Տարվա մարզական ամփոփում. Սեպտեմբերը պարտությունների ամիս էր

2016 թվականի սեպտեմբերին ֆուտբոլի եվրոպական գլխավոր կառույցը՝ ՈՒԵՖԱ-ն, նոր նախագահ ունեցավ, մեր ֆուտբոլի ազգային հավաքականը առաջին հանդիպումն անցկացրեց Աշխարհի 2018 թվականի առաջնության ընտրական մրցաշարում, Ռիո Դե Ժանեյրոյում էլ կայացան ամառային Պարալիմպիկ խաղերը: Իսկ ամիսը սկսվեց եւ ավարտվեց հայկական սպորտի համար ցավալի լուրերով. Միջազգային օլիմպիական կոմիտեի որոշմամբ խթանիչներ օգտագործելու համար ծանրորդ Տիգրան Մարտիրոսյանը զրկվեց Օլիմպիական խաղերի բրոնզե մեդալից, իսկ ատլետիկայի միջազգային ֆեդերացիայից էլ հայտնեցին, որ Գոռ Ներկարարյան անունով ատլետ չի մասնակցել ավարտված Օլիմպիական խաղերին: Վերհիշենք 2016 թվականի սեպտեմբերին միջազգային եւ հայկական սպորտում արձանագրված այս եւ այլ նշանակալի իրադարձությունները: 

Միջազգային

Ռիո դե Ժանեյրոյում սեպտեմբերի 7-18-ին կայացան ամառային 15-րդ Պարալիմպիկ խաղերը. աշխարհի 159 երկրների սահմանափակ ֆիզիկական հնարավորություններ ունեցող 4342 մարզիկ 22 մարզաձեւում խաղարկեցին մեդալների 528 հավաքածու: Ընդհանուր թիմային հաշվարկում 4-րդ անգամ անընդմեջ ամառային Պարալիմպիկ խաղերի հաղթող դարձավ Չինաստանը, որը ներկայացնող մարզիկները նվաճեցին 107 ոսկե, 81 արծաթե եւ 51 բրոնզե մեդալներ: Պարալիմպիկ խաղերի բացման արարողությունը ուղեկցվեց քաղաքական մեծ սկանդալով: Դոպինգային սկանդալի հետեւանքով որակազրկվել եւ այս խաղերին իրավունք չունեին մասնակցել ռուսաստանցի մարզիկները: Սակայն, ՌԴ դրոշը ծածանվեց բացման արարողության ժամանակ. Բելառուսի պատվիրակության անդամներից մեկը «Մարականա» ստադիոն էր բերել այն եւ կարողացել մի քանի րոպե ծածանել: Մրցումներն ավարտվեցին ողբերգությամբ. վերջին օրը մեդալներ էին խաղարկվում հեծանվավազքում, որի ժամանակ իրանցի 48-ամյա Բախման Գոլբարնեժադը վայր ընկել եւ ստացավ գլխուղեղային վնասվածք: Նրան տեղում շտապ բուժօգնություն ցույց տվեցին, բայց հիվանդանոցի ճանապարհին նա մահացավ սրտի կաթվածից:

Թենիսի «Մեծ սաղավարտի» մեջ մտնող ԱՄՆ բաց առաջնության՝ «US Open»-ի հաղթողներ դարձան շվեյցարացի Ստանիսլավ Վավրինկան եւ գերմանուհի Անժելիկ Կերբերը:

Սեպտեմբերի 14-ին Աթենքում կայացած արտահերթ կոնգրեսի ժամանակ ՈՒԵՖԱ-ի նոր նախագահ ընտրվեց Սլովենիայի ֆուտբոլի ֆեդերացիայի նախագահ Ալեքսանդր Չեֆերինը:

Բաքվում կայացավ շախմատի համաշխարհային 42-րդ օլիմպիադան. 40-ամյա ընդմիջումից հետո ԱՄՆ-ի տղամարդկանց հավաքականը նվաճեց չեմպիոնի կոչումը, կանանց մրցաշարն էլ ավարտվեց Չինաստանի ընտրանու հաղթանակով: Օլիմպիադային մասնակցեցին ՖԻԴԵ-ի կազմի մեջ մտնող 180 երկրներից 175-ը. Հայաստանը հրաժարվեց մասնակցել:

Հայկական

Սեպտեմբերի 1-ին ՄՕԿ-ը հայտնեց, որ 2008 թվականին Պեկինում կայացած Օլիմպիական խաղերում հայաստանցի ծանրորդ Տիգրան Գեւորգի Մարտիրոսյանը բրոնզե մեդալ է նվաճել արգելված խթանիչներ օգտագործելու միջոցով: ՄՕԿ-ի որոշմամբ հայ մարզիկը զրկվեց Օլիմպիական բրոնզից:

Ֆուտբոլի Հայաստանի ազգային հավաքականը ընկերական խաղում խոշոր՝ 0-3 հաշվով պարտություն կրեց Չեխիայի ընտրանուց: Սեպտեմբերի 4-ին էլ մեր ընտրանին Աշխարհի 2018 թվականի ընտրական մրցաշարի առաջին խաղում պարտություն կրեց Դանիայից 0-1 հաշվով:

Ռիո դե Ժանեյրոյում կայացած 15-րդ ամառային Պարալիմպիկ խաղերում Հայաստանը ներկայացնող 2 մարզուհիները հետեւյալ արդյունքները գրանցեցին. ծանրամարտի մինչեւ 55 կգ քաշային կարգում Գրետա Վարդանյանը զբաղեցրեց 5-րդ տեղը, լողի մրցաշարի 50 մետր ազատ եւ 100 մետր բրաս լողաոճերում Մարգարիտա Հովակիմյանը վերջինը հասավ եզրագծին:

Սեպտեմբերի 24-ին Երեւանի «Հանրապետական» ստադիոնում կայացած խաղում Ֆուտբոլի Հայաստանի չեմպիոն «Ալաշկերտը» ետխաղյա 11 մետրանոցների օգնությամբ հաղթեց գավաթակիր «Բանանցին» եւ նվաճեց Հայաստանի սուպերգավաթը: 

«Armtimes.com» կայքի հետ զրույցում ատլետիկայի միջազգային ֆեդերացիան տեղեկացրեց, որ հայաստանցի Գոռ Ներկարարյանը չի նվաճել Ռիո Դե ժանեյրոյում կայացած ամառային Օլիմպիական խաղերի ուղեգիր, հետեւաբար իրավունք չէր կարող ունենալ մասնակցել: «Նման մարզիկ «Ռիո 2016»-ում չի եղել»,- հայտարարել էին ատլետիկայի միջազգային ֆեդերացիայից: Այս հայտարարությունից ընդամենը օրեր առաջ ատլետիկայի Հայաստանի ֆեդերացիայի նախագահ Ռոբերտ Էմիյանը պնդում էր, թե Գոռը նվաճել է Օլիմպիական խաղերի ուղեգիր, սակայն չի մասնակցել վնասվածքի պատճառով: