Ֆուտբոլի Չեմպիոնների լիգա. Ստամբուլը սպասում է թուրք-իտալական դիմակայությանը

Այսօր եւ վաղը կայանալու են ֆուտբոլի Չեմպիոնների լիգայի 4-րդ տուրի հանդիպումները, որի շրջանակներում այսօր անգլիական «Մանչեսթեր Սիթին» հյուրընկալելու է իսպանական «Բարսելոնային» եւ փորձելու է ռեւանշի հասնել 2 շաբաթ առաջ կրած խոշոր հաշվով (0-4) պարտության դիմաց: Բնականաբար, այս հանդիպումն առանձնանում է այսօր կայանալիք խաղերից առնվազն իր ցուցանակով. մրցելու են աշխարհի ամենաթանկարժեք թիմերից 2-ը, որոնք համարվում են Լիգայի ընթացիկ մրցաշարի ֆավորիտներից: Բայց կա մեկ այլ հանդիպում, որը միգուցե շատ ու շատ գործոններով զիջում է այս հանդիպմանը, բայց կարեւորության, հնարավոր ինտրիգների առումով՝ հաստատապես գերազանցում է: 

4-րդ տուրը մեկնարկելու է այսօր, Երեւանի ժամանակով 21:45-ին Ստամբուլում կայանալիք «B» խմբի առաջատարներ «Բեշիքթաշի» (Թուրքիա) եւ «Նապոլիի» (Իտալիա) անչափ կարեւոր հանդիպումով: Կայացած 3 տուրից հետո «Նապոլին» վաստակել է 6, «Բեշիքթաշը»՝ 5, 3-րդ տեղում ընթացող պորտուգալական «Բենֆիկան»՝ 4 միավոր: 2 շաբաթ առաջ կայացած 3-րդ տուրում «Նապոլին» սեփական հարկի տակ պարտվեց թուրքական թիմին 2-3 հաշվով եւ բավական բարդացրեց իր մրցաշարային գործերը: Ընդ որում, այդ պարտությունը վերջին շրջանում «Նապոլիի» խաղային անկման ապացույցներից մեկն էր. վերջին 6 հանդիպումից 4-ում «Նապոլին» պարտվել է: Նման ձախողում չէր եղել գլխավոր մարզիչ Մաուրիցիո Սարիի ամբողջ աշխատանքի ընթացքում:

Կադրային (վնասվածքի պատճառով դեռ երկար ժամանակ չի խաղալու հարձակման առաջատար Արկադիուշ Միլիկը) եւ խաղային լրջագույն խնդիրներ ունեցող «Նապոլիի» ձախորդություններին օրեր առաջ ավելացավ եւս մեկը. Իտալիայի առաջնության վերջին տուրում արտագնա հանդիպման ժամանակ «Նապոլին» 1-2 հաշվով զիջեց իր հիմնական մրցակիցներից մեկին՝ Թուրինի «Յուվենտուսին», եւ այս հանդիպման ավարտից հետո լրջագույն կոնֆլիկտ է ծագել Սարիի եւ թիմի առաջատարներից Լորենցո Ինսինյեի միջեւ: Վերջինս ակնհայտ դժգոհություն արտահայտեց, երբ մարզիչը փոխարինեց իրեն: Երեկ առավոտյան Սարին հայտարարել է, որ Ինսինյեն ներողություն է խնդրել իր պահվածքի համար: «Նա կտուգանվի: Գործը փակված է»,- ասել է Սարին: Թե որքանով է իրականությանը համապատասխանում այս հայտարարությունը, պարզ կլինի այսօր երեկոյան «Բեշիքթաշի» հետ խաղի ժամանակ:

Բավական «տարօրինակ» են «Բեշիքթաշի» գործերը Թուրքիայի առաջնությունում: Թիմը մրցաշարային աղյուսակում առաջ է իր հիմնական մրցակիցներից՝ ստամբուլյան «Գալաթասարայից» եւ «Ֆեներբախչեից», բայց ընթանում է 2-րդ տեղում, քանի որ թուրքական ֆուտբոլի այս 3 թոփ թիմերի պայքարին միջամտում է մայրաքաղաքային մեկ այլ թիմ՝ «Իստամբուլ Բաշակշեհիրը»: Բայց հիմա «Բեշիքթաշը» կադրային խնդիրներ ունի. վնասվածքներ ունեն մի շարք առանցքային խաղացողներ: Ցավալի է, որ օրեր առաջ այս շարքում է հայտնվել նաեւ մեր Արաս Օզբիլիսը: Ֆուտբոլասերները տեղյակ են, որ Հայաստանի ազգային հավաքականի ֆուտբոլիստը հայտավորված չէ «Բեշիքթաշի» կազմում Չեմպիոնների լիգայում, բայց հայտավորված է ներքին մրցաշարերում: Օրեր առաջ էլ մարզման ժամանակ Արասը վնասել է ուսը, վիրահատվել է եւ բաց կթողնի առնվազն 2 ամիս:

2 շաբաթ առաջ իր պատմության ընթացքում առաջին անգամ հաղթելով իտալական թիմի («Նապոլիին» 3-2 հաշվով) «Բեշիքթաշը» այսօր հաղթանակի դեպքում գրեթե կարող է ապահովել իր տեղը փլեյ-օֆում: Ստամբուլի եվրոպական մասում գտնվող «Բեշիքթաշի» 41 հազարանոց նորակառույց «Վոդաֆոն Արենա» ստադիոնը լեփ լեցուն է լինելու, եւ թուրք ֆաները փորձելու են գերազանցել իրենց իսկ սահմանած ռեկորդը. 9 տարի առաջ՝ 2007 թվականի հոկտեմբերի 24-ին «Բեշիքթաշի» ֆաները նախկին՝ 32 հազարանոց «Ինյոնյու» ստադիոնում արձանագրել էին աղմուկի համաեվրոպական ռեկորդ՝ 132 դեցիբել բարձրությամբ:

Մրցակցային, մրցաշարային իմաստով «Բեշքիքթաշ»-«Նապոլի» հանդիպումը այսօր կայանալիք խաղերից գուցե ամենակարեւորն է, եւ պատահական չէ, որ այս խաղի գլխավոր մրցավար է նշանակվել աշխարհի լավագույն մրցավարներից մեկը՝ անգլիացի Մարկ Կլատենբուրգը: Եվ հետաքրքիր է, որ հենց այս մարդու հետ է կապված հանդիպման մեծագույն ինտրիգը: Մինչ այժմ Կլատենբուրգը վարել է իտալական եւ թուրքական թիմերի մասնակցությամբ 6 հանդիպում եւ ոչ մի անգամ իտալական կամ թուրքական թիմերը չեն հաղթել: Կլատենբուրգի մասնակցությամբ հանդիպումներում իտալական կամ թուրքական թիմերը չեն հաղթում, եւ եթե այս «ավանդույթը» շարունակվի, ապա «Բեշքիքթաշ»-«Նապոլի» հանդիպումը պետք է ավարտվի ոչ-ոքի՝ միգուցե 2 թիմերն էլ ձեռնտու ելքով:

Ավելացնեմ, որ նույն՝ «Բ» խմբում պորտուգալական «Բենֆիկան» հյուրընկալելու է Կիեւի «Դինամոյին», «A» խմբում մրցելու են «Լուդոգորեց» (Բուլղարիա)-«Արսենալ» (Անգլիա) եւ «Բազել» (Շվեյցարիա) ՊՍԺ (Ֆրանսիա) զույգերը, «C» խմբում անգլիական «Մանչեսթեր Սիթին» հյուրընկալելու է իսպանական «Բարսելոնային», իսկ գերմանական «Բորուսիան» (Մյունխենգլադբախ)՝ շոտլանդական «Սելթիկին» եւ վերջապես «D» խմբում մրցելու են «Ատլետիկո» (Մադրիդ, Իսպանիա)-«Ռոստով» (Ռուսաստան) եւ «ՊՍՎ» (Հոլանդիա)-«Բավարիա» (Գերմանիա) զույգերը: Ի դեպ, այս բոլոր, ինչպես նաեւ վաղը  կայանալիք մյուս 8 հանդիպումները մեկնարկելու են Երեւանի ժամանակով 23:45-ին՝ 1 ժամ ուշ, քան Լիգայի առաջին 3 տուրերի հանդիպումները, եւ սա պայմանավորված է այն հանգամանքով, որ Եվրոպայում անցել են ձմեռային ժամանակի: