Ադրբեջանը, փաստորեն, ամեն ինչ անում է, որ մենք լուրջ վերաբերվենք պատերազմ սկսելու իր պատրաստակամությանը:
Սարգսյան-Մեդվեդեւ-Ալիեւ սանկտպետերբուրգյան հանդիպումից առաջ Ադրբեջանը հինգ հարյուր միլիոն դոլարով ավելացրեց ռազմական բյուջեն, իսկ հանդիպումից հետո տեղի ունեցավ այն դիվերսիոն գործողությունը, որի հետեւանքով Լեռնային Ղարաբաղի զինված ուժերի հինգ զինծառայողներ զոհվեցին: Ադրբեջանի այս քայլերը միանշանակ ուղղված են Լեռնային Ղարաբաղի հարցով բանակցային գործընթացում սեփական դիրքերի ուժեղացմանը, եւ սա` այն պարագայում, երբ պաշտոնական Բաքուն արդեն իսկ հայտարարել է, որ Մադրիդյան սկզբունքների նորացված տարբերակը ընդունելի է իր համար: Սրանում զարմանալի ոչինչ չկա, որովհետեւ հատկապես վերջին տարիներին Ադրբեջանը միշտ ավելին է ուզել, քան հայկական կողմը պատրաստ է զիջել: Եւ երբ զգացել է, որ այդ ավելին ստանալու դիվանագիտական հեռանկար է բացվել, կոշտացրել է դիրքորոշումը` պահանջելով ավելի, քան պահանջում էր նախկինում: Ու որպեսզի այդ պահանջները ծիծաղելի չհնչեն, Իլհամ Ալիեւը դրանք համալրում է իրական խաղաքարտերով: Ադրբեջանի ռազմական բյուջեն հասել է 1.5 միլիարդ դոլարի, ինչն ավելի քան չորս անգամ գերազանցում է Հայաստանի համանման ցուցանիշը, իսկ հունիսի 18-ի լույս 19-ի գիշերը ԼՂՀ հյուսիս-արեւելքում տեղի ունեցած դիվերսիոն գործողության իմաստը ադրբեջանցիք իրենք պարզաբանեցին. նրանք ուզում են ապացուցել, որ ԼՂ հակամարտությունը սառեցված չէ, այսինքն` պատերազմ սկսելու կարիք չկա. այն այս պահին էլ շարունակվում է, եւ խնդիրն ընդամենը ռազմական գործողությունների ինտենսիվության մեջ է:
