Վարդան Այվազյանի ոսկին՝ Ֆիոլետովո գյուղի մոտ

20/01/2015 schedule08:00

«Գրեյդ Ռեդմետ» ընկերությունը պատրաստվում է Լոռու մարզի Ֆիոլետովո գյուղից մոտ մեկ կիլոմետր հեռավորության վրա ոսկու հանք շահագործել, ինչին գյուղի բնակչությունն ընդդիմանում է:

Ռուս մալականներով բնակեցված Ֆիոլետովոյում, սկսած համայնքի ղեկավար Ալեքսեյ Նովիկովից, «Գրեյդ Ռեդմետը», որը կապվում է հանրապետական պատգամավոր Վարդան Այվազյանի անվան հետ, ոչ մի համախոհ չունի. առանց բացառության՝ բոլորը դեմ են նախագծին:  

«Գրեյդ Ռեդմետ» ՍՊԸ-ն մտադիր է հանքավայրը շահագործել բաց եղանակով, 5,2 հեկտար տարածքի վրա: Լցակույտը տեղակայվելու է հանքից 1,3 կմ հեռավորության վրա, ունենալու է մոտ 3 միլիոն խմ տարողունակություն՝ 4 հեկտար մակերեսի վրա: Հանքավայրը շահագործվելու է 5 տարի, տարեկան արդյունահանվելու է 37 հազար տոննա հանքաքար, որը տեղափոխվելու է կամ Արմանիսի, կամ Արարատի հարստացուցիչ ֆաբրիկա:

Ֆիոլետովոյում երկու անգամ անցկացվել են համայնքային լսումներ: Նախորդ տարվա նոյեմբերի 25-ին Ֆիոլետովոյի բնակիչներից 31-ի մասնակցությամբ անցած քննարկումն ավարտվել է միաձայն «դեմ» քվեարկությամբ: Երկրորդ քննարկմանը, որ տեղի է ունեցել դրանից 20 օր անց՝ դեկտեմբերի 16-ին, հանքի շահագործմանը դեմ է արտահայտվել արդեն 170 բնակիչ: «Կողմ» կամ «ձեռնպահ» քվեարկողներ չեն եղել: Բնակիչները մտահոգություն ունեն, որ կորցնելու են գյուղի արոտավայրերն ու ջուրը: Հանքը գտնվում է հենց գյուղի արոտավայրերի վրա: Ենթադրվում է, որ հանքավայրի բացասական ազդեցությունը կհասնի մինչեւ Դիլիջան՝ վնասելով նաեւ միջազգային դպրոցին: Համահայկական բնապահպանական ճակատի ներկայացուցիչ Լեւոն Գալստյանի խոսքով, հանքավայրի շահագործման դեպքում նախեւառաջ կաղտոտվեն տեղի ջրային աղբյուրները:

Օրենքի երկրներում համայնքի անհամաձայնությունը, թերեւս, ամենակարեւոր գործոններից է որեւէ ծրագիր իրականացնելու կամ չիրականացնելու համար: Սակայն, մեր տեղեկություններով, «Գրեյդ Ռեդմետ» ընկերությունը շարունակում է համայնքի դեմն առնելու, նախագիծն առաջ տանելու ճանապարհներ գտնել: Երկու հանրային լսումներն անցկացվել են հասարակության մասնակցության ողջ գործընթացի խախտումով: Ֆիոլետովցիները տիրապետում են միայն ռուսաց լեզվին: «Գրեյդ Ռեդմետ» ՍՊԸ-ն, որը պատասխանատու է հասարակական լսումների կազմակերպման համար, չի ապահովել նախագծի՝ շրջակա միջավայրի վրա ազդեցության գնահատականի՝ ՇՄԱԳ-ի թարգմանությունը տեղի բնակիչների համար:

Համայնքի ղեկավար Ալեքսեյ Նովիկովը մեզ հետ զրույցում նշեց, որ համայնքն իր դիրքորոշումը չի փոխելու: Նա զարմացած է, որ երկու քվեարկությունից հետո էլ հարցը մնում է օրակարգում: «Երկրորդ լսումների ժամանակ համարյա ողջ գյուղն էր հավաքվել: Մարդիկ քիչ էր մնում «բունտ» անեին: Ուզում են՝ 5 անգամ քննարկում անեն. եթե մարդիկ մի անգամ գտել են, որ դա իրենց պետք չէ, ինչո՞ւ պետք է փոխեն իրենց կարծիքը»,- ասաց գյուղապետը: Ֆիոլետովցիները նամակով դիմել են վարչապետ Հովիկ Աբրահամյանին, բնապահպանության նախարար Արամայիս Գրիգորյանին, ՀՀ-ում Ռուսաստանի Դաշնության արտակարգ եւ լիազոր դեսպան Իվան Վոլինկինին, Վանաձորի քաղաքապետ Սամվել Դարբինյանին, գործարար Ռուբեն Վարդանյանին՝ արտահայտելով իրենց բողոքը նախագծի դեմ եւ խնդրելով կանխել հանքի շահագործումը: Այս պաշտոնյաներին ուղղված տեքստի տակ ստորագրել են Ֆիոլետովոյի հարյուրավոր բնակիչներ: Համայնքի ղեկավար Ալեքսեյ Նովիկովից տեղեկացանք, որ մոտ մեկ ամիս առաջ ուղարկած նամակներին ոչ ոք դեռ չի պատասխանել: 

Լոռու մարզպետ Արթուր Նալբանդյանն այս նախագծի մեջ վտանգներ չի տեսնում: «Գրեյդ Ռեդմետ» ՍՊԸ մասնագետները նրան վստահեցրել են, որ հանքի շահագործումից բնապահպանական լուրջ խնդիրներ չեն առաջանա եւ շահագործման ընթացքում բոլոր բնապահպանական չափորոշիչները կպահվեն: Այս մասին մեզ հետ զրույցում պատմեց մարզպետը: Չնայած դրան՝ Արթուր Նալբանդյանը վստահեցրեց, որ եթե համայնքն իր դիրքորոշումը չփոխի, ապա մարզպետարանը եւ ինքն անձամբ, կանգնելու են համայնքի կողքին: «Տեղյակ եմ, որ նախագիծը բնապահպանական փորձագիտական եզրակացություն է անցել, եւ կարծում եմ, որ եզրակացություն տալուց առաջ Բնապահպանության նախարարությունը լուրջ ուսումնասիրություն է անցկացրել: Բայց այս պահի դրությամբ, իհարկե, որոշում կայացնողը համայնքն է, եւ նրա որոշումն ինձ համար շատ կարեւոր է»,- նշեց մարզպետը: Թե քանի՞ քննարկում է անհրաժեշտ եւ քանի՞ անգամ գյուղացիները պետք է «դեմ» քվեարկեն, որ հարցը համարեն վերջնականապես փակված, մարզպետն ինքն էլ չգիտի: Նա միայն հայտնեց, որ հնարավոր է հաջորդ համայնքային քննարկումը տեղի ունենա ՀՀ-ում ՌԴ դեսպանի ներկայությամբ: «Ես դրա կողմնակիցն եմ: Եւ թող անգամ 10 քննարկում լինի: Միգուցե համայնքը պահանջներ ունի, միգուցե շահագործող կազմակերպությունը կարողանա այդ պահանջների լուծումը տալ»,- ասաց Նալբանդյանը: 

«Գրեյդ Ռեդմետը» գրանցված է Վարդան Այվազյանի կնոջ ընկերուհի եւ համագյուղացի Մայրեն Բատոյանի, ինչպես եւ Բնապահպանության նախարարության բնապահպանության պետական տեսչության ընդերքի երկրաբանամարկշեյդերական վերահսկողության բաժնի նախկին պետ Երվանդ Հովհաննիսյանի կնոջ՝ Հասմիկ Հարությունյանի անուններով: Լոռու մարզպետից հետաքրքրվեցինք՝ այս ընթացքում, ինչ սկսել են նախագծի մեկնարկի խոսակցությունները, Վարդան Այվազյանն իր հետ հարցը քննարկե՞լ է: «Ճիշտն ասաց, ես չգիտեմ, թե ում է պատկանում ընկերությունը: Միայն կարող եմ ասել, որ ինձ հետ ոչ ոք չի զրուցել այդ հարցով: Բոլոր հարցերը իրականացվում են մարզպետարանի հողօգտագործման բաժնի միջոցով»,- պատասխանեց մարզպետը:

Տպել
3507 դիտում

Օսկանյանի ցուցմունքով էլ է հաստատվում, որ Քոչարյանը ուժ կիրառելու գործողությունների մասին առավոտյան է տեղեկացել. պաշտպան

Մհեր Մարգարյանն ընտրվել է ՄԱԿ-ի Կանանց կարգավիճակի հարցերով հանձնաժողովի նախագահ

Ստեփանծմինդա–Լարս ավտոճանապարհը բաց է տրանսպորտային բոլոր միջոցների համար

ԿԽՄԿ-ն ցանկանում է երկարաձգել ՀՀ ԱԻՆ-ի հետ փոխըմբռնման հուշագրի գործողության ժամկետը

Զոհրաբ Մնացականյանը մասնակցել է զինված ուժերի ղեկավար կազմի օպերատիվ հավաքին

Վարչապետը կանչում է ֆուտբոլ դիտելու՝ ժամը 21.00-ին, Հանրապետական մարզադաշտում

Շիրակի, Լոռու, Արագածոտնի, Գեղարքունիքի մարզերում ձյուն է տեղում. մառախուղ, մերկասառույց, բուք է առկա ճանապարհներին

Ավտոմեքենան մերկասառույցի պատճառով դուրս է եկել ճանապարհի երթևեկելի մասից և սահել ձորը

Քարաթափում Կապան քաղաքում. փրկարարները սահմանազատել են տարածքը

Ամենայն Հայոց կաթողիկոսը և ՀԲԸՄ նախագահն անդրադարձել են 2020-ին Ազգային-Եկեղեցական ժողով գումարելու որոշմանը

Հաղթանակի կարևոր նախապայմանը պարտվելուց չվախենալն է. Փաշինյանը՝ ՀՀ ազգային հավաքականի ֆուտբոլիստներին

Երևան-Մեղրի ավտոճանապարհին մոտ 200 ավտոմեքենա է արգելափակվել ձյան մեջ

Կայանալու է Հայաստանի Թաեքվոնդոյի առաջնությունը. կընտրվի ՀԹՖ-ի նախագահ ու կփոխվի կազմը

Ժողովրդի թիկունքում ստվերային պայմանավորվածություններ են եղել

Աշխատանքային ստաժ չունեցող քաղաքացիների կենսաթոշակը կբարձրանա. հանձնաժողովը կողմ է օրինագծին

Գեղահովիտում վրաերթի է ենթարկվել 15-ամյա մի տղա. հիվանդանոցի ճանապարհին նա մահացել է. shamshyan.com

Երկիրը խորը փոփոխություն է ապրում. ԵԽԽՎ համազեկուցողները ողջունում են Հայաստանում բարեփոխումները

Փոխնախարար Տիգրան Արզումանյանն ազատվել է զբաղեցրած պաշտոնից

Հայաստանում կարմրուկի առումով իրավիճակը կայուն է, բայց պետք է պատվաստվել. նախարար

Շահագրգիռ բոլոր խմբերին, պրոֆեսիոնալներին հրավիրում եմ համագործակցության. Հակոբ Արշակյան