«Քաղաքացիական պայմանագիրը» պատրաստվում է համաժողովի

28/05/2015 schedule18:00

«Քաղաքացիական պայմանագրի» գրասենյակում երեկ քվեատուփեր ու քվեախցիկներ էին շարված: Քաղաքական այս միավորը պատրաստվում է մայիսի 30-ին նշանակված հիմնադիր համագումարին, որը տեղի է ունենալու «Էլիտ պլազայում»:

Այդ օրն ընտրվելու է «Քաղաքացիական պայմանագիր» կուսակցության ղեկավար մարմին, հաստատվելու է կուսակցության ծրագիրը: Մեր հարցերին երեկ պատասխանել է «Քաղպայմանագրի» ներկայացուցիչ Արայիկ Հարությունյանը:

- Պարոն Հարությունյան, մայիսի 30-ին «Քաղպայմանագրի» հիմնադիր համաժողովն է, քաղաքական շրջանակներում խոսվում է, որ սա արեւմտամետ կուսակցություն է լինելու եւ փորձելու է լրացնել այդ դաշտը, որը հիմա բաց է: Այդպե՞ս է:

- «Քաղաքացիական պայմանագիրը» միավորման ձեւավորման առաջին օրերից եւ հետագա քննարկումների ընթացքում հայտարարել է, որ դուրս է որեւէ «իզմ»-երից եւ «մետ»-ություններից, որը միշտ խանգարել է մեր քաղաքական ուժերին՝ որոշակի հաջողություններ արձանագրել: «Քաղպայմանագիրը» առաջնորդվելու է կոնկրետ իր ծրագրով եւ ծրագրում առաջադրված խնդիրներին տալու է կոնկրետ լուծումներ՝ հիմնվելով բացառապես փաստի եւ փաստարկի վրա՝ անկախ նրանից, թե այդ լուծումը բնորոշ կլինի ձախ, թե աջ ուղղվածության ուժերին: «Իզմ»-երը առհասարակ աշխարհում այսօր լրջագույն խնդիր ունեն եւ ճգնաժամի մեջ են, այդ սահմանները գաղափարախոսությունների միջեւ բավական լուրջ լղոզվել են: Կարող եմ բերել նույն արեւմտյան երկրների օրինակները, երբ ազատական գաղափարախոսության կուսակցությունները տնտեսական որոշակի ճգնաժամերի ընթացքում կայացնում են այնպիսի որոշումներ, որոնք բնորոշ են ձախ ուղղվածության կուսակցություններին: Սա խոսում է այն մասին, որ գաղափարախոսությունները այսօր փոխվում են, նրանց սահմանները լղոզվում են, եւ առաջնորդվելով բացառապես մի գաղափարախոսության սկզբունքներով ու կանոններով, մենք կարծում ենք, որ քաղաքական ուժը չի կարող հաջողության հասնել:

- Այսինքն՝ չենք կարող ասել՝ սա լիբերալ կուսակցություն է, դեմոկրատական է, կենտրոնամետ է...

- Ո՛չ, մենք զերծ ենք մնում նման որակումներից, մեզ տարբեր բաներում են մեղադրում, մի մասն ասում է՝ դուք արեւմտյան ուժ եք, մյուս մասն ասում է՝ ԵԱՏՄ-ական կողմնորոշում եք պահում, բայց իր գործունեության ընթացքում «Քաղպայմանագիրը» լինելու է բացառապես հայաստանամետ:

- Կուսակցության համագործակցությունը ո՞ր քաղաքական ուժերի հետ եք տեսնում:

- Մենք ամենասկզբից որդեգրել ենք հետեւյալ սկզբունքը՝ համագործակցությունը ցանկացած ուժի հետ լինելու է կոնկրետ խնդրի շուրջ, եւ քննարկվելու են կոնկրետ լուծումները: Մենք այս 1.5 տարվա ընթացքում մեր համագործակցությունը մյուս ուժերի հետ ձեւավորել ենք այս տրամաբանության մեջ: Կլինի նման սկզբունք մյուս ուժերի կողմից՝ պատրաստ ենք կոնկրետ խնդրի շուրջ համագործակցել:

- Օրինակ՝ հիմնադիր համաժողովին ինչ-որ ուժեր հրավիրվա՞ծ են:

- Համաժողովին լինելու են բացառապես պատվիրակները, որովհետեւ դա առաջին համաժողովն է, որի ժամանակ ընդունվելու են որոշումներ, որոնք բխում են «Քաղպայմանագրի» հիմնարար փաստաթղթից: Որոշվելու է «Քաղպայմանագրի» կազմակերպաիրավական հետագա ձեւը: Այսինքն՝ այս վերջին 4 ամիսների քննարկումները ցույց տվեցին, որ «Քաղպայմանագիր» հանրային քաղաքական միավորման շրջանակներում հիմնադրվելու է կուսակցություն:

- Իսկ կուսակցությունը ունենալո՞ւ է նախագահ: Մամուլում խոսակցություններ կային, որ միայն վարչություն է լինելու, կուսակցության կառուցվածքն ինչպիսի՞ն է լինելու:

- Համաժողովի ժամանակ ընտրվելու է վարչություն, եւ ըստ կանոնադրության՝ վարչությունն իր շարքերից ընտրելու է վարչության նախագահ, որն օժտված չէ մեծ լիազորություններով: Որոշումների ընդունման լիազորությունները գրեթե ամբողջությամբ տրված են քաղաքական վարչությանը:

- Ավելորդ է, թերեւս, ասել, որ այս կուսակցությունը, բնականաբար, ընդդիմադիր է լինելու, ենթադրվում է նաեւ, որ կմասնակցեք հաջորդ համապետական ընտրություններին, կա՞ նման խնդիր դրված: Մեծ հաշվով, Նիկոլ Փաշինյանը խոսել է ձեր ռազմավարության ու մարտավարության մասին, բայց ավելի կոնկրետ՝ ձեր առաջիկա ռազմավարությունն ու մարտավարությունը ո՞րն է լինելու:

- Կարծում եմ, Նիկոլ Փաշինյանը բավական կոնկրետացրել է. ի սկզբանե մենք հայտարարել ենք, որ նախապատրաստվում ենք հաջորդ համապետական ընտրություններին: Սա մեզ անհրաժեշտ է այն առումով, որ հետագա մեր գործողություններում պետք է հասկանանք՝ որքան է բնակչությունը վստահում այս ուժին եւ ինչ մանդատ է տալիս՝ հետագա իր գործողություններով: Այդ առումով, 2017թ. ընտրությունները մեզ համար կարեւոր են: Կարեւոր են նաեւ այն առումով, որ կոնկրետ այս ժամանակաշրջանում հնարավորություն կունենանք «Քաղաքացիական պայմանագիրը» ձեւավորել որպես ինստիտուցիոնալ կառույց, որի հաջողությունը թույլ կտա մեզ հաստատակամ ասել, որ հաջորդ ընտրություններին մենք կարող ենք ունենալ հաջողություն եւ ընդհուպ՝ վերցնել իշխանությունը ու ձեւավորել իշխանությունը: Ի՞նչ է ենթադրում այս ինստիտուցիոնալ կառույցը: 3 հիմնական բաղադրիչ ունենք այստեղ. դա ապագայի նախագիծն է, որը պետք է լինի շատ կոնկրետ, ըստ ոլորտների, մի քանի խնդիրներով, որոնք հաշվելի կլինեն մեր քաղաքացիների համար եւ լուծումներ կտան տարբեր ոլորտներում գոյություն ունեցող խնդիրներին: Երկրորդը մենք կոչում ենք ստվերային կառավարություն, երբ քաղաքացին, գնալով ընտրության եւ նախապատվությունը տալով մեզ, հստակ իմանալու է, թե ապագա ձեւավորվելիք կառավարությունում կոնկրետ ինչ դերաբաշխումներ են լինելու եւ ովքեր են լինելու ոլորտային պատասխանատուները: Սա, թերեւս, էլի նորություն է մեր քաղաքական դաշտում, որովհետեւ նախկինում նման կոնկրետություն չենք ունեցել: Եւ 3-րդը՝ մենք ասում ենք, որ հաջորդ ընտրություններում պիտի ունենանք այնպիսի կառուցվածք, որը թույլ կտա մեզ տոտալ վերահսկել ամբողջ ընտրությունները, բոլոր 1988 տեղամասերում ունենալ թիմեր: Այս ամենը մեզ թույլ կտա ունենալ ընտրությունների այլընտրանքային հաշվարկ, որովհետեւ մինչեւ հիմա թե՛ ընդդիմությունը եւ թե՛ իշխանությունը իրենց վերլուծություններում եւ հայտարարություններում հղում են անում բացառապես ԿԸՀ-ի տվյալներին: Եթե դու ասում ես, որ դա ընտրությունները կեղծող կառույց է, դու պետք է հնարավորություն ունենաս ստեղծել այլընտրանքային համակարգ: Այն է՝ յուրաքանչյուր տեղամասից մենք պետք է ստանանք տվյալ տեղամասի վերաբերյալ տվյալներ եւ համեմատենք՝ արդյո՞ք դրանք համադրելի են իշխանության ներկայացրած տվյալների հետ, որքանո՞վ են եղել խախտումներ, եւ ըստ դրա՝ որոշումներ կայացնել: Սա մեր գլխավոր ծրագիրն է: Բայց ունենք նաեւ պլան B, որը սահմանված է մեր հիմնարար փաստաթղթով եւ ներկայում արդեն կուսակցության ծրագրի նախագծում. ունենալով բավարար իրավական ապացույցներ, որ ընտրությունները կեղծվել են եւ ժողովուրդը մեզ է իշխանություն ձեւավորելու մանդատ տվել՝ մենք կգործենք արդեն պլան B-ով, որը թավշյա հեղափոխությունն է՝ այստեղից բխող բոլոր հետեւանքներով:

- Ինչպե՞ս եք ընտրելու ղեկավար մարմինը:

- Մոտ 300 պատվիրակ է մասնակցելու համաժողովին: Վարչության թեկնածուները 22-ն են, վարկանիշային քվեարկությամբ նրանցից կընտրվեն 13-ը, այսինքն՝ քվեաթերթիկում լինելու է 22 անուն, որոնցից յուրաքանչյուր պատվիրակ պետք է ընտրի իր 13 թեկնածուներին, եւ վարկանիշային քվեարկության արդյունքում՝ պարզ կդառնա՝ ովքեր են այն 13-ը, որ կկազմեն վարչությունը: Եւ կրկին փակ, գաղտնի քվեարկությամբ ընտրվելու է վերահսկող հանձնաժողով, որը հետեւելու է քաղաքական որոշումների ընդունմանը եւ իրագործմանը:

Տպել
2755 դիտում

Բողոք Թբիլիսիում. քաղաքական ճգնաժա՞մ, թե՞ ժամկետից շուտ քարոզարշավ

Նա պարզապես չի կարող լինել մեզանից մեկը. Հայաստանի մի շարք մարզական ֆեդերացիաներն ու մարզիկները՝ Մել Դալուզյանի մասին

Նուբարաշենի հոգեբուժարանի 7-րդ հատուկ բաժանմունքում խնդիրը հարթվել է, բոլորը սնունդ ընդունել են. պարզաբանում

Սեյրան Օհանյանի պաշտպանը բացարկի միջնորդություն ներկայացրեց մեղադրող դատախազին

Այսպես խոսեց Մաստեր Մյաուն

Մրցույթ՝ ՀՀ ԿԳՄՍ նախարարին կից hասարակական խորհրդում ընդգրկվելու համար

Լիտվայի ԱԳ նախարարը բարձր է գնահատել Աննա Հակոբյանի «Կանայք հանուն խաղաղության» արշավը

Այս կատարյալ ֆիասկոն արտացոլում է հայկական ֆուտբոլի իրավիճակը. գլխավոր մարզիչ (տեսանյութ)

Փոխգործակցության մեծ հնարավորություններ կան. Ա. Սարգսյանը Դոհայում հանդիպել է Կատարի վարչապետի հետ

Հայտնի է ՀՀ վարչապետի եւ Աննա Հակոբյանի Իտալիա այցի օրակարգը

Օրենսդիրը քննարկում է պետական սահմանի անցակետում հակահամաճարակային վերահսկողության նախագիծը

ՄԻՊ-ը տեղեկատվական արշավի շրջանակում ներկայացնում է «Միասին կարող ենք փոխել աշխարհը» երգի պրեմիերա

Նիկոլ Փաշինյանն ու Աննա Հակոբյանը 28 հոգուց բաղկացած պատվիրակությամբ մեկնում են Իտալիա

Վերջին անգամ Իտալիան 1 խաղում 9 գոլ է խփել 71 տարի առաջ

Դևիդ Բեքհեմն ու Միլի Բոբի Բրաունը ելույթ կունենան ՄԱԿ-ի գագաթնաժողովում, վաղը ՀՀ-ում և 50 երկրում գագաթնաժողովներ կլինեն

ԱԺ-ն ընդունեց խորհրդականի պաշտոն զբաղեցնելու համար սահմանված տարիքային շեմն իջեցնելու նախագիծը

Պարո՛ն Պետրոսյան, հիշո՞ւմ եք էն դրվագը, որ ասում ա՝ փիղը մտնում ա մրջյունների ռեստորան. ԱԺ նախագահը՝ Գեւորգ Պետրոսյանին

Արմեն Սարգսյանը Դոհայում հյուրընկալվել է Կատարում ՀՀ դեսպանատանը (տեսանյութ)

ՊՎԾ-ի ստուգումներով ոստիկանությունում հայտնաբերված խախտումների փաստաթղթերը դատախազությունն ուղարկել է ՀՔԾ

ՀՀ ֆուտբոլի հավաքականի երկրպագուն ՀՖՖ ղեկավարներին մեղադրում է դիրքը չարաշահելու մեջ. ՀՖՖ-ն հերքում է