Պատերազմն ունի իր օրենքները. ինչու է Ադրբեջանն ահաբեկված Մինգեչաուրով

13/04/2016 schedule09:30

ԼՂՀ նախագահի մամուլի խոսնակ Դավիթ Բաբայանը երեկ պատասխանել է ԼՂ հակամարտության համապարփակ լուծման հնարավորության, ռազմական գործողությունների վերսկսման եւ մեր մի շարք այլ հարցերին:

- Պարոն Բաբայան, ԼՂՀ ՊԲ-ն երեկ հաղորդագրություն տարածեց, որ զորքերի տեղաշարժ է նկատվում ադրբեջանական կողմից, սա ի՞նչ է նշանակում, արդյոք այս զինադադարից հետո իրենք հավաքում են իրենց ու կարող է նոր հարձակո՞ւմ լինի:

- Կտեսնենք՝ այդ տեղաշարժը ագրեսի՞վ տեղաշարժ է, ինչ-որ նպատակներ ունի՞, ժամանակը ցույց կտա: Մենք՝ բանակը, հայությունը, պատրաստ ենք ցանկացած պահի, եթե այդպիսի եւս մեկ փորձ կատարվի, կասեցնել: Բայց եթե այս անգամ որեւէ փորձ կատարվի, սա պարզապես կնշանակի միջազգային հանրության կարծիքի հանդեպ խորը անտարբերություն, դա ցույց կտա, որ Ադրբեջանը իր պահվածքով չի հարգում միջազգային հանրությանը եւ ԵԱՀԿ Մինսկի խմբի համանախագահներին, ավելին, նաեւ հարված է հասցնում նրանց միջնորդական ջանքերին:

- Այս ընթացքում մեղադրանքներ են հնչել, որ հայկական կողմի հետախուզությունը լավ չի աշխատել, հակառակ պարագայում հնարավոր կլիներ խուսափել այսքան զոհերից, համաձա՞յն չեք:

- Իհարկե, համաձայն չեմ: Այդ գնահատականները տալիս են մարդիկ, ովքեր ընդհանրապես զինված ուժերի հետ որեւէ առնչություն չունեն: Այս պահին պետք է շատ զգույշ լինել նման հայտարարություններ անելիս, եւ եթե հայտարարություն արվում է, դա լինի պրոֆեսիոնալ: Եվ միշտ պետք է մտապահել, որ հակառակորդը այդ ամենին է առաջինը ուշադրություն դարձնում: Ինչքան մենք պառակտված լինենք, այնքան ավելի լավ իրենց  համար: Իհարկե, ամեն ինչ իդեալական եւ փայլուն չի եղել, պետք է լուրջ հետեւություններ արվեն եւ դա արվում է, բայց դա չի նշանակում, որ ոմանք պետք է «հանճարեղ» հայտարարություններով հանդես գան:

- Գեներալ Վիտալի Բալասանյանը Արցախ TV-ի եթերում հայտարարեց, որ մեր անօդաչու սարքերը վաղուց նկարել էին Ադրբեջանի դիրքերը, եւ մեր ոչ մի կրակոց փուստ չի անցել, բայց այսօր էլ ԼՂՀ ՊԲ-ի կողմից հայտարարություն եղավ, որ էլի անօդաչու սարքեր են թռել Արցախի օդային տարածքով: Հիմա էլ իրե՞նք են փորձում մեր դիրքերին ծանոթանալ:

- Հակառակորդը, իհարկե, չի դադարեցնում զինադադարի խախտումները եւ սա էլ է զինադադարի խախտում: Պարտադիր չէ, որ անպայման կրակ արձակի տարբեր տիպի զենքերից: Մենք պետք է պատրաստ լինենք: Այս կարճատեւ պատերազմը ցույց տվեց նաեւ մի շարք նոր զարգացումներ, որ առանձնակի կարեւորվում է սպառազինությունը եւ ժամանակակից տեխնոլոգիաների օգտագործումն ու կիրառումը:

- Հիմա իրենք ի՞նչ կարող են անել այդ նկարահանումների հետ:

- Եկել են, նկարահանել են եւ տեսել են, որ բանակը պատրաստ է, եւ կարծում եմ, տեսնելով իր դիմաց կանգնած ուժը, սա նաեւ սթափեցուցիչ ազդեցություն կունենա իրենց վրա:

- Բայց Սերժ Սարգսյանը հայտարարեց, թե Արցախում 88 թվականի զենքերով են կռվում:

- Իմ կարծիքով, դա փոխաբերական իմաստով է ասել, այն առումով, որ մենք զենքերի մրցավազք չենք անում, ագրեսիվ պահվածք չեք ցուցաբերում, որովհետեւ այն զենքը, որ մենք ունենք... իհարկե, 80-ականներից մնացած զենք էլ կա, այդ թվում՝ նաեւ Ադրբեջանում:

- Հիմա հայկական կողմը քանի՞ զոհ ունի, կա՞ հստակ թիվ, այստեղ արդեն 74 են հաշվում:

- ՊԲ-ից ճշտեք, ես չեմ ուզում այնպիսի թիվ ասել, որ հանկարծ մեկ-երկու հոգու տարբերություն լինի:

- Կտրված գլուխների մասին է խոսվում, քանի՞սն են:

- Կան այդպիսի դեպքեր, դժբախտաբար, եւ ադրբեջանական կողմը եւս մեկ անգամ ապացուցեց, որ ինքը ահաբեկիչ է: Սա ընդհանրապես մարդկային պահվածք չէ, սա եւս մեկ անգամ ապացուցում է, որ ադրբեջանական բանակում մեր դեմ կռվում են համաշխարհային համբավ ունեցող մարդասպանները՝ իսլամական պետության գրոհայինները, թուրքական «գորշ գայլերը», մնացած հանցագործ ահաբեկչական կազմակերպությունների ներկայացուցիչներ, եւ ընդհանրապես նման պահվածքը մարդուն բնորոշ չէ: Եթե մարդը մարդուն ատում է, ուրեմն, ինքը ի վերջո ատում է Աստծուն: Եթե իրենք այդ ճանապարհն են ընտրել, ուրեմն, իրենք անպայման կկործանվեն: Նման պահվածք ընդունող մարդը չի կարող լինել խիզախ, պատերազմել տարբեր գաղափարների համար, այդպիսի մարդը կամ հիվանդ է, կամ թմրանյութերի ազդեցության տակ է: Իսկ այս ամենը անխուսափելի ձեւով բերում է ջախջախման, ուշ թե շուտ:

- Տեսակետներ ու պնդումներ կան, որ հայկական կողմը չպետք է գնար զինադադարի ու հիմա էլ պետք է առաջ գնա ու նոր տարածքներ վերցնի, որպեսզի ավելի ամուր դիրքերից հանդես գա:

- Մենք զավթիչներ չենք, մենք պաշտպանելու ենք մեր ազատությունն ու անկախությունը: Եթե այս անգամ եւս սկսվի, արդեն բոլորովին այլ ռազմավարություն ու մարտավարություն է լինելու: Բնական է, որ մենք չենք կարող կանգնել ու սպասել հակառակորդների հարվածներին: Մենք չենք ուզում պատերազմ, ոչ թե նրա համար, որ վախենում ենք, միայն աննորմալը կարող է պատերազմ ուզել: Միայն այդ գլուխ կտրողները, որ կարող էին սպանել ծերերին, ականջ կտրել կամ գերի ընկած եւ իրեն պաշտպանելու հնարավորություն չունեցող մարդուն խոշտանգել, կարող է ուզել: Դա շատերը կարող են անել, բայց ուրիշ բան է հայրենիքը պաշտպանելը: Կրկնում եմ, մենք զավթողական նպատակներ չունենք, բայց եթե թշնամին փորձ անի այսպիսի նենգ ձեւով պատերազմ հրահրել, դա արդեն կլինի լրիվ այլ իրավիճակ, եւ այստեղ արդեն պետք է լինի պատերազմ մինչեւ հաղթական ավարտ:

- Հայտնի դարձավ, որ Սարսանգի ջրամբարում խիստ ուժեղացված հսկողություն է իրականացվում, այնտեղ ի՞նչ վտանգ կա՝ թունավորման, պայթեցման:

- Ընդհանրապես, երբ իրավիճակը լինում է լարված, ռազմավարական կարեւորագույն օբյեկտները պետք է վերահսկվեն: Այստեղ որեւէ տարօրինակ բան չկա: Իսկ այն, որ թշնամին փորձ կարող է կատարել մեր ջրային ռեսուրսների վրա, սա միանշանակ է, նման բաներ եղել են նաեւ պատերազմի ժամանակ: Մենք գործ ունենք աննորմալ ահաբեկչական երկրի հետ եւ պետք է պատրաստ լինենք ցանկացած քայլի ու հանկարծ չմոռանանք՝ ով է մեր դիմացը կանգնած:

- Իրենք կարծես թե ահաբեկված են Մինգեչաուրի համար ու մտավախություն ունեն, որ հայկական կողմը կարող է պայթեցնել այդ ջրամբարը, Սեյրան Օհանյանն էլ կարծես հեռավոր ակնարկ արեց օրերս:

- Պատերազմը ունի իր օրենքները, եթե սկսվում են պատերազմական գործողություններ, արդեն այնպես է զարգանում, որ անհնարին է կանխատեսել որեւէ բան:

- ԵԱՀԿ ՄԽ համանախագահները եկան, գնացին, ի՞նչ էին առաջարկում ու հնարավո՞ր է հիմա հարցի համապարփակ լուծում:

- Չէ, հարցի համապարփակ լուծում կարծում ենք, շատ շուտ է, որովհետեւ այս պատերազմը ցույց տվեց, որ Ադրբեջանը անկանխատեսելի է եւ դեստրուկտիվ, հետեւաբար, պետք է դրա ժամանակը գա, որպեսզի նրանք պատրաստ լինեն ողջամիտ գոնե քննարկումների: Իսկ համանախագահները հիմնական շեշտը դրել են խաղաղության եւ կայունության պահպանման վրա, ուրիշ նոր առաջարկ, նոր ուղղություններ չկան, որովհետեւ այս իրավիճակում անիմաստ է խոսել համապարփակ կարգավորման մասին: Այս իրավիճակում պետք է թույլ չտալ նոր անկանխատեսելի զարգացումներ:

Տպել
8550 դիտում

Զարմանալի է, Ալիեւին էսքան հարց չեք տալիս, պիտի ամեն օր կանգնեք իմ ճամփան փակե՞ք. Վարդան Ղուկասյան

Ալավերդի քաղաքի երեք բնակչի մեղադրանք է առաջադրվել՝ գողություն կատարելու համար

Բողոք Թբիլիսիում. քաղաքական ճգնաժա՞մ, թե՞ ժամկետից շուտ քարոզարշավ

Նա պարզապես չի կարող լինել մեզանից մեկը. Հայաստանի մի շարք մարզական ֆեդերացիաներն ու մարզիկները՝ Մել Դալուզյանի մասին

Նուբարաշենի հոգեբուժարանի 7-րդ հատուկ բաժանմունքում խնդիրը հարթվել է, բոլորը սնունդ ընդունել են. պարզաբանում

Սեյրան Օհանյանի պաշտպանը բացարկի միջնորդություն ներկայացրեց մեղադրող դատախազին

Այսպես խոսեց Մաստեր Մյաուն

Մրցույթ՝ ՀՀ ԿԳՄՍ նախարարին կից hասարակական խորհրդում ընդգրկվելու համար

Լիտվայի ԱԳ նախարարը բարձր է գնահատել Աննա Հակոբյանի «Կանայք հանուն խաղաղության» արշավը

Այս կատարյալ ֆիասկոն արտացոլում է հայկական ֆուտբոլի իրավիճակը. գլխավոր մարզիչ (տեսանյութ)

Փոխգործակցության մեծ հնարավորություններ կան. Ա. Սարգսյանը Դոհայում հանդիպել է Կատարի վարչապետի հետ

Հայտնի է ՀՀ վարչապետի եւ Աննա Հակոբյանի Իտալիա այցի օրակարգը

Օրենսդիրը քննարկում է պետական սահմանի անցակետում հակահամաճարակային վերահսկողության նախագիծը

ՄԻՊ-ը տեղեկատվական արշավի շրջանակում ներկայացնում է «Միասին կարող ենք փոխել աշխարհը» երգի պրեմիերա

Նիկոլ Փաշինյանն ու Աննա Հակոբյանը 28 հոգուց բաղկացած պատվիրակությամբ մեկնում են Իտալիա

Վերջին անգամ Իտալիան 1 խաղում 9 գոլ է խփել 71 տարի առաջ

Դևիդ Բեքհեմն ու Միլի Բոբի Բրաունը ելույթ կունենան ՄԱԿ-ի գագաթնաժողովում, վաղը ՀՀ-ում և 50 երկրում գագաթնաժողովներ կլինեն

ԱԺ-ն ընդունեց խորհրդականի պաշտոն զբաղեցնելու համար սահմանված տարիքային շեմն իջեցնելու նախագիծը

Պարո՛ն Պետրոսյան, հիշո՞ւմ եք էն դրվագը, որ ասում ա՝ փիղը մտնում ա մրջյունների ռեստորան. ԱԺ նախագահը՝ Գեւորգ Պետրոսյանին

Արմեն Սարգսյանը Դոհայում հյուրընկալվել է Կատարում ՀՀ դեսպանատանը (տեսանյութ)