8 հազար 475 դոլար էր: Սա էական ազդեցություն կթողնի Հայաստանի արտաքին առեւտրի վրա, քանի որ ՀՀ-ից արտահանման մի զգալի մասը պղնձի հանքաքարն է:

Երեկ ԿԸՀ-ի հրավիրած արտահերթ նիստի օրակարգում ընդգրկված էր պատգամավորի թեկնածուներ` թիվ 12 ընտրատարածքից լրագրող Գոհար Վեզիրյանին եւ թիվ 32 ընտրատարածքից Անուշավան Նիկողոսյանին վարչական տույժի ենթարկելու մասին արձանագրություն կազմելու հարցը: Իսկ ԿԸՀ-ում նման հարց քննարկելու պատճառն այն է, որ նշված երկու թեկնածուները հանձնաժողովի վերահսկիչ-վերստուգիչ ծառայությանը չէին ներկայացրել իրենց նախընտրական հիմնադրամների հաշվետվությունները: Համապատասխան հաշվետվությունները պատգամավորի թեկնածուները ԿԸՀ պետք է ներկայացնեին մինչեւ մայիսի 8-ը: Նշված հաշվետվությունը չներկայացնելու համար նախատեսված է 100-200 հազար դրամի վարչական տույժ: Նշված թեկնածուներից ԿԸՀ նիստին ներկայացել էր միայն Գոհար Վեզիրյանը: Վերջինս ԿԸՀ-ին տեղեկացրեց, որ ինքը հաշվետվությունը էլեկտրոնային եղանակով իր էլեկտրոնային փոստից ուղարկել է վերահսկիչ-վերստուգիչ ծառայությանը: Սակայն, նշված ծառայությունը նամակը չէր ստացել: Վեզիրյանը նաեւ հայտարարեց, որ ինքը կարող է իր էլեկտրոնային փոստի միջոցով ապացուցել, որ նման նամակ ուղարկել է: Հենց ԿԸՀ նիստերի դահլիճում դրված համակարգչով Վեզիրյանը բացեց իր փոստը, եւ հաստատվեց, որ նա իսկապես մայիսի 8-ի երեկոյան նամակ է ուղարկել ԿԸՀ, որը, սակայն, տեղ չէր հասել: Արդյունքում Վեզիրյանին վարչական տույժի ենթարկելու արձանագրություն չկազմվեց: Ի դեպ, ծավալված քննարկման արդյունքում ԿԸՀ-ի անդամները Անուշավան Նիկողոսյանին տույժի ենթարկելու արձանագրության մասին էլ մոռացան, եւ այդքանով խնդրի քննարկումն ավարտվեց:

Հենց այսօր կազմակերպելով Ձեր հանգիստը ամենագողտրիկ եւ շքեղ հանգստավայրերից մեկում` Մոնակոյում, Դուք կկարողանաք 7-օրյա անմոռանալի հանգիստ անցկացնել Մոնակոյի լավագույն հյուրանոցներից մեկում` «Կոլումբուս Մոնտե Կառլո» 4-աստղանի հյուրանոցում` վճարելով մեկ երկտեղանոց սենյակի 7-օրյա հանգստի համար 1600 եվրո:

http://www.inlobby.com/en/red?slug=columbos_monte_carlo

Արդյունքում` ունենում ենք վայելուչ հանգիստ լավագույն ծովափնյա հանգստավայրերից մեկում, ըմբոշխնում ծովային ուտեստներից լավագույնները, ինչու չէ, նաեւ տեղի հայտնի ուտեստները, ինչպիսիք են` Baby Squid-ը եւ Escalope Veal Valdostana-ն: Ավելին, այցելուները կարող են հետաքրքրաշարժ հանգիստ կազմակերպել զբոսանավերով եւ հնարավորության դեպքում մասնակցել Մոնակոյում անցկացվող բազմատեսակ հայտնի աճուրդներին:

Երեկ մեր տարածաշրջանում ստորգետնյա հերթական ցնցումն է գրանցվել: Ըստ ՀՀ ԱԻՆ-ի, տեղական ժամանակով ժամը 18:47-ին գրանցվել է 5.0 մագնիտուդով երկրաշարժ, որի էպիկենտրոնը գտնվում է Ադրբեջանի տարածքում` Զաքաթալա քաղաքից 19 կիլոմետր դեպի հարավ-արեւելք: Երկրաշարժի հիպոկենտրոնը գտնվում է 20 կիլոմետր խորության վրա, ուժգնությունը էպիկենտրոնային գոտում կազմել է յոթ բալ: Ըստ նախնական տվյալների` երկրաշարժը զգացվել է Հայաստանի տարածքում` Ստեփանակերտ եւ Վարդենիս քաղաքներում, երեք բալ ուժգնությամբ:

Երեկ առավոտյան Լոռիի Խնկոյան գյուղում մետաղյա լարից կախվելու միջոցով ինքնասպան է եղել գյուղի 38-ամյա բնակիչ, հարեւան Սարալանջ գյուղի դպրոցի տնօրեն Արայիկ Ավետիսյանը: Նա չորս ամիս առաջ էր նշանակվել դպրոցի տնօրեն, մինչ այդ տարիներ շարունակ նույն դպրոցի պատմության ուսուցիչն էր: Հայտնի է, որ Ավետիսյանն առավոտյան գնացել է կարտոֆիլ ցանելու, հարազատներն իջել են հորը եւ գտել նրա դիակը: Գյուղապետ Վարուժան Համբարձումյանը երեկ մեր թղթակցին ասել է, որ ինքնասպանության դրդապատճառները դեռեւս հայտնի չեն, եւ պատկերացում անգամ չունի, թե ինչն է ստիպել դպրոցի տնօրենին` գնալ նման քայլի: «Շատ լավ տղա էր, շատ լավ ընտանիք ունի, ամեն ինչ նորմալ էր»,- ասել է նա` հավելելով, որ վերջին անգամ Արայիկ Ավետիսյանին տեսել էր նախօրեին, նրա պահվածքում որեւէ տարօրինակ բան չէր նկատել: Ըստ գյուղում պտտվող լուրերի, Ավետիսյանը շուրջ երեք միլիոն դրամ պարտք է ունեցել: Նա ամուսնացած էր, երեք անչափահաս երեխաների հայր էր: Ի դեպ, Սարալանջի դպրոցում մայիսի 6-ին տեղի ունեցած Ազգային Ժողովի ընտրությունների ժամանակ տեղակայված է եղել 29/44 ընտրատեղամասը: Ըստ ԿԸՀ տվյալների, այստեղ գրանցված 156 հոգուց ընտրություններին մասնակցել է 111 մարդ, որոնցից 99-ը իրենց ձայնը տվել են ՀՀԿ-ին, 8-ը` ԲՀԿ-ին, մեկական ձայն են ստացել Հայ ազգային կոնգրեսը, Դաշնակցությունը, ՕԵԿ-ը եւ Դեմկուսը, իսկ «Ժառանգությունն» ու «Միավորված հայերը» ձայն չեն ստացել:

«Նուբարաշեն» ՔԿՀ կալանավոր, առեւանգման համար մեղադրվող Հրաչյա Գեւորգյանը օրերս դուրս է գրվել «Դատապարտյալների հիվանդանոց» ՔԿՀ-ից, նրան տարել են ետ` «Նուբարաշեն», որտեղ նա տեղափոխվել է պատժախուց, ինչը արգելված է օրենքով: Այս մասին երեկ մեզ հայտնեց կալանավորի մայրը: Նա պատմեց, որ դեռեւս ամիսներ առաջ որդին դաժան ծեծի էր ենթարկվել, նրան ծեծի ենթարկողները ոստիկաններ էին, որոնք պահանջում էին, որ իր որդին ինքնախոստովանական ցուցմունք տա, մինչդեռ Հրաչյան պնդում է, որ ինքը անմեղ է: Չկարողանալով դիմադրել ոստիկաններին, փորձելով որեւէ կերպ փրկվել, Հրաչյան կուլ է տվել գետնին ընկած մեխերը: «Ինձ հետո պատմեց, որ եթե այդպես չաներ, իրեն ուղղակի ծեծելով կսպանեին»,- պատմեց մայրը: Նրա խոսքով, դաժան ծեծի հետեւանքով, մի քանի ամիս անց որդու մոտ առողջական խնդիրներ են առաջացել, կուլ տված մեխերից ստամոքսում խոց է առաջացել, այդ խնդիրների հետ կապված էլ նա տեղափոխվել էր բուժօգնություն ստանալու: Նշենք, որ ՀՀ քրեակատարողական օրենսգրքի 98 հոդվածի համաձայն, պատժախցում գտնվող անձը պետք է լինի բժիշկների հսկողության տակ, իսկ տույժի միջոցը կարող է վաղաժամկետ դադարեցվել բժշկի եզրակացության հիման վրա: Սրանից հետեւում է, որ առողջական լուրջ խնդիրներ ունեցող անձին չի կարելի պահել պատժախցում: Այս ամենի վերաբերյալ պարզաբանում տալու խնդրանքով երեկ դիմեցինք ՀՀ ԱՆ ՔԿՎ մամուլի քարտուղար Գոռ Ղալեչյանին: Նա ասաց, որ Հրաչյա Գեւորգյանի հետ տեղի ունեցածի մասին ճշտումներ կանի եւ մեր հարցերին կպատասխանի այսօր:

36-ամյա Տիգրան Աբրահամյանը, որը մայիսի 16-ին տեղափոխվել էր Հանրապետական հակատուբերկուլոզային դիսպանսեր, երեկ դուրս է եկել հիվանդանոցից: Մասնագետների խումբն ուսումնասիրել է նրան եւ Տիգրանին ու նրա մորը` Ալիտա Սարդարյանին առաջարկել է սպասել 2-3 ամիս, շարունակել բուժումը, որից հետո միայն հնարավոր կլինի խոսել վերականգնողական բուժման մասին: Մենք արդեն հայտնել ենք, որ Տիգրանը տառապել է տուբերկուլոզային մենինգիտով, ընկել է կոմայի մեջ, ապա` գամվել անվասայլակին: Նրա մայրը առողջապահության նախարարության մոտ սպառնում էր այրել իրեն էլ, որդուն էլ` պահանջելով օգնել` վերականգնել որդու քայլելու ունակությունը: Ալիտա Սարդարյանը վերականգնողական բուժման մերժումը համարում է կողմնակալ մոտեցում: ԱՆ փոխնախարար Վահան Պողոսյանը, ընդունելով Տիգրանի մորը, երեկ խոստացել է երկուշաբթի օրն անպայման զբաղվել նրա որդու խնդրով: