Նոր Կյանքի գյուղապետի ծառայողական մեքենան վաճառելուց հետո հեծանիվ կգնեն

Արարատի մարզի Նոր Կյանք համայնքի ղեկավար, «Քաղաքացիական պայմանագիր» կուսակցության վարչության անդամ Գարիկ Սարգսյանն Armtimes.com-ի հետ զրույցում ասաց, որ համայնքի սեփականությունը համարվող ծառայողական ավտոմեքենան վաճառվելու է աճուրդում, իսկ վաճառքից հետո կարող են արդեն հեծանիվ գնել:

- Պարոն Սարգսյան, ի՞նչ ընթացակարգով է վաճառվելու մեքենան:

- Գյուղապետարանում աճուրդ է տեղի ունենալու, մեր հայտարարությունում նշված հեռախոսահամարով դիմողները մանրամասները կտեղեկացվեն:

- Մեկնարկային գինն ի՞նչ արժի:

- 3 միլիոն 575 հազար դրամ:

- Համայնքի ղեկավար ընտրվելուց հետո շահագործե՞լ եք:

-Արդեն երկու ամիս է՝ հոկտեմբերի 10-ից հաշված, մոտ 500 կմ է եղել մեքենայի շարժը: Ես իմ մեքենան եմ վարել: Մեկ-երկու անգամ մարզպետարան եմ այդ մեքենայով գնացել, մի անգամ բերել եմ Երեւան՝ գնահատման: Այդ մեքենան ծառայողական է, ժամը 18:00-ից հետո իրավունք չունենք վարելու, պետք է ուղեգրով վարել: Բենզինի կտրոն է հասնում, բայց քանի որ իմ մեքենան գազով է, ես գազով եմ վարել իմ անձնական մեքենան:

- Մեքենան սարքի՞ն է:

- Լրիվ նոր է, 14 հազար կիլոմետր է ընդամենը վարվել:

- Վաճառքից հետո գումարն ի՞նչ նպատակով է օգտագործվելու, արդեն որոշե՞լ եք:

- Հիմա նախագիծ-նախահաշիվ եմ պատվիրել համայնքի կենտրոնական փողոցի լուսավորման համար: Փողոցների բարեկարգման կամ զբոսայգու վրա պետք է ծախսվի: Այգու մասով դեռ հողային հարցը պետք է պարզել: Գումարը գնալու է համայնքի բյուջեի ֆոնդային մաս, որից հետո նախատեսվում է, թե ինչի վրա պետք է ծախսվի:

- Իսկ մարզպետարանից ինչպե՞ս են արձագանքել ձեր այս նախաձեռնությանը, քննարկում եղե՞լ է:

- Ես տեղյակ եմ պահել իրենց, որ պատրաստվում եմ համայնքին պատկանող այս գույքն աճուրդի հանել, քանի որ դրա կարիքը ես գոնե առաջիկա 5 տարում չեմ զգալու, ո՛չ վարորդ եմ ուզում, ո՛չ ծառայողական մեքենա: Այսինքն՝ հրաժարվում եմ այդ մեքենայից էլ, վարորդից էլ: Ինձ խորհուրդ են տվել ավագանու նիստերից մեկում որոշում կայացնել: Արտահերթ նիստը կայացել է դեկտեմբերի 1-ին, իսկ մինչ այդ գնահատել էինք մեքենայի շուկայական արժեքը եւ աճուրդը տեղի կունենա դեկտեմբերի 15-ին:

- Համայնքի նախկին ղեկավարը մեր զրույցում ասել էր, որ եթե ընտրություններում պարտվի, ապա կշնորհավորի հաղթողին, քանի որ «գյուղապետի աթոռն իր հոր տնից չի բերել»: Դուք էլ հայտարարեցիք, որ ընտրվելու դեպքում այդ աթոռն իրեն կնվիրեք: Արդեն նվիրե՞լ եք:

- Այդ աթոռն իր տեղում է, ուղղակի ես այդ աթոռի վրա չեմ նստում, այլ աթոռի վրա եմ նստում: Այսինքն, որ մարդիկ են գալիս իմ աշխատասենյակ, ես չեմ նստում այդ աթոռի վրա, իրենք՝ ավելի ցածր աթոռի, հավասարը հավասարի նստում ենք: Այդ աթոռը դատարկ է մնում: Դա գյուղապետարանի գույք է համարվում, եթե այդ աթոռը փոխարինելու լինեմ, տեղում պետք է նոր աթոռ բերեմ:

- Հնարավո՞ր է այդ աթոռն էլ աճուրդում վաճառեք:

-Ոչ: Այդպիսի բա չենք անի (ծիծաղում է, հեղ): Առավելագույնը ես այդ աթոռը կնվիրեմ ավագանու անդամներից որեւէ մեկին, ցանկալի է ամենաշատ ձայն ստացած ավագանու անդամին, որպես սինվոլիկ դեպք:

- Դուք հայտարարել էիք, որ լավ եղանակի դեպքում հեծանիվով էլ կգնաք աշխատանքի: Այս ընթացքում եղա՞վ դեպք, որ հեծանիվով գնացիք:

- Հիմա ցուրտ է, ես իմ մեքենայով եմ գնում, գալիս: Կարող եմ ոտքով էլ գնալ, մեր տնից մոտ 700-800 մետր է հեռու համայնքապետարանը: Այ գարնանը կարող է մենք այս աճուրդ վաճառքից հետո նախատեսենք, բյուջեով հեծանիվի համար գումար հատկացնենք, հեծանիվ ունենանք, թող լինի գյուղապետարանի հաշվեկշռում, ես կվարեմ հաճույքով:

- Նախկինում հայտարարել էիք, որ զբոսաշրջիկները կգան եւ «check-in» կլինեն Նոր Կյանքում: Կա՞ արդեն նախադրյալ, որ զբոսաշրջիկներ կգան գյուղ կամ գործարարներ կգան եւ ներդրում կկատարեն գյուղում:

- Մեր գյուղից կան գործարարներ, որոնք արտերկրում են աշխատում եւ ցանկություն են հայտնել ներդրումներ կատարել, հիմնականում գյուղմթերքի վերամշակման, գյուղատնտեսության մեջ ներդրումներ կատարելու համար: Զբոսաշրջիկների մասով մի միտք ունենք, որը չեմ ուզում հանրայնացնել: Այն մտքի վրա ենք աշխատում, որ մի այնպիսի բան գյուղում կառուցենք, որ նախադեպ կլինի: Օրինակ՝ այնպիսի մի բան, որ Հայաստանի այլ բնակավայրերում չեք տեսել, որը զբոսաշրջիկին կգրավի: Մենք Խոր Վիրապից այդքան էլ հեռու չենք: Զբոսաշրջիկները՝ գալով Խոր Վիրապ եւ իմանալով, որ մոտակայքում գտնվող Նոր Կյանքում կա այսպիսի մի բան, ցանկություն կունենան գալ եւ տեսնել, նկարել եւ այլն: Քանի որ մեր գյուղը նոր է, մենք չունենք հին վանական համալիր, պատմամշակութային ժառանգություններ, որոնք զբոսաշրջիկներին կարող են գրավել, կստեղծենք մի նոր բան: