Ֆինանսական շուկայում «Բարսելոնան» մեծ առավելություն է ստացել

Համաշխարհային ակումբային ֆուտբոլում վերջին ժամանակներս տեղի են ունենում առաջին հայացքից մերձֆուտբոլային կարեւոր իրադարձություններ, բայց որոնք հետագայում մեծ հաշվով կանխանշելու են ֆուտբոլի ապագան: Անվիճելի է, որ ակումբային ֆուտբոլում հաջողությունների կարելի է հասնել միայն եւ միայն ահռելի գումարների շնորհիվ եւ համաշխարհային ակումբային ֆուտբոլի առաջատարները իրենց դիրքերը պահպանելու համար մրցում են ոչ միայն խաղադաշտերում, այլ նաեւ այլ «տարածքներում»:

Մեծ ակումբների սեփականատերերին մտահոգում է ոչ միայն մարզական հաջողությունները, այլ նաեւ ֆինանսական բարեկեցությունը: Հասկանալի է, որ ակնկալվող ֆինանսները ուղղակիորեն կապված են հաջողությունների, տիտղոսների հետ, բայց կա նաեւ հակառակ պնդումը՝ հաջողությունների հասնել, տիտղոսներ նվաճել հնարավոր է միայն մեծ ներդրումների շնորհիվ: Ֆուտբոլը եւ ֆինանսները նմանվում են հավի եւ ձվի պատմությանը. որն է ավելի կարեւոր կամ առաջնային՝ հնարավոր չէ պարզել: Միեւնույն ժամանակ մեկն առանց մյուսի չի կարող գոյություն ունենալ:

Օրեր առաջ իսպանական «Բարսելոնան» հայտարարեց նոր, ռեկորդային հովանավորչական պայմանագիր կնքելու մասին. 2017-18 թթ. մրցաշրջանից կատալոնական ակումբի մարզաշապիկի վրա լինելու է ճապոնական «Rakuten» էլեկտրոնային կազմակերպության անվանումը: Պայմանագիրը նախատեսված է առաջիկա 4 տարիների համար եւ ինտերնետ ցանցերի վաճառքով զբաղվող աշխարհի ամենամեծ կազմակերպություններից մեկը համարվող ճապոնական այս ֆիրման յուրաքանչյուր տարվա համար «Բարսելոնային» վճարելու է 55 միլիոն եվրո: 2011 թվականից կատալոնական ակումբի տիտղոսային հովանավորն էր «Qatar airways» կազմակերպությունը՝ 22 միլիոն եվրո տարեկան գումարով, եւ ահա «Բարսելոնան» կատարում է միանգամից «22 միլիոնանոց քայլ» ու դառնում այդ առումով համաշխարհային շուկայի առաջատար:

Անցյալ տարի անգլիական 2 գերակումբները՝ «Մանչեսթեր Յունայթեդը» եւ «Չելսին» նույնպես հովանավորչական պայմանագրեր կնքեցին համապատասխանաբար ամերիկյան «Շեւրոլե» (54 միլիոն եվրո տարեկան) եւ ճապոնական «Յոկոհամա» (44 միլիոն եվրո տարեկան) կազմակերպությունների հետ,  եւ թվում էր, թե անգլիական թիմերի հետ այս բնագավառում մրցելը անիմաստ է: Բայց «Բարսելոնան» կարողացավ նոր ռեկորդ արձանագրել, եւ ներկա պահին հովանավորչական պայմանագրերից ստացվող գումարների առումով լավագույն 10 թիմերը հետեւյալներն են (թիմերի անուններից հետո նշված են հովանավոր կազմակերպությունների անունները եւ նախատեսված տարեկան գումարը՝ մլն եվրոյով):

1. «Բարսելոնա», «Rakuten», 55
2. «Մանչեսթեր Յունայթեդ», «Chevrolet», 54
3. «Չելսի», «Yokohama», 44
4. «Բավարիա», «Deutsche Telekom», 35
5. «Արսենալ», «Fly Emirates», 35
6. «Ռեալ Մադրիդ», «Fly Emirates», 30
7. «ՊՍԺ», «Fly Emirates», 25
8. «Լիվերպուլ», «Standard Chartered», 24
9. «Մանչեսթեր Սիթի», «Etihad Airways», 24
10. «Տոտենհեմ», «AIA», 21

Ակումբները էլ ավելի մեծ գումարներ են ստանում մարզահագուստ արտադրող ֆիրմաներից, եւ այստեղ էլ «Բարսելոնան» առաջատար է: Կատալոնական ակումբը այս տարի թարմացրեց ամերիկյան «Nike» կազմակերպության հետ գործող պայմանագիրը եւ հաջորդ մրցաշրջանից «Nike» մարզահագուստը կրելու համար այդ ֆիրմայից ստանալու է տարեկան 105 միլիոն եվրո: «Nike»-ը, ընդ որում, նաեւ «Չելսիի» (66 միլիոն տարեկան) եւ «ՊՍԺ»-ի (23 միլիոն) հովանավորն է: Այս շուկայում «Nike»-ի հիմնական մրցակից գերմանական «Adidas»-ի մարզազգեստ են կրում «Մանչեսթեր Յունայթեդը» (96), «Բավարիան» (80), «Ռեալ Մադրիդը» (40), իտալական «Միլանը» եւ «Յուվենտուսը» (26-ական միլիոն եվրո):

Հովանավորչական այս 2 հիմնական բաղադրիչներից ստացված գումարներով, ընդհանուր առմամբ, առաջատարը «Բարսելոնան է»՝ 160 միլիոն տարեկան (105+55), լավագույն հնգյակում են նաեւ «Մանչեսթեր Յունայթեդը» (150), «Բավարիան» (115), «Չելսին» (110) եւ «Ռեալ Մադրիդը» (70): Ֆինանսական շուկայում հիմա բոլորը սպասում են «Արքայական» ակումբի քայլին՝ հասկանալի է, որ Մադրիդի «Ռեալի» նախագահ Ֆլորենտինո Պերեսը ամենեւին ուրախ չէ իրերի նման դասավորությունից: Հովանավորներից ստացվող գումարների չափով «Ռեալը» ընդամենը 5-րդ տեղն է զբաղեցնում եւ բավական ետ է մնում իր «պատմական» մրցակից «Բարսելոնայից»: Առաջիկա ամռանը լրանում է մադրիդյան ակումբի 2 գլխավոր հովանավորների՝    «Fly Emirates»-ի եւ «Adidas»-ի պայմանագրերի ժամկետները եւ այս պահին քննարկվում են նոր առաջարկներ:

Դեռ ամռանը հայտնի դարձավ, որ «Nike»-ը «Ռեալին» առաջարկել է խզել «Adidas»-ի հետ պայմանագիրը եւ իր հետ կնքել պայմանագիր աստղաբաշխական՝ 150 միլիոն եվրո տարեկան գումարով: «Adidas»-ը եւ «Nike»-ը մրցակիցներ են շուկայում, եւ ամերիկյան կազմակերպությունը «Բարսելոնայի» հետ միասին ցանկանում է ամեն գնով ձեռք բերել «Ռեալին» հանդերձանք մատակարարելու իրավունքը, ինչը գրեթե համազոր է այդ շուկայում գերիշխանություն ստանալուն: Բայց այստեղ փոքրիկ նրբություն կա:

1998 թվականին էլ պայքար էր ընթանում «Adidas»-ի եւ «Nike»-ի միջեւ իսպանական նույն 2 գրանդ ակումբների համար, եւ այն ժամանակ գրեթե նույն չափի գումարներով «Ռեալը» ընտրեց «Adidas»-ին, «Բարսելոնան» էլ՝ «Nike»-ին: «Ռեալ» - «Բարսելոնա» ֆուտբոլայի դիմակայությունը հովանավորչական շուկայում վերածվել էր «Nike» - «Adidas» դիմակայության: 18 տարի շարունակ իսպանական 2 թոփ ակումբները օգտվել են մարզազգեստ արտադրող տարբեր ֆիրմաների արտադրանքից: 

Հիմա «Բարսելոնան» իր հին գործընկերոջ՝ «Nike» հետ նոր պայմանագիր է կնքել՝ շատ ավելի մեծ գումարով, իսկ «Ռեալի» նախագահ Պերեսը լռում է եւ չի մեկնաբանում անգամ «Nike»- ի առաջարկը: Միգուցե «Adidas»-ը նո՞ւյնպես առաջարկ ունի: