Մինչեւ տարեվերջ կլինի նոր էտապ, Արամ Կարապետյան

«Նոր Ժամանակներ» կուսակցության նախագահ Արամ Կարապետյանը չի կարծում, որ Կարեն Կարապետյանի վարչապետ նշանակվելուց հետո Ռուսաստանի դիրքերը Հայաստանում ավելի ամրապնդվեցին: Նա գտնում է, որ ամրապնդվելու համար այդ երկիրը Հայաստանում պետք է ֆինանսական ներդրումներ անի:

- Պարոն Կարապետյան, ի՞նչ նոր գործընթացներ կամ դասավորումներ կարող են տեղի ունենալ Հայաստանի ներքաղաքական կյանքում 2017թ. ընտրություններից առաջ:

- Ես կարծում եմ, առայժմ ոչ մի լուրջ բան չկա: Այդ ամենը նոր էտապից հետո կերեւա: Իմ կարծիքով, Հայաստանը մտնելու է տնտեսական, քաղաքական եւ գեոքաղաքական նոր էտապի մեջ: Համաշխարհային գործընթացները բոլորին ստիպելու են իրադարձություններին մի քիչ այլ աչքով նայել: Այդ նոր էտապը կլինի նոր պատերազմի, թե ռուս-ամերիկյան նոր հակամարտության ձեւով, դեռ պարզ չէ, բայց ակնհայտ է, որ մեր շուրջ ընթացող գործընթացները մեզ նոր էտապի են բերելու: Իմ տպավորությամբ՝ դա կլինի մինչեւ տարվա վերջ: Դրանից հետո պարզ կդառնա, թե որ քաղաքական ուժը ինչ գործողությունների պատրաստ կլինի:

- Ոչ իշխանական դաշտում մեկնարկը տվեց Վիկտոր Դալլաքյանը, որը շուտով կհայտարարի նոր կուսակցության բացման լուրը, եւ որին կարող է միանալ պաշտպանության նախկին նախարար Սեյրան Օհանյանը: Իսկ դա համարվում է ռուսական ծրագիր:

- Գործող իշխանության ներկայացուցիչը՝ նախագահի աշխատակազմի ղեկավարի տեղակալը, երկրի նախագահին մեղադրում է, որ նա ապագա հանցագործ է: Մի բան է, երբ դա ասում են լրագրողները, քաղաքացիները կամ քաղաքական հակառակորդները, բայց մեկ այլ բան է, երբ դա ասում է գործող իշխանության ներկայացուցիչը: Երբ նա նման մեղադրանք էր առաջադրում, դեռ աշխատակազմի ղեկավարի տեղակալ էր: Դուք տեսնում եք, թե մառազմն ինչ աստիճանի է հասել, իսկ դուք ասում եք, թե կուսակցություն են ստեղծում: Հետո՞ ինչ, թող ստեղծեն, մի հատ ավելի, մի հատ պակաս: Եվ հետո արտասահմանյան դիվանագիտական առաքելությունների ուշադրությունը բեւեռում է իր վրա ու հայտարարում, թե եթե իրեն մի բան պատահի, Սերժ Սարգսյանն է մեղավոր: Եթե ինչ-որ մեկը ընդդիմություն է, ուրեմն Ս. Սարգսյանն այդ մարդկանց նկատմամբ ֆիզիկական հաշվեհարդա՞ր է տեսնելու:

- Իսկ այդ աշխարհաքաղաքական հակասությունների սրացման ազդեցությունն ինչպե՞ս է լինելու Հայաստանի վրա:

- Բոլոր վերլուծությունները ցույց են տալիս, որ ՌԴ-ի ու ԱՄՆ-ի միջեւ հակասությունը գնալով աճելու է, այն բավականաչափ լրջանալու է: Եվ հասկանալի է, որ երկուսի շահերն էլ Հարավային Կովկասում բախվելու են, ու դա իր ազդեցությունն է ունենալու Հայաստանի վրա: Ես նկատի չունեմ, որ Հայաստանում հեղափոխություններ են արվելու, ես նկատի ունեմ այն, որ մինչեւ ընտրությունները մեր շուրջ ընթացող գործընթացները կարող են բոլորովին այլ կերպ ընթանալ: Եվ տխուրն այն է, որ այդ հակամարտությունը կրում է ռազմական բնույթ, ինչը բոլոր առումներով կործանարար է: Կամ, ի՞նչ եք կարծում, «Սասնա ծռեր» խմբի գործողություններից առաջ ու հետո Հայաստանը նո՞ւյնն է, կամ ապրիլյան պատերազմից առաջ եւ հետո Հայաստանը նո՞ւյնն է: Եվ քանի որ կարող են նման այլ գործընթացներ էլ լինել, ինչո՞ւ քննարկենք մի բան, որ մի քանի ամիս առաջ կարող է փոփոխության ենթարկվել:

- Օրինակ, ներքաղաքական զարգացումների դեպքում կարծիք կա, որ կառավարության փոփոխությունը ուներ նաեւ նման զարգացումները կանխելու, դրական սպասումներ առաջացնելու նպատակ:

- Ճիշտ է, բայց դա կհաջողվի՞: Հայաստանը ապրում է արտասահմանյան տրանսֆերտների եւ վարկերի հաշվին: Եթե վարկ չեն տալիս, իսկ ուղղակի ներդրումներն արդեն երեք անգամ ընկել են, Հայաստանի տնտեսությունն ինչպե՞ս կարող է զարգանալ: ՌԴ-ում տնտեսական, գեոքաղաքական վիճակը գնալով վատանալու է: Այսինքն, մեր երկիրը տնտեսական առումով գտնվում է արտաքին կառավարման ներքո: Դրսում վիճակն այնպիսին է, որ Հայաստան փող չի գալիս, ուրեմն այստեղ ինչպե՞ս են իրավիճակ բարելավելու:

- Չե՞ք կարծում, որ վարչապետի պաշտոնում Կարեն Կարապետյանի նշանակմամբ ՌԴ-ն ավելի ամրապնդեց իր դիրքերը մեր երկրում:

- Ոչ, որովհետեւ դրանից հետո մեծ ներդրումներ են անհրաժեշտ: Այսօր աշխարհում մի երկրում ամրապնդվելը հնարավոր է միայն մեծ ներդրումներով: ՌԴ-ն այստեղ ի՞նչ քաղաքական ռեսուրս ունի: Սերժ Սարգսյանն էլ է ՌԴ-ի ազդեցության տակ, բայց նա քաղաքական ռեսուրս չէ: Քաղաքական ռեսուրսն այն է, որ կարողանա հասարակության վրա ազդել: Ինչպես ասում են՝ եթե անգամ արդուկը միացնես, այնտեղից  էլ Սերժ Սարգսյանին են հայհոյում: Նա ի՞նչ քաղաքական ռեսուրս:

- ՌԴ-ն էլ «Իսկանդեր» ու այլ զինատեսակներ բերեց, շքերթի ժամանակ ցուցադրեց: Դա ոգեւորեց մեր հասարակությանը: Հասարակության վրա ազդելու համար կարող է նման մի քանի այլ զինտեխնիկա էլ ներկայացնել:

- Ռազմական առումով՝ այո, ՌԴ-ն մեր բարեկամն է: Բայց այդքան էլ Ադրբեջանի բարեկամն է:

- Իսկ ՌԴ-ն մեր հասարակության վրա ազդեցություն ունենալու համար ֆինանսական ներդրումներ կանի՞:

- Պիտի ունենա, որ անի: Բա ինչո՞ւ եմ միանգամից աշխարհի փորձը ներկայացնում: ՌԴ-ի վիճակը գնալով վատանում է: Դատելով Նյու Յորքի համաժողովից՝ Արեւմուտքից էլ որեւէ մեկը չի պատրաստում Հայաստանում ներդրումներ անել: Մեզ տրամադրվող վարկերը կրճատվում են, բյուջետային իրավիճակն այնպիսին է, որ ծախսերի կրճատում են անում, Հարկային օրենսգիրք ընդունում: Այսինքն պարզ է, չէ՞, որ վատ է լինելու: Բա էլ ինչո՞վ են մինչեւ ընտրությունները տնտեսությունը խելքի բերում ու դրական սպասումներ առաջացնում: Արեւմուտքն էլ չունի Հայաստանին վարկ տալու քաղաքական որոշում:

- Իսկ հնարավո՞ր է Արեւմուտքը, օգտվելով ՌԴ-ի այդ վատ վիճակից, փորձի ֆինանսական ներդրումներով ավելի ամրապնդվել մեր երկրում:

- Իմ իմանալով՝ ոչ: Բայց արեւմուտքը բախվելու է այն իրավիճակին, թե ինչքան կարելի է վարկեր տալով՝ այս երկիրն ավերել: Չէ՞ որ վարկեր տալով՝ պահում են այս իշխանություններին: