Սյուզաննա Պողոսյան

Փետրվարի 12-ին համայնքի ղեկավարի ընտրություններ են նախատեսված 37 գյուղերում ու քաղաքներում: Այդ համայնքների թվում չկա որեւէ մեկը, որի նախկին ղեկավարը առաջիկա ընտրություններում առաջադրված չլինի: Ամենահետաքրքիրն այն է, որ 37 համայնքներից 16-ում մեկ թեկնածու կա, եւ դրանք համայնքների գործող ղեկավարներն են: Նրանց դեմ առաջադրված են եղել այլ թեկնածուներ, սակայն ընթացքում իրենց թեկնածությունները հանել են: Արագածոտնի մարզի Զարինջա գյուղում, օրինակ, ՀՀԿ գործող գյուղապետի դեմ առաջադրված անկուսակցական թեկնածուն է հանել իր թեկնածությունը: Սարալանջում ինքնաբացարկ են ներկայացրել ՀՀԿ-ական գյուղապետի դեմ առաջադրված երկու անկուսակցականներ:

Մինչ մարտի 2-ը պետք է որոշվի` կուսակցությունը ընտրություններին մասնակցում է միայնա՞կ, թե` «Ազատ դեմոկրատների» հետ դաշինքով: «Ժառանգությունը», ինչպես տեղեկացրեց Հովհաննիսյանը, մինչ այդ կշարունակի հանդիպել «Ազատ դեմոկրատների» հետ, բայց նախ պետք է ինքն իր համար հասկանա` ո՞րն է հասարակության պահանջը, եւ արդյո՞ք իրենց օրակարգում պետք է լինի միայն Ազգային ժողովում կրկին հայտնվելու հարցը: «Որովհետեւ եթե դա է միակ խնդիրը, որ «Ժառանգությունը» պետք է որոշի, ապա դա առանց համագումարի էլ կարող ենք ասել, որ հաջորդ գումարման Ազգային ժողովում «Ժառանգությունը» եթե ցանկանա` առանձին ցուցակով կհայտնվի: Բայց մենք ուզում ենք հավատալ, որ Հայաստանի Հանրապետությունը գտնվում է լուրջ փոփոխությունների ճանապարհին, եւ պարտավոր ենք մաս կազմել այդ համակարգափոխական շարժման` թե՛ Ազգային ժողովում, թե՛ հրապարակում»,- ասաց Հովհաննիսյանը: Ի վերջո` ավելի շատ հակված եք միավորվելու՞ «Ազատ դեմոկրատների» հետ, թե ոչ` հարցրինք Հովհաննիսյանին: «Ես չեմ կարող ասել` մենք կմիավորվենք, թե ոչ, բայց մենք հակված ենք մեծ լուծումների»,- պատասխանեց նա` հավելելով, որ միայն ռեսուրսների միացմամբ է հնարավոր լուծել ավելի մեծ խնդիրներ, քան Ազգային ժողովում հայտնվելն է:

Հանրային խորհրդի մշակույթի հանձնաժողովը երեկ սկսեց քննարկել «Հաղթանակ» զբոսայգու բարձունքում` «Արագիլ» հյուրանոցի հարեւանությամբ գտնվող տարածքում 10 հազար քառակուսի մետր ընդհանուր մակերեսով «Նոյան տապան» կառուցելու մասին նախաձեռնությունը եւ շատ արագ «այո» պատասխանեց գաղափարին` անգամ առանց տեսնելու դրա նախագիծը: Նախագծի նախաձեռնող խմբում են դերասան Սոս Սարգսյանը, երգիծաբան Արամայիս Սահակյանը, գրող, հրապարակախոս Մերուժան Տեր-Գուլանյանը, Նկարիչների միության նախագահ Կարեն Աղամյանը, ՀՀ ժողովրդական նկարիչ, քանդակագործ Լեւոն Թոքմաջյանը, «Հաղթանակ» զբոսայգու տարածքը վարձակալող «Ուրախ ժամանց» ՍՊԸ տնօրեն Թորոս Ումրիկյանը, «ԱՐՄԱՐԵ» ընկերության տնօրեն Մարտուն Հարությունյանը եւ ուրիշներ:

Ըստ նախագծի, որը ՀԽ ներկայացուցիչների համար ընթերցեց Մարտուն Հարությունյանը, նախատեսվում է կառուցել տապան` Աստվածաշնչում նշված չափերին համապատասխան: Ըստ այդմ, նախագծվում է ներսից եւ դրսից փայտյա կառույց, որի երկարությունը կլինի 132-157 մետր, լայնությունը` 24-30 մետր, իսկ բարձրությունը` 13-20 մետր: Առաջին հարկը նախատեսված է թանգարանի համար: Թանգարանում պետք է տեղավորվեն «Նոյան տապանի» «անձնակազմի» կրկնապատկերները` 8 մարդկային եւ 120 զույգ կենդանական: Խոշոր կենդանիների պղնձաձույլ կրկնապատկերները պետք է տեղադրվեն «Նոյան տապանից» դուրս: Նաեւ կտեղադրվեն դիտասարքեր դեպի Արարատ լեռ, դեպի մայրաքաղաք եւ բաց երկինք: 

«Թեկնածուների եւ կուսակցությունների լուսաբանումը ոչ միշտ է եղել անկողմնակալ, ուստի լրատվամիջոցների մոնիտորինգի կարիք կա: Այս գործընթացը կսկսենք փետրվարի 1-ից, որովհետեւ, ինչպես հայտնի է, քարոզչությունը չի սկսվելու միայն պաշտոնական քարոզչության ընթացքում»,- պարզաբանեց ԵԱՀԿ ներկայացուցիչը: Եվ քանի որ երեկ փետրվարի 1-ն էր, ԵԱՀԿ գրասենյակից հետաքրքրվեցինք` սկսվե՞լ է հեռուստաեթերի մոնիտորինգը: Պարզվեց` ոչ միայն դեռ չի սկսվել, այլեւ մոնիտորինգ անցկացնող ընկերություն դեռեւս չի գտնվել: «Դա մոտավոր ժամկետն էր, որ պարոն Հոֆստրան ասել էր, արդեն հայտարարվել է մրցույթ, մի քիչ հետաձգվում է մոնիտորինգը»,- ասաց ԵԱՀԿ գրասենյակի մամուլի եւ հանրային կապերի պատասխանատու Գոհար Ավագյանը: Նա նաեւ տեղեկացրեց, որ մոնիտորինգն անցկացվելու է 18 ամսով, այսինքն` նաեւ նախագահական ընտրություններին նախորդող ժամանակահատվածում: