Ֆուտբոլի Չեմպիոնների լիգայի խմբային փուլի առանձնահատկությունները

Եվրոպական առաջատար 6 ֆուտբոլային երկիր միայն ներկայացուցիչներ կունենան Չեմպիոնների լիգայի փլեյ-օֆում՝ սա աննախադեպ իրողություն է Լիգայի 25-ամյա պատմության ընթացքում: Նախորդ բոլոր մրցաշարերում խմբային փուլի արգելքը կարողացել են հաղթահարել առնվազն 7 երկրների թիմեր, որոնցից մեկը մշտապես եղել է ոչ առաջատար երկրի ներկայացուցիչ: Բայց ընթացիկ մրցաշրջանում եվրոպական վեցյակը նվաճել է փլեյ-օֆի բոլոր 16 ուղեգրերը՝ Իսպանիան Չեմպիոնների լիգայի 1/8 եզրափակչում կունենա 4 թիմ, Գերմանիան եւ Անգլիան՝ 3-ական, Իտալիան, Ֆրանսիան եւ Պորտուգալիան՝ 2-ական: Խմբային փուլի մասնակից 32 թիմերը ներկայացնում էին 17 երկրներ, բայց խմբային փուլում այլեւս չեն լինելու այսպես կոչված անցողիկ թիմեր: 

Իհարկե, սա չի նշանակում, թե փլեյ-օֆ մտած բոլոր թիմերը հավակնում են հաղթողի կոչմանը՝ այստեղ էլ կան համեմատաբար ուժեղ կամ թույլ թիմեր, եւ այս հանգամանքը ակնհայտ էր «Ռեալ» (Մադրիդ)-«Բորուսիա» (Դորտմունդ) խաղում: Նախ նշեմ, որ համաձայն կանոնակարգի, 1/8 եզրափակչում չեն կարող իրար հետ հանդիպել նույն երկիրը ներկայացնող, ինչպես նաեւ խմբային փուլում իրար հանդիպած թիմեր: 

Ահա այս հանգամանքը հաշվի առնելով՝ «Ռեալը» «Բորուսիայի» հետ խաղում հաղթանակի դեպքում խմբում զբաղեցնում էր 1-ին տեղը եւ այդ դեպքում 1/8 եզրափակչում հնարավոր մրցակիցներն էին Լիգայի ֆավորիտներ համարվող գերմանական «Բավարիան», անգլիական «Մանչեսթեր Սիթին», ֆրանսիական «ՊՍԺ»-ը, նաեւ՝ «Բայերը» (Գերմանիա), պորտուգալական «Բենֆիկան» եւ «Պորտուն»: Ոչ-ոքի խաղալու կամ պարտվելու դեպքում «Ռեալը» խմբում զբաղեցնում էր 2-րդ տեղը եւ փլեյ-օֆում հնարավոր մրցակիցների թվում էին հայտնվում անգլիական «Արսենալը» եւ «Լեսթերը», իտալական «Յուվենտուսը» եւ «Նապոլին», ֆրանսիական «Մոնակոն»:

Համեմատենք այս 2 ցուցակները՝ ակնհայտորեն առաջինը շատ ավելի ուժեղ է 2-րդից, եւ պատահական չէ, որ «Ռեալը» իր ստադիոնում կարողացավ ընտրել հնարավոր ամենալավ տարբերակը. չպարտվեց, ոչ-ոքի` 2-2 խաղաց «Բորուսիայի» հետ, խմբում զբաղեցրեց 2-րդ տեղը եւ այժմ շատ ավելի հանգիստ է սպասելու դեկտեմբերի 12-ին կայանալիք փլեյ-օֆի վիճակահանությունը, քանի որ այս փուլում խուսափել է «Բավարիայի», «Մանչեսթեր Սիթիի», «ՊՍԺ»-ի հետ հանդիպումներից: Լիգայի ընթացիկ խաղարկության առանձնահատկություններից մեկն էլ ռեկորդային մի քանի ցուցանիշներն են:

Նախ նույն «Բորուսիան» խմբային փուլի 6 խաղերում խփեց 21 գոլ եւ 1 գոլով գերազանցեց ռեկորդային ցուցանիշը: 17-րդ անգամ անընդմեջ փլեյ-օֆի ուղեգիր ձեռք բերած իսպանական «Բարսելոնան» սեփական հարկի տակ տոնեց 14-րդ անընդմեջ հաղթանակը, խմբային փուլում անցկացրած 3 խաղերում տոնեց միայն հաղթանակներ անհավատալի՝ 15-0 ընդհանուր հաշվով  («Մանչեսթեր Սիթի»՝ 4-0, «Բորուսիա» (Մյունխենգլադբախ)՝ 4-0, «Սելթիկ»՝ 7-0), թիմի առաջատար Լիոնել Մեսին էլ այդ 3 խաղերում դարձավ 7 գոլի հեղինակ: Ի դեպ, Մեսին ընդհանուր առմամբ խփած 10 գոլերով Չեմպիոնների լիգայի ընթացիկ խաղարկության լավագույն ռմբարկուն է:

Եվ վերջապես՝ եւս մեկ ռեկորդի կամ հակառեկորդի մասին, որի վրա ծիծաղում է ամբողջ ֆուտբոլային աշխարհը. Մոսկվայի «ԲԿՄԱ»-ի դարպասապահ Իգոր Ակինֆեեւը գոլ բաց թողեց Չեմպիոնների լիգայի 43-րդ եւ խմբային փուլի 39-րդ խաղերում անընդմեջ: Վերջին անգամ Ակինֆեեւին հաջողվել է իր դարպասը անառիկ պահել 2006 թվականի նոյեմբերի 1-ին Լոնդոնում՝ «Արսենալի» դեմ խաղում: Խմբային փուլի վերջին տուրում «ԲԿՄԱ»-ն 1-3 հաշվով զիջեց անգլիական «Տոտենհեմին», եւ Ակինֆեեւի հաշվին ինքնագոլ գրանցվեց: Ակինֆեեւը 2-րդ անգամ Լիգայի պատմության մեջ դարձավ ինքնագոլի հեղինակ, որը նույնպես ռեկորդային ցուցանիշ է: 

Եվս մեկ կարեւոր հանգամանք, որը արձանագրվեց Չեմպիոնների լիգայի խմբային փուլում. Եվրոպա լիգան «ազատագրվեց» իսպանական «Սեւիլիայի» եռամյա «գերությունից»: Նախորդ 3 մրցաշրջանում «Սեւիլիան» հաղթող էր ճանաչվել Եվրոպա լիգայի խաղարկությունում, բայց ընթացիկ մրցաշրջանում նման բան հաստատապես հնարավոր չէ, քանի որ «Սեւիլիան» պայքարը շարունակում է Չեմպիոնների Լիգայի փլեյ-օֆում: