Արդյոք Հենրիխ Մխիթարյանը վերջնականապե՞ս վերադարձավ «աքսորից»

Եվրոպայի լիգայի խաղարկության 4-րդ տուրի շրջանակներում Ստամբուլում կայացած «Ֆեներբախչե»- «Մանչեսթեր Յունայթեդ» հանդիպման 61-րդ րոպեին, 54 օրվա բացակայությունից հետո, Հենրիխ Մխիթարյանը վերջապես խաղադաշտ վերադարձավ: Այդ պահին խաղի հաշիվը արդեն 2-0 էր՝ տանտերերի օգտին: Մխիթարյանը բավական ակտիվ մտավ խաղի մեջ, փորձեց որոշակի սրություն հաղորդել իր թիմի գործողություններին, բայց ի վերջո «Մանչեսթեր Յունայթեդը» պարտվեց 1-2 հաշվով: Հանդիպման ավարտից հետո կայացած ասուլիսի ընթացքում անգլիական թիմի գլխավոր մարզիչ Ժոզե Մոուրինյոն Մխիթարյանի մասին հետեւյալ կարծիքն է արտահայտել. «Նա պետք է ավելացնի՝ դա շատ պարզ է: Մենք այդ դիրքում շատ խաղացողներ ունենք, եւ Մխիթարյանը պետք է խաղա ավելի լավ, քան Մատան, Լինգարդն ու Անտոնի Մարսիալը: Աշխարհում յուրաքանչյուր մարզիչ ցանկանում է հաղթել, ցանկացած մարզիչ ցանկանում է խաղացնել այն ֆուտբոլիստներին, որոնք կարող են ավելի օգտակար լինել թիմին, եւ ես բացառություն չեմ»:

Իսկ ահա Անգլիայում համարում են, որ «Ֆեներբախչե» - «Մանչեսթեր Յունայթեդ» խաղի միակ լուսավոր կետը հենց Մխիթարյանի հայտնվելն էր խաղադաշտում: Ընդ որում, այս կարծիքը կիսում են գրեթե բոլոր հեղինակավոր լրատվամիջոցները: «Հինգշաբթի երեկոյան, գրեթե երկամսյա «աքսորից» հետո Մխիթարյանը վերադարձավ, եւ սա այն ոչ շատ լուսավոր կետերից էր, որ տեսանք Մոուրինյոյի «պատրաստած» ընդհանուր առմամբ բավական մռայլ երեկոյի ընթացքում»,- գրել է «The Telegraph»-ը: «Անցյալ խաղաշրջանում Բունդեսլիգայի լավագույն խաղացող ճանաչված Հենրիխ Մխիթարյանը սեպտեմբերի 10-ին «Մանչեսթեր Սիթիի» հետ կայացած խաղից հետո չէր հայտնվում անգամ հայտացուցակում, եւ խոսակցություններ կային, թե անձնական բնույթի խնդիրներ են ծագել: Երեկ Մխիթարյանը վերջապես կես ժամով հայտնվեց խաղադաշտում, եւ Մոուրինյոն խաղից հետո ձեւակերպել է նրա նկատմամբ վերաբերմունքը՝ «պետք է ավելի լավ խաղա»: Ինչպե՞ս՝ Մոուրինյոն չի մանրամասնում», - սա էլ «DailyMail»-ի կարծիքն է, իսկ «The Sun»-ը գրել է. «Վստահ էինք, որ Մխիթարյանը իրեն ցույց տալու դեռ հնարավորություններ կստանա, բայց Մոուրինյոյի խոսքերից հետո դա քիչ հավանական է թվում»:

Մեծ հաշվով կարելի էր համաձայնվել Մոուրինյոյի հետ, եթե նա հայտարարեր՝ «Մխիթարյանը պետք է փոխի իր խաղը»: Հայտնի է, որ հայ ֆուտբոլիստը այսպես կոչված «մեկ հպումով», «տարածության եւ ազատ գոտիների» խաղի կողմնակից է: Մխիթարյանը հրաշալի է խաղում, երբ ամբողջ թիմը խաղում է արագ, մեկ հպումով փոխանցումներով ֆուտբոլ. «ստացար - փոխանցիր - բացվիր - ստացիր»՝ գնդակի հետ վարվելու այս պարզ ու հանճարեղ մեխանիզմը հենց Մխիթարյանի խաղային ձեռագիրն ու բնութագիրն է: Ընդ որում, Մխիթարյանը առավել էֆեկտիվ է գործում, երբ խաղում է հարձակման գծի ֆուտբոլիստի թիկունքից, այսպես կոչված «10 համարի» դիրքում. առաջ քաշված հարձակվողը եզրեր տեղափոխվելով անընդհատ Մխիթարյանի համար պետք է տարածություններ ազատի: Այդպես էր խաղում Դորտմունդի «Բորուսիան»՝ Օբամեյանգ - Մխիթարյան զույգով, նման ֆուտբոլ էր խաղում Հայաստանի ազգային հավաքականը, երբ մեր հարձակման գծում փայլում էր Յուրա Մովսիսյանը: Իսկ ի՞նչ ֆուտբոլ է խաղում Մոուրինյոյի «Մանչեսթեր Յունայթեդը»: Իհարկե, Հայաստանում բոլորն էլ համարում են, որ մեծ հաշվով «Յունայթեդը» «ֆուտբոլ չի խաղում»: Ուղղակի այդ խաղային մոդելը բացարձակապես այլ բնույթի եւ որակի է: «Յունայթեդի» ցանկացած ֆուտբոլիստ գնդակը ստանալով, այն մշակում է, մի քանի անգամ դիպչում է գնդակին, պտտվում է, ետ ու առաջ է շարժվում, նոր՝ փոխանցում կատարում: Սա տեմպի մեծ կորուստ է, եւ այս ընթացքում Մխիթարյանը հասցնում է մի քանի անգամ փոխել դիրքը, հետո հիասթափված կանգնում: Հաջորդը. «Ֆեներբախչեի» հետ խաղում Մխիթարյանը խաղում էր խորքից, մի քանի անգամ էլ գնդակը ստացավ սեփական կիսադաշտում:

Ընդ որում, 2 անգամ կորցրեց գնդակը այս դիրքում եւ վտանգավոր հակագրոհներ բերեց: Սեփական կիսադաշտում Մխիթարյանի խաղալը, երբ առջեւում են 2 թիմերի գրեթե բոլոր ֆուտբոլիստները, ուղղակի հակացուցված է: Անգամ Հայաստանի հավաքականի խաղերում կարելի է գտնել բազմաթիվ դեպքեր, երբ Մխիթարյանը սխալվում է սեփական կիսադաշտում եւ վտանգավոր գրոհ բերում իր թիմի դարպասին, անգամ գոլեր են խփվել նման սխալներից հետո: Դե իսկ գլխավոր խնդիրը Զլատան Իբրահիմովիչի խաղաոճն է: Զլատանը իհարկե համաշխարհային կարգի ֆուտբոլիստ է եւ միգուցե լավագույնը «Յունայթեդի» այս կազմում: Բայց նա հարձակման գծում խաղում է ոչ թե դաշտի «լայնքով», այլ՝ «ուղղահայաց», ետ ու առաջ է վազում միայն: Մխիթարյանը անընդհատ իր առջեւ բաց տարածության փոխարեն տեսնում է բարձրահասակ Իբրահիմովիչին եւ այլ տարբերակ չունենալով՝ կամ փոխանցում է կատարում նրան, կամ էլ խաղընկերոջը: Տարածության, ազատ գոտիների բացակայությունը հնարավորություն չեն տալիս հայ ֆուտբոլիստին իր որակները ցույց տալու:

Արդեն վաղը Անգլիայի առաջնության շրջանակներում «Մանչեսթեր Յունայթեդը» արտագնա խաղում մրցելու է ետնապահներից «Սուոնսիի» հետ: Մոուրինյոյի համար սա շատ լավ առիթ է իր ֆուտբոլով հաղթանակ տանելու եւ սեփական իրավացիությունը ապացուցելու համար: Մխիթարյանո՞վ, թե՞ առանց նրա՝ դժվար է ասել: Ուղղակի արդեն ակնհայտ է Մոուրինյոյի վերաբերմունքը մեր ֆուտբոլիստի հանդեպ: