Լեռնային Ղարաբաղի փոխվարչապետին չե՞ն կրճատել

02/07/2015 schedule20:06

Նախօրեին ԼՂՀ Ազգային ժողովն արտահերթ նիստ է հրավիրել, որին ներկա է եղել նաեւ վարչապետ Արա Հարությունյանն ու փոխել «ԼՂՀ կառավարության կառուցվածքի մասին» օրենքը, որով օպտիմալացվում է գործադիր մարմնի կառուցվածքը:

Կառավարությանն առընթեր 9 գերատեսչությունների թիվը կրճատվել է, որոշները միացվել են այլ նախարարությունների, խոսվում է մոտ 100 հոգու կրճատման եւ համապատասխանաբար՝ նրանց սպասարկող մեքենաներից հրաժարվելու մասին: Երեկ լրատվամիջոցներից մեկում տեղեկություն հայտնվեց, որ կրճատվել է նաեւ ԼՂՀ փոխվարչապետի պոստը, որը, հիշեցնենք, զբաղեցնում է դաշնակցական Արթուր Աղաբեկյանը, ով հայտարարել էր ԼՂՀ հաջորդ նախագահը դառնալու իր հավակնությունների մասին: Աղաբեկյանը մայիսի 3-ին տեղի ունեցած ԼՂՀ ԱԺ ընտրություններում գլխավորում էր ՀՅԴ համամասնական ցուցակը, բայց հրաժարվեց մանդատից: ՀՅԴ-ին չհաջողվեց մեծամասնություն ունենալ ԱԺ-ում՝ չնայած գործադրած մեծագույն ճիգերին: Աղաբեկյանն էլ 1 ամիս արձակուրդում էր: Ուշագրավ է, որ կառավարության կառուցվածքը փոխելուն կողմ չի եղել միայն ԼՂՀ ԱԺ ՀՅԴ խմբակցությունը: Խմբակցության ղեկավար Դավիթ Իշխանյանն առաջարկել է հետաձգել հարցի քննարկումը եւ խորը քննարկումներ սկսել քաղաքական ուժերի հետ: «Եթե անցած տարիներին ունեցել ենք 9-10 տոկոս տնտեսական աճ, այն էլ այս պայմաններում, ինչո՞ւ է անհրաժեշտ դարձել այսպիսի կառուցվածքային փոփոխություններ կատարել»,- իր ելույթում ասել է Իշխանյանը: Դաշնակցականները «ձեռնպահ» են քվեարկել օրինագծին: ԼՂՀ վարչապետի մամուլի խոսնակ Արտակ Բեգլարյանը, սակայն, երեկ մեզ հետ զրույցում հայտարարեց, որ փոխվարչապետի պոստը պահպանվել է, քանի որ դա Սահմանադրությամբ է նախատեսված ու չէր կարող նման կրճատում տեղի ունենալ: Այդ դեպքում, ո՞րն է ԼՂՀ կառավարության կառուցվածքի փոփոխության պատճառը եւ որքանո՞վ է դա պայմանավորված Արցախում եւս սպասվող սահմանադրական փոփոխությունների հետ, ինչի մասին բարձրաձայնել է նաեւ վարչապետ Արայիկ Հարությունյանը: «Այդ հարցին վարչապետը մանրամասն անդրադարձել է ԱԺ-ում ունեցած իր ելույթում»,- պատասխանեց խոսնակը: Իսկ վարչապետը ԱԺ-ում հայտարարել է. «Բավական գործառույթներ կան, որոնք պետք չէ պետությունը իրականացնի: Այսօր մասնավորը պատրաստ է դա իրականացնել եւ մենք պետք է փոխանցենք այդ ծառայությունները մասնավորին: Այս փոփոխությունները շարունակական են լինելու: Դա անխուսափելի է: Պետական ապարատի պահպանման ծախսերը պետք է կրճատել, եւ կառուցվածքային փոփոխություններն այդ գործընթացի սկիզբն են: Պարտադիր սկսելու ենք կրճատել պետական ծառայողական մեքենաները, ապարատների ծախսերը: Այսօր գլխավոր խնդիրը՝ բարեփոխումների ընթացքում աշխատատեղերի կրճատման հարցը, անցավ կազմակերպելն է: Այո, կրճատումներ լինելու են, հարց է եղել՝ ինչքա՞ն, հաստատ տասնյակ, եթե ոչ՝ հարյուրից ավել: Պիտի կարողանանք տեղավորել նրանց, հետո հաջորդ փուլը սկսել: Հետո կարող է նաեւ 3-րդ փուլը լինի: Գիտեք նաեւ սահմանադրական բարեփոխումների մասին, խոսում ենք, իհարկե, ոչ պաշտոնական, եթե լինեն սահմանադրական փոփոխություններ, կառավարության կողմից նոր առաջարկ կարող է լինել՝ էլի կրճատել»: Այսպիսով, ԼՂՀ վարչապետն արդեն 2-րդ անգամն է բարձրաձայնում Արցախի սահմանադրական հանրաքվեի մասին եւ ԼՂՀ կառավարության կառուցվածքային փոփոխությունները նաեւ սահմանադրական փոփոխությունների հետ կապում: Հիշեցնենք, առաջին անգամ նա այդ փոփոխությունների մասին խոսել էր մայիսի 3-ի խորհրդարանական ընտրություններից առաջ՝ իր ղեկավարած «Ազատ հայրենիք» կուսակցության համագումարում, եւ նշել կառավարման խորհրդարանական համակարգին անցնելու անհրաժեշտության մասին: Թե իրականում ի՞նչ է թաքնված կառուցվածքային սույն փոփոխությունների տակ՝ այս պահին, թերեւս, դժվար է միանշանակ ասել: ԼՂՀ ԱԺ ընդդիմադիր պատգամավոր Հայկ Խանումյանը, օրինակ, երեկ մեզ հետ զրույցում ասում էր. «Թե՛ 2012, թե՛ 2015թթ. ԱԺ ընտրությունների ժամանակ ընդդիմությունը միշտ քննադատել է կառավարությանը՝ ուռճացված բյուրոկրատական համակարգ եւ սպասարկում ունենալու համար: Այս տարի կարծես թե կառավարությունը ժամանակ առ ժամանակ լուրջ ֆինանսատնտեսական խնդիրների առաջ է կանգնում եւ ստիպված է լինում կրճատել ծախսերը: Ես կարծում եմ, այո՛, ֆինանսական խնդիրներն են պատճառը, որ կառավարությունը գնում է կրճատման: Բայց չգիտեմ՝ այդ օպտիմալացումը բառիս բուն իմաստո՞վ կաշխատի, այսինքն՝ արդյունավետությունը կբարձրանա՞ դրանից, թե ոչ, ենթադրում եմ, որ կրճատումների մի մասը կամայական կլինի»: Ըստ Խանումյանի, ժամանակին կառավարությունը զգուշացել է սույն քայլին գնալ՝ վախենալով սոցիալական խնդիրներից: «Միեւնույն ժամանակ, դրանով նաեւ կքչացվի վարչական ռեսուրսը, բյուջետային աշխատողները ընտրությունների ժամանակ բավական խոցելի են դառնում, եւ իշխանական ուժերը օգտագործում են իրենց լծակները այս մարդկանց վրա: Աշխատանքից ազատելու վախը ամենամեծ վախն է Արցախի հասարակության շրջանում: Մի խոսքով, սա համալիր խնդիր է»,- ասում էր ընդդիմադիր պատգամավորը:

ԼՂՀ խորհրդարանից մեզ հայտնեցին, որ «ԼՂՀ կառավարության կառուցվածքի մասին» օրենքի փոփոխության շրջանակներում Զբոսաշրջության վարչությունը դարձել է Էկոնոմիկայի նախարարության ստորաբաժանում, Պետական կադաստրի վարչությունը միացել է կառավարության աշխատակազմին, Սպորտի վարչությունը միացել է Կրթության նախարարությանը եւ դարձել Կրթության, գիտության եւ սպորտի նախարարություն, Հարկային ծառայությունը միացել է նոր ստեղծված Ֆինանսների նախարարությանը: Արտադրական ենթակառուցվածքների նախարարությունը լուծարվել է եւ ստեղծվել են Ֆինանսների եւ Էկոնոմիկայի նախարարություններ, եւ այսպես շարունակ: Կառավարությանն առընթեր 9 մարմիններից ընդամենը 4-ն է մնացել՝ ԱԱԾ, ոստիկանություն, Արտակարգ իրավիճակների ծառայություն եւ Բնական ռեսուրսների վարչություն: Նախարարություններում որոշ վարչություններ կլուծարվեն, բայց, ըստ ԼՂՀ վարչապետի, մոտ 1 ամիս է պետք՝ հասկանալու համար, թե ո՛ր նախարարության ո՛ր վարչություններն են լուծարվելու: Որոշ մարմինների գործառույթներ, ըստ վարչապետի, աստիճանաբար կփոխանցվեն մասնավորին: ԼՂՀ-ում կարծես թե մեծ փոփոխությունների են պատրաստվում:

Տպել
2267 դիտում

Մայիսի 9-ի փողոցի տներից մեկում հրդեհ է բռնկվել. տուժածներ չկան

Ինֆարկտ տարած գյուղապետը հետ է վերցրել փաստաթղթերը. նախընտրական կրքեր գյուղերում

ԱԻՆ-ը կոչ է անում երթեւեկել բացառապես ձմեռային անվադողերով. սպասվում են տեղումներ ձյան տեսքով

Արշակունյաց պողոտայում ավտոմեքենա է այրվել. տուժածներ չկան

Արմեն Գրիգորյանը կմասնակցի ԱՊՀ անդամ երկրների ԱԽ քարտուղարների յոթերորդ ամենամյա հանդիպմանը

Էրդողանն անդրադարձել է ԱՄՆ Սենատում Հայոց ցեղասպանության բանաձևի վրա դրված վետոյին

Մ-2 ավտոճանապարհի Գորիս-Սիսիան հատվածում՝ դեպի Իշխանասար լեռ, բռնկված հրդեհն ինքնամարվել է (տեսանյութ)

Քաղաքապետը դեռեւս չի ստորագրել կենդանաբանական այգու տնօրենի ազատման դիմումը

Երևանի կենտրոնում կրակել են շան վրա. փամփուշտը դիպել է անմիջապես ողնաշարին

Ներկայացվել է «Հայաստանի էներգետիկ համակարգի նվազագույն ծախսերով 2020 – 2036 թվականների զարգացման պլան» հաշվետվությունը

ԱՄՆ կոնգրեսականները կոչ են արել վերանայել Ադրբեջանին հատկացվող ռազմական օգնության քաղաքականությունը

Հայաստան Մ-19 - Չեռնոգորիա Մ-19 հանդիպումն ավարտվեց ոչ-ոքի՝ 3:3 հաշվով. ՀՖՖ

Արթուր Դանիելյանը միացել է Հայաստանի Մ-21 հավաքականին. ՀՖՖ

Գյումրու դեպոյի մեքենավարները դիմել են ԱԱԾ, դատախազություն, ոստիկանություն (լուսանկարներ, տեսանյութ)

Փոխվարչապետ Տիգրան Ավինյանն ընդունել է Միջազգային գիտատեխնիկական կենտրոնի պատվիրակությանը

Խորհրդարանն առաջին ընթերցմամբ ընդունեց «օրենքով գողերին» քրեական պատասխանատվության ենթարկելու նախագիծը

Մաթեմատիկա, հայոց լեզու եւ պատմություն առարկաների ուսուցիչները աշխատանքի ընդունվելուց առաջ քննություն կհանձնեն

Շվեդ ուսանողները շրջել են խորհրդարանի շենքում. ԱԺ

Դպրոցում 6 քննություն հանձնելով՝ ընդունելության քննությունները, ըստ էության, վերանալու են. նախարարը՝ նոր նախագծի մասին

Վարչապետը հանդիպում է ունեցել ռուսական առաջատար ԶԼՄ-ների ներկայացուցիչների հետ