Փոփոխություններ կլինեն ՀՀԿ ԳՄ-ում. սպասվում է նաեւ վարչապետի մուտքը ՀՀԿ եւ ՀՀԿ ԳՄ

ՀՀԿ ԳՄ անդամ, պատգամավոր Սամվել Նիկոյանի խոսքերով՝ Հայաստանում տեղի ունեցող փոփոխություններն ու բարեփոխումներն անպայման արտացոլում են ունենալու իրենց կուսակցության մեջ եւ կուսակցության ղեկավար կազմում:

- Պարոն Նիկոյան, Ղարաբաղա-ադրբեջանական առաջնագծում խնդիրնե՞ր կան, որ տարբեր տեղերից կամավորական ուժերին մոբիլիզացնելու վերաբերյալ կոչեր են հնչում: Նախօրեին նման նախաձեռնությամբ էր հանդես եկել պաշտպանության նախարարության լրատվական վարչության ղեկավար Վարդան Ավետիսյանը, ավելի վաղ Արցախում նման նախաձեռնությամբ էր հանդես եկել «Դաշնակցություն» կուսակցությունը:

- Ղարաբաղաադրբեջանական սահմանագծում խնդիրները նոր չեն: Այնտեղ պարբերաբար եղել են բռնկումներ, եղել է էսկալացիա, եւ դա հանգեցրել է ապրիլյան պատերազմին: Ղարաբաղաադրբեջանական սահմանն այսօր էլ հանգիստ չէ, վաղն էլ հանգիստ չի լինելու, քանի որ ըստ էության բանակցությունները մտել են փակուղի այն պատճառով, որ Ադրբեջանը ցանկանում է Ռուսաստանի օգնությամբ ինչ-որ տարածքներ ստանալ: Բնականաբար, դա չէր կարող տեղի ունենալ, եւ այդ երկիրը նորից փորձում է լարվածությունը սրել: Հատկապես որ տեղեկություններ են հնչում, թե արեւմուտքը փորձում է ազդել Ադրբեջանի վրա, որ ճանաչի ԼՂՀ ինքնորոշման իրավունքը: Դա խոստովանեց նաեւ այդ երկրի նախագահը: Նման դեպքերում Ադրբեջանին մնում է պարբերաբար սրել իրավիճակը: Իսկ այն, որ համախմբվելու վերաբերյալ նման հայտարարություններ են հնչում, կարծում եմ, մեր հասարակությունը միշտ պետք է դրան պատրաստ լինի:

- Բանակի ուժերը չե՞ն բավարարում, որ պահեստազորայիններին ու կամավորներին մոբիլիզացվելու վերաբերյալ նախաձեռնություններ են լինում:

- Մեր բանակն ի վիճակի է դիմագրավելու այդ խնդիրներին, բայց եթե հասարակությունը կանգնած է նրա հետեւում, իրեն ավելի ուժեղ է զգում:

- Պարոն Նիկոյան, մոտենում է Հանրապետական կուսակցության համագումարի օրը՝ նոյեմբերի 26-ը: Ի վերջո դրա արդյունքում ի՞նչ փոփոխություններ են լինելու կուսակցությունում:

- Վստահաբար որեւէ մեկը, բացի հանրապետության նախագահից, ամբողջությամբ չի կարող տիրապետել այդ հարցին հատկապես այն հարթության մեջ, ինչ հարթության մեջ դա լրագրողներին է հետաքրքրում: Կարող եմ ընդամենն ասել, որ մեր հասարակական-քաղաքական կյանքում եւ պետական կառավարման համակարգում տեղի ունեցող փոփոխությունները, բարեփոխումները չեն կարող իրենց արձագանքը չգտնել նաեւ մեր կուսակցության մեջ, քանի որ այդ ամբողջ փոփոխությունները նախաձեռնել է երկրի ղեկավարը: Իսկ մեր նպատակն է՝ օգնել կառավարությանն իրականացնելու իր առջեւ դրված նպատակները:

- Իսկ այդ փոփոխությունների արդյունքում նոր մարդի՞կ կմտնեն ՀՀԿ ԳՄ, եւ որոշ անդամներ դուրս կգա՞ն այնտեղից:

- Փոփոխությունները նշանակում են ամեն ինչ: Փոփոխությունները կարող են վերաբերվել եւ ԳՄ-ի ընդհանուր թվակազմին, եւ նոր անդամների հնարավորությանն ու ԳՄ-ից դուրս գալուն: Պարզապես զինվեք համբերությամբ մինչեւ մեր համագումարը: Երկրում տեղի ունեցող բարեփոխումները չեն կարող ազդեցություն չունենալ իշխող կուսակցության ղեկավար մարմնի վրա:

- Կարեն Կարապետյանի մամուլի խոսնակը երեկ պատասխանելով նրա՝ ՀՀԿ-ին անդամակցելու վերաբերյալ հարցին՝ ասել էր, որ այդ մասին վարչապետն ինքը կհայտարարի: Այսինքն արդեն հաստատ է, որ Կարապետյանը կմտնի ՀՀԿ: Այդ դեպքում էլ նա, բնականաբար, կընդգրկվի ԳՄ:

- Մեզ համար, իհարկե, ցանկալի կլինի վարչապետի մուտքը ՀՀԿ, բայց դա ինքը պետք է նախաձեռնի, եւ ինքը պետք է դա հայտարարի: Իսկ եթե Կարեն Կարապետյանն անդամագրվի կուսակցությանը, ապա, բնականաբար, նա պետք է լինի կուսակցության ղեկավար մարմնում:

- Այդ բարեփոխումների կամ փոփոխությունների շրջանակներում ՀՀԿ մի շարք բարձրաստիճան պաշտոնյաներ հրաժարական տվեցին: Հնարավո՞ր է նրանցից ԳՄ անդամները դուրս գան այդ կառույցից:

- Դա պարզ կլինի նոյեմբերի 26-ին: Դուք ինձ այնպիսի հարցեր եք տալիս, որոնք որոշվելու են համագումարի ժամանակ: Դուք ուզում եք, որ ես պատասխանե՞մ այնպիսի հարցերի, որոնք որոշվելու են քվեարկության միջոցով: Ես դա չեմ կարող ասել:

- Իսկ դուք մնալո՞ւ եք ԳՄ անդամ:

- Ուզում եք, որ ես պատասխանե՞մ համագումարի բոլոր պատվիրակների փոխարեն ու վիրավորե՞մ նրանց: Ես դա չեմ անի:

- Իսկ նոր պաշտոնանկություններ սպասվո՞ւմ են: Կարծես թե դեռ այնքան էլ բարեփոխված չէ կառավարման համակարգը:

- Որպեսզի դուք ունենաք այդ հարցի պատասխանը, պետք է եւս մեկ անգամ կարդաք նախագահի փետրվարի 12-ի ելույթը: Երբ ինձ տալիս են փոփոխությունների վերաբերյալ հարցեր, ես մատնացույց եմ անում դա, որտեղ ապագա պետական չինովնիկի կերպարի վերաբերյալ շատ հստակ հարցադրումներ կան: Դա ուղղված է հասարակությանը, բայց կրողը պետք է լինի պաշտոնյան: Նրանք, ովքեր չեն մտնում այդ տեսլականի մեջ, կարող են փոխվել: Եվ այդ փոփոխությունները վերաբերում են մեր հանրային կյանքի բոլոր ոլորտներին:

- Կառավարությունում կա՞ն այդ կերպարին չհամապատասխանող պաշտոնյաներ:

- Այդ հարցի պատասխանը կստանաք վեց ամիս հետո ձեւավորվելիք կառավարությունից:

- Ձեզ համար ի վերջո հստա՞կ է հարցը, թե նախագահության իր ժամկետի ավարտից հետո Սերժ Սարգսյանը կդառնա՞ վարչապետ, ինչը չէր հերքել «Ալ-Ջազիրային» տված հարցազրույցում: Թե՞ ինչպես սահմանադրական փոփոխություններից առաջ էր ասել, չի ցանկանում լինել այդ պաշտոնում:

- Դուք ինձ հարցեր եք տալիս, որի պատասխանը նախագահը չի տվել: Այդ հարցի պատասխանը կարելի է տալ միայն խորհրդարանական ընտրություններից հետո: Սա անհայտներից մեկն է: Կան այլ անհայտներ: Իշխող կուսակցության ղեկավարը իր խաղաքարտերը կարող է բացել միմիայն ընտրությունից հետո: