Ֆուտբոլ եվ քաղաքականություն. Անհավատալի սցենա՞ր

Ֆրանսիայում ընթացող ֆուտբոլի Եվրոպայի առաջնությունը ուղեկցվում է լրջագույն անդրկուլիսային պայքարով, որի կիզակետում Ռուսաստանն է, իսկ թեման ավելի շատ քաղաքական է, քան մարզական: Արտերկրի տարբեր ԶԼՄ-ներում պարբերաբար հրապարակվող փոքրիկ նյութերը որոշակի հնարավորություն են տալիս պատկերացում կազմելու, թե իրականում ինչ է տեղի ունենում ֆրանսիական ստադիոններից դուրս: Անգլիացի ֆաների հետ ծեծկռտուք հրահրելու, ֆուտբոլում արգելված կոչեր ու արարքներ թույլ տալու համար, ինչպես հայտնի է, ՈՒԵՖԱ-ն պայմանականորեն որակազրկել է Ռուսաստանին, խոստանալով հեռացնել Ռուսաստանի ազգային հավաքականին «Եվրո 2016»-ից, եթե մեկ անգամ էլ կրկնվի այն, ինչ տեղի է ունեցել Մարսելում Ռուսաստան - Անգլիա խաղից առաջ:

Իրոք, ընթացող Եվրոպայի առաջնությունը լրջագույն անհանգստության առիթ է հանդիսանում բոլորի համար. ահաբեկչության հնարավորությունից զատ ընթացող «Եվրոն» աչքի է ընկնում երկրպագուների խուլիգանական պահվածքով, ու Ֆրանսիայից ստացվող տարբեր քրեական նորությունները իրենց ծավալով չեն զիջում մարզական լուրերին: Ընդ որում, արեւմտաեվրոպական երկրներում դրանք հիմնականում կապված են ռուսաստանցիների հետ եւ կրում են բացահայտ հակառուսական բնույթ: Անգլիայի հավաքականի նախկին հանրահայտ ֆուտբոլիստ, ներկայումս սոցցանցերում բավական մեծ հեղինակություն վայելող, «Եվրոյի» խաղերը հեռուստատեսությամբ մեկնաբանող Գարի Լինեկերը մեկնաբանել է ՈՒԵՖԱ-ի որոշումը. «Հուսանք, որ պայմանական որակազրկումը կկանգնեցնի այս կենդանիներին: Եվ դեռ մտածում եք գնա՞լ Ռուսաստանում 2018-ին կայանալիք Աշխարհի առաջնություն», - գրել է Լինեկերը:

Ռուսաստանցի երկրպագուներին նվիրված բոլոր հոդվածները ավարտվում են Աշխարհի 2018 թվականի առաջնության մասին կարծիքով եւ գրեթե բոլորը համոզված են, որ պետք է հետ վերցնել Ռուսաստանից այդ մրցաշարի կազմակերպչի իրավունքը: Ռուսաստանի պառլամենտի փոխխոսնակ, ֆուտբոլի ֆեդերացիայի գործկոմի անդամ Իգոր Լեբեդեւի հայտարարությունն էլ դարձել է հակառուսական բոլոր հոդվածների սկիզբ ու վերջ: «Ապրեն մեր ֆանատները: Այդպես էլ պետք է: Մենք պետք է աջակցենք նրանց», - հայտարարել է Լեբեդեւը: «Ժամանակն է լրջորեն մտածել Աշխարհի 2018 թվականի առաջնությունը ավելի հանգիստ եւ անվտանգ երկիր տեղափոխելու մասին: Տեսնում ենք, որ խաղաղ բանակցությունները ոչ մի արդյունք չեն տալիս», - գրում է պորտուգալական «Observador»-ը:

Եվրոպական գրեթե բոլոր երկրների առաջատար պարբերականները անդրադառնում են այս թեմային ու որպես պատիժ պահանջում Ռուսաստանից հետ վերցնել Աշխարհի առաջնության կազմակերպման իրավունքը եւ որպես առաջին քայլ սպասում են Ռուսաստանի ֆուտբոլի ազգային հավաքականի հեռացմանը «Եվրո-2016»-ից: Նախօրեին կայացած Սլովակիա - Ռուսաստան խաղն անցավ առանց լուրջ բախումների. ռուս ֆանատները կարծես հասկացել են պահի լրջությունը: Երկուշաբթի՝ հունիսի 20-ին տեղի է ունենալու Ռուսաստան - Ուելս վճռական հանդիպումը. ռուսներին պայքարը շարունակելու համար անհրաժեշտ է միայն հաղթանակ: Այս հանդիպումը կարող է վճռական դառնալ նաեւ Ռուսաստանի ֆուտբոլային միության, ընդհանրապես ռուսական սպորտի համար՝ երկրպագուների կողմից որեւէ սանձարձակություն կարող է դառնալ որակազրկման պատճառ:

Ռուսաստանում, բացարձակ մեծամասնության կարծիքով, Ֆրանսիայում տեղի ունեցող իրադարձությունները, դրանց միակողմանի՝ ի վնաս ռուսաստանցիների մեկնաբանությունները, ՈՒԵՖԱ-ի կողմից պայմանական որակազրկումը արդեն 1 տարի ռուսական սպորտը տակնուվրա անող դոպինգային սկանդալի շարունակությունն է եւ  ունի շատ ավելի քաղաքական ենթատեքստ: Բայց հանդիպում են նաեւ եզակի հրապարակումներ, որոնք շատ ավելի սթափ են վերլուծում իրադարձությունները, չեն տրվում ազգայնամոլական, կեղծ հայրենասիրական այդ պոռթկմանը: Մասնավորապես ռուսական սպորտում բավական ազդեցիկ «Չեմպիոնատ» կայքի խմբագրի տեղակալ Եվգենի Սլյուսարենկոն հանդես է եկել բավական ծավալուն հոդվածով, նշելով, որ միայն «Եվրոյով» չի սահմանափակվելու Ռուսաստանին Աշխարհի առաջնության կազմակերպչի իրավունքից զրկելու գործընթացը: Կա այլ ճանապարհ՝ բաղկացած 5 քայլերից: Առաջին հայացքից այն ֆանտաստիկայի ոլորտից է, բայց նշեմ, որ նույն Սլյուսարենկոն 1 տարի առաջ զգուշացնում էր, որ Ռուսաստանին սպառնում է մեծագույն դոպինգ սկանդալ, ինչը եղավ ամիսներ անց, խորհուրդ էր տալիս թենիսիստուհի Մարիա Շարապովային հեռու մնալ տարատեսակ դեղամիջոցների օգտագործումից՝ ամիսներ անց Շարապովան որակազրկվեց դոպինգ ընդունելու համար:

Այնպես որ, այնքան էլ անհավատալի չէ այն սցենարը, որը ներկայացրել է հայտնի լրագրողը: Որպես առաջին քայլի ժամկետ նշվում է հունիսի 17-ը. այսօր ատլետիկայի միջազգային ֆեդերացիան (IAAF) պետք է վերջնական որոշում կայացնի Ռուսաստանի վերաբերյալ. IAAF-ը չի կասեցնելու Ռուսաստանի ատլետիկայի ֆեդերացիայի որակազրկումը եւ ռուսաստանցի ատլետները զրկվելու են Բրազիլիայում կայանալիք Օլիմպիական խաղերին մասնակցելու իրավունքից: Հուլիսի 15-ին համաշխարհային հակադոպինգային կազմակերպության հատուկ հանձնաժողովը հրապարակելու է իր վերջնական որոշումը եւ խորհուրդ է տրվելու տարբեր մարզաձեւերի ֆեդերացիաներին կասեցնել Ռուսաստանի անդամակցությունը իրենց կազմակերպություններին: Շատ արագ կիրականացվի այս գործընթացը, որը ի վերջո կհանգեցնի Ռուսաստանին ամբողջապես Օլիմպիական խաղերին մասնակցելու իրավունքից զրկելուն: Ի վերջո «կհանձնվի» նաեւ ՖԻՖԱ-ն՝ ֆուտբոլի միջազգային ֆեդերացիան. տարվա վերջին ռուսաստանի անդամակցությունը կկասեցնի նաեւ ՖԻՖԱ-ն, իսկ հետո արդեն ամեն ինչ կարելի է անել համաձայն ՖԻՖԱ-ի կանոնադրության՝ «որակազրկված երկրում չի կարող անցկացվել ՖԻՖԱ-ի ոչ մի մրցաշար»: