Պաշտոնական ՌԴ-ն չի հասկանում ՀՀ-ում առաջացած բացասական ռեզոնանսը. Զախարովա

Պաշտոնական Ռուսաստանը չի հասկանում Հայաստանի հանրային-քաղաքական շրջանակներում ՌԴ ԱԳՆ հատուկ կարգադրությունների դեսպան Էլեոնորա Միտրոֆանովայի՝ ռուսերենին ԱՊՀ տարածքում իրավական կարգավիճակ տալու վերաբերյալ հայտարարության շուրջ ծավալվող բուռն քննարկումները: «Այդ հայտարարության մեջ ոչ մի հեղափոխական բան չկա»,- մեզ հետ զրույցում նշեց ՌԴ ԱԳՆ պաշտոնական ներկայացուցիչ Մարիա Զախարովան եւ հավելեց, որ Միտրոֆանովայի խոսքում չի նշվել պետական կարգավիճակի մասին եւ խոսքն ուղղակի վերաբերում է համամարդկային նորմերի պաշտպանությանը:   

Թեպետ Միտրոֆանովան իսկապես իր խոսքում չի նշել` արդյո՞ք «իրավական որոշակի կարգավիճակ» ասելով պաշտոնական Մոսկվան նկատի ունի պետական կամ երկրորդ պետական լեզվի կարգավիճակը, հայաստանյան քննարկումներում թիրախավորվում է հենց այդ թեկուզ պաշտոնապես չհայտարարված նպատակը:

Իհարկե, առաջին անգամ չէ, որ ՌԴ փոքր եւ մեծ տրամաչափի պաշտոնյաները հանդես են գալիս ԱՊՀ տարածքում ռուսերենին կարգավիճակ շնորհելու անհրաժեշտության օգտին: Բավական է հիշել միայն «Ռուսաստանն այսօր» միջազգային տեղեկատվական գործակալության գործադիր տնօրեն, Կրեմլի գլխավոր պրոպագանդիստ Դմիտրի Կիսելյովի` երկու տարի առաջ ՀՀ ԱԺ-ում հնչեցրած դժգոհություններն առ այն, որ Հայաստանում ռուսերենի իմացությունը ցածր մակարդակի վրա է: Այդ ժամանակ Կիսելյովի հայտարարությունն, իհարկե, առաջացրեց հանրային բուռն ռեակցիա, սակայն Միտրոֆանովայի հայտարարությունից հետո գործընթացը չսահմանափակվեց միայն հանրային կամ թեկուզ փորձագետների մակարդակի քննարկումներով: Խնդրին անդրադարձավ ՀՀ Կրթության և գիտության նախարար Լևոն Մկրտչյանը` շեշտելով, որ ռուսաց լեզուն Հայաստանում պետական լեզու չի դառնա: «ՀՀ պետական լեզուն հայերենն է, երկրի անկախության հիմնարար արժեքներից մեկն է և փոփոխության ենթակա չէ: Ռուսաց լեզուն Հայաստանում պետական լեզու չի դառնա»,- Կառավարությունում լրագրողների հետ զրույցում ասաց նախարար Մկրտչյանը:

Նախարարի հայտարարությունը ուղիղ «մեսիջ» էր ՌԴ գործընկերներին, թե Հայաստանում բորբոքվող կրքերին որոշակի պատասխան, դժվար է ասել:

Այս պարագայում, սակայն, Ռուսաստանի մտահոգությունները կարծես թե ոչ այնքան Հայաստանին են վերաբերում, որտեղ ԱՊՀ տարածքում ռուսական համայնքն ամենափոքրերից է, որքան հետխորհրդային այլ երկրների՝ Ղազախստանին, Լատվիային, Ուկրաինային եւ այլն, որտեղ գործում են մեծ ռուսական համայնքներ: Այդ երկրներում ռուսներն ունեն խնդիրներ թե´ լեզվի եւ թե´ ազգային փոքրամասնությունների մյուս իրավունքների պաշտպանության մասով: Այս հարցում Հայաստանը, կարելի է ասել, Ռուսաստանի համար մեծ առաջնահերթություն չէ:

«Ճիշտն ասած, այդքան էլ հասկանալի չէ, թե ինչու է այդ հայտարարությունը նման բացասական ռեզոնանս առաջացրել (Հայաստանում – խմբ.): Խոսքը մարդու հիմնարար իրավունքների եւ նորմերի մասին է, որի տակ ստորագրել են աշխարհի շատ քաղաքակիրթ երկրներ: Այն է՝ մարդկանց տալ հնարավորություն` խոսել իրենց մայրենի լեզվով: Մենք բոլորս հավատարիմ ենք այդ կանոններին: Այստեղ ոչ մի հեղափոխական բան չկա: Խոսքը մարդու հիմնարար իրավունքների եւ միջազգային նորմերի մասին է», - ասաց Զախարովան:

Մեր ճշտող հարցին, Միտրոֆանովայի հայտարարությունից կարելի է հասկանալ, որ խոսքը նաեւ ռուսերենին այլ պետություններում պետական եւ երկրորդ պետական լեզվի կարգավիճակի շնորհելու մասին է, Զախարովան պատասխանեց՝ հիշելով հետխորհրդային տարածքի փորձը. «Հետխորդային տարածքում առկա են տարբեր ձեւաչափեր, երբ պետությունը հնարավորություն է ընձեռել ռուսալեզու բնակչությանը օգտվել լեզվի իր իրավունքից: Ուստի, ինձ թվում է այստեղ ռեակցիայի եւ քննադատության չափազանցություն է», - եզրափակեց նա: