Հենրիխ Մխիթարյանը Անգլիայի Պրեմիեր լիգայում գոլ խփած առաջին հայաստանցին է

«Իմ հաջորդ գոլը «Օլդ Թրաֆորդում» պետք է լինի»՝ անցյալ հինգշաբթի ուկրաինական «Զարյայի» հետ խաղից հետո հայտարարել էր Հենրիխ Մխիթարյանը: 3 օր անց Անգլիայի առաջնության «Մանչեսթեր Յունայթեդ» - «Տոտենհեմ» խաղում հայ ֆուտբոլիստը կատարեց խոստումը: Մխիթարյանի խփած միակ գոլի շնորհիվ «Մանչեսթեր Յունայթեդը» Անգլիայի Պրեմիեր լիգայում անցկացրած 3 անընդմեջ ոչ-ոքիներից հետո վերջապես հաղթանակ տոնեց, հայ ֆուտբոլիստն էլ հավաքելով քվեարկողների 87 տոկոս ձայները, ճանաչվեց հանդիպման լավագույն ֆուտբոլիստ: 4-րդ անգամ Մխիթարյանը գրեթե ամբողջական հանդիպում անցկացրեց «Մանչեսթեր Յունայթեդի» կազմում եւ 4-րդ անգամ ճանաչվեց հանդիպման լավագույն ֆուտբոլիստ՝ թերեւս այլ բնութագիր ավելորդ է մեր ֆուտբոլիստի խաղը գնահատելու համար:

«Տոտենհեմի» հետ խաղի միակ բացասական իրադարձությունը խաղավերջում Հենոյի ստացած վնասվածքն էր, որն առաջին րոպեներին բավական ծանր թվաց (խաղադաշտը լքելու համար Մխիթարյանին անհրաժեշտ եղավ պատգարակ), բայց հետագայում հայտնի դարձավ, որ այն այնքան էլ լուրջ չէ. երեկ կատարված բժշկական մանրամասն հետազոտության արդյունքում արձանագրվել է ընդամենը կրնկի փոքրիկ շեղում՝ առանց կոտրվածքների կամ մկանային խնդիրների: Ընդամենը մի քանի օր հետո Մխիթարյանը արդեն կարող է մարզվել:

Ֆուտբոլիստների հետ աշխատող հայ բժիշկները, ընդ որում, Հենրիխի վնասվածքի հետ կապված բավական հետաքրքիր վերլուծություն ներկայացրին մեր զրույցում: Պարզվում է՝ կրնկի հատվածում ոտքը ծալվելու խնդիր ունենում են գրեթե բոլոր հայ ֆուտբոլիստները, եւ եղել են դեպքեր, երբ մեր ֆուտբոլիստները ամբողջ կարիերայի ընթացքում խաղադաշտ են դուրս եկել նման վնասվածքով՝ ուղղակի պինդ կապելով ոտնաթաթը: Իսկ, օրինակ, բրազիլացիները նման խնդիր չեն ունենում, եւ սա կապված է այն հանգամանքի հետ, որ բրազիլացիները երկար ժամանակ մարզվում են ավազների վրա՝ բավական ուժեղացնելով ոտնաթաթերը:

Վերադառնանք «Տոտենհեմի» դարպասը Մխիթարյանի խփած գոլին: Համացանցում «համահայկական պատերազմ» է սկսվել հետեւյալ թեմայով. ո՞ր բնորոշումն է ճիշտ այս դեպքում՝ առաջին հայի գոլը Անգլիայո՞ւմ, Պրեմիեր լիգայո՞ւմ, «Օլդ Թրաֆորդո՞ւմ»: Բոլորը սեփական կարծիքներ են ներկայացնում, եւ ըստ դրա պարզաբանում, մեկնաբանում տեղի ունեցածը: Այնինչ պատմության մեջ նման իրադարձությունների համար որպես հիմք օգտագործվում են ոչ թե կարծիքները կամ մեկնաբանությունները, այլ ուղղակի փաստերը: Ընդ որում, նախ պետք է հասկանանք, որ ի տարբերություն մեզ՝ հայերիս, անգլիացիները չունեն բարդույթ բոլորին անգլիացի դարձնելու կամ անգլիական արմատներ փնտրելու:

Ուղղակի որպես փաստ նրանք օգտագործում են այն դրոշը, երկիրը, որը տեղադրված է տվյալ ֆուտբոլիստի անվան դիմաց՝ առանց ազգությունը հաշվի առնելու. Մխիթարյան՝ Հայաստան եւ վերջ: Հիմա վերադառնանք փաստերին: Անգլիայում առաջին անգամ հայ ֆուտբոլիստը գոլ է խփել դեռեւս 41 տարի առաջ. 1975 թվականի նոյեմբերի 6-ին Եվրոպայի գավաթակիրների գավաթի խաղարկության 1/16 եզրափակիչի Լոնդոնի «Ափթոն պարկ» ստադիոնում կայացած «Վեստ Հեմ Յունայթեդ» - «Արարատ» (3-1) խաղում գոլի հեղինակ է դարձել Նազար Պետրոսյանը:

Եվրոպա լիգայի խաղարկության  շրջանակներում 2012 թվականի փետրվարի 23-ին «Օլդ Թրաֆորդ» ստադիոնում կայացած «Մանչեսթեր Յունայթեդ» - «Այաքս» խաղում (1-2) հոլանդական թիմի կազմում գոլի հեղինակ է դարձել Արաս Օզբիլիսը. 6 օր անց Օզբիլիսը իր առաջին պաշտոնական հանդիպումն է անցկացրել Հայաստանի ազգային հավաքականի կազմում: Անգլիայի Պրեմիեր լիգայում նույն թիմի՝ «Բոլտոնի» կազմում 2001 թվականին գոլի հեղինակ է դարձել Յուրի Ջորկաեւը, 2006-ին՝ Անդրանիկ Թեյմուրյանը: Հիշեցնեմ, որ Ջորկաեւի մայրը հայ է, իսկ հայրը՝ կալմիկ, Թեյմուրյանի ծնողները հայեր են, բայց առաջինը հանդես է եկել է Ֆրանսիայի, Անդրանիկը՝ Իրանի ազգային հավաքականների կազմերում եւ անգլիական մամուլում նրանք ընկալվել են որպես ֆրանսիացի եւ իրանցի:

Այսպիսով, ստացվում է միակ ճիշտ ձեւակերպումը, որն, ի դեպ, օգտագործվում է նաեւ բիտանական մամուլում՝ Հենրիխ Մխիթարյանը առաջին հայաստանցին է, որ գոլ է խփել Անգլիայի Պրեմիեր լիգայում եւ Հայաստանն էլ 96-րդ երկիրն է, որի քաղաքացին գոլի հեղինակ է դարձել Անգլիայի առաջնություններում: