Էջմիածնում նախընտրական կրքերը թեժ են

Սեպտեմբերի 18-ին կայանալիք ՏԻՄ ընտրությունները որոշ համայնքներում ու քաղաքներում խոստանում են թեժ լինել, ընդհուպ մինչեւ բախումների աստիճան:

 Նման հավանականություն կա, օրինակ, Էջմիածին քաղաքում, որտեղ իրար են բախվում երկու թիմեր՝ գեներալ Մանվել Գրիգորյանի եւ քաղաքապետի թեկնածու Արթուր Թումանյանի կողմնակիցները: Ինչպես հայտնի է, Մանվել Գրիգորյանի որդուն՝ Էջմիածնի գործող քաղաքապետ Կարեն Գրիգորյանին պաշտպանում է Հանրապետական կուսակցությունը: Իսկ Արթուր Թումանյանին պաշտպանում են նախկին պատգամավոր Հակոբ Հակոբյանը՝ Ճոյտը եւ Էջմիածնի նախկին քաղաքապետ Հրաչիկ Աբգարյանը: Ի դեպ, Արթուր Թումանյանը Էջմիածնում առաջադրվեց միայն այն բանից հետո, երբ Հրաչիկ Աբգարյանը պարզել էր, որ իրեն Էջմիածնի գրանցումից հանել են: Նրանք երկուսն էլ մեզ հետ զրույցում հաստատեցին այս հանգամանքը, Արթուր Թումանյանն էլ հավելեց, թե քանի որ իրենք համախոհներ են, իսկ Հրաչիկ Աբգարյանի առաջադրումը չստացվեց, որոշվեց փոխարենն իր թեկնածությունը առաջադրել:

Այս երկու թիմերի միջեւ լարվածությունն ու փոխադարձ մեղադրանքները եւ հայհոյանքներն արդեն իսկ թեժ մթնոլորտ են ստեղծել Էջմիածնում: Եվ այդ իրավիճակին ուշի ուշով հետեւում են նաեւ մայրաքաղաքի քաղաքական շրջանակներում: Ընդ որում, ինչպես արդեն նշել էինք, ՀՀԿ-ում ոչ բոլորն են պաշտպանում Կարեն Գրիգորյանին: Որոշ տեղեկությունների համաձայն, վարչապետ Հովիկ Աբրահամյանն ու Արմավիրի մարզպետ Աշոտ Ղահրամանյանը ստվերային աջակցություն են ցուցաբերում նրա մրցակից թիմին: Մարզպետին խանգարում է մարզում Գրիգորյանների ազդեցությունն ու հնարավորությունները, ինչը նրան թույլ չի տալիս մարզում լինել ամենաազդեցիկը: Իսկ վարչապետի ու Մանվել Գրիգորյանի միջեւ լարվածության մասին վաղուց է հայտնի: Արթուր Թումանյանը մեզ հետ զրույցում չհերքեց, որ վարչապետն ու մարզպետը կարող է իրեն աջակցեն: «Չեմ կարող ասել, բայց շարքային քաղաքացիները հոգնել են Գրիգորյաններից ու նրանց ստեղծած վախի մթնոլորտից»,- պատասխանեց նա:

Գրեթե նման խուսափողական պատասխան տվեց նաեւ Հրաչիկ Աբգարյանը: Մենք փորձեցինք Արմավիրի մարզպետ Աշոտ Ղահրամանյանից էլ մեկնաբանություն ստանալ այդ հնարավոր ստվերային աջակցության վերաբերյալ, բայց նա չցանկացավ պատասխանել ու անմիջապես անջատեց հեռախոսը:

Ի դեպ, էջմիածնից ստացած մեր տեղեկությունների համաձայն, քաղաքացիներն արդեն իսկ խուսափում են մասնակցել Արթուր Թումանյանի հետ հանդիպումներին: Կարծիք կա, որ Գրիգորյանները հետեւում են այդ շարժին ու մարդկանց հասկացնում, որ ցանկալի չէ նրանց հանդիպումը հակառակորդ թիմի հետ: Իսկ Գրիգորյանների հաշվեհարդարներին կամ երբեմն ահասարսուռ վարվելակերպին ծանոթ էջմիածինցիները չեն ցանկանում ավելորդ խնդիրներ ունենալ եւ զգուշանում են Արթուր Թումանյանի հետ առերեւույթ հանդիպումներից: Քաղաքում հատկապես բիզնես ունեցող մարդիկ ընդհանրապես փորձում են ինչ-որ այլընտրանքային հայացքներով աչքի չընկնել եւ անգամ խուսափել մյուս թեկնածուների ու նրանց աջակիցների հետ շփումներից՝ վախենալով, որ Կարեն Գրիգորյանի ընտրվելուց հետո նրա գեներալ հայրը հաշվեհարդար կտեսնի իրենց հետ: Էջմիածնի քաղաքապետարանի մամուլի ծառայության ղեկավար Վարդան Վարդանյանը հերքեց, որ նման երեւույթ կա: «Ո՞ւր է, որ նրանք հանդիպում են, որ մի հատ էլ խանգարեն: Կարեն Գրիգորյանը սահմանված գրաֆիկով հանդիպումներ է ունենում, բայց ես նրանց հանդիպումները չեմ էլ տեսել»,- պատասխանեց Վարդանյանը:

Երեկ մենք փորձեցինք նաեւ Արթուր Թումանյանից ու նրան սատարողներից ճշտել, թե արդյոք իրենք չե՞ն վախենում նախընտրական հնարավոր բախումներից: Էջմիածնում արդեն իսկ ենթադրություններ կան, որ այդ լարվածությունը կարող է գագաթնակետին հասնել հատկապես հենց ընտրությունների ժամանակ կամ քվեաթերթիկների հաշվարկման ընթացքում, երբ միմյանց ընտրազանգվածի կամ քվեների նկատմամբ ոտնձգության փորձ լինի: Հատկապես որ Գրիգորյանների շրջապատի անզուսպ դրսեւորումներին էջմիածինցիները տարիներ շարունակ ծանոթ են եղել: Արթուր Թումանյանը մեզ հետ զրույցում չբացառեց նման հնարավորությունը: «Բայց խորհուրդ չէի տա: Ես որեւէ բախումից չեմ վախենում, բայց դրա կողմնակիցն էլ չեմ»,- ասաց նա:

Ինչ վերաբերում է հանդիպումներին, ապա հավելեց, որ իրենք շփվում են էջմիածինցիների հետ եւ նրանց վերաբերմունքից ու տրամադրվածությունից հասկացել են, որ ընտրություններին իրենք են հաղթելու, եւ իշխանությունների աջակցությունն այս անգամ նրանց չի փրկի: «Ինչ անենք, որ աջակցում են, բայց ժողովուրդն է չէ՞ ընտրելու: Մենք հաղթելու ենք, ու կտեսնեք, թե ինչպես ենք հաղթելու»,- հավելեց նա:

Եվ վերջապես Արթուր Թումանյանին աջակցող Հակոբ Հակոբյանը հավելեց, որ ինքը որեւէ թեկնածուի կողքին չի կանգնել, անձնական շահագրգռվածություն չունի եւ պաշտպանելու է քաղաքացիների ընտրությունը: Իսկ Էջմիածնում տիրող մթնոլորտը նրան հուշում է, որ այս անգամ Կարեն Գրիգորյանը չի հաղթելու: Արդյոք անձնական շահագրգռվածությո՞ւն չէ այն հանգամանքը, որ Հրաչիկ Աբգարյանի պաշտոնավարման տարիներին ինքը կարողացել է քաղաքապատկան որոշ օբյեկտներ սեփականացնել, իսկ հիմա չի կարող: Համենայնդեպս, նախորդ հրապարակման ժամանակ մեզ այդպես էր հայտնել Էջմիածնի քաղաքապետարանի մամուլի ծառայության ղեկավար Վարդան Վարդանյանը: «Բոլորիդ համար ասում եմ, իմացեք, որ Էջմիածնում Գրիգորյաններից բացի որեւէ մեկը չի կարող որեւէ գույք ձեռք բերել: Կարող եք դիմել կադաստրին եւ իմանալ, թե ով ինչ է ձեռք բերել: Ես երբեւէ ոչինչ չեմ սեփականաշնորհել, եւ ոչ էլ իմ ազգականներն են սեփականացրել: Եթե գտնեք, նվեր կտամ»,- ասաց Հակոբ Հակոբյանը: