Ֆուտբոլ. Եվրոպայի առաջնություն. Ֆրանսիան սպասում է եզրափակիչին

Վաղը, Երեւանի ժամանակով 23:00-ին Փարիզի մերձակայքում գտնվող «Ստադ դը Ֆրանս» ստադիոնում կայանալու է Եվրոպայի 2016 թվականի վերջին՝ եզրափակիչ հանդիպումը. Եվրոպայի չեմպիոնի կոչման համար մրցելու են Ֆրանսիայի եւ Պորտուգալիայի հավաքականները: Տանտերերի հավաքականի եզրափակիչ հասնելը կանխատեսվում էր դեռ «Եվրո 2016»-ի մեկնարկից առաջ: Ֆրանսիան իր կազմում ընդգրկված ֆուտբոլիստներով, ցուցադրած խաղով ուժեղագույններից մեկն է աշխարհում, եւ եզրափակիչ հասնելը կարելի է համարել այն նվազագույնը, որը պահանջում էր ամբողջ Ֆրանսիան: Կիսաեզրափակչում Ֆրանսիային հաջողվեց պայքարից դուրս թողնել Աշխարհի գործող չեմպիոն Գերմանիային: Ընդ որում, գրեթե բոլոր ֆուտբոլային մասնագետները նշում են, որ Ֆրանսիա - Գերմանիա խաղի 1-ին կեսում Աշխարհի գործող չեմպիոնները ցուցադրեցին գրեթե իդեալական ֆուտբոլ: Ունենալով մեծ առավելություն, ստեղծելով մի քանի ամենաիրական գոլային պահեր, Գերմանիան, սակայն, չկարողացավ գոլ խփել: Իսկ ահա ֆրանսիացիներին հաջողվեց այս խաղում քաղել առավելագույնը. Անտուան Գրիզմանի խփած 2 գոլերը ապահովեցին Ֆրանսիայի հաղթանակը 2-0 հաշվով:

«Մենք ավելի լավ խաղ ցուցադրեցինք: Իմ ֆուտբոլիստները ցուցադրեցին գերազանց համագործակցություն, խաղացին անձնուրաց: Ուղղակի այսօր հաջողությունը երես էր թեքել մեզանից: Լինում են այնպիսի օրեր, երբ ամեն ինչ հարթ չի ընթանում: Այսօր այդ օրերից էր»,- խաղից հետո հայտարարել է Գերմանիայի ընտրանու գլխավոր մարզիչ Յոախիմ Լյովը: Գերմանական մամուլը ուշադրություն է հրավիրել այն հանգամանքի վրա, որ վերջին 12 խաղերում, երբ հավաքականի մեկնարկային կազմում խաղադաշտ է մտել թիմի ավագ Բաստիան Շվայնշտագերը, Գերմանիան չի պարտվել: Բայց Ֆրանսիայի հետ կիսաեզրափակիչ խաղում հենց այս ֆուտբոլիստի՝ ձեռքով խաղի հետեւանքով նշանակվեց 11 մետրանոց հարված, եւ Գրիզմանը բացեց խաղի հաշիվը: «Ի հեճուկս մեր ավագի». այսպիսի վերնագրով է երեկ լույս տեսել գերմանական հանրահայտ «Bild» -ը:

Ֆրանսիայի հավաքականի եւ Մադրիդի «Ատլետիկոյի»  հարձակվող Գրիզմանին իսպանական «As»-ը բնութագրել է որպես «ազգային հերոս», գերմանական թերթերն էլ նրան «կնքել են» «Նոյերի սարսափ» անունով. Գերմանիայի հավաքականի եւ Մյունխենի «Բավարիայի» դարպասապահ Մանուել Նոյերը վերջին 5 գոլերից 3-ը բաց է թողել Գրիզմանի հարվածներից հետո՝ 1-ը՝ «Բավարիա» - «Ատլետիկո», 2-ը՝ Գերմանիա - Ֆրանսիա խաղերում: «Անտուանը հրաշալի ֆուտբոլիստ է եւ դա կրկին ապացուցեց Գերմանիայի դեմ խաղում: Բայց այս հաղթանակը բոլորինն է՝ մեր հավաքականի բոլոր ֆուտբոլիստները: Մենք արդեն եզրափակիչում ենք. ուղղակի հրաշալի պահ է: Հիմա ամեն ինչ մեր ձեռքերում է: Ֆրանսիան սպասում է մեր հաղթանակին: Ամեն ինչ անելու ենք եզրափակիչում հաղթելու, Եվրոպայի չեմպիոնի կոչումը նվաճելու համար: Մենք չենք կարող լուծել ֆրանսիացիների խնդիրները, բայց կարող ենք մեր խաղով այնպիսի դրական էմոցիաներ տալ, որ մարդիկ մոռանան իրենց խնդիրների մասին»,- հայտարարել է Ֆրանսիայի ընտրանու գլխավոր մարզիչ Դիդյե Դեշամը:

Ամբողջ Ֆրանսիան է տոնել Գերմանիայի նկատմամբ հաղթանակը, համարելով, որ մրցաշարում ամենածանր հանդիպումը իրենց ընտրանին արդեն անցկացրել է: Եզրափակիչում տանտերերի հավաքականի մրցակիցն է լինելու Պորտուգալիան, որի հայտնվելը եզրափակիչում արդեն իսկ մեծ անակնկալ է: Կիսաեզրափակիչում Պորտուգալիան Կրիշտիանու Ռոնալդուի եւ Նանիի գոլերի շնորհիվ 2-0 հաշվով հաղթեց Ուելսի ընտրանուն եւ դուրս եկավ եզրափակիչ: Չնայած կիսաեզրափակիչում կրած պարտությանը Ուելսի հավաքականի խաղը եւ արդյունքները «Եվրո 2016»-ում գերազանց են գնահատվել Մեծ Բրիտանիայում. թերթերի առաջին էջերում Ուելսի ֆուտբոլիստներն են, թիմի ավագ Գարեթ Բեյլը: «Շնորհակալություն հերոսներին», - գրել է «Western Mail»-ը, «Գլուխներդ բարձր»՝- կոչ է արել «South Wales Echo» -ն: «Եվրո 2016»-ում անցկացրած 5 անընդմեջ ոչ ոքիներից հետո Պորտուգալիան կարողացավ հաղթանակ տոնել հիմնական ժամանակում: Հանդիպման լավագույն ֆուտբոլիստ ճանաչված Ռոնալդուն «Եվրոներում» խփած իր գոլերի քանակը հասցրեց 9-ի եւ կրկնեց ֆրանսիացի լեգենդար ֆուտբոլիստ Միշել Պլատինիի ռեկորդը:

Բնականաբար պորտուգալական թերթերի առաջին էջերում Կրիշտիանու Ռոնալդուն եւ Պորտուգալիայի հավաքականի մյուս ֆուտբոլիստներն են եւ նրանք էլ արդեն ստացել են հերոսների «կարգավիճակ»: Որքան էլ զարմանալի թվա մինչ այժմ ոչ մի տիտղոս չնվաճած Պորտուգալիայի հավաքականը ամենակայուն թիմն է 21-րդ դարում կայացած Եվրոպայի առաջնություններում: Եվ սա այն դեպքում, երբ Պորտուգալիան, իսկ ահա Ֆրանսիան, Իսպանիան, Գերմանիան, Իտալիան 21-րդ դարում նվաճել են Եվրոպայի, Աշխարհի չեմպիոնների կոչումները: Պորտուգալիան իր հերթին «Եվրո 2000»- ում հասել է կիսաեզրափակիչ, «Եվրո 2004»-ում՝ եզրափակիչ, «Եվրո 2008»-ում՝ քառորդ եզրափակիչ, «Եվրո 2012»-ում՝ կիսաեզրափակիչ եւ «Եվրո 2016»-ում՝ կրկին եզրափակիչ: Ոչ մի այլ հավաքական չունի նման ցուցանիշներ:

Պորտուգալիան կրկին եզրափակիչում է, եւ ֆրանսիական թերթերը հիշեցնում են, որ Ֆրանսիայի ամենահարմար մրցակիցներից մեկը, եթե ոչ ամենահարմարը, հենց Պորտուգալիան է: Վերջին անգամ Պորտուգալիան Ֆրանսիային  հաղթել է 41 տարի առաջ՝ 1975-ին Փարիզում կայացած ընկերական խաղում՝ 2-0 հաշվով: 2 հավաքականների ներկայիս կազմում հանդես եկող ոչ մի ֆուտբոլիստ դեռ ծնված չի եղել այդ ժամանակ: Իսկ հետագա 10 խաղերն ավարտվել են Ֆրանսիայի հաղթանակով: Ընդ որում, վերջին 2-ը կայացել են «Եվրո 2016»-ի ընտրական մրցաշարում: Հիշեցնեմ, որ Ֆրանսիան եւ Պորտուգալիան «Եվրո 2016»-ի որակավորման փուլում Հայաստանի հետ ընդգրկված էին նույն խմբում. Ֆրանսիան հանդես էր գալիս հաշվարկից դուրս եւ նրա մասնակցությամբ հանդիպումները կրում էին ընկերական բնույթ: 2-1 եւ 1-0՝ այսպիսի հաշիվներով հաղթեց Ֆրանսիան Պորտուգալիային այդ խաղերում:

Ավելացնենք, որ Պորտուգալիա - Ֆրանսիա եզրափակիչ խաղի մրցավար է նշանակվել անգլիացի 41-ամյա Մարկ Կլատենբուրգը, որը այս տարի սպասարկել է նաեւ Չեմպիոնների լիգայի եզրափակիչը: