Լուսինե Բարսեղյան

ՕԵԿ Կենտրոնի տարածքային կառույցի ղեկավար Արայիկ Հայրապետյանը` Լավանդայի Արայիկը, Ամանորից առաջ մեզ հետ զրույցում ասել էր, որ տոներից հետո կասի` մեծամասնական ընտրակարգով պատգամավորի թեկնածու առաջադրվելո՞ւ է, թե` ոչ: Երեկ Հայրապետյանը պատասխանել է մեր հարցերին:

- Ձեր ասած ժամկետներն անցել են, առաջադրվելո՞ւ եք:
- Դուք ինձնից ավելի լավ հետեւում եք բոլոր իրադարձություններին, եւ իմ կամքից անկախ է. տեսնում եք, ոչ մի տեսակի քաղխորհրդի նիստ չի լինում, կոալիցիոն քննարկումներ են գնում, որոշակի, կոնկրետ ոչ մի բան չկա, դրա համար ես ինքս էլ չգիտեմ: Պետք է այս հինգշաբթի էլ ՕԵԿ քաղխորհրդի նիստ լիներ, որոշվեր, բայց վաղն էլ չի լինելու, անընդհատ հետաձգվում է, որովհետեւ ինչ-որ հարցեր են քննարկվում, որոնցից, ճիշտն ասած, ես էլ տեղյակ չեմ: Դրա համար ես հստակ որեւէ բան չեմ կարող ասել:

Եթե նախկինում իշխող կուսակցությունում կար միայն երկու թեւ` հին ու նոր հանրապետականներ, ապա հիմա ՀՀԿ-ն ունի վարչապետ Տիգրան Սարգսյանի թեւ, ԱԺ նախկին նախագահ Հովիկ Աբրահամյանի թեւ, հին հանրապետականների թեւ, Սերժ Սարգսյանի փեսա Միքայել Մինասյանի թեւ, Սերժ Սարգսյանի աշխատակազմի նախկին ղեկավար Կարեն Կարապետյանի թեւ եւ այսպես շարունակ: Ու հիմա, ինչպես պնդում են ՀՀԿ մեր աղբյուրները, այս թեւերը, որ ներքին կատաղի պայքար են մղում իրար դեմ, փորձում են հնարավորինս շատ քվոտա ստանալ ՀՀԿ համամասնական ցուցակում: Թեւերի առաջնորդները փորձում են առավելագույն տեղեր ապահովել ՀՀԿ համամասնական ցուցակում` իրենց մարդկանց համար: Այս փուլում, ըստ ՀՀԿ աղբյուրների, որոշվում է, թե Տիգրան Սարգսյանը քանի տեղ է ունենալու, Հովիկ Աբրահամյանը` քանի, Միքայել Մինասյանը` քանի: ՀՀԿ-ում վերջնականապես չի որոշվել անգամ, թե ովքեր են գլխավորելու իրենց համամասնական ցուցակի հնգյակը: Մինչ այժմ խոսվել է Սերժ Սարգսյան, Տիգրան Սարգսյան, Տարոն Մարգարյան տարբերակի մասին: ՀՀԿ շտաբի պետ Հովիկ Աբրահամյանը, սակայն, դեռ անցյալ շաբաթ մեզ հետ զրույցում ասել էր, թե հույս ունի, որ այդպես չի լինի: ՀՀԿ մեր աղբյուրները պնդում են, որ ՀՀԿ-ն իր համամասնական ցուցակի մասին պաշտոնապես որեւէ բան չի ասի մինչեւ համագումարը, որը տեղի է ունենալու մարտի 17-ին: Բանն այն է, որ ՀՀԿ-ն, ըստ նույն աղբյուրների, անհամբեր սպասում է Ռուսաստանում տեղի ունենալիք նախագահական ընտրություններին, եւ հենց այդ պատճառով էլ համագումարը նշանակվել է ՌԴ ընտրություններից հետո: Հենց դրանից հետո էլ կհստակեցվի, թե ով է լինելու ՀՀԿ համամասնական ցուցակի երկրորդ համարը: Հասկանալի է, որ նա էլ լինելու է պոտենցիալ վարչապետացուն: Իսկ Ռուսաստանը, ըստ ՀՀԿ աղբյուրների, Սերժ Սարգսյանին կարող է պարտադրել վարչապետ նշանակել ոչ թե Տիգրան Սարգսյանին, այլ բոլորովին այլ մարդու:

Երբ նիստն ընթանում էր, մի պահ փակ դռան հետեւից ծափեր լսվեցին: Ավելի ուշ պարզվեց, որ դաշինքով մասնակցության որոշումն էին Կոնգրեսի մաս կազմող կուսակցությունները ողջունում: Որոշման մասին պաշտոնապես կհայտարարվի երկուշաբթի օրը: Նիստի ընդմիջման ժամանակ Հայ ազգային կոնգրեսի համակարգող Լեւոն Զուրաբյանը հայտնեց, որ երկուշաբթի օրը հասարակության ուշադրությանը կներկայացվի հայտարարություն, որը կվերաբերի Կոնգրեսի առաջիկա քաղաքական ռազմավարությանը եւ ընտրությունների մասնակցության ձեւաչափին: Իսկ նիստի ավարտից հետո Կոնգրեսի մաս կազմող ՍԴՀ կուսակցության ատենապետ Լյուդմիլա Սարգսյանը «ՀԺ»-ին հայտնեց, որ դաշինքով մասնակցության շուրջ կոնսենսուսը բավական հեշտ կայացավ: «Բոլորն էլ կողմ էին, ուղղակի մոտեցումների խնդիր կար` երբ հայտարարել այդ մասին, ընդհանրապես ինչ ենք անելու, եթե արտահերթը չստացվի, հերթականի ժամանակ եթե կեղծվեն ընտրությունները` ինչ պիտի անենք, այդ ընդհանուր հարցերի շուրջ քննարկումներ էին գնում»,- ասաց Լյուդմիլա Սարգսյանը:

Երեկ հայտնի դարձավ, որ ՀՀԿ-ն որոշել է թիվ 18 ընտրատարածքում (Արարատի մարզ), որտեղ գործող պատգամավորը ՀՀԿ-ական Մանվել Ղազարյանն է, սատարել ԱԺ մեկ այլ պատգամավորի` Արայիկ Գրիգորյանին` Ավշարի Արայիկին: Ավշարի գինու գործարանի սեփականատերը 2007-ին խորհրդարան է մտել Դաշնակցության համամասնական ցուցակով եւ հիմա էլ նույն խմբակցությունից է: ՀՀԿ-ի ՀՅԴ-ական թեկնածուի դեմ էլ ԲՀԿ-ից առաջադրվելու է ոստիկանության ներքին զորքերի նախկին տխրահռչակ հրամանատար Գրիգոր Գրիգորյանը` Շերիֆը: Հիշեցնենք, նա 2008-ի Մարտի 1-ի իրադարձությունների առանցքային մասնակիցներից է, որի գործողությունների հետ կապված բազմաթիվ անպատասխան հարցեր կան: Հայտնի դարձավ նաեւ, որ ՀՀԿ-ն որոշել է, որ ԱԺ գործող պատգամավոր Խաչիկ Մանուկյանը, որը 2007-ին խորհրդարան մտավ թիվ 15 ընտրատարածքից (Արագածոտնի մարզ), այս անգամ մեծամասնականով չի առաջադրվելու: Այստեղ կառաջադրվի Թալինի գործող ՀՀԿ-ական քաղաքապետ Մնացական Մնացականյանը: Գրել էինք նաեւ, որ ապագա ԱԺ-ում, ըստ որոշ տեղեկությունների, չի լինելու նաեւ ՀՀԿ խմբակցության պատգամավոր Գրիգորի Մարգարյանը` Բելաջիոյի Գրիշը, որ ԱԺ էր մտել թիվ 11 ընտրատարածքից: Մարգարյանը մեզ հետ զրույցում պնդել էր, որ մեծամասնականով առաջադրվելու է: Մեր աղբյուրները, սակայն, հայտնում են, որ ՀՀԿ-ն որոշել է նրան այս ընտրատարածքում չսատարել, այլ փոխարենը ՀՀԿ-ից առաջադրել գործող պատգամավոր, առեւտրաարդյունաբերական պալատի նախագահ Մարտին Սարգսյանին: